Baranaba na Paulo achagumiwa maninge m’Malemba yachigiriki yachikhrisitu. Iwo angatumikira ninge wonyang’anira wofamba-famba ndipo angazungira mipingu. Ndawa chani iwo angachita mwevi? Iwo angaganizira na kuwadera nkhawa abale wawo wauzimu. Paulo adalewa kuti wenze na shungu ‘yokazungira soti abale wake’ kuti adziwe mwaliri. Iye wenze wokonzeka kufamba maulendo yatali-yatali kuti akawalimbikise. (Machitidwe 15:36) Mwechi ndicho chakulinga cha wonyang’anira madera wathu ntsiku zino.

Iwo achatilimbikisa. Wonyang’anira dera aliyese achazungira mipingu yokwana 20. Pa mpingu uliwose achakhala kwa sondo ibodzi ndipo achabwerezera kawiri pa gole mpingu uliwose. Tingalimbikisiwe maninge na abale mwawa na akazi wawo akakhala wolowola. Iwo achayesesa kudziwana na alumbwana na akulu-akulu ndipo achakonda kuyenda nase mu umboni na mumapfunziro yathu ya Baibolo. Wonyang’anira mwawa achachita mawulendo ya ubusa na akulu ndipo achakamba nkhani zolimbikisa pamisonkhano ya mpingu na ikulu-ikulu. —Machitidwe 15:35.

Iwo achaganizira aliyese. Wonyang’anira madera achaganizira maninge uzimu wa mpingu. Iwo achasonkhana na akulu pabodzi na atumiki wothandiza kuti awone momwe mpingu unkukulira ndipo achawapasa malangizo kuti akwanirise maudindo yawo. Achathandiza apainiya kuti akhale wakhama pa basa yawo yolalikira ndipo achakonda kudziwana na wanthu wanyowani pa mpingu na kudziwa momwe moyo wawo wauzimu ulili. Abale mwawa achachita khama ninge ‘anyabasa ayathu’ kuti atithandize. (2 Akorinto 8:23) Isembo timbatewedzere chikhulupiriro na kudzipereka kwawo. —Aheberi 13:7.

• Ndawa chani wonyang’anira madera achazungira mipingu?

• Ko imwepo mungaphindule tani akabwera pampingu panu?