Mugulu yathu mulibe azitsogoleri omwe achalipiriwa. Pakutewedzera Akhrisitu woyambirira, wonyang’anira woyenerera achaikhiwa ‘kuti abuse mpingu wa Mulungu.’ (Machitidwe 20:28) Akulu mwawa ni amuna wodziwa vinthu na wokhuma mwawuzimu womwe achanyang’anira na kubusa nkhosa, ‘osati mochichimizika koma mofunisisa, osati ndawa yakuti agumane phindu, koma na moyo wose.’ (1 Petulo 5:1-3) Ko iwo achachita vinthu viponi votiphindulisa?

Iwo achatisamala na kutiteteza. Akulu achanyang’anira na kuteteza mpingu mwawuzimu. Pakudziwa kuti Mulungu ndiye adawapasa udindo wofunika maninge muyu, iwo achachitalini ufumu pampingu, koma achathandizira kuti pakhale chibverano na ntendere. (2 Akorinto 1:24) Ninge momwe nyakabusa wabwino achachita vose vangakwanise kuti adyesere nkhosa zake, nawombo akulu achayesesa kudziwa bwino aliyese mumpingu. —Miyambo 27:23.

Iwo achatipfunzisa kuchita vomwe Mulungu achada. Sondo iliyose, akulu achachitisa misonkhano yampingu kuti alimbise chikhulupiriro chathu. (Machitidwe 15:32) Amuna odzipereka mwawa achatipasa chitsanzo chabwino pakuphata basa yolalikira ndipo achayenda nase pabodzi nkumbatipfunzisa mwatingaiphatire.

Iwo achalimbikisa aliyese payekha. Kuchosapo pa kutisamala mwawuzimu, akulu achatizungira m’muyi mwathu panango kucheza nase ku Nyumba ya Ufumu kuti atikhazike moyo pasi pophatisa basa Baibolo. —Yakobo 5:14, 15.

Podi kuti akulu achaphata basa ikulu tene pampingu, iwo anawudindo wosamalira soti mabanja yawo yomwe yachadekana pomwe nthawe. Abale wakhama mwawa, tichadekana kuwalemekeza maninge. —1 Atesalonika 5:12, 13.

• Ko ni udindo uponi womwe akulu anawo pampingu?

• Ko iwo achawonesa tani kuti achaganizira aliyese payekha?