Ndawa yake tinganene kuti m’dawiro wa bvunzo moyu ni wodekana
Ndawa chani ni vodekana kudziwa kuti Mulengi aliko? Peno munkutsimikiza kuti Mulungu ni wamphanvu yose, ndiye kuti mungakonde pomwe kudziwa kuti Baibolo idauziriwa na Mulungu. Peno mukhulupirira vomwe Baibolo ichanena, vingakuthandizeni pa vinthu ivi:
Mudzayambe kukondwa maninge na moyo wanu
BAIBOLO INENA KUTI: ‘[Mulungu] adachita vabwino. Adakupasani mvula kuchokera kudzulu, na nthawe yomwe vokolola vanu vikhala vizinji. Adadzadza mitima yanu na chakudya komasoti na kuti mumbakhale okondwa.’—Machitidwe 14:17.
KO MWEVI VINKUTANTHAUZA CHANI?: Vinthu vose vomwe tikondwa navo mu chilengedwe ni mphaso yochokera kwa Mulengi. Mungatembeje maninge mphaso mwezi mukambaganizira kuti yemwe adapereka akuganizirani maninge.
Mudzagumane malangizo yothembeka yomwe yangakuthandizeni
BAIBOLO INENA KUTI: ‘Udzabvese vinthu volondola vomwe ni chaivo, vasitiriti na njira zose za vinthu vabwino.’—Miyambo 2:9.
KO MWEVI VINKUTANTHAUZA CHANI?: Ninge Mulengi wanu, Mulungu adziwa vomwe munkudekana kuti mumbakhale okondwa. Mukambawerenga Baibolo, imwepo mungapfunzire vinthu vomwe vingakuthandizeni pa moyo wanu.
Mudzagumane midawiro ya mibvunzo yanu
VOMWE BAIBOLO INENA: ‘Udzamudziwedi Mulungu.’—Miyambo 2:5.
KO MWEVI VINKUTATHAUZA CHANI?: Kudziwa kuti Mulungu aliko kungakuthandizeni kugumana midawiro ya mibvunzo yodekana maninge ninge aya: Ko chakulinga cha moyo ni chani? Ndawa chani tichabonera? Ko chichachitika ni chani tikamwalira? Mungagumane midawiro yake m’Baibolo.
Mudzakhale na chidikhiro pa vinthu va kutsogolo
BAIBOLO INENA KUTI: ‘‘Maganizo yangu kwa imwepo ninkuyadziwa bwino.’ Ninkuganizira vokupasani ntendere osati matsoka kuti mukhale na chidikhiro chabwino na tsogolo yabwino’ walewa teno Yahova.’—Yeremiya 29:11.
KO MWEVI VINKUTANTHAUZA CHANI?: Mulungu wapolomisa kuti kutsogolo uku adzachose vinthu voipa, adzamalise mabvuto komasoti na impfa. Mukambakhulupirira mapolomisi ya Mulungu, chidikhiro chanu cha vinthu va kutsogolo chidzakuthandizeni kupirira molimba ntima mabvuto yomwe munkugumana nayo ntsiku na ntsiku.
