Wanthu azinji achaganiza kuti Mboni za Yahova ni dzina ya chipembedzo chanyowani. Koma magole yoposha 2.700 kumbuyo, Mulungu chaiye adachemera atumiki wake kuti ‘mboni’ zangu. (Yesaya 43:10-12) Ikanati yafika gole ya 1931, tingadziwika na dzina yakuti Wopfunzira Baibolo. Tsono ndawa chani tidatenga dzina yakuti Mboni za Yahova?

Ichadziwikisa Mulungu wathu. Mobverana na mipukutu yakale-kale, dzina ya Mulungu yakuti Yahova, ichagumanika mamidyawu yazinji mu Baibolo. M’mabaibolo yazinji, dzina mweyi adayichosa nkuyikhamo madzina yawudindo ninge yakuti Mulungu panango Ambuya. Koma Mulungu chaiye adaidziwikisa dzina yake yakuti Yahova kwa Mose, pakumuwuza kuti: ‘Mweyi ndiyo dzina yangu mpakana kale-kale.’ (Ekisodo 3:15) Pamwapa iye adadzisiyanisa na milungu yanango yabodza. Ndise wokondwa kudziwika na dzina ya Mulungu wakuchena.

Iyo ichadziwikisa basa yathu. Kale-kale wanthu azinji adachitira umboni va chikhulupiriro chawo kwa Yahova. Wakuyamba wenze Abele. Nkuyenda kwa nthawe, Nowa, Abulahamu, Sara, Mose, Davide na wanthu anango adakhala mu ‘ntambo wa mboni.’ (Aheberi 11:4–12:1) Ninge momwe munthu angakhalire mboni pa mulandu kukhoti wa munthu yemwe alibe kuphonya, isepano ndise wotsimikiza kumbawuza ayathu va chowonadi cha Mulungu wathu.

Tinkutewedzera Yesu. Baibolo ichati Yesu ni ‘mboni yokhulupirika.’ (Chivumbulutso 3:14) Yesu adalewa kuti ‘wadziwikisa dzina ya Mulungu’ ndipo ‘adachitira umboni va chowonadi’ cha Mulungu. (Yohane 17:26; 18:37) Ndipomwapa ateweri chaiwo wa Yesu achadekana kumbawuza wanthu va dzina ya Yahova, vimwevi ndivo vomwe Mboni za Yahova zinkuchita.

• Ndawa chani Wopfunzira Baibolo adatenga dzina yakuti Mboni za Yahova?

• Ko nilini pomwe Yahova adayamba kukhala na Mboni zake padziko yapasi?

• Ko Mboni ikulu maninge ya Yahova ni mbani?