Yesu adawuza opfunzira wake kuti: ‘Wonesani kugaka kwa luju yanu kwa wanthu, kuti awone basa zanu zabwino nakuti alemekeze Ababa wanu ali kudzulu.’ (Mateyu 5:16) Kuti tikwanise vimwevi, tinkuphatisira basa mwanzeru vipangizo va manjewuno, kuphatanidzapo intaneti. Saiti yathu ya jw.org, ni njira ibodzi yodziwisira wanthu basa ya Mboni za Yahova na vomwe achakhulupirira. Ko pa saiti mweyi pali chani?

Pali midawiro ya m’Baibolo ya mibvunzo yobvunziwa kawiri-kawiri. Imwepo mungagumane midawiro ya mibvunzo yakudekana maninge. Mwakulinganiza, tumapepa twakuti, Ko kubonera kuchadzamala? na kakuti Ko wakufa adzakhale soti na moyo? tulipo mu viseweredwe voposha 600. Ndipo imwepo mungalewenge soti Baibulo la Dziko Latsopano mu viseweredwe voposha 130 na mabukhu yanango yothandiza kubvesesa bwino Baibolo, ninge yakuti, Vomwe Baibolo ichapfunzisa, na magazini ya tsontsono ya Nsanja ya Olonda na Galamukani! Yazinji ya mabukhu mwaya mungayalewenge panango kuyabvesera pa saiti. Ndipo mungayabuluse mumakhaindi yosiyana-siyana ninge MP3, PDF na EPUB. Mungakwanise mpakana kudinda matsamba yanango mu chiseweredwe chinango kuti mukapase munthu wachidwi. Pankugumanika pomwe mavidiyo yazinji ya viseweredwe vamanja voposha 20. Mungabuluse soti kulewenga Baibolo kwa dirama, dirama za m’Baibolo na nyimbo zabwino maninge zomwe mungazibvesere mukakhala na mpata.

Pali nkhani zofotokoza chaivo va Mboni za Yahova. Mungagumane soti nkhani za manje-manje na mavidiyo yolewa va basa yathu ya padziko yose, vomwe vinkuchitikira Mboni za Yahova na momwe tinkuchitira khama kuthandizana pakachitika matsoka yachilengedwe. Mungagumane pomwe vati vidzapfunziriwe pa misonkhano yachigawo yakutsogolo na namba za foni za maofesi yosiyana-siyana ya Mboni za Yahova.

Zimwizi ni njira zowonesera kugaka kwa luju ya chowonadi m’madera yakutali yadziko. Wanthu wapadziko yose, kuphatanidzapo ku Antártida, ankubva ntontholo wa m’Baibolo. Pemphero yathu ni yakuti, ‘mawu ya Yahova yapitirize kufalikira kankulumize’ padziko yose kuti Mulungu alemekezeke. —2 Atesalonika 3:1.

• Ko saiti ya jw.org inkuthandiza tani wanthu kupfunzira chowonadi cha m’Baibolo?

• Ko munashungu yowonako chani pa saiti yathu?