Ndawa chani wanthu mwawa ni wokondwa? Iwo ali pansonkhano. Ninge mwevenzere na atumiki wa Mulungu wakale womwe adawuziwa kuti ambachite misonkhano ikulu-ikulu katatu pagole, isembo tichadikhirira mwachidwi misonkhano yadera na yachigawo. (Deuteronomo 16:16) Pagole, tichachita misonkhano ikulu-ikulu itatu, misonkhano yadera yiwiri ya ntsiku ibodzi na nsonkhano wachigawo wa ntsiku zitatu. Ko tichaphindula tani na misonkhano mwaya?

Iyo yachalimbikisa ubale wathu wachikhrisitu. Ninge mwangakondwera Aizilayeli pakutamanda Yahova ‘pamisonkhano ikulu-ikulu,’ ise tichakonda kusonkhana pabodzi ku misonkhano ikulu-ikulu yadera. (Salimo 26:12; 111:1) Misonkhano mwaya yachatipasa mwayi wakudziwana na Mboni za Yahova za mipingu yanango na zamadziko yanango. Panthawe ya chakudya masikati, tichadyera pabodzi pamalo ya nsonkhano. Mwevi vichachitisa kuti tikhale wobverana pa chochitika mwechi chauzimu. (Machitidwe 2:42) Pa misonkhano mweyi tichabva kuti tili ‘pawubale’ wa padziko yose. —1 Petulo 2:17.

Misonkhano mweyi ichatithandiza kuti tikule mwawuzimu. Aizirayeli angaphindula maninge na misonkhano mweyi ndawa ‘angabvesa mawu’ ya m’Malemba. (Nehemiya 8:8, 12) Isembo tichalemekeza mpfundo za m’Baibolo zomwe tichapfunzira ku misonkhano yathu. Misolo ya misonkhano mwaya yachachokera m’Baibolo. Kudzera munkhani, nkhani zosiyirana na vitsanzo vabwino, tichapfunzira momwe tingachitire vomwe Mulungu achada pa moyo wathu. Tichalimbikisiwa maninge kubva nkhani za abale omwe ankupitiriza kuchita vomwe akhrisitu achadikana kuchita olo kuti ankugwebana na mabvuto mu ntsiku zino zoshupa. Pamisonkhano yachigawo, vitsanzo va m’Baibolo vichatipfunzisa mpfundo zakudikana pa moyo wathu. Pa misonkhano yose ikulu-ikulu, wanthu womwe achada kudzidziwikisa kuti adadzipereka kwa Mulungu achabatiziwa.

• Ndawa chani misonkhano ikulu-ikulu ni nthawe yakukondwesa?

• Ko mungaphindule tani mukambayenda ku misonkhano mweyi ikulu-ikulu?