Mibvunzo yochokera kwa olewenga
Ni mwanjira iponi momwe nkhani yakuti: “Dzina Lanu Liyeretsedwe” ya mu Nsanja ya Olonda ya Junho 2020 momwe idafotokozera bwinobwino va chikhulupiriro chathu na ulemu pa dzina ya Yahova na ulemerero weke?
Mu nkhani mweire, tidapfunzira kuti pali chinthu chibodzi chomwe ni chodekana maninge, chomwe chikhudza wanthu na Angelo. Chomwe ni kuchenesewa kwa dzina ya Yahova, nkhani ya ulamuliro na kuti Yahova achalamulira bwino. Vibverana na nkhani ya kuchenesewa kwa dzina ya Yahova. Mobverana na vimwevi, nkhani ya kukhulupirika kwa wanthu, ni nkhani ikulu yomwe ibverana na kuchenesewa kwa dzina ya Yahova.
Ndawa chani manjeuno tinkutsindika kuti nkhani ya kuchenesewa kwa dzina ya Yahova ni yodekana maninge? Naboni tione vifukwa vitatu.
Yahova adzachitise kuti dzina yake ilemekezewe mpakana kalekale
Chakuyamba, Satana adanyozesa dzina ya Yahova na mbiri yake, m’munda wa Edeni. Mbvunzo womwe Satana adabvunza Hava, udachitisa kuti iwo ayambe kuona kuti Mulungu ni wosaona ntima ndawa yakuti aikha malamulo yosabveseseka. Satana adalewa vinthu vosiyana maninge na vomwe Yahova wenze adalewa. Venze ninge ankulewa kuti Yahova ni wabodza. Iye adapsipiza dzina na mbiri ya Yahova. Ndipomwapa iye adakhala ‘Dyerekezi’ kutanthauza kuti ni ‘wabodza.’ (Yoh. 8:44) Ndawa yakuti Hava adakhulupirira mabodza ya Satana, iye alibe kubvera Mulungu ndipo adapandukira ulamuliro wake. (Gen. 3:1-6) Mpakana manje Satana ankupitiriza kulewa vinthu vabodza va momwe Yahova aliri. Ni vobveka kuti wale omwe abvera bodza mweyi abveralini Yahova. Manje kwa atumiki wa Mulungu bodza yolewa va kuchenesewa kwa dzina ya Yahova ni chinthu choipa maninge chomwe chinkuonesa kusowa chilungamo. Umoyu ni muzu wa mabvuto yose yomwe tinkugumana nayo manjeuno.
Chachiwiri, kuchitira ubwino wa chilengedwe chake chose, Yahova ni wotsimikiza kuchosa chitonzo na kuchenesa dzina yake. Chimwechi ni chinthu chodekana maninge kwa Yahova. Ndipomwapa, iye ankulewa kuti: ‘Shuwadi, inepano nidzachenese dzina yangu.’ (Ezek. 36:23) Yesu adafotokoza bwinobwino kuti nkhani mweyi ichadekana kukhala chinthu chodekana maninge kwa atumiki wose wa Yahova. Pomwe iye adalewa kuti: ‘Dzina yanu ichenesewe.’ (Mat. 6:9) Baibolo ifotokoza maulendo yazinji kudekana kwa kulemekeza dzina ya Yahova. Onani vitsanzo vinango: ‘Pasani Yahova ulemu womwe dzina yake inkudekana.’ (1Mbiri 16:29; Sal. 96:8) ‘Imbani nyimbo zolemekeza dzina yake.’ (Sal. 66:2) ‘Nidzalemekeze dzina yanu mpakana kalekale.’ (Sal. 86:12) Pa nthawe inango pomwe Yahova chaiye adayankhula kuchokera kudzulu, kwenze kudawira Yesu pomwe iye wenze Nkachisi ku Yerusalemu. Pomwe Yesu adalewa kuti: ‘Ababa lemekezani dzina yanu.’ Pamwapo Yahova adadawira kuti: ‘Inepano nayilemekeza kale ndipo nidzapitirize kuyilemekeza.’—Yoh. 12:28. a
Chachitatu, chifuniro cha Yahova nthawe zose chidzakhale chobverana na dzina yake, komasoti na mbiri yake. Ganizirani ivi: Nchani chidzachitike pa chiyeso chomaliza pambuyo pa magole 1000 Yesu ankutonga? Ko wanthu na Angelo adzapitirize kukhala ogawana pa nkhani ikulu ya kuchenesewa kwa dzina ya Yahova? Pakutithandiza kudawira bvunzo moyu, naboni tione vinthu viwiri vomwe ni vobverana. Kukhulupirika kwa wanthu na ulamuliro wa chilengedwe chose. Pa mbuyo pa magole 1000, ko wanthu adzapitirize kuyesewa chikhulupiriro chawo? Neye. Ndawa yakuti iwo adzakhale ayesewakale mokwana, adzakhale waungwiro ndipo adzakhale kuti atambira moyo wosapera. Nthawe mweyi ikadzafika, ko wanthu adzapitirize kukhala osabvesesana mu ulamuliaro wa Yahova? Neye. Ndawa yakuti wose kudzulu na padziko yapasi adzakhale obverana, adzakhale okondwa ndawa yakuti utongi wa Yahova ni wabwino maninge komasoti wachilungamo. Manje dzina ya Yahova idzapitirize kukhala chinthu chodekana maninge kwa wanthu wake?
Pambuyo pa magole 1000, tose tidzadziwe chonadi cholewa va Yahova ndipo dzina yake idzakhale yochenesewa maninge. Koma dzina ya Yahova idzapitirize basi kukhala chinthu chodekana maninge kwa wanthu wake kudzulu na padziko yapasi. Ndawa chani? Ndawa yakuti iwo adzawone kuti Yahova ankupitiriza kuchita vinthu vodabwisa. Ganizirani ivi: Pambuyo pakuti Yesu wabwezera utongi kwa Ababa wake, Mulungu adzakhale ‘vinthu vose kwa wanthu wose.’ (1 Akor. 15:28) Pambuyo pa vimwevi, wanthu wose adzaphindule na ‘ulemelero wa mwana wa Mulungu.’ (Aro. 8:21) Ndipo pakumalizira Yahova adzakwanirise cholinga chake chikulu chomwe ni kubveranisa volengewa vake va kudzulu na va padziko yapasi, kukhala banja ibodzi ikulu komasoti yobverana.—Aef. 1:10.
Pambuyo pakuti vose vimwevi vachitika, ko wanthu wa Yahova kudzulu na padziko yapasi adzabvetani? Shuwadi, ose adzakhale na chikhumbo chikulu maninge chofuna kupitiriza kulemeza dzina ya Yahova. Wamasalimo Davide adauziriwa kunemba kuti: ‘Alemekezeke Yahova Mulungu . . . Ndipo dzina yake yaulemelero ilemekezeke mpaka kalekale.’ (Sal. 72:18, 19) Tidzapitirize kugumana vifukwa vokondweresa vochitira vimwevi mpakana kalekale.
Shuwadi, dzina ya Yahova iwonesa bwinobwino momwe iye aliri. Ndipo tikambaganizira va dzina yake, tikumbukiratu va chikondi chake. (1 Yoh. 4:8) Nthawe zose timbadzakumbukire kuti Yahova adatilenga mwa chikondi. Iye adapereka dipo ndawa ya chikondi ndipo ankutonga mwachilungamo ndawa ya chikondi. Ndipo tidzapitirize kuona chikondi chomwe Yahova anacho kwa volengewa vake. Ndipo nthawe zose tidzakhale na vifukwa vizinji vofuna kufenderera kwa Yahova na kuyimba molemekeza dzina yake ya ulemelero.—Sal. 73:28.
a Baibolo ifotokoza kuti Yahova nthawe zizinji achita vinthu ‘mobverana na dzina yake.’ Mwakulinganiza, iye adatsogolera wanthu wake, adawapulumusa, kuwakhululukira na kuwateteza kwa azondi wawo—adachita vose vimwevi ndawa yakukula kwa dzina yake yakuti Yahova.—Sal. 23:3; 31:3; 79:9; 106:8; 143:11.
