Abale wa m’banja ya Beteli achatumikira m’madipatimenti yosiyana-siyana, pakusamala basa yakulalikira mudziko ibodzi panango m’madziko yazinji. Iwo angambaphate basa mu gulu yotsumbudzulira, mu gulu yodinda magazini, kukonza mabukhu na kuyalongedza, kukonza mavidiyo na votepewa panango kunyang’anira mabasa yanango mudziko.

Komiti ya nthambi ichanyang’anira basa ya Mboni za Yahova. Bungwe yotonga ichapereka udindo wonyang’anira basa pa ofesi ya Mboni za Yahova kwa komiti ya nthambi yomwe ichakonzewa na akulu woyenerera wokwana atatu panango kuposha. Komiti mweyi ichafotokozera Bungwe yotonga va kuyenda patsogolo kwa basa yolalikira mudziko yomwe ankuyinyang’anira na mabvuto yaliyose yomwe angagumane nayo. Lipoti mweyi ichathandiza Bungwe yotonga kuwona nkhani zomwe zichadikana kufotokozewa m’mabukhu, m’misonkhano ya mpingu na misonkhano ikulu-ikulu yakutsogolo. Kazinji-kazinji woyimira Bungwe yotonga achatumiziwa kukazungira mawofesi ya nthambi na kukapereka malangizo ku makomiti ya nthambi momwe angasamalilire mawudindo yawo. (Miyambo 11:14) Pologalama yakudikana yomwe ichaphatanidza nkhani yokambiwa na woyimira Bungwe yotonga, ichakonzewa kuti ilimbikise wose womwe achakhala mu chigawo cha ofesi ya nthambi.

Mawofesi ya nthambi yachathandiza mipingu. Pachakhala abale ku ofesi ya nthambi womwe achakonza kuti pakhazikisiwe mipingu inyowani. Ndipo kuna abale soti womwe achanyang’anira basa ya apayiniya, amishonale, na wonyang’anira madera womwe achakhala mu chigawo cha nthambi yawo. Iwo achakonza misonkhano yadera na yachigawo, achanyang’anira basa yakumanga Nyumba za Ufumu ndipo achasamalira soti mabukhu yotumiziwa m’mipingu. Vose vomwe vichachitika mu chigawo vichachitisa kuti basa yolalikira imbaphatiwe mwadongosolo. —1 Akorinto 14:33, 40.

• Ko makomiti ya nthambi yachathandiza tani Bungwe yotonga?

• Ko ofesi ya nthambi ichaphata basa yanyi?