Mwamuna Na Nkazi Wake
2: Kuchitira vinthu pabodzi
VOMWE VICHITIKA
Mwamuna na nkazi wake akambachita vinthu mobverana, akhala ninge wanthu awiri ofambisa ndeke omwe anachakulinga chibodzi. Podiya agumane na mabvuto, mwamuna na nkazi andoganiziralini vawo wokha koma vomwe wose awiri angachite.
MPFUNDO YA M’BAIBOLO: ‘Ndipomwapa nawirilini pomwe, koma thupi ibodzi.’—Mateyu 19:6.
Christopher adanena kuti: “Msolo ubodzi usenzalini denga. Ndipomwapa kuti vinthu vimbafambe bwino m’banja, mwamuna na nkazi achadekana kuchitira vinthu pabodzi.”
NDAWA YAKE NIVODEKANA
Mwamuna na nkazi omwe achitiralini vinthu pabodzi, akashupana achapasana mulandu m’malo mwa kukonza bvuto. Ndipo bvuto ing’ono ikhala ikulu.
Alexandra adanena kuti: “Mwamuna na nkazi achadekana kumbachitira vinthu pabodzi. Adakati inepano na mwamuna wangu tichitiralilini vinthu pabodzi, sembe tindokhala ninge wanthu wokhala nyumba ibodzi osati banja. Ndipo sembe tikwanisalini kukambirana vinthu vofunika.”
VOMWE MUNGACHITE
DZIBVUNZENI KUTI
-
Ko nikagumana kobiri niwona kuti ‘ni zangu nekha’ basi?
-
Ko nikondwa maninge pakakhala palibe nkazi panango mwamuna wangu?
-
Ko inepano nifunalini kumbabverana na azibale wa mwamuna wangu panango nkazi wangu, podiya kuti iye abverana nawo?
VAMUNGACHEZERANE
-
Ko ni vinthu viponi vomwe tichitira pabodzi ninge banja?
-
Ko tichadekana kuchinja vinthu viponi?
-
Ko tingachite chani kuti timbachitire vinthu pabodzi?
VOMWE MUNGACHITE
-
Tilinganize kuti mukumenya bola maekipa yawiri yosiyana. M’malo mwakuti aliyese ambamenye ekipa yake, imwepo ninge banja muchadekana kukhala ekipa ibodzi.
-
M’malo moganiza kuti: ‘Nichite tani kuti niwine,’ dzibvunzeni kuti, ‘tichite tani kuti tiwine?’
Ethan adati: “Ayi kumbashupana kuti wophonya ni mbani. Chodekana ni kubverana na kukhala mwantendere m’banja.”
MPFUNDO YA M’BAIBOLO: ‘Ayi kumbandoganizira vofuna vanu vokha, koma mumbaganizire pomwe va wanthu anango.’—Afilipi 2:3, 4.
