Wanthu azinji adaleka kuyenda kumatchetchi yawo ndawa achalimbikisiwalini olo kudawiriwa mibvunzo yawo. Tsono ndawa chani muchadekana kumbasonkhana na Mboni za Yahova? Ko nchani chati mudzawone kumisonkhano yathu?

Mudzakondwe kukhala na wanthu wachikondi na woganizirana. Akhrisitu wakale-kale angasonkhana m’mipingu kuti apempherere Mulungu, kupfunzira Malemba na kulimbikisana na ayawo. (Aheberi 10:24, 25) Kusonkhana pabodzi na wanthu wachikondi kungawachitisa kubva kuti ali pa ushamwali na abale wawo wawuzimu. (2 Atesalonika 1:3; 3 Yohane 14) Isembo, misonkhano yathu tichayachita mwakutewedzera Akhrisitu mwawa ndipo tichakhala wakukondwa.

Mudzaphindule ndawa ya kupfunzira kuphatisira basa mpfundo za m’Baibolo. Ninge mwevenzere na Akhrisitu wakale-kale, ntsiku zino, amuna, akazi na wana achasonkhana pabodzi. Apfunzisi wokwanisa kupfunzisa achaphatisa basa Baibolo kuti atipfunzise momwe tingaphatisire basa mpfundo za m’Baibolo ntsiku na ntsiku.. (Deuteronomo 31:12; Nehemiya 8:8) Aliyese ni womasuka kuwonesa chikhulupiriro chake mwa kudawira na kuyimba pamisonkhano mwaya. —Aheberi 10:23.

Chikhulupiriro chanu kwa Mulungu chidzalimbe. Mtumi Paulo adawuza mpingu m’bozi wa munthawe yake kuti: ‘Ninashungu ya kukuwonani, . . . kuti tidzalimbikisane mwa chikhulupiriro chanu na changu.’ (Aroma 1:11, 12) Kumisonkhano, kukhala pabodzi na abale kuchalimbisa chikhulupiriro chathu kuti tipitirize kuchita vinthu ninge Mkhrisitu.

Ndise wokondwa kukuchemerani kumisonkhano yathu kuti mudzachite kuwona mwekha vamwabva mu pfunziro mweyi. Ndipo dziwani kuti tidzakutambireni na manja yawiri! Mudzalipirelini kalikose ndipo tichafambisalini puleti ya mali.

• Ko misonkhano yathu tichayachita pakutengera chitsanzo chiponi?

• Ko mudzaphindule tani mukadzabwera kumisonkhano yathu yachikhrisitu?