1. Ko Yahova achafuna kuti atumiki wake ambachite chani? (Onani pomwe foto.)

 MUKAFUNA kulimbikisiwa panango kupasiwa malangizo, ko imwepo munyang’ana kwa mbani? Tinkudziwa ndawiro wa mbvunzo moyu. Tichadekana kupemphera kwa Yahova Mulungu. Ndipo ni vimweviletu vomwe tose tichachita. Iye afuna kuti timbapemphere ‘mosalekedza komasoti pafupi-pafupi.’ (1 Ates. 5:17) Isepano tina ufulu ukulu wopemphera kwa Yahova na kukumbira malangizo pa vochitika vilivose. (Miy. 3:5, 6) Yahova ni Mulungu wopasa, umboni wa vimwevi ni wakuti iye adatiuza kuti tingapemphere kwa iye maulendo yazinji yomwe tingafune.

2. Ko tiwone chani mu nkhani ino?

² Pemphero ni mphaso yapadera maninge kwa isepano. Koma ndawa yotangwanika na vochitika va ntsiku na ntsiku vingakhale voshupa kuti tigumane nthawe yakuti tipemphere. Ndipo vingachitike pomwe kuti imwepo mufuna kuchinja kuti mapemphero yanu yambakhale yabwino. Vokomedza ni vakuti Baibolo itithandiza pa nkhani mweyi. Mu nkhani ino, tiwone vomwe tingachite kuti timbagumane mpata wopemphera pakutewedzera chitsanzo cha Yesu. Ndipo tiwone pomwe vinthu 5 vomwe tichadekana kuphatanidza kuti mapemphero yathu yambakhale yabwino.

3. Ko Yesu ambadziwa chani pa nkhani ya pemphero?

³ Yesu ambadziwa kuti kwa Yahova mapemphero ni yofunika maninge. Akalibe kubwera padziko yapasi, iye ambawona  momwe Ababa wake ambadawirira mapemphero ya amuna na akazi okhulupirika. Mwakulinganiza, Yesu wenze pambali pa Ababa wake pomwe angadawira mapemphero yochokera pasi pa moyo ninge ya Hana, Davide, Eliya na anango azinji. (1 Sam. 1:10, 11, 20; 1 Maf. 19:4-6; Sal. 32:5) Ni chabelini kuti Yesu adapfunzisa ateweri wake kuti ambapemphere pafupi-pafupi na kumbakhulupirira kuti Yahova awadawire!—Mat. 7:7-11.

4. Ko ni chitsanzo chiponi chomwe Yesu adatisiira?

⁴ Mu mapemphero yomwe Yesu adachita kwa Yahova, adatisiira chitsanzo chakuti titewedzere. Pa utumiki wake wose, Yesu ambapemphera pafupi-pafupi. Iye ambapatula nthawe kuti apemphere ndawa iye nthawe zose ambakhala wotangwanika komasoti kuzunguliriwa na wanthu azinji. (Maliko 6:31, 45, 46) Iye ambamuka machibesebese kuyenda kwayekha kuti akapemphere. (Maliko 1:35) Pachochitika chibodzi chokha, iye adapemphera usiku wose kuti achite chosalula chodekana maninge. (Luka 6:12, 13) Usiku wakuti mangwana yake afe, Yesu pakudziwa kuti alipafupi kuti agumane na bvuto yoshupa maninge pa utumiki wake, adapemphera maulendo yazinji mobwerezabwereza.—Mat. 26:39, 42, 44.

5. Ko tingatewedzere tani chitsanzo cha Yesu mumapemphero yathu?

⁵ Chitsanzo cha Yesu chitipfunzisa kuti podiya tikhale otangwanika maninge, tichadekana kupatula nthawe kuti tipemphere. Molingana na Yesu, tifunika kukhala na ndandanda ya nthawe yopemphera ndipo panango vimwevi vingafune kuti timbamuke machibesebese maninge panango kuchedwako kugona. Tikachita vimwevi, tidzawonese Yahova kuti tikutembeja maninge mphaso ya pemphero. Mulongo munango dzina yake Lynne akumbukira momwe adakhalira wokondwa pomwe adapfunzira va pemphero. Iye adalewa kuti: “Pomwe nidazindikira kuti inepano ningayankhule na Yahova nthawe iliyose, nidayamba kuwona kuti Yahova ni shamwali wangu wabwino maninge ndipo nimbafuna kuti mapemphero yangu yambakhale yabwino maninge.” Mosakaika tose isepano tibvambo tene. Naboni tiwone vinthu vishanu vodekana maninge vomwe tingaphatanidze mumapemphero yathu.

6. Mobverana na Chivumbulutso 4:10, 11, ko nchani chomwe Yahova achadekana kutambira?

⁶ Tamandani Yahova. Mtumi Yohane mu masomphenya yake yopasa chidwi, adawona  akulu 24 kudzulu akutumikira Yahova. Iwo ambamutamanda Mulungu nkumbalewa kuti: ‘Niwodekana kutambira ulemerero wose ulemu na mphanvu.’ (Lewengani Chivumbulutso 4:10, 11.) Angelo okhulupirika iwombo anavifukwa vizinji votamandira na kupereka ulemu kwa Yahova. Iwo ali kudzulu pabodzi na Yahova ndipo amudziwa bwino maninge. Angelo mwawa abvesa bwino makhalidwe ya Yahova pa vose vomwe Iye achachita. Iwo akambawona vose vomwe Iye achachita, viwachitisa kuti amulemekeze.—Yobu 38:4-7.

7. Ko ni vifukwa viponi votamandira Yahova?

⁷ Isepanombo titamanda Yahova mumapemphero yathu pakufotokaza vomwe vitichitisa chidwi na kupereka ulemu. Imwepo mukambawerenga na kupfunzira baibolo, yesesani kuwona makhalidwe ya Yahova yomwe imwepo muyakonda maninge. (Yobu 37:23; Aro. 11:33) Patsogolo pake mufotokozereni Yahova ndawa yake imwepo muyakonda maninge makhalidwe mwaya. Njira inango yotamandira Yahova, ni kutembeja vomwe iye watichitira na vomwe wachitira abale wathu. Yahova nthawe zose akutisamalira isepano na kutiteteza.—1 Sam. 1:27; 2:1, 2.

8. Ko ni vifukwa viponi vomwe tinavo votembejera Yahova? (1 Atesalonika 5:18)

⁸ Tembejani Yahova. Isepano tinavifukwa vizinji votembejera Yahova mumapemphero yathu. (Lewengani 1 Atesalonika 5:18.) Tingamutembeje Yahova ndawa ya vinthu vose vabwino vomwe tinavo, shuwadi mphaso iliyose yangwiro ichokera kwa Iye. (Yak. 1:17) Mwakulinganiza, tingamutembeje ndawa ya vinthu vose vokhuza vomwe adalenga. Tinganene pomwe kwa iye kuti tinkutembeja maninge ndawa ya moyo, banja yathu na chidikhiro chomwe iye watipasa chakutsogolo. Ni vobveka kuti tifuna kutembeja Yahova ndawa ya mwayi womwe watipasa wokhala azishamwali wake.

9. Ndawa chani tichadekanalini kuyebwa kutembeja Yahova?

⁹ Panango tingafunike kuchita khama kuti tikwanise kuganizira vifukwa vose vomwe tinavo votembejera Yahova, ndawa yakuti wanthu azinji ntsiku zino ni osatembeja. Iwo amala nthawe ikulu kuchita khama kuti agumane vomwe iwo ankufuna m’malo mwakuwonesa kutembeja na vomwe alinavo. Peno tingatengerembo khalidwe mweyi, mapemphero yathu yangayambe kundokhala ndandanda yakukumbira basi. Kuti vimwevi vileke kuchitika, tichadekana nthawe zose kukumbukira kutembeja vinthu vose vomwe Yahova watichitira.—Luka 6:45.

10. Ko kutembeja kudathandiza tani mulongo munango kupirira bvuto yake? (Onani pomwe foto.)

¹⁰ Kukhala munthu Wotembeja kungatithandize kulimbana na mabvuto. Onani chitsanzo cha mulongo Kyung-sook, mu Nsanja ya Olonda ya 15 Janeiro, 2015. Mafulumero yadamuuza kuti iye anakhansa ya m’mapapu yomwe yenze idakula. Iye adati: “Kudziwa kuti ninamatenda mwaya kudakhala kowawa maninge. Venze ninge kuti moyo wangu wamala ndipo nidayamba kukhala na mantha maninge.”  Manje ko nchani chidathandiza mulongo moyu kuti apirire bvuto mweyi? Iye adati usiku uliwose akanati kuyenda kagona, ambakwira padzulu panyumba nkupemphera mokuwa na kutembeja Yahova pa vinthu vishanu vomwe vachitika pakumala kwa ntsiku mweyo. Pamwapo iye ambakhala alibe nkhawa ndipo ambakhala womasuka kufotokozera Yahova kuti amukonda. Iye adazindikira kuti Yahova athandiza atumiki wake okhulupirika akambagumana na mabvuto nakuti tina madaliso yazinji pamoyo wathu kuposha mabvuto. Ninge mulongo Kyung-sook, isepano tinavifukwa vizinji votembejera Yahova olo kuti tinkugumana na mayesero panthawe ino. Ndipo na momwe tiliri otembeja kungatithandize kupirira na kupitiriza kukhala na maganizo yoyenera.

11. Ndawa chani opfunzira wa Yesu ambadekana kulimba moyo pambuyo pakuti Yesu wabwerera kudzulu?

¹¹ Kumbirani Yahova kuti mukhale wolimba ntima pakulalikira. Padasala pang’ono kubwerera kudzulu, Yesu adakumbusa opfunzira wake kuti achadekana kuchitira umboni va iye ‘ku Yerusalemu, ku Yudeya, ku Samariya mpaka kumalekedzero yapadziko yapasi.’ (Mac. 1:8; Luka 24:46-48) Kanthawe pang’ono, atsogoleri Wachiyuda adamanga mtumi Petulo na Yohane nkuyenda nawo ku tiribunali ya Sehedirini. Kumuko iwo adalambiziwa kulalikira ndipo adawagopsa. (Mac. 4:18, 21) Ko Petulo na Yohane adachita tani?

12. Mobverana na Machitidwe 4:29, 31, ko opfunzira adachita chani?

¹² Petulo na Yohane pomwe adagopsewa na atsogoleri wavipembedzo, adalewa kuti: ‘Weruzani mwekha peno nkoyenera kwa Mulungu kubvera imwepo kuposha Mulungu. Koma isepano tingalekelini kuyankhula vinthu vomwe tidaviwona na kuvibva.’ (Mac. 4:19, 20) Pomwe Petulo na Yohane adamasuliwa, opfunzira adachita pemphero nkukumbira Yahova kuti awathandize kupitiriza kuchita chifuniro chake. Iwo adapemphera kuti: ‘Chitisani kuti akapolo wanu apitirize kuyankhula Mawu yanu molimba ntima.’ Yahova adadawira pemphero mweyi yochokera pasi pa moyo.—Lewengani Machitidwe 4:29, 31.

13. Ko tikupfunzira chani pa chitsanzo cha m’bale Jin-hyuk?

¹³ Peno akuluakulu wa boma watilambiza kulalikira, isepano tingatewedzere chitsanzo cha atumi. Ni vimwevi vomwe vidachitikira m’bale wochemerewa Jin-hyuk, iye adamangiwa ndawa yachikhulupiriro chake. Mudjeri iye ambasamalira wadjeri anango omwe enze na nkhawa. Koma iye adalewa kuti adakacheza nawo pokhapokha peno akufuna chinthu chinango. Iye wenze wolambiziwa kuyankhula nkhani iliyose kuphatanidzapo yolewa va Baibolo. Pamwapo iye adapemphera kwa Yahova kuti amuthandize kukhala wolimba ntima na woganiza bwino kuti akwanise kulalikira pa mpata uliwose womwe ungagumanike. (Mac. 5:29) Iye adati: “Yahova adanidawira mapemphero yangu mwaya pakunichitisa kukhala wolimba ntima na wanzeru ndipo nidayamba kuchitisa mapfunziro ya maminuto 5 pa misuwo ya djeri, komasoti usiku nimbanemba makalata yomwe nidakapasa wadjeri mangwana yake.” Isepano tingakhale na chitsimikizo chakuti Yahova adzatithandize pa basa yake. Ninge Jin-hyuk, tingakumbire nzeru na kulimba moyo.

14. Ko nchani chomwe chingatithandize kulimbana na mabvuto yathu? (Salimo 37:3, 5)

¹⁴ Kumbirani thandizo ya Yahova kuti mukwanise kulimbana na mabvuto. Azinji tinkulimbana na mabvuto yakuthupi na ya m’maganizo. Mwakulinganiza, anango aluza munthu yemwe amukonda, anango akulimbana na mabvuto ya m’banja,pomwe anango akudzudziwa na mabvuto yanango. Kuingizira pamwapa, vinthu ninge miliri na nkhondo vachitisa  kuti vinthu viipe maninge. Ndipomwapa, mbapempherani kwa Yahova ndipo muuzeni vose vomwe munkugumana navo ninge kuti mukucheza na shamwali wanu. Tsimikizani kuti Yahova ‘adzachitepo kanthu.’—Lewengani Salimo 37:3, 5.

15. Ko mapemphero yangatithandize tani ‘kupirira mabvuto’? Perekani chitsanzo.

¹⁵ Chomwe chingatithandize ‘kupirira mabvuto’ ni kupitiriza kupemphera. (Aro. 12:12) Yahova ankudziwa vomwe atumiki wake ankugumana navo ndipo ‘iye akubva kukuwa kwawo kokumbira thandizo.’ (Sal. 145:18, 19) Kristie m’painiya wa magole 29 adazindikira kuti vimwevi ni chaivo. Iye adayamba kugumana na matenda yakulu ndipo vimwevi vidamuchitisa kuti ambakhale wokhumudwa. Nkuyenda kwa nthawe, iye adazindikira kuti amayi wake enze na matenda yakulu yokhala nayo pang’ono kumwalira. Kristie adati: “Ine nimbapemphera kwa Yahova mobwerezabwereza kuti anipase mphanvu zokwanisa kupirira mabvuto mwaya. Kuingizira pamwapa, nidapitiriza kugumanika pa misonkhano yose komasoti kuchita pfunziro ya panekha. Ni mapemphero mwaya yomwe yadanithandiza kuti nipitiritize kupirira mabvuto pa nthawe yoshupa mweyi. Nenze wotsimikiza kuti Yahova wenze nane. Kundoganiza vimwevo nimbakhala nilibe nkhawa. Mabvuto yangu yalibe kumala koma kundodziwa kuti Yahova adawira mapemphero yangu, kumbanipasa ntendere komasoti nimbakhala nilibe nkhawa.” Tichadekana kukumbukira kuti nthawe zose ‘Yahova adziwa kupulumusa wanthu odzipereka kwa iye akakhala pa mayesero.’—2 Pet. 2:9.

16. Ndawa chani tichadekana thandizo ya Yahova kuti tikwanise kupirira mayesero?

¹⁶ Kumbirani thandizo ya Yahova kuti mupirire mayesero. Ndise wanthu ochimwa ndipomwapa, tichadekana nthawe zose kuchita khama kuti osati tichite vinthu voipa. Koma Satana adzachite vilivose kuti moyo wathu ukhale woshupa. Chinthu chibodzi chomwe iye aphatisa basa kuti atiyese, ni vokondweresa va chigololo. Khaindi mweyi ya vokondweresa vingatichitise  kuti tikhale na maganizo yoipa. Ndipo ni khaindi mweyi ya maganizo yomwe ingatichitise chimo ikulu nkuluza ushamwali wathu na Yahova.—Mko 7:21-23; Yak. 1:14, 15.

17. Pambuyo pakuti takumbira thandizo kwa Yahova, ko tichadekana kuchita chani? (Onani pomwe foto.)

¹⁷ Peno tinkufuna kugonjesa mayesero, tichadekana thandizo ya Yahova. Yesu adaphatanidza nkumbiro moyu pa pemphero yake ya chitsanzo, iye adati: ‘Ayi kubvuma kuti tiyesewe, koma mutipulumuse kwa wakuipa.’ (Mat. 6:13) Yahova afuna kutithandiza koma isepano tichadekana kukumbira thandizo yake. Komasoti tichadekana kuchita vinthu mobverana na mapempohero yathu. Tichadekana kuchita vose vomwe tingakwanise kuti tipewe kukhala na maganizo yoipa mu dziko ya Satana iyi. (Sal. 97:10) Tikambalewenga na kupfunzira Baibolo, tidzadza m’maganizo mwathu na vinthu vabwino. Kuyenda ku misonkhano na kuphata basa yolalikira, kudzatithandize pomwe kuteteza maganizo yathu. Pamwapo, Yahova adzakwanirise polomisi yake yakuti adzatisiyelini kuti tiyesewe kufika mpaka pomwe tingakwaniselini kupirira.—1 Akor. 10:12, 13.

18. Ko tose tichadekana kupitiriza kuchita chani?

¹⁸ Tose tichadekana kupemphera kuti tipitirize kukhala okhulupirika kwa Yahova ntsiku zomalizira zino zomwe nizoshupa. Mbapatulani nthawe ntsiku iliyose kuti mupereke mapemphero yochokera pasi pamoyo. Yahova akufuna kuti timbapmhere kwa iye ya ntima wathu wose. (Sal. 62:8) Mbatembejani na kutamanda Yahova pa vose vomwe wakuchitirani. Kumbirani thandizo kuti mukhale wolimba ntima pakulalikira. Nthawe zose mbapempherani kukumbira thandizo kuti mukwanise kulimbana na mabvuto nakuti mupirire mayesero yaliyose yomwe yangabwere. Ayi kubvuma kuti aliyese akukangiseni kupemphera kwa Yahova nthawe zose. Koma, ko Yahova achadawira tani mapemphero yathu? Tidzawone dawiro wofunika maninge wa mbvunzo moyu munkhani inkubwera.