Ko wasayansi anena momwe chilengedwe na momwe vamoyo vidayambira? M’dawiro wachigwato ni wakuti neye. Wanthu anango anena kuti wasayansi omwe adapfunzira vinthu va kudzulu ndiwo omwe angafotokoze momwe chilengedwe chidayambira. Koma shasha munango wa ku shikola ya Dartmouth dzina yake, Marcelo Gleiser yemwe akayikira kuti Mulungu aliko, adanena kuti: “Ise tiribe kukwanisa kunena momwe chilengedwe chidayambira.”

Koma ponena momwe moyo udayambira, nkhani inango ya m’magazini ya sayansi ya Science News inena kuti: “Ni vosakwanisika kudziwa momwe moyo udayambira pa dziko yapasi. Minyala komasoti vinthu vinango vakale, vomwe vidafuchirika vomwe vidakatithandiza kudziwa momwe vinthu venzere pakuyamba pa dziko, vinkugumanikalini pomwe.” Mwevi vinkuonesa kuti mpakana manje, wasayansi atazira kugumana m’dawiro wa bvunzo uyu, ko chilengedwe na vinthu va moyo vidayamba tani?

Koma panango mungadabwe kuti: ‘Peno vamoyo vidachita kulengewa, manje ko ni mbani yemwe adavilenga?’ Panango mudadzibvunzako kale mibvunzo ninge aya: ‘Peno alikodi Mulengi yemwe ni wanzeru komasoti wachidwi, ndawa chani abvuma kuti wanthu omwe adawalenga yekha ambabonere? Ndawa chani achabvuma kuti wanthu ambamutumikire munjira zosiyana? Ko ndawa chani iye abvuma kuti wanthu anango omwe anena kuti amutumikira ambachite vinthu voipa?’

Wasayansi angakwaniselini kugumana midawiro ya mibvunzo mwaya. Koma vimwevi vinkutathauzalini kuti mungagumanelini midawiro yobveka. Ndipo wanthu anango adagumana midawiro yobveka m’Baibolo.

Peno munkufuna kudziwa kuti ndawa chani wasayansi anango omwe adapfunzira Baibolo achakhulupirira kuti Mulengi aliko, ngenani pa jw.org. Fagani mawu yakuti: “Zokhudza Mmene Moyo Unayambira.”