1-2. Ko ni chosalula chiponi chomwe Ayuda omwe enze ku Babulo angadekana kuchita? (Ezara 1:2-4)

 MPFUMU idalengeza kuti Ayuda omwe enze ku ukapolo kwa magole 70 abwerere ku dziko yawo ku Izirayeli. (Lewengani Ezara 1:2-4.) Ni vowonekeratu kuti Yahova ndiye adawathandiza ndawa yakuti Ababulo ambamasulalini akapolo wawo. (Yes. 14:4, 17) Koma mpfumu yawo inyowani idabvumiza kuti Ayuda achoke mu dziko ya Babulo. Ndipomwapa, mu Yuda aliyese makamaka misolo ya banja yabafunika kuchita vosalula. Kuchoka ku Babulo panango kupitiriza kukhala. Kuti akwanise kusalula yenzelini nkhani ya masenzeka. Ndawa chani tinkulewa teno?

² Ndawa yakuti Ayuda azinji enze wokalamba, ndipo mwapa vidakakhala voshupa maninge kwa iwo kuti achite ulendo moyu. Ayuda azinji enze obadwira ku Babulo ndipo kwenze kumoku kokha komwe iwo angadziwa. Kwaiwo Izirayeli yenze chabe dziko ya ababa wawo na azimbuya wawo. Ayuda anango wenze adakhala olemera ku Babulo, ndipomwapa, vidakakhala voshupa maninge kusiya nyumba zawo na bizi yawo kuti akayambe pomwe moyo unyowani.

3. Ko nidaliso iponi yomwe Ayuda okhulupirika adakatambira ndawa yobwerera ku Izirayeli?

³ Kwa Ayuda okhulupirika madaliso yomwe adakatambira ndawa yobwerera ku Izirayeli, yadakakhala yazinji kuposha khama iliyose yomwe adakachita. Pamadaliso yose yomwe adakatambira ikulu yenze kutumikira Yahova. Nishuwadi kuti ku Babulo kwenze makachisi yoposha 50 yakupemphera konama. Koma kumouko Aizirayeli wenze alibe olo kachisi bodzi kuti atumikirireko Yahova olo guwa yakuti aperekereko nsembe zomwe zimbafunika mobverana na Chilamulo cha Mose. Wenze alibe pomwe gulu yolinganiziwa kuti ambapereke nsembe zimwezi. Kuingizira mwapo wanthu wa Yahova wenze adazunguliriwa na wanthu omwe ambalemekezalini malamulo ya Yahova ne pang’ono.  Ndipo mwapa Ayuda azinji okhulupirika ambafunisisa kubwerera kudziko yawo kuti akabwezerese kupemphera kochena.

4. Ko Yahova adawapolomisa chani Ayuda omwe adakadzabwerera ku Izirayeli?

⁴ Ulendo wochoka ku Babulo kufika ku Iziraeli yenzerini nkhani ya masenzeka ndawa udakatenga minyezi 4. Koma Yahova adapolomisa kuti adzadzonge chinthu chirichose chomwe chidakakangisa wanthu wake kubwerera. Yesaya adanemba kuti: ‘Konzani nsewu wa Yahova! Thamulani nsewu wa Mulungu wogwata na muchipululu. . . . Malo yokumbikakumbika yasalaziwe ndipo mitunthu-mitunthu yakhale malo ya see.’ (Yes. 40:3, 4) Ganizirani chochitika ichi: Pakati pachipululu pomwe palidzale mapiri na madambo padakadzakhala nsewu wothamuka na wosalala. Wose omwe adakadzafamba mu nsewu moyu, adakadzakomedzewa nawo maninge! Ndoganizirani momwe vidakakhalira vosashupa kufamba mofulumiza mu nsewu moyu yemwe wenze wothamuka kusiyana nakuti akwire na kumbuluka panango kuyambuka madambo na kuzungulira mapiri.

5. Ko nsewu womwe Yesaya adanemba udatambira dzina iponi?

⁵ Ntsiku zino, misewu yazinji yadziwika na dzina panango namba. Nsewu wophiphirisa womwe Yesaya adanemba udatambirambo dzina. Lemba ya Yesaya 35:8 ilewa kuti: ‘Kumouko kudzakhale nsewu ukulu nsewu wochemerewa kuti Nsewu Wochena. Wopsipiziwa adzafambemolini.’ Ko polomisi mweyi idakwanirisiwa tani mu nthawe ya Aizirayeli? Ndipo ndawa chani ni yodekana maninge kwa ise ntsiku zino?

6. Ndawa chani nsewu wochena udatambira dzina imweyi?

⁶ ‘Nsewu Wochena’. Mweyi ni dzina yabwino maninge! Koma ko ndawa chani nsewu moyu ni wochena? Kwa Ayuda omwe adakadzabwerera ku dziko yawo yadakagumanikalini malo ya ‘munthu wopsipiziwa,’ wachigololo, wopemphera kwa mafano panango wochita machimo yanango yakulu-yakulu. Ayuda mwawale adakadzakhala ‘wanthu ochena’ kwa Mulungu. (Deut. 7:6) Koma kuti akondwerese Yahova iwo angadekana kuchinja vinthu vinango.

7. Ko nikuchinja kuponi komwe Ayuda anango angadekana kuchita? Perekani chitsanzo.

⁷ Ninge momwe tawonera, Ayuda azinji enze adabadwira ku Babulo ndipo iwo enze adjaira kaganizidwe na kachitidwe ka vinthu ka ku Babulo. Payadapita magole 70 pomwe Ayuda oyambirira adabwerera ku Izirayeli, Ezara adazindikira kuti Ayuda anango enze adalowola akazi wamadzinza yanango. (Eks. 34:15, 16; Ezara 9:1, 2) Ndipo patsogolo pake Governadoli Nehemiya adakhala wokalipa pomwe adazindikira kuti wana womwe enze adabadwira ku Izirayeli alibe kupfunzira chiyankhulo cha Ayuda. (Deut. 6:6, 7; Neh. 13:23, 24) Mbali ikulu ya mawu ya Mulungu yenze yonembewa mu Chiheberi. Ko wana mwawa adakapfunzira tani kukonda kutumikira Yahova pomwe ambakwanisalini kubva chiyankhulo mwechi? (Ezara 10:3, 44) Nivobveka kuti Ayuda mwawa ambafunika kuchinja vinthu vizinji pamoyo wawo. Koma vidakakhala vosashupa maninge kwa iwo kuti achinje adakakhala kuti ali ku Izirayeli komwe kutumikira kochena kwenze kudayamba kubwezeresewa pang’onopang’ono.—Neh. 8:8, 9.

8. Ndawa chani tichadekana kuchita chidwi na vinthu vomwe vidachitika magole yazinji kumbuyo? (Onani foto ya pakhava.)

⁸ ‘Anango angaganize kuti nkhani imweyi niyokomedza’ kuibva. ‘Koma ko vinkutikhudza tani vomwe vidachitikira Ayuda magole yazinji kumbuyo?’ Vinkutikhudza maninge ndawa yakuti isepanombo tinkufamba ‘mu Nsewu Wochena.’ Viribe basa peno ndise odzozewa  panango wa ‘nkhosa zinango,’ tose tichadekana kupitiriza kufamba ‘mu Nsewu Wochena.’ Vimwevi vidzatithandize kupitiriza kutumikira Yahova manjeuno komasoti kutsogolo tikadzatambira madaliso yomwe Ufumu wa Mulungu udzabwerese. b (Yoh. 10:16) Kundoyambira mu 1919  wanthu azinji amuna, akazi na wana akhala ankubula mu Babulo Nkulu panango kuti chipembedzo chonama na kuyamba kufamba mu nsewu wophiphirisa. Nivosakaikisa kuti imwembo mulimbo mugulu ya wanthu mwawa. Nimugole imweyi pomwe nsewu moyu udafunguliriwa, koma basa ikulu imbafunika kuchitika gole mweyi ikanati kufika.

9. Mobverana na Yesaya 57:14, ko ‘Nsewu Wochena’ udakonzewa tani?

⁹ Yahova adatsimikizira kuti chopunthwisa chirichose chomwe chidakakangisa Ayuda kuchoka ku Babulo chidakachosewa. (Lewengani Yesaya 57:14.) Ko ntsiku zathu zino kunkuchitikambo vinthu volingana na ‘Nsewu Wochena?’ Inde. Kwamagole yazinji ikanati kufika gole ya 1919, Yahova adaphatisa basa amuna okhulupirika kuthandiza anango kuti achoke mu Babulo Nkulu. (Onani pomwe Yesaya 40:3.) Amuna mwawa adakonza njira kuti wanthu wabwino ntima akwanise kuchoka mu chipembedzo chonama nakuti atumikire Yahova pabodzi na wanthu wake. Koma ko iwo adakonza tani ‘Nsewu moyu?’ Naboni tione vitsanzo vinango vomwe vachitika.

10-11. Ko basa yodinda na kutsumbudzulira Baibolo idathandiza tani wanthu? (Onani pomwe foto.)

¹⁰ Kudinda. Mpaka mu gole ya 1450 Baibolo imbanembewa pamanja. Basa mweyi imbatenga nthawe ikulu maninge ndipomwapa penze ma Baibolo yokoperewa yang’onong’ono ndipo yenze yodula. Koma pomwe adayamba kuphatisa basa njira zinyowani kukonza na kugawa ma Baibolo kudakhala kosashupa.

¹¹ Kutsumbudzulira. Kwamagole yazinji, Baibolo imbagumanika muchiyankhulo cha Chilatini basi. Koma bvuto yenze yakuti wanthu wopfunzira maninge ndiwo adakabvesa bwinobwino chiyankhulo chimwechi. Koma basa yodinda idafalikira maninge ndipo wanthu ogopa Mulungu adaphata basa mweyi mwakhama kutsumbudzulira Baibolo mu viyankhulo voyankhuliwa na wanthu azinji. Vimwevi vidachitisa kuti wanthu ayambe kulinganiza vomwe angapfunzira kumatchetchi na vomwe Baibolo ingapfunzisa.

12-13. Perekani chitsanzo cha momwe opfunzira Baibolo adayambira kuulula vipfunziso va vipembedzo vonama.

¹² Vinthu vothandiza kupfunzira Baibolo. Pakupfunzira Mawu ya Mulungu wopfunzira Baibolo adapfunzira vinthu vizinji maninge. Pakuti iwo ambauza anango vomwe angapfunzira m’Baibolo, kwa atsogoleri wavipembedzo vidakhala vokalipisa maninge. Mwakulinganiza, cha m’ma 1835, amuna anango omwe ambalemekeza Mawu ya Mulungu adabulisa tumapepa tomwe tumbaulula va vipfunziso vonama va matchetchi.

¹³ Pa nthawe mweire munthu munango wogopa Mulungu dzina yake Henry Grew adafalisa kapepa kolewa va vomwe vichachitika munthu akafa. Vipembedzo vonama vimbapfunzisa kuti munthu abadwa na mzimu womwe ukufalini. Pakuphatisa basa Baibolo Henry, adawonesa kuti yenze bodza nakuti kusafa ni mphaso yomwe iperekewa na Mulungu. Mu gole ya 1837 mtumiki munango wachipembedzo wochemerewa George Storrs adagumana kapepa mwaka pomwe ambachita ulendo wa mu komboyo. Pambuyo pakuti wawerenga kapepa mwaka, iye adakhala wotsimikiza kuti wagumana chonadi chofunika maninge. Pamwapo iye adakhala wotsimikiza kuuzambo anango vomwe  wapfunzira. Mu 1842 iye adakamba nkhani zoteweranatewerana zochitisa chidwi zakuti: ‘Mbvunzo ubodzi, ko oipa angafelini?’ Momwe adafotokozera George Storrs kudathandiza mulumbwana munango dzina yake Charles Taze Russell.

14. Ko m’bale Russell na omwe angamuthandizira adaphindula tani na basa yose yokonza nsewu yomwe idachitika iwo akanati kukhalako? (Onani pomwe foto.)

¹⁴ Ko m’bale Russell na omwe angamuthandiza adaphindula tani na basa yose yokonza nsewu yomwe idachitika iwo akanati kukhalako? Ndawa yabasa mweyi pakupfunzira kwawo iwo adakakwanisa kufagafaga vinthu mu ma dicionario mu ma bukhu yofagira va Baibolo komasoti mu ma Baibolo yotsumbudzuliriwa yazinji. Ndipo kufagafaga Baibolo komwe kudachitika na amuna ninge Henry Grew, na George Storrs, kudawathandiza pomwe maninge ndipo mbale Russell na anzake omwe ambamuthandiza adathandizambo maninge kukonza nsewu pakubulisa mabukhu na mapepa yazinji yomwe yambalewa va Baibolo.

15. Ko nchani chomwe chidachitika mu gole ya 1919?

¹⁵ Mu gole ya 1919, Babulo Nkulu, adaluza mphanvu yawenzenayo pa wanthu wa Mulungu. Mu gole mweyi, adaikhiwa ‘kapolo wokhulupirika na wanzeru’ kuti ambathandize wanthu kuyamba kufamba ‘mu Nsewu Wochena.’ (Mat. 24:45-47) Ndawa ya basa yose yomwe idachitika ‘yokonza nsewu’ wochena wale omwe angafamba mu nsewu moyu angathimizira chidziwiso chawo cholewa va Yahova na volinga vake. (Miy. 4:18) Iwo adakwanisambo kuchinja kuti ambachite vinthu mobverana na mpfundo za Yahova. Yahova alibe kuwachichimiza wanthu wake kuti achinje kabodzi na kabodzi. M’malomwake iye adapfunzisa wanthu wake mwa pang’onopang’ono. (Onani bokosi yakuti “ Yahova apfunzisa wanthu wake kubvesa mpfundo zake pang’ono-pang’ono.”) Ndipo kutsogolo vidzakhale vokomedza maninge pomwe timbadzakwanise kukondweresa Yahova pa vose vomwe timbadzachite!—Akol. 1:10.

16. Kundoyambira mu 1919, ko ni kukonzewa kuponi komwe kwakhala kunkuchitika ‘mu Nsewu Wochena?’ (Yesaya 48:17; 60:17)

¹⁶ Nsewu uliwose uchadekana kukonzewa kuti upitirize kukhala wabwino. Kundoyambira mu 1919, ‘Nsewu Wochena’ wakhala unkukonzewa pafupafupi ndipo vimwevi vachitisa kuti azinji abule mu Babulo Nkulu. Mu 1921 pambuyo pakuti kapolo wokhulupirika wakhazikisiwa adabulisa bukhu inango kuti ithandize wanthu kupfunzira Baibolo. Bukhu mweyi ichemerewa kuti Zeze wa Mulungu, bukhu mweyi idadindiwa pafupifupi 6 midyau mu viyankhulo 36 ndipo wanthu adapfunzira chonadi pakuphatisa basa bukhu mweyi. Mu magole ya manjemanjepa padabulisiwa bukhu yochitisira mapfunziro ya Baibolo yakuti Kondwani na moyo mpaka kalekale! Ndawa ya thandizo ya Yahova na gulu yake chakudya chauzimu chinkushotalini ntsiku zomalizira zino. Chakudya chauzimu chimwechi chakhala chinkuthandiza tose isepano kupitiriza kufamba ‘mu Nsewu Wochena.’—Lewengani Yesaya 48:17; 60:17.

17-18. Ko ‘Nsewu Wochena’ unkutiyendesa kuponi?

¹⁷ Tingalewe kuti nthawe zose pomwe munthu wabvuma kupfunzira Baibolo iye anamwayi wofamba ‘mu Nsewu Wochena.’ Anango achita vimwevi pakufamba kanthawe kang’onong’ono basi nkusiya kufamba mu nsewu moyu. Anango atsimikiza kupitiriza kufamba mu nsewu moyu mpaka komwe ukamalire. Koma ko nsewu moyu ukamalire kuponi?

¹⁸ Kwa wale omwe anachidikhiro chakudzulu komwe ukamalire ‘Nsewu Wochena’ moyu ni ‘paradaiso wa Mulungu’ kudzulu. (Chiv. 2:7) Koma kwa wale omwe anachidikhiro chodzakhala na moyo padziko yapasi, komwe ukamalire ni kumapeto kwa magole 1000 ya Khrisitu pomwe tose tidzakhale wangwiro. Peno imwepo munkufamba mu nsewu wochena moyu manjeuno, ayi kunyang’ana m’mambuyo ndipo ayi kusiya kufamba mu nsewu moyu mpaka mukafike komwe ukumalira mudziko inyowani! Tinkufuna kuti imwepo mufambe ‘ulendo wabwino.’