Ko chilengedwe na vamoyo vidachita kulengewa na Mulungu panango vidakhalapo vokha? Mawu yomwe yali padzulu ya mashasha yawiri ya asayansi komasoti mawu yoyambirira ya m’Baibolo, yankuwonesa kuti pali midawiro yawiri yosiyana maninge. M’dawiro uliwose una wanthu wake omwe achauteteza. Olo viri teno, wanthu azinji adziwalini vomwe achadekana kukhulupirira. Wanthu alewa maganizo yosiyanasiyana pa nkhani mweyi. Achita vimwevi pakuphatisa basa mabukhu yobvekera na kutsutsa.

Panango aticha wanu adakutsimikizirani kuti vinthu vose mu chilengedwe vidakhalapo vokha ndipo vilibe kuchita kulengewa. Manje ko aticha wanu adapereka umboni woonesa kuti kulibe Mulengi? Komasoti panango mudabva akuluakulu wa vipembedzo akulewa kuti kuli Mulengi, koma ko adakupasani umboni wa vomwe adalewa? Panango adandokuuzani kuti muchadekana ‘kukhulupirira’ ndawa ndivo vomwe achapfunzisa?

Ni vosakayikisa kuti mudadzibvunzako mbvunzo moyu ndipo panango muchawona kuti palibe angalewe motsimikiza kuti Mulengi aliko. Panango muna mbvunzo munango wakuti: Ko kugumana m’dawiro wa mbvunzo moyu ni kodekanadi?

Galamukani! mweyi, ifotokoze vomwe vachitisa kuti wanthu azinji ambakhulupirire kuti kuli Mulungu. Ifotokoze pomwe kudekana kodziwa momwe moyo udayambira.