1. Ko Baibolo ifotokoza tani chikondi chaicho?

 BAIBOLO ifotokoza chikondi chaicho mu njira yabwino maninge. Iyo ilewa kuti: ‘Chedza chake chili ninge kugaka kwa moto chedza cha Ya, madzi yazinji yangakwaniselini kudzimwisa chikondi olo tukamadzi tungakwaniselini kuchikukulula.’ b (Nyimbo 8:6, 7) Mawu mwaya yapereka chitsimikizo chabwino maninge kwa wanthu olowolana! Shuwadi, imwepo mungakwanise kukhala na chikondi chaicho kwa mwanzanu.

2. Ko banja ingachite tani kuti chikondi chawo chileke kuzizira?

² Chikondi chaicho chomwe chikhala pakati pa mwamuna na nkazi chithemba khama yawo. Mwakulinganiza, ganizirani va moto. Moto ungakhale wogaka nthawe zose, koma imwepo mungafunike kuusonkhezera ndipo mukaleka kusamala moto ugadzimwe. Molingana na vimwevi chikondi cha pakati pa mwamuna na nkazi chingapitirize kukhala cholimba nthawe zose peno iwo angapitirize kusamalira mbverano wawo. Nthawe zinango banja ingadzibve kuti chikondi chawo chayamba kuzizira makamaka peno iwo ankugumana na bvuto yosowa kobiri matenda panango bvuto yosamalira wana. Manje peno ndimwe olowola, ko mungachite tani kuti mupitirize kuchitisa ‘chedza cha Ya’ kukhala chogaka m’banja mwanu? Munkhani ino, tione vinthu vitatu vomwe imwepo mungachite kuti mupitirize kukhala na banja yolimba na yokondwa. c

3. Ko ushamwali wakulimba na Yahova uthumizira tani chikondi pa banja? (Mlaliki 4:12) (Onani pomwe foto.)

³ Kuti apitirize kuchitisa ‘chedza ya Ya’ kukhala chogaka, mwamuna na nkazi achadekana kuchita khama kuti akhale pa ushamwali wolimba na Yahova. Ndawa chani kuchita vimwevi ni kodikana? Pa banja mwamuna na nkazi akambalemekeza ushamwali wawo na Yahova, iwo aphatisa basa malangizo yake ndipo kuchita vimwevi kuwathandiza kupewa na kulimbana na mabvuto yomwe yadakachitisa chikondi cha banja yawo kukhala chozizira. (Lewengani Mlaliki 4:12.) Munthu wa uzimu ayesesa kuchita vose vomwe angakwanise kuti atewedzere makhalidwe ya Yahova ninge kuleza ntima, kudekha na kukhululuka. (Aef. 4:32–5:1) Banja ikambaonesa makhalidwe mwaya chikondi chomwe chilipo kwa iwo chidzakule. Mulongo munango dzina yake Lena, yemwe wakhala pa banja kwa magole 25 adati: “Nivosashupa kukonda na kupereka ulemu kwa munthu wa uzimu.”

4. Ndawa chani Yahova adasalula Yosefe na Mariya kuti adzakhale azibereki wa Mesiya kutsogolo?

⁴ Naboni tione chitsanzo cha m’Baibolo. Pomwe Yahova angasalula yemwe adakadzakhala baba wa Mesiya kutsogolo, Iye wenze na njira zizinji zochitira vimwevi pa mbewu ya Davide. Koma Iye adasalula Yosefe na Mariya. Ndawa chani? Ndawa yakuti wose awiri enze pa ushamwali wakulimba na Yahova, ndipo iye ambadziwa kuti nthawe zose iye ambadzakhale woyamba pa banja yawo. Ko mabanja yangapfunzire chani kwa Yosefe na Mariya?

5. Ko amuna olowola angapfunzire chani kwa Yosefe?

⁵ Yosefe ambachebwalini kubvera malagizo ya Yahova, mwevi ndivo vomwe vidamuchitisa kuti akhale mwamuna wa bwino. Katatu kose adatambira malangizo yochokera kwa Mulungu yolewa va banja yake. Maulendo yose mwaya iye ambabvera mwakankulumize. Podiya kuti vimwevi vimbaphatanidzapo kuchinja vinthu. (Mat. 1:20, 24; 2:13-15, 19-21) Ndawa yobvera malangizo ya Mulungu, Yosefe adateteza, kuthandiza na kusamalira Mariya. Shuwadi, mwevi vidachitisa kuti chikondi na ulemu womwe Mariya angabva kwa Yosefe uyingizirike maninge! Amuna olowola imwepo mungatewedzere chitsanzo cha Yosefe mukambafagafaga malangizo ya m’Baibolo pa kusamalira banja yanu. d Podiya kuti mungafunike kuchinja, imwepo mukambatewedza malangizo ya m’Baibolo muonesa kuti mumukonda nkazi wanu na kulimbisa ukwati wanu. Mulongo munango waku Vanuatu, yemwe wakhala pa banja kwa magole 20 adati: “Mwamuna wangu akambafagafaga na kutewedza malangizo ya Yahova ulemu wangu kwa iye uyingizirika maninge. Ine nidzibva wotetezeka ndipo nithemba vosalula vake.”

6. Ko akazi olowodwa angapfunzire chani kwa Mariya?

 ⁶ Mariya wenze pa ushamwali wakulimba na Yahova, chikhulupiriro chake chimbathembalini Yosefe, ambayadziwa bwino Malemba ndipo ambapatula nthawe yoganizira. (Luka 2:19, 51) Mosakayika pakukhala munthu wauzimu Mariya wenze nkazi wabwino maninge. Ntsiku zino akazi azinji olowodwa iwo achita khama kuti akhale ninge Mariya. Mwakulinganiza, mulongo munango dzina yake Emiko adati: “Pomwe nenze wosalowodwa nenze na ndandanda yangu yochitira vinthu vauzimu, koma pomwe nidalowodwa mwamuna wangu ndiye angapemphera kwa ise na kutsogolera pfunziro ya banja. Nidazindikira kuti mwamuna wangu ambachite vose mwevi kwa inepano. Pamwapo nidaona kuti yemwe angadekana kusamalira ushamwali wangu na Yahova nenze inepano pa nekha. Manjeuno nipatula nthawe yopemphera kwa Yahova na kuganizira vomwe nalewenga.” (Agal. 6:5) Akazi olowodwa pitirizani kulimbisa ushamwali wanu na Yahova. Kuchita vimwevi amuna wanu adzakhale na vifukwa vokutembejerani na kukukondani imwepo.—Miy. 31:30.

7. Ko mwamuna na nkazi angapfudzire chani kwa Yosefe na Maria kuti ambatumikire Yahova pabodzi?

⁷ Kwa Yosefe na Mariya kulimbisa ushamwari wawo na Yahova enze basa ya pabodzi. Iwo ambadziwa kuti nivodikana maninge kutumikira Yahova pabodzi ninge banja. (Luka 2:22-24, 41; 4:16) Mwevi venze voshupa makamaka pomwe adakhala na wana azinji, koma iwo adakwanisa. Chimwechi nichitsanzo cha bwino maninge kwa mabanja ntsiku zino! Peno imwepo munawana ninge Yosefe na Mariya, vingakhale voshupa kuyenda kumisonkhano panango kugumana nthawe yochitira pfunziro ya banja. Nthawe zinango vingakhale voshupa kupatula nthawe yopfunzira na kupemphera pabodzi ninge banja. Koma ayi kuyebwa kuti mukambatumikira pabodzi Yahova ninge banja, mudzamufenderere komasoti mudzakhale na banja yobverana. Ndipomwapa, mbaikhani basa zauzimu pa malo yakuyamba.

8. Ko nchani chomwe chingathandize banja yomwe inkugumana na mabvuto kuti ambachite pfunziro ya banja?

⁸ Ko imwepo mungachite tani peno munkugumana na mabvuto yanango m’banja mwanu? Panango mungakhale na chifuno chochita pfunziro ya banja pabodzi. Pachochitika ninge mwechi mungayambe na chinthu chosashupa panango nkhani yomwe mose awiri mungayikonde kuipfunzira. Kuchita vimwevi kudzalimbise chikondi chanu na kuyingizira chifuno chanu chochitira vinthu va uzimu pabodzi.

9. Ndawa chani mwamuna na nkazi olowolana achadekana kupatula nthawe yokhala pabodzi?

⁹ Mabanja, mungalimbise pomwe chikondi chanu mukambagumana nthawe yokhala pabodzi. Kuchita vimwevi kudzakuthandizeni kuti muleke kumbadzibva kuti ndimwe wachabechabe, koma kuti mudziwe bwino maganizo na momwe achabvera mwanzanu. (Gen. 2:24) Onani momwe Lilia na Ruslan adazindikirira patsogolo pakuti alowolana. Magole 15 kumbuyo Lilia adati: “Isepano timbaganiza kuti timbadzamale nthawe ikulu tili pabodzi, koma vimbachitikalini tenouyo, nthawe zose tenze na vinthu vizinji vochita ninge basa yathu, vinthu va pa muyi na kusamalira wana. Pamwapo tidaona kuti timbafunika kupatula nthawe yokhala pabodzi ndawa kuleka kuchita vimwevo tidakapatukana.”

10. Ko mabanja yangaphatise tani basa lemba ya Aefeso 5:15, 16?

¹⁰ Ko mabanja yangachite chani kuti ambapatule nthawe yokhala pabodzi? Panango aliyese angafunike kupatula nthawe na kukonza ndandanda. (Lewengani Aefeso 5:15, 16.) M’bale munango waku Nigéria dzina yake Uzondu adati: “Inepano nikambakonza ndandanda za basa zangu niyebwalini kuikhapo nthawe yokhala  pabodzi ndipo niikha vimwevi pa malo yakuyamba.” (Afil. 1:10) Onani chitsanzo cha Anastasia, waku Moldávia, iye ni nkazi wa wonyang’anira dera. Iye adagumana njira yomwe angaphatisire basa bwino nthawe yake, iye adati: “Ine niyesesa kuchita vinthu vangu va nekha pomwe mwamuna wangu ali otangwanika na maudindo yake. Aliyese akamaliza basa zake tigumana nthawe yokhala pabodzi.” Manje ko tani peno imwepo mukhala wotangwanika maninge ndipo vikhala voshupa kugumana nthawe yokhala pabodzi?

11. Ko ni basa iponi yomwe Akula na Purisika ambachitira pabodzi?

¹¹ Amuna na akazi muli pabanja, mungapfunzire vizinji pa chitsanzo cha Akula na Purisika banja yokondewa maninge na Akhrisitu oyambirira (Aro. 16:3, 4) Baibolo ifotokozalini vizinji pa nkhani ya ukwati wawo, koma iwonesa kuti ambaphata basa, kulalikira na kuthandiza anango, ndipo iwo ambachita vose mwevi pabodzi. (Mac. 18:2, 3, 24-26) Shuwadi, nthawe zose Baibolo ikambafotokoza va Akula na Purisika iwo atomolewa wose mwawa pabodzi.

12. Ko mwamuna na nkazi olowolana angachite tani kuti ambagumane nthawe ikulu yokhala ali pabodzi? (Onani pomwe foto.)

¹² Ko olowolana angatewedzere tani Akula na Purisika? Ganizirani mabasa yazinji yomwe mungachitire pabodzi. Ko imwepo mungachite basa zinango mulipabodzi ninge banja? Ko imwepo muchita makonzedwe kuti mumbalalikire pabodzi pafupi-pafupi? Akula na Purisika ambaphatambo basa pabodzi. Vingachitike kuti mose awiri muphatalini basa ibodzibodzi. Manje imwepo mungaphate basa zinango pabodzi ninge kupsaira na kulongedza mnyumba? (Mla. 4:9) Mukambathandizana basa, imwepo mudzadzibve kukhala obverana ndipo mudzakhale na mipata yocheza. Robert na Linda akhala pa banja kwa magole yoposha 50. Robert adati: “Isepano tikhala tilibe nthawe ikulu kuti timbachitire vinthu pabodzi. Koma inepano nikambatsuka mapuleti nkazi wangu nkumbapukuta panango nikambasamalira mafololi iye nkubwera kudzanithandiza nikhala okondwa maninge. Kuchitira vinthu pabodzi vitichitisa kukhala obverana maninge ndipo chikondi chathu chipitiriza kukula.”

13. Ko mwamuna na nkazi olowolana achadekana kuchita chani kuti apitirize kukhala obverana chaivo?

¹³ Koma kumbukirani kuti kundokhala pabodzi nthawe zose kutanthauzalini kuti ndimwe obverana. Nkazi munango wolowodwa waku Brasil adalewa kuti: “Ntsiku zinango panavinthu vizinji vomwe vingatisokoneze mosashupa ndipo vingatigwesere mu ngozi yakuganiza kuti tinkukhala pabodzi ndawa yakuti tikundokhala mu nyumba ibodzi. Inepano nidapfunzira kuti kukhala pabodzi ni mbali ibodzi yothandiza, mbali inango ni kubvesera mwatcheru mwamuna wangu pa vomwe iye ankufuna.” Onani vomwe achachita Bruno na nkazi wake Tays kuti ambabveserane mwatcheru, iye adati: “Tikakhala kuti tinanthawe yokhala tili pabodzi tisiya mafoni kumbali ndipo tiyesesa  kuphatisa bwino basa nthawe mwiyi ninge banja.”

14. Peno banja ikondalini kugumana nthawe yokhala ali pabodzi ko iwo angachite tani?

¹⁴ Manje ko tani peno mukondalini kugumana nthawe yokhala pabodzi? Aponeye mukonda vinthu vosiyana panango imwepo mukakhala pabodzi mukonda kugegedzana maninge. Manje ko mungachite tani? Ganizirani pomwe chitsanzo cha moto, sikuti moto undokhala wogaka nthawe zose koma ungafunike kuikha nkhuni nthawe zose. Molingana na chitsanzo mwechi, tani imwepo kuyamba kupatula ka nthawe kang’onong’ono kakuti mumbakhalire pabodzi nthawe zose? Yesesani kuchita vinthu vomwe mose muchavikonda pewani kuchita vinthu vomwe vingachitise kuti mugegedzane. (Yak. 3:18) Mukambayesesa kuchita vimwevi mudzasonkhezera chikondi chanu.

15. Ndawa chani ulemu ni wodekana maninge kuti chikondi m’banja chipitirize kukhala cha mphanvu?

¹⁵ Ulemu ni wodekana manige m’banja, ndipo ulemu tingaulinganize na mphepo. Palibe mphepo moto udzimwa mwakankulumize. Molingana na vimwevi, pakakhala palibe ulemu chikondi chomwe chilipo pa banja chingazizire mwakankulumize. Pambali inango mwamuna na nkazi olowolana akambachita khama yowonesana ulemu iwo apitiriza kuchitisa chikondi chawo kukhala champhanvu. Panango imwepo mungaganize kuti munkuonesa ulemu. Koma ko mwamuna wanu panango nkazi wanu adzibva kuti mumulemekeza? Penny na nkazi wake Aret omwe akhala pa banja kwa magole yoposha 25 adati: “Ulemu womwe tionesana uchitisa kuti banja yathu ikhale malo yabwino maninge. Ise tidzibva kukhala omasuka kucheza ndawa tidziwa kuti vomwe munango akuganiza nivodekana maninge.” Manje ko imwepo mungachite tani kuti mwamuna panango nkazi wanu ambadzibve kuti alemekezewa? Onani chitsanzo cha Abulahamu na Sara.

16. Ko amuna olowola angapfunzire chani pa chitsanzo cha Abulahamu? (1 Petulo 3:7) (Onani pomwe foto.)

¹⁶ Abulahamu ambachita vinthu mwaulemu kwa Sara. Ndawa iye ambabvesera maganizo ya Sara na kulemekeza momwe ankubvera. Ntsiku inango Sara wenze wokalipa maninge ndipo adafotokozera Abulahamu vose na momwe ankubvera, iye mpakana adamuimba mulandu ndawa ya vomwe vidachitika. Manje ko Abulahamu adakalipa naye Sara? Neye, iye ambadziwa kuti Sara ni nkazi wobvera ndipo ambamuthandiza. Abulahamu adamubvesera Sara ndipo adayesesa kukonza bvuto. (Gen. 16:5, 6) Ko tingapfunzire chani pa chitsanzo chimwechi? Amuna olowola nishuwadi kuti imwepo muna udindo wosalula vochita va banja yanu. (1 Akor. 11:3) Podiya viri teno chingakhale chikondi kubvesera malangizo ya nkazi wanu mukanati kusalula vochita makamaka peno chosalula mwecho chimukhudzembo. (1 Akor. 13:4, 5) Nthawe zinango vingachitike  kuti nkazi wanu wandokhumudwa koma akundofuna kufotokozako momwe ankubvera. Ko imwepo mulemekeza maganizo yake ndipo mumubvesera mwatcheru? (Lewengani 1 Petulo 3:7.) Angela na Dmitry wakhala pa banja kwa magole pafupifupi 30. Angela adafotokoza vomwe mwamuna wake achachita kuti iye ambadzibve kuti alemekezewa, iye adati: “Dmitry akhala wokonzeka nthawe zose kunibvesera peno inepano ndine wokhumudwa panango nikundofuna kufotokozako maganizo yangu. Iye anilezera ntima podiya panthawe yomwe ndine wokhumudwa.”

17. Ko akazi olowodwa angapfunzire chani pa chitsanzo cha Sara? (1 Petulo 3:5, 6)

¹⁷ Sara ambaonesa ulemu kwa Abulahamu pa kumuthandiza pavosalula vake. (Gen. 12:5) Ntsiku inango alendo adafika mwadzidzidzi ndipo Abulahamu adawauza kuti adikhire adye. Iye adakumbira Sara kuti asiye vomwe angachita kuti awakonzere chakudya chizinji. (Gen. 18:6) Sara adathandiza chosalula chomwe Abulahamu adachita ndipo panthaweletu mweyo adachita vomwe adamukumbira. Akazi olowodwa, mungatewedzere chitsanzo cha Sara pakuthandiza vosalula va amuna wanu, kuchita vimwevi kudzalimbise banja yanu. (Lewengani 1 Petulo 3:5, 6.) Dmitry, watafotokoza mu ndime yapita, adafotokoza vomwe nkazi wake achachita kuti iye ambadzibve kuti alemekezewa, iye adati: “Ine nikonda maninge kuona momwe Angela athandizira vosalula vangu podiya kuti maganizo yathu niyosiyana, olo kuti vomwe nasalula vilibe kufamba bwino iye aninyazalini.” Vikhala vosashupa maninge kukonda munthu ule yemwe akulemekeza!

18. Ko chidzachitike nchani peno banja inkuchita khama kupitiriza kuchitisa chedza cha chikondi kukhala chogaka?

¹⁸ Ntsiku zino, Satana achita vose vangakwanise kuti amalise chikondi chomwe chilipo m’banja. Iye adziwa kuti peno banja ingaluze chikondi chomwe anacho iwo angaluze pomwe chikondi chawo kwa Yahova. Koma chikondi chomwe chilipo, chipo chidzaperelini. Chitani vose vomwe mungakwanise kuti chikondi cha m’banja mwanu chikhale ninge chofotokozewa pa Nyimbo ya Solomo ndipo mbaikhani Yahova pa malo yoyamba m’baja mwanu. Mumbapatule nthawe yokhala pabodzi ndipo mumbaonesane ulemu na kulemekeza vomwe mwanzanu achafuna. Mukachita vimwevi imwepo mudzapereke ulemu kwa Yahova yemwe ni phata ya chikondi chaicho. Ninge moto womwe unkugaka bwino, chikondi chanu m’banja chidzapitirize kukhala cholimba nthawe zose.