Kundochokera kale-kale, Yahova achada kuti mabanja yose yambamale nthawe yali pabodzi kuti yambalimbikise uzimu na mbverano wawo. (Deuteronomo 6:6, 7) Ndipomwapa, mabanja ya Mboni za Yahova yachapatula nthawe sondo iliyose kuti yatumikire Mulungu mwa kumbapfunzira vinthu vawuzimu, vakudikana pa banja yawo, pamalo yomwe palibe vomwe vingawasokoneze. Peno muchakhala mwekha, mungaphatisire basa nthawe mweyi kuti imwepo mumufenderere Mulungu. Vimwevi vingachitike mukakhala na ndandanda yopfunzira nkhani ya m’Baibolo yomwe muchada.

Ni nthawe yakuti timufenderere Yahova. ‘Fendererani Mulungu ndipo iyembo adzakufenderereni.’ (Yakobo 4:8) Isepano tichamudziwa bwino Yahova, tikambapfunzira nkhani zosiyana-siyana za umunthu wake, vomwe adachita tikambapfunzira Mawu yake. Njira yosashupa ya momwe tingachitire pfunziro ya banja ni kulewenga mwakukuwa Baibolo, panango kuphatisira basa ndandanda ya misonkhano ya Utumiki na moyo wathu wachikhrisitu. Aliyese m’banja angakonzekere payekha ndipo patsogolo pake mungakhale pabodzi nkumbakambirana vomwe mwapfunzira.

Ni nthawe yolimbisa ushamwali kwa aliyese m’banja. Mwamuna na nkazi, panango abereki na wana, achabvana maninge akambapfunira Baibolo ninge banja. Nthawe mweyi ichadekana kukhala yakukondwesa maninge pa sondo yose. Abereki achadekana kusalula nkhani yakudikana mobverana na nsinkhu wa wana wawo, iwo angaphatisire basa nkhani zili mu Nsanja ya Olonda na Galamukani! panango angaphatisire webusayiti ya jw.org. Angaphatisire soti basa nthawe mweyi kuti akambirane mabvuto yomwe wana wawo ankugumana nayo kushikola na momwe angagwebanirane nayo. Panango munganyang’anire pologalama ya JW Broadcasting (tv.pr418.com) nkukambirana vomwe mwapfunzira. Imwepo panango mungawone kuti n’vakudekana kupfunzira nyimbo zomwe zikaimbiwe kumisonkhano nkudya tuvakudya tunango mukamaliza kupfunzira ninge banja.

Nthawe mweyi ni yakudikana maninge kuti mupfunzire va Yahova ninge banja sondo iliyose vomwe vingakuchiseni kukhala wakukondwa na Mawu ya Mulungu. Yahova adzakudaliseni ndawa ya kuyesesa kwanu. —Salimo 1:1-3.

• Ndawa chani tichapatula nthawe yakupfunzira ninge banja?

• Ko abereki angachitise tani kuti nthawe mweyi imbakhale yokondwesa kwa banja yose?