1. Ko ni mabvuto yaponi yomwe azinji agumana nayo?

 KO IMWEPO mudakhalako kale na cholinga chauzimu chomwe mudachiona kuti nichoshupa kuchikwanirisa? b Peno nteno dziwani kuti ndimwelini mwekha. Mwakulinganiza, Philip adawona kuti ambafunika kupemphera maninge nakukonza mapemphero yake kuti yambakhale yabwino, koma iye ambashupika maninge kuti agumane nthawe yochita vimwevi. Erika ambafuna kuti ambafike kamangu pamisonkhano yokonzekera kuyenda muumboni koma iye nthawe zose ambafika mochedwa. Tomáš adayesesa maulendo yazinji kuti awerenge Baibolo yose. Koma iye adati: “Nimbakondalini kuwerenga Baibolo koma nidayesesa kwa maulendo yatatu, pa maulendo yose mwaya nimbandofika pa Levitiko basi nkuima.”

2. Ndawa chani muchadekanalini kukhumudwa peno mukukwanisalini kukwanirisa cholinga chanu?

² Peno imwepo mukuyesesa mwakhama kuti mukwanirise cholinga chinango cha uzimu koma mukukwanisalini, ayi kuona kuti basi mwakangira. Kukwanirisa cholinga podiya chosashupa kungafune nthawe komasoti khama. Kuyesesa komwe muchachita kuwoneseratu kuti mulemekeza ushamwali wanu na Yahova ndipo mukufuna kuchita vose vomwe mungakwanise kwa iye. Dziwani kuti Yahova alemekeza kuyesesa kwanu ndipo iye adikhiralini vomwe tingakwaniselini kuchita koma vomwe tingakwanise. (Sal. 103:14; Mika 6:8) Ndipomwapa pakusalula cholinga muchadekana kukhala wachikatikati nkusalula cholinga chomwe mungakwanise  kuchita. Mukambasalula cholinga ko muchadekana kumbachita chani kuti muchikwanirise? Naboni tiwone malangizo yanango yomwe yangatithandize.

3. Ndawa chani ni vodekana kukhala namaganizo yoyenera?

³ Kuti tikwanise volinga vathu vauzimu tichadekana kukhala na maganizo yabwino. Maganizo yoyenera nichifuno champhanvu choyesayesa kukwanirisa volinga vathu. Maganizo yoyenera tingayalinganize na mphabvu ya madzi yomwe igwinya mwadiya kuti ukafike komwe unkuyenda. Ikakhala mphanvu yamadzi ni yasaizi mwadiya ufika, koma ikakhala yamphanvu maninge ungafike mwakankulumize. Nchibodzibodzimbo, tikakhala na maganizo yoyenera tikwanise kukwanirisa volinga vanthu. M’bale munango Davide, wa ku Salvador, adalewa kuti: “Ukakhala na maganizo yabwino uchita khama maninge ndipo ubvumalini kuti chinthu chinango chikukangise kukwanirisa cholinga chako.” Ko mungachite tani kuti mumbakhale na maganizo yoyenera?

4. Ko tingakumbire chani mu mapemphero yathu? (Afilipi 2:13) (Onani pomwe foto.)

⁴ Pempherani kuti mumbakhale na maganizo yoyenera. Yahova aphatisa basa mzimu uchena kuti akulimbikiseni kukwanisa volinga vanu. (Lewengani Afilipi 2:13.) Nthawe zinango tingakhale na cholinga ndawa yakuti tinkudziwa kuti ndivo tichadekana kuchita, palibe vophonyeka na vimwevi. Koma vingachitike kuti mulibe chifuno chokwanirisa cholinga chimwechi. Ndivo vidachitikira mulongo munango wa ku Uganda dzina yake Norina. Iye wenze nacholinga chokhala na pfunziro ya Baibolo koma iye wenze alibe maganizo yoyenera ndawa ambadziona kuti apfunzisalini bwino. Ko iye adachita chani? Iye adati: “Nidayamba kupemphera kwa Yahova ntsiku zose kukumbira kuti nikhale wofunisisa kuchitisa pfunziro ya Baibolo. Ine nidachita mbali yangu nidayesesa kuti nimbapfunzise bwino, nkuyenda kwa nthawe nidaona kuti chifuno changu chinkuthimizirika. Mu gole mweire nidayamba kuchitisa mapfunziro yawiri ya Baibolo.”

5. Kuti tiyingizire chifuno chathu ko tichadekana kuganizira chani?

⁵ Ganizirani vomwe Yahova adakuchitirani kale. (Sal. 143:5) Mtumi Paulo ambaganizira kukoma ntima kosapera komwe Yahova adamuwonesa, vimwevi vimbamuchitisa kuti ambaphate basa mwakhama pakutumikira Yahova. (1 Akor. 15:9, 10; 1 Tim. 1:12-14) Nchibodzibodzimbo, imwepo mukambaganizira vomwe Yahova wakuchitirani kale mudzakhale wofunisisa kukwanirisa cholinga chanu. (Sal. 116:12) Onani chomwe chidathandiza mulongo munango wa ku Honduras kuti akwanise cholinga chake chokhala mpayiniya wokhazikika. Iye adati: “Inepano nimbaganizira momwe Yahova achanikondera iye adanithandiza kugumana gulu yake ndipo anisamalira na kuniteteza. Kuganizira vimwevi, kudayingizira chikondi changu kwa Yahova komasoti chifuno changu chokwanirisa volinga va uzimu.”

6. Ko ni chinthu chinango chiponi chomwe chingatithandize kuyingizira chifuno chanthu?

 ⁶ Ganizirani maphindu yomwe mungagumane ndawa yakukwanirisa volinga vanu. Ganizirani vomwe vidathandiza Erika yemwe tamutomola kale mbuyo kuti akwanirise cholinga chake chofika kamangu pa msonkhano. Iye adati: “Nidazindikira kuti nikambachedwa niluza vinthu vizinji koma nikafika kamangu nikhala na mwayi wopasa moni abale na kucheza nawo. Nimbakwanisa pomwe kubva malangizo yokonzekera kuyenda muumboni.” Erika adayikha maganizo yake pa maphindu yomwe angagumane ndawa yakufika kamangu, iye adakwanirisa chakulinga chake. Ko mudaganizako kale maphindu yomwe mungagumane ndawa yokwanirisa volinga vanu? Mwakulinganiza, peno cholinga chanu ni kuwerenga Baibolo na pemphero ganizirani momwe vimwevi vingalimbisire ushamwali wanu na Yahova. (Sal. 145:18, 19) Peno cholinga chanu nkufuna kukulisa khalidwe ya Chikhrisitu ganizirani momwe ushamwali wanu na anzanu ungakhalire. (Akol. 3:14) Ko tani kuchita ndandanda wa vinthu vose vabwino vomwe vingachitike ndawa yokwanirisa cholinga chanu? Nthawe na nthawe mbanyang’anani kawirikawiri pa ndandanda mweyo. Tomáš, yemwe watomolewa poyamba adati: “Ukakhala na maganizo yoyenera pa cholinga chomwe unacho, uyesesa kuchikwanirisa.”

7. Ko nchani chidathandiza Julio na nkazi wake kukwanirisa volinga vawo?

⁷ Mbachezani maninge na wanthu womwe angakulimbikiseni. (Miy. 13:20) Onani vomwe vidathandiza Julio na nkazi wake kuti achite vizinji mu utumiki. Iye adati: “Tidanyang’ana azishamwali omwe angatithandize na kutilimbikisa kuti tikwanirise volinga vathu va uzimu. Azinji enze adachitambo kale volinga ninge vimwevo ndipo iwo adatipasa malangizo yothandiza. Azishamwali wathu pomwe ambachita chidwi na kufuna kudziwa momwe volinga vathu vinkufambira ndipo iwo ambatilimbikisa nthawe zose.”

8. Ko nchani chomwe chingachitike tikandodikhira kuti tidzakhale na chifuno kuti tidzakwanirise cholinga chathu? (Onani pomwe foto.)

⁸ Kunena shuwa, tose ntsiku zinango tikhala tilibe shungu yokwanirisa volinga. Ko vimwevi vingatikangise kukwanirisa volinga vathu? Neye. Ganizirani pomwe chitsanzo cha mwadiya. Mphanvu ya madzi igwinya mwadiya kuti ukafike komwe unkuyenda. Koma nthawe zinango madzi yakhala yalibe mphanvu kuti yangagwinye mwadiya. Ko vimwevi vinkuthandauza kuti mwadiya ungafabelini? Neye. Mwadiya ungapitirize kufamba. Mwakulinganiza, ungaphatise basa ng’ombo kuti mwadiya apitirize kufamba. Chifuno chathu chirininge mphanvu ya madzi, nthawe zinango pangakhale palibe mphanvu yamadzi kuti igwinye mwadiya. Mukadikhira kuti mudzakhale na chifuno kuti mudzakwanirise volinga vanu, nthawe zinango mungakwaniselini kuvikwanirisa. Ninge momwe viliri kuti mwadiya ungafike komwe unkuyenda osandothemba mphanvu yamadzi yokha, isembo tingakwanirise volinga vathu podiya kuti tilibe chifuno. Nishuwadi kuti mwevi ni voshupa,  koma nivothandiza. Naboni tione mbvunzo womwe anango achachita ndipo tione malangizo yanango yomwe yangatithandize.

9. Ko nivobveka kuchita khama kukwanirisa cholinga olo kuti tilibe chifuno? Fotokozani.

⁹ Yahova afunalini kuti munthu ambachite vinthu mokakamiziwa, koma mokodwa. (Sal. 100:2; 2 Akor. 9:7) Manje tani peno imwepo mulibe chifuno chokwanirisa cholinga, ko muchadekana kuchita khama kuti muchikwanirise? Onani chitsanzo cha mtumi Paulo, iye adati: ‘Nikupumphuntha thupi yangu na kuitsogolera ninge kapolo.’ (1 Akor. 9:25-27) Paulo abadzikakamiza kuchita vinthu vabwino olo kuti alibe chifuno chochita vinthu vimwevi. Ko Yahova ambawona chani pa vomwe Paulo ambachita? Iye ambakondwa na utumiki wake ndipo Yahova adadalisa khama yake.—2 Tim. 4:7, 8.

10. Ndawa chani tichadekana kuchita khama kukwanirisa cholinga olo kuti tilibe chifuno chokwanirisira?

¹⁰ Chibodzibodzimbo, Yahova akhala wokodwa akambaona khama yathu yokwanirisa volinga vathu, podiya kuti tilibe chifuno chochitira vimwevi. Iye akhala wokodwa kuwona khama yomwe tinkuchita osati ndawa yokonda vomwe tinkuchita koma ndawa yomukonda iye. Ninge momwe Yahova adadalisira Paulo, iye adzadalisembo khama yanu. (Sal. 126:5) Tikambaona kuti Yahova ankutidalisa tilimbikisiwa. Mulongo munango wa ku Polônia dzina yake Lucyna adati: “Ntsiku zinango nikhala nilibe chifuno choyenda muumboni makamaka nikakhala woneta. Koma chimwemwe chomwe nichagumana nikambabwerera kumuyi nimphaso yodabwisa maninge yomwe Yahova wanipasa.” Naboni tione vomwe tingachite peno tilibe chifuno chokwanirisira cholinga.

11. Ko tingachite chani kuti tikhale wodzilesa?

¹¹ Pempherani kukumbira kuti mukhale wodzilesa. Kudzilesa, ni buya yokwanisa kutsogolera bwino maganizo yathu na vochita vathu. Kawirikawiri vitanthauza kukwanisa kutsogolera bwino maganizo yathu, kuti tileke kuchita voipa. Koma nthawe zinango tingafunike kudzilesa kuti tikwanise kuchita vinthu vabwino, makamaka vomwe ni voshupa ndipo tilibe chifuno chovikwanirisa. Kumbukirani kuti kudzilesa ni khalidwe ibodzi ya mzimu uchena ndipo kumbirani thandizo kwa Yahova kuti mukwanise kuwonesa khalidwe ya padera mweyi. (Luka 11:13; Agal. 5:22, 23) David, yemwe tamutomola pakuyamba adalewa kuti ni nthawerini zose pomwe angakwanisa kuchita pfunziro ya payekha. Iye ankufotokoza momwe pemphero idamuthandizira, iye adati: “Nthawe zose nimbakumbira kwa Yahova kuti anithandize kukhala wodzilesa. Nathandizo yake nidayesesa kukhala na ndandanda yabwino ya pfunziro ndipo nimbayesesa kuyitewedza.”

12. Ko lemba ya Mlaliki 11:4 ifotokoza chani pa nkhani ya volinga?

¹² Ayi kumbandodikhira kuti vose vimbafambe bwino. Mudziko yomwe tinkukhala ino tingadikhirelini kuti vose vimbafambe bwino. Tikambandodikhira kuti vose vimbafambe bwino, chipo tidzakwaniriselini volinga vathu. (Lewengani Mlaliki 11:4.) M’bale munango dzina yake Dayniel adalewa kuti: “Ninthawelini zose pomwe vinthu vingafambe bwino. Koma tingaone kuti tikwanise tikayamba kuvichita.” M’bale munango waku Uganda dzina yake Paul adalewa ndawa yake tichadekanalini kuchebwesa kuchita vinthu, iye adati: “Tikafuna kuti tichite vinthu podiya kuti tikugumana na mabvuto, tidzapase Yahova vinthu vomwe iye angatidalise navo.”—Mal. 3:10.

13. Ndawa chani nivabwino kukwanirisa volinga vathu pang’onopang’ono?

¹³ Yambani pang’onopang’ono. Vingachitike kuti mwepo mulibe chifuno ndawa yakuti cholinga chanu ni choshupa kuchikwanirisa. Ko munkuwona tani kukwanirisa cholinga chimwechi pang’onopang’ono? Peno munkufuna kukhala na khalidwe ya bwino, mukuwona tani kumbayiwonesa pang’onopang’ono pa vochitika vanu va ntsiku na ntsiku? Panango cholinga chanu  nikulewenga Baibolo yantero, tani kuyamba na kulewenga tumaminutu tochepa ntsiku iliyose? Tomáš, yemwe tamufotokoza kumayambiriro kwa nkhani ino, iye ambakwanisalini cholinga chake cholewenga Baibolo nkati mwa gole ibodzi. Iye adati: “Nidazindikira kuti nimbakonda kulewenga vinthu vizinji pa nthawe ibodzi. Nidawona kuti viribwino kuti niyambe pomwe koma manjeuno nidakonza vakuti nimbalewenge mavesi yochepa ntsiku iliyose na kuganizira vomwe nalewenga. Patsogolo pake nidayamba kukomedzewa na kulewenga Baibolo.” Ndawa yopfunzira kukonda kulewenga Baibolo, Tomáš adakwanisa kulewenga nthawe itali. Pakumalizira iye adakwanisa kulewenga Baibolo yose. c

14. Ko nimabvuto yaponi yomwe tingalimbane nayo?

¹⁴ Chobvesa ntsisi ni chakuti podiya kuti isepano tingakhale na chifuno, koma nthawe zinango tingagumane na mabvuto kuti tikwanirise cholinga chathu. Mwakulinganiza, ‘vinthu vosadikhirika’ vingatichitise kuti tikhale tilibe nthawe yokwanirisa cholinga chathu. (Mla. 9:11) Panango bvuto ingatichitise kuti tikhale wokhumudwa komasoti tilibe mphanvu. (Miy. 24:10) Pakuti ndise wochimwa nthawe zinango tingachite chinthu chomwe chingachitise kuti vikhale voshupa kukwanirisa cholinga chathu. (Aro. 7:23) Panango tingadzibve kuti ndise woneta. (Mat. 26:43) Nchani chomwe chingatithandize kuti ntsiku zose timbakwanise kulimbana na mabvuto?

15. Ndawa chani mabvuto yachadekanalini kukuchitisani kuti musiye kukwanirisa volinga vanu? Fotokozani. (Salimo 145:14)

¹⁵ Peno mukugumana nabvuto kuti mukwanirise cholinga chanu ayi kufoka. Baibolo ifotokoza bwino kuti peno tinkugumana na mabvuto yosiyanasiyana, isepano tingapitirize kuyenda patsogolo na thandizo ya Yahova. (Lewengani Salimo 145:14.) Philip, yemwe tamutomola kale poyamba adati: “Kuti nidziwe kuti vinthu  vinkunifambira bwino niyikhiralini nzeru kuti nimaulendo yangasi pomwe nakangira. M’malo mwake niganizira maulendo yomwe inepano nakwanisa kuchita vithu vabwino.” David, yemwe tamutomola pakuyamba adati: “Niyesesa kuwona mabvuto na vinthu voipa osati ninge vinthu vonikangisa, koma ninge mwayi wakuti nionese chikondi changu kwa Yahova.” Shuwadi, tikambayenda patsogolo podiya kuti tinkugumana na mabvuto, tionesa Yahova kuti tinkufuna kumukondweresa iye. Yahova akhala wokondwa akambowona kuti munkuchita khama pa kuyesesa kukwanirisa volinga vanu!

16. Ko tingapfunzirepo chani pa mabvuto yomwe tingagumane nayo?

¹⁶ Pfunziramponi kanthu pa mabvuto yomwe munkugumana nayo. Dzibvunzeni kuti, ko nchani chomwe chachitisa bvuto mweyi? ‘Ko pali chomwe ningachite kuti ileke kuchitika pomwe?’ (Sal. 27:12) Nthawe zinango bvuto, ingakuchitiseni kuwona cholinga chanu kuti mungachikwaniriselini. Peno vimwevi ndivo vinkukuchitikirani ganizirani bwino volinga vanu. d Onani peno mungakwanisedi kuvikwanirisa. Peno imwepo mukwanisalini kukwanirisa cholinga chanu, pambuyo pakuti mwaiganizira bwino nkhani mweyo, Yahova adzakuwonenirini kuti ndimwe wokangira.—2 Akor. 8:12.

17. Ndawa chani ni vabwino kukumbukira vinthu vomwe mwakwanirisako kale?

¹⁷ Ganizirani vomwe mwakwanirisako kale. Baibolo ichalewa kuti: ‘Mulungu ni wolungama angayebwelini basa zanu.’ (Aheb. 6:10) Ndipomwapa, chitanimbo chibodzibodzi mbaganizirani vomwe mwakwanirisa kale. Mwakulinganiza, kukhala pa ushamwali na Yahova, kuuzako anango va iye panango kubatizika. Ninge momwe mudakwanirisira volinga va uzimu kumbuyo, imwepo mungakwanise kukwanirisa volinga vomwe munavo manjeuno.—Afil. 3:16.

18. Ko tingachite bwino kuchita chani pomwe tinkuyesesa kukwanirisa volinga vathu? (Onani pomwe foto.)

¹⁸ Nathandizo ya Yahova imwepo mungakwanirise volinga vanu. Ninge momwe munthu ankuchita ulendo na mwadiya akhala wokondwa akafika komwe ankuyenda. Kumbukirani kuti muchadekana kupfunzirapo kanthu pa ulendo muyo, panango kuti mukambayesesa kuchita khama pakukwanirisa volinga vanu mbakodwani na kuwona momwe Yahova ankukuthandizirani pakukwanirisa volinga vanu. (2 Akor. 4:7) Imwepo mukaleka kusiya kukwanirisa volinga vanu, dziwani kuti mudzatambire madaliso yakulu maninge.—Agal. 6:9.