NKHANI YOPFUNZIRA 21
Momwe Yahova achadawirira mapemphero yathu
‘Tichadziwa kuti achatibvera tikakumbira chilichose, tikhala na chikhulupiriro chakuti titambire vinthu vomwe tamukumbira.’—1 YOH. 5:15.
NYIMBO NA. 41 Mulungu Imvani Pemphero Langa
VOMWE TIPFUNZIRE a
1-2. Ko wanthu anango akayikira chani?
KO IMWEPO mudakayikirako kale kuti panango Yahova akudawira mapemphero yanu? Peno munkubva teno dziwani kuti ndimwelini mwekha. Abale na alongo azinji abvambo teno makamaka pomwe ankugumana na mabvuto. Vikakhala teno vingakhale voshupa kudziwa kuti Yahova ankudawira mapemphero yathu.
2 Mu nkhani ino, tikambirane momwe Yahova achadawirira mapemphero ya atumiki wake. (1 Yoh. 5:15) Ndipo tidawire pomwe mibvunzo aya: Ndawa chani nthawe zinango tingaone ninge kuti Yahova ankudawiralini mapemphero yathu? Ko ni mwanjira yanyi momwe Yahova adawirira mapemphero yathu ntsiku zino?
NI NTHAWELINI ZOSE POMWE YAHOVA ANGADAWIRE MAPEMPHERO YATHU NINGE MOMWE ISEPANO TINKUGANIZIRA
3. Ndawa chani Yahova afuna kuti timbapemphere kwa iye?
3 Baibolo ititsimikizira kuti Mulungu atikonda ndipo ationa kuti ndise wanthu ofunika maninge kwa iye. (Hag. 2:7; 1 Yoh. 4:10) Ndipomwapa iye atikumbira kuti timbapemphere kwa iye. (1 Pet. 5:6, 7) Yahova afuna maninge kuti timufenderere kuti tikwanise kulimbana na mabvuto.
Yahova adadawira mapemphero ya Davide pakumupulumusa kwa adani wake (Onani ndime 4)
4. Ko tichadziwa tani kuti Yahova achadawira mapemphero ya atumiki wake? (Onani pomwe foto.)
4 M’Baibolo, tigumanamo nkhani zizinji za momwe Yahova adadawirira mapemphero ya atumiki wake okhulupirika. Ko imwepo mukukwanisa kuganizirako chitsanzo chibodzi? Panango imwepo munkukumbuka chitsanzo cha mpfumu Davide? Pamoyo wake iye adagumana na mabvuto yazinji ndipo nthawe zizinji iye ambapereka pemphero yokumbira thandizo kwa Yahova. Nthawe inango iye adapemphera kwa Yahova kuti: ‘Yahova, bvani pemphero yangu, bvani kugwigwirira kwangu kokumbira thandizo, nidawireni mobverana na kukhulupirika kwanu na chilungamo chanu.’ (Sal. 143:1) Yahova adadawira mapemphero ya Davide ndipo adamupulumusa ku mabvuto yake. (1 Sam. 19:10, 18-20; 2 Sam. 5:17-25) Ndipomwapa Davide adamaliza kulewa kuti ‘Yahova alipafupi na wose omuchemera.’ Isembo tingakhale na chitsimikizo chimwechi.—Sal. 145:18.
Yahova adadawira mapemphero ya Paulo pakumupasa mphanvu kuti akwanise kupirira bvuto yake (Onani ndime 5)
5. Ko Yahova ambadawira mapemphero ya atumiki wake wakale mu njira yomwe iwo angadikhira? Perekani chitsanzo. (Onani pomwe foto.)
5 Nthawe zinango Yahova angadawirelini mapemphero yathu ninge momwe isepano tinkuganizira. Vimwevi ndivo vomwe vidachitikira mtumi Paulo, iye adakumbira Yahova kuti amuchosere ‘munga mthupi.’ Maulendo yatatu iye adakumbira mwasitiriti pa nkhani mweyi. Koma ko Yahova adadawira mapemphero mwaya? Inde, koma osati mu njira yomwe Paulo ambadikhira. M’malo mwakuti amalise mabvuto yake Yahova adamupasa mphanvu kuti apitirize kumutumikira mokhulupirika.—2 Akor. 12:7-10.
6. Ndawa chani nthawe zinango vingaoneke ninge kuti Yahova akudawiralini mapemphero yathu?
6 Nthawe zinango Yahova angadawire mapemphero yathu mu njira yomwe tinkudikhiralini. Koma tingakhale otsimikiza kuti Yahova ankudziwa bwino vinthu vabwino maninge kwa ise. Iye angachite vizinji ‘kuposha vomwe timbaganizira.’ (Aef. 3:20) Ndipomwapa m’dawiro wa Yahova ungabwere pa nthawe na mu njira yomwe timbadikhiralini.
7. Ndawa chani nthawe zinango tingafunike kuchinjako pang’ono mapemphero yathu? Perekani chitsanzo.
7 Panango tingafune kuchinja mapemphero yathu kuti yakhale yobverana na chifuniro cha Yahova kwa ise. Onani vomwe vidachitikira m’bale Martin Poetzinger. Kanthawe pang’ono pambuyo pakuti walowola, m’bale Poetzinger iye adaikhiwa mudjeri ku malo ya wanthu othawa kwawo mu chipani cha Nazi. Pakuyamba iye ambakumbira Yahova kuti amuchose ku malo ya wanthu othawa kwawo kuti akasamalire nkazi wake nakuti akapitirize kulalikira. Koma payadamala ma sondo yawiri iye adazindikira kuti chimwechi chenzelini chifuniro cha Yahova. Pamwapo iye adayamba kukumbira kuti: “Yahova wonesani chifuniro chanu kwa ine.” Pamwapo iye adayamba kuganizira abale anango omwe enzembo mu djeri. Azinji pa abale mwawo ambaderambo nkhawa akazi na wana wawo. Patsogolo pake m’bale Poetzinger adapemphera kuti: “Yahova ninkutembeja ndawa ya utumiki unyowani. Nithandizeni kuti nilimbikise abale wangu.” Ndipo iye adamala magole 9 akuchita vimwevi!
8. Ko tichadekana kukumbukira chani pakuchita mapemphero yathu?
8 Tichadekana kukumbikira kuti Yahova adzakwanirise cholinga chake pa nthawe yomwe adakhazikisa. Cholinga chimwechi chikuphatanidzapo kuchosa vinthu vose vomwe vichachitisa kuti timbabonere ninge matsoka ya chilengedwe, matenda na impfa. Yahova adzakwanirise cholinga chake pakuphatisa basa Ufumu wake. (Dan. 2:44; Chiv. 21:3, 4) Pakudikhira ntsiku mweyi, Yahova wabvuma kuti Satana atonge dziko. b (Yoh. 12:31; Chiv. 12:9) Vichikhala kuti Yahova wamalisa mabvuto manjeuno, vingaoneke ninge kuti utongi wa Satana unalazau. Ndipomwapa vimwevi vinkutanthauza kuti tichadekana kudikhira Yahova kuti akwanirise polomisi mweyi na mapolomisi yake yanango. Koma vimwevi vinkutanthauzalini kuti Yahova achatisiya ne kutithandiza. Naboni tione njira zinango zomwe Yahova achatithandizira ntsiku zino.
MOMWE YAHOVA ACHADAWIRIRA MAPEMPHERO YATHU NTSIKU ZINO
9. Ko Yahova angatithandize tani tikafunika kusalula vochita? Perekani chitsanzo.
9 Yahova atipasa nzeru. Iye wapolomisa kuti adzatipase nzeru kuti tikwanise kusalula bwino vochita. Isepano tichadekana nzeru kuti tikwanise kusalula bwino vochita pamoyo wathu. Mwakulinganiza kusaina kupitiriza kukhala wosalowola panango kulowodwa. (Yak. 1:5) Onani chitsanzo cha mulongo munango wosalowodwa dzina yake Mariya. c Iye ambatumikira ninge m’painiya wokhazikika ndipo patsogolo pake adadziwana na m’bale munango. Iye adati: “Tidayamba kucheza patsogolo pake tidayamba kukondana maninge. Nimbadziwa kuti nimbadekana kuchita vosalula vabwino. Ndipo nidayamba kupemphera maninge kwa Yahova. Nimbafuna kuti Yahova anitsogolere, koma nimbadziwa kuti iye anganisalulirelini vochita.” Mariya adabva kuti Yahova adadawira mapemphero yake yokumbira nzeru. Ko adadawiriwa tani? Iye adafagafaga mu mabukhu yathu ndipo iye adakwanisa kugumana nkhani zomwe zimbaleweratu mwa sitiriti vomwe vidamuthandiza pa mibvunzo yake. Iye adaphatisa pomwe basa malangizo yabwino yomwe adatambira kwa amayi wake. Ni vimwevi vomwe vidathandiza Mariya kuti akwanise kulimbana na vinthu vose vomwe vimbamuchitikira pa moyo wake. Pakumalizira iye adakwanisa kusalula bwino vochita.
Ko Yahova achatipasa tani mphanvu zodikana kuti tipirire? (Onani ndime 10)
10. Mobverana na Afilipi 4:13, ko Yahova achachita tani kuti athandize atumiki wake? Perekani chitsanzo. (Onani pomwe foto.)
10 Yahova atipasa mphanvu kuti tipirire. Ninge momwe adachitira na mtumi Paulo, Yahova adzatipase mphanvu kuti tipirire mabvuto yathu. (Lewengani Afilipi 4:13.) Onani momwe Yahova adathandizira m’bale munango dzina yake Benjamin kuti alimbane na mabvuto yakulu. Iye ali mulumbwana Benjamin adakhalako pabodzi na azibereki wake kumalo yosungirako wanthu othawa kwawo ku África. Iye adati: “Nimbapemphera kwa Yahova nthawe zose kuti anipase mphanvu kuti nikwanise kuchita vabwino pamaso pake. Yahova adadawira mapemphero yangu pakunithandiza kukhala na ntendere na kulimba ntima kuti nilalikire na kunipasa mabukhu yomwe nimbadekana kuti nipitirize kukhala wolimba mwa uzimu.” Ndipo iye adaingizira kufotokoza kuti: “Kulewenga nkhani za atumiki wa Yahova kwalimbisa chikhulupiriro changu cha kupitiriza kukhala okhulupirika kwa iye.”
Ko imwepo mudatambirako kale thandizo ya Yahova pakuphatisa basa abale? (Onani ndime 11-12) d
11-12. Ko Yahova angaphatise tani basa abale kuti atidawire mapemphero yathu? (Onani pomwe foto.)
11 Yahova aphatisa basa abale wathu kuti atithandize. Usiku wakuti magwana yake afe, Yesu adapemphera mogwigwirira. Iye ambafunalini kuti wanthu ambaone ninge kuti ankunyoza dzina ya Ababa wake. Ndipomwapa, iye adapamphera kwa Ababa wake kuti osati abvume kuti vimwevi vichitike. Koma m’malo mwakuti Yahova achite vomwe Yesu adamukumbira, adatumiza mngelo kuti akamulimbikise. (Luka 22:42, 43) Yahova angatithandize pomwe pakuphatisa basa m’bale kuti atifonere panango kubwera kudzatizungira kuti atilimbikise. Shuwadi, tose tingafagefage mipata yakuti tiyankhule ‘mawu yabwino’ panango kuti tilimbikise anzathu.—Miy. 12:25.
12 Onani chitsanzo cha mulongo munango dzina yake Miriam. Paidamala sondo ibodzi mwamuna wake wamwalira kale, Miriam wenze yekha pamuyi, ndipo wenze wokwinyilira maninge. Iye ambakwanisalini kuleka kulira ndipo ambafunika kucheza na munthu munango. Iye adati: “Nimbakwanisalini kufonera aliyese, pamwapo nidapemphera kwa Yahova. Nthaweletu mweyo foni yangu idachemera ndipo wenze nkulu yemwe nimbabverana naye.” Miriam adalimbikisiwa maninge na nkulu moyu pabodzi na nkazi wake. Iye adatsimikiza kuti ni Yahova adachitisa kuti nkulu moyu amufonere.
Ko Yahova aphatisira tani basa wale omwe amutumikiralini kuti atithandize? (Onani ndime 13-14)
13. Fotokozani chitsanzo cha momwe Yahova angaphatisire basa wanthu omwe amutumikiralini pa kudawira mapemphero yathu.
13 Yahova angaphatisire basa wanthu omwe amutumikiralini kuti atithandize. (Miy. 21:1) Nthawe zinango Yahova angaphatisire basa wanthu omwe amutumikiralini kuti atithandize. Mwakulinganiza, Yahova adachitisa kuti mpfumu Aritasasita amubvumize Nehemiya kubwerera ku Yerusalemu kuti akamangesoti mpanda wa thaundi. (Neh. 2:3-6) Ntsiku zinombo, Yahova angachitise kuti wanthu omwe amutumikiralini atithandize.
14. Ko chitsanzo cha Soo Hing chakulimbikisani tani? (Onani pomwe foto.)
14 Mulongo munango dzina yake Soo Hing adabvesa momwe Yahova adamuthandizira pakuphatisa basa m’fulumero. Mwana wake abonera maninge na bvuto ya mumaganizo. Pomwe mwana wawo adachita ngozi iye na mwamuna wake adasaina kusiya basa kuti amuthandize. Ndawa ya vimwevi, iwo adayamba kugumana na bvuto yosowa kobiri. Soo Hing adati adafika pa nthawe yomwe ambabva kuti angakwaniselini kupirira, pamwapo iye adachita pamphero kwa Yahova yokumbira kuti amuthandize. M’fulumero yemwe ambathandiza mwana ule adasalula kuti athandize banja mweyi, vimwevi vidachitisa kuti apasiwe nyumba na boma kuti akhalemo. Pakumaliza, Soo Hing adati: “Tidaona djanja ya Yahova ikutithandiza. Shuwadi, Iye ni ‘wakubva pemphero.’”—Sal. 65:2.
CHIKHULUPIRIRO CHITITHANDIZA KUZINDIKIRA NA KUBVUMA MIDAWIRO YA YAHOVA PA MAPEMPHERO YATHU
15. Ko nchani chidathandiza mulongo munango kuzindikira kuti Yahova ambadawira mapemphero yake?
15 Kazinji-kazinji mapemphero yathu yadawiriwalini modabwisa. Koma midawiro yomwe Yahova achapereka pa mapemphero yathu yachilungamo ndioletu yomwe yangatithandize kupitiriza kukhala okhulupirira kwa Ababa wathu wakudzulu. Nthawe zose mbakhalani tcheru kuti muone momwe Yahova achadawirira mapemphero yanu. Mulongo munango dzina yake Yoko ambaganiza kuti Yahova ambadawiralini mapemphero yake, ndipomwapa iye adayamba kuchita ndandanda ya vinthu vomwe angakumbira kwa Yahova. Kuyenda kwa nthawe iye adanyang’ana pa ndandanda ndipo adazindikira kuti Yahova wenze adadawira mapemphero yake yanango yazinji mpakana yanango yomwe iye wenze adayayebwa. Ndipomwapa, nivabwino kuti nthawe na nthawe timbaganizire nkuona momwe Yahova ankudawirira mapemphero yathu.—Sal. 66:19, 20.
16. Ko ni njira inango iponi yomwe tingaonesere chikhulupiriro? (Aheberi 11:6)
16 Tionesa kuti tinachikhulupiriro tikambapemphera kwa Yahova komasoti tikambabvuma midawiro yake ya mapemphero yathu vilibe basa na momwe iye watidawirira. (Lewengani Aheberi 11:6.) Onani chitsanzo cha m’bale Mike na nkazi wake Chrissy. Iwo enze na cholinga chokatumikira pa Beteli. Iwo adati: “Tidasaina mafomu ya pa Beteli kwa magole yazinji ndipo timbapemphera kwa Yahova pa nkhani mweyi” koma ise “chipo tilibe kuchemelewa,” Mike na Chrissy enze otsimikiza kuti Yahova ambadziwa bwino malo yomwe iwo angamutumikirire. Iwo adachita vomwe angakwanise nkumbatumikira ninge apainiya okhazikika ku gawo yosowa nkumbathandizira pa basa ya chimango. Manjeuno iwo ni onyang’anira dera ndipo Mike adathumizira kuti: “Ni nthawelini zose pomwe Yahova angadawire mapemphero yathu mu njira yomwe timbaganizira. Koma iye nthawe zose achatidawira mapemphero yathu mu njira yabwino maninge kuposha momwe timbaganizira.”
17-18. Mobverana na Salimo 86:6, 7, ko tingakhale na chitsimikizo cha chani?
17 Lewengani Salimo 86:6, 7. Wamasalimo Davide wenze na chitsimikizo chose chakuti Yahova ambabvesera mapemphero yake. Olo imwembo mungakhalembo na chitsimikizo chimwechi. Vitsanzo vomwe taona mu nkhani ino vatitsimikizira kuti Yahova angatipase nzeru, mphanvu na chikhulupiriro kuti tikwanise kupirira mabvuto. Iye angaphatisire basa abale wathu komasoti wanthu omwe amutumikiralini kuti atithandize mu njira zinango.
18 Ni shuwadi kuti ni nthawelini zose pomwe Yahova angadawire mapemphero yathu mu njira yomwe timbaganizira. Koma chomwe tinkudziwa nchakuti iye achadawira mapemphero yathu. Iye adzatipase vomwe tichadekana komasoti pa nthawe yoyenera. Ndipomwapa, pitirizani kupemphera mwa chikhulupiriro na kukhala otsimikiza kuti Yahova adzakusamalireni manjeuno na mu dziko inyowani momwe Yahova ‘adzakwanirise vofuna va chamoyo chilichose.’—Sal. 145:16.
NYIMBO NA. 46 Timakuyamikirani Yehova
a Yahova atitsimikizira kuti adzadawire mapemphero yathu yakakhala yobverana na chifuniro chake. Tikambagumana na mabvuto, tikhala otsimikiza kuti Yahova adzapitirize kutithandiza kukhala okhulupirika kwa iye. Munkhani ino, tione momwe Yahova achadawirira mapemphero yathu.
b Kuti mudziwe vizinji ndawa yake Yahova wabvuma kuti Satana atonge dziko, onani nkhani yakuti “Musamaiwale Nkhani Yofunika Kwambiri,” mu Nsanja ya Olonda ya Junho 2017.
c Madzina yanango yachinjiwa.
d MAWU YOFOTOKOZERA MAFOTO: Mayi munango na mwana wake akufika mu dziko inango momwe munawanthu wothawa kwao. Ndipo abale ankuwatambira mwachikondi na kuwapasa thandizo.
