NKHANI YOPFUNZIRA 31
Mbatembejani mwayi wa pemphero
‘Pemphero yangu ikhale yokonzewa ninge vofukiza pamaso panu.’—SAL. 141:2.
NYIMBO NA. 47 Muzipemphera kwa Yehova Tsiku Lililonse
VOMWE TIPFUNZIRE *
1. Ko timbachite tani na mwayi watinawo woyankhula na Yahova mpemphero?
NI MWAYI ukulu kwa isepano kupemphera kwa Yahova yemwe adakonza kudzulu na dziko yapasi. Ndoganizani so! Isepano tinamwayi woyankhula na Yahova nthawe iliyose, muchiyankhulo chilichose ndipo alibe kulewa mwatingakhalire pakupemphera. Tingapemphere kwa iye peno tili kudjeri panango tili basha kushipitali tichimbatsimikiza kuti Ababa wathu wachikondi ankutibvesera. Timbatembeje nthawe zose ndawa ya mwayi moyu.
2. Ko Mpfumu Davide adawonesa tani kuti angatembeja mwayi wa pemphero?
2 Mpfumu Davide angatembeja mwayi wa pemphero. Iye adaimbira Yahova kuti: ‘Pemphero yangu ikhale yokonzewa ninge vofukiza pamaso panu.’ (Sal. 141:1, 2) Munthawe ya Davide, vofukiza vopatulika vimbaphatisiwa basa na wantsembe pakutumikira Yahova ndipo ambavikonza mosamala maninge. (Eks. 30:34, 35) Pakuti vofukiza vimbakonzewa mosamala maninge, Davide ambafunambo kuganizira mosamala vinthu vomwe ankufuna kuuza Yahova mpemphero. Isepano tichadekanambo kuchita vimwevi kuti mapemphero yathu yambakondwerese Yahova.
3. Ko timbapemphere tani kwa Yahova, ndipo ndawa chani?
3 Tikambapemphera kwa Yahova, timbakhale waulemu maninge. Ndoganizirani masomphenya yodabwisa yomwe Yesaya, Ezekieli, Danieli na Yohane adawonesewa. Iwo adawonesewa vinthu vosiyana, koma vomwe adawona vinkuwonesa kuti Yahova ni Mpfumu yolemekezeka maninge. Yesaya ‘adawona Yahova ali khale pampando wachifumu wolemekezeka womwe wenze pamalo yokwizika.’ (Yes. 6:1-3) Ezekieli adawona Yahova ali khale kudzulu ndipo pamalo yose yomuzungulira penze ‘pogaka . . . ninge chitawaleza.’ (Ezek. 1:26-28) Danieli adawona ‘Wantsiku Zizinji’ ali vale vovala vichena na chedza cha moto wa pampando wake wachifumu. (Dan. 7:9, 10) Ndipo Yohane adawona Yahova ali khale pampando wachifumu wozunguliriwa na chitawaleza chokhuza ninge mwala wa emarodi. (Chiv. 4:2-4) Pakuti Yahova ni wolemekezeka maninge, ni mwayi wathu kuwona kuti wabvuma kuti timbapemphere kwa iye. Manje timbapemphere tani?
‘MUMBAPEMPHERE TENE’
4. Ko tinkupfunzira chani na mawu yoyamba ya mpemphero yachitsanzo yogumanika pa Mateyu 6:9, 10?
4 Lewengani Mateyu 6:9, 10. Pa Ulaliki Wapaphiri, Yesu adapfunzisa opfunzira wake momwe angapempherere munjira yobvumizika kwa Mulungu. Padati ‘mumbapemphere tene,’ Yesu adayamba kuguma vinthu vodikana maninge vomwe ni kuchenesewa kwa dzina ya Yahova, kubwera kwa Ufumu womwe udzacheneke adani wa Mulungu na vinthu vabwino vomwe iye adzachitire wanthu na dziko yapasi kutsogolo. Isembo tikambaguma vinthu vimwevi m’mapemphero yathu, tiwonesa kuti tinkufunisisa kuti Mulungu akwanirise chifuniro chake.
5. Ko Yahova atibvesera tikambaguma nkhani zathu popemphera?
5 Mawu yomwe Yesu adafotokoza patsogolo pake mpemphero, yankuwonesa kuti tingachite pomwe bwino kuguma nkhani zathu pakupemphera. Tingamukumbire Yahova kuti atipase chakudya cha ntsiku na ntsiku, kuti atikhululukire vophonya vathu, kuti atiteteze pamayesero nakuti atipulumuse kwa woipa. (Mat. 6:11-13) Tikambamukumbira Yahova vinthu vimwevi, tiwonesa kuti tinkudziwa kuti tifunika kuthandiziwa na iye ndipo tinkufuna kumukondweresa.
Ko mwamuna na nkazi wake ankupempherera chani? (Onani ndime 6) *
6. Ko vinthu vatingatomole m’mapemphero yathu, ni vimwevi vomwe viri mu pemphero yachitsanzo basi? Fotokozani.
6 Pamwapa sikuti Yesu ambafuna kuti opfunzira wake pakupemphera ambayankhule mawu mwaya ndendende. M’mapemphero yomwe Yesu adachita, adatomola vinthu vosiyanasiyana malingana na vomwe iye angawona kuti ni vofunika panthawe mweyo. (Mat. 26:39, 42; Yoh. 17:1-26) Isembo tingatomole vinthu vosiyanasiyana mpemphero mobverana na momwe viriri panthawe mweyo. Peno pali nkhani yomwe tinkufunika kusaina vochita, tingapemphere kuti Yahova atipase nzeru nakuti tikhale wobvesa vinthu. (Sal. 119:33, 34) Peno tinkufuna kuyamba utumiki woshupa, tingapemphere kuti Yahova atipase nzeru na kutithandiza kuwona momwe tingachitire utumiki muyo. (Miy. 2:6) Azibereki angapempherere wana wawo, wanambo angapempherere azibereki wawo ndipo tose tichadekana kupempherera mapfunziro ya Baibolo na wanthu wose womwe tichalalikira. Koma osati mapemphero yose timbandokhalira kukumbira vinthu basi.
Ko pakupemphera tingatamande Yahova na kumutembeja pa vinthu viponi? (Onani ndime 7-9) *
7. Ndawa chani tichadekana kutamanda Yahova mpemphero?
7 Osati timbayebwe kutamanda Yahova m’mapemphero yathu. Palibe pomwe munango watingatamande, koma Mulungu yekha basi. Iye ni ‘wabwino ndipo ni wokonzeka kukhululuka.’ Iye ni ‘wachifundo, wosafulumiza kukalipa ndipo ni wodzala na kukoma mtima na choonadi.’ (Sal. 86:5, 15) Tinavifukwa vabwino votamandira Yahova ndawa anamakhalidwe yabwino ndipo atichitira vinthu vabwino.
8. Ko tingamutembeje Yahova ndawa ya vinthu viponi? (Salimo 104:12-15, 24)
8 Kuthimizira pa kutamanda Yahova m’mapemphero yathu, tifunika pomwe kumbamutembeja ndawa ya vinthu vomwe achatipasa. Mwakulinganiza, tingamutembeje ndawa ya mafololi ya khaindi na khaindi yomwe tichawona, kuwanda kwa vakudya vosiyanasiyana vomwe adakonza na azishamwali wabwino watinawo. Ababa wathu wachikondi atipasa vinthu vimwevi na vinango vizinji pakufuna kuti timbakhale wokondwa. (Lewengani Salimo 104:12-15, 24.) Ndipo tinkutembeja pomwe Yahova ndawa yotipasa malangizo yazinji yotithandiza kukhala na chikhulupiriro cholimba na chidikhiro chabwino chakutsogolo.
9. Nchani chingatithandize kuti osati timbayebwe kutembeja Yahova? (1 Atesalonika 5:17, 18)
9 Ni vosashupa kuyebwa kutembeja Yahova pa vinthu vose vomwe ankutichitira. Manje nchani chingakuthandizeni kuti osati mumbayebwe? Mungachite bwino kumbanemba vinthu vomwe mwakhala munkukumbira Yahova na kukhala tcheru nkumbawona momwe ankukudawirirani. Mukateno mumbachite pemphero yomutembeja ndawa ya momwe ankukuthandizirani. (Lewengani 1 Atesalonika 5:17, 18.) Peno munthu watitembeja pa vomwe tachita, tikondwa maninge ndipo tidzibva kuti ndise wofunika. Isembo tikambakumbukira kutembeja Yahova ndawa yotidawira mapemphero yathu, iye akondwa maninge. (Akol. 3:15) Koma pali pomwe chifukwa chinango chotembejera Mulungu wathu.
MUMBATEMBEJE YAHOVA NDAWA YA MWANA WAKE WAPAMOYO
10. Mobverana na 1 Petulo 2:21, ndawa chani tichadekana kutembeja Yahova potitumizira Mwana wake padziko yapasi?
10 Lewengani 1 Petulo 2:21. Timbatembeje Yahova ndawa yotumiza Mwana wake wapamoyo kuti adzatipfunzise. Tikambapfunzira va moyo wa Yesu, timudziwa bwino Yahova na kudziwa pomwe vatingachite kuti timukondwerese. Tikambakhulupirira ntsembe ya Yesu, tingakhale paushamwali wolimba na Yahova ndipo tingakhale naye pantendere.—Aro. 5:1.
11. Ndawa chani tipemphera mudzina ya Yesu?
11 Tinkutembeja Yahova ndawa tikwanisa kupemphera kwa iye kupitira mwa Yesu. Iye ni njira yomwe achaphatisa basa pakudawira mapemphero yathu. Yahova akubva na kudawira mapemphero yoperekewa mudzina ya Yesu. Yesu adalewa kuti: ‘Chilichose chamungakumbire mudzina yangu, nidzakuchitireni, kuti Ababa alemekezeke ndawa ya Mwana wake.’—Yoh. 14:13, 14.
12. Ko nchifukwa chinango chiponi chotembejera Yahova ndawa yotipasa Mwana wake?
12 Ntsembe ya dipo ya Yesu ichitisa kuti Yahova ambatikhululukire machimo yathu. Malemba yafotokoza kuti Yesu ni ‘wantsembe nkulu yemwe ali kumakulu kwa mpando wachifumu wa Wolemekezeka kudzulu.’ (Aheb. 8:1) Yesu ni ‘mthandizi wathu yemwe ali pabodzi na Ababa.’ (1 Yoh. 2:1) Tinkutembeja maninge ndawa yakuti Yahova adatipasa Nkulu wa antsembe yemwe atibvesa tikaphonyesa ndipo ‘atiyankhulira mogwigwirira kwa Mulungu.’ (Aro. 8:34; Aheb. 4:15) Isepano ndise wochimwa ndipo adakati Yesu alibe kupereka ntsembe, sembe tilibe mwayi wopemphera kwa Yahova. Tinashuwa kuti imwepo muchitambo kusowa mawu kuti mumutembeje tani Yahova ndawa yopereka Mwana wake kuti adzatifere.
MBAPEMPHERERANI ABALE NA ALONGO WANU
13. Usiku wakuti mangwana yake afe, ko Yesu adawonesa tani kuti awakonda opfunzira wake?
13 Usiku wakuti mangwana yake afe, Yesu adapempherera opfunzira wake nkukumbira Ababa wake kuti ‘awanyang’anire kwa woipa.’ (Yoh. 17:15) Pamwapa Yesu adawoneseratu kuti ni wachikondi maninge. Ndawa olo kuti ambadziwa kuti manjemanje adzudziwe, nzeru zake zenze pa wopfunzira wake basi.
Ko tingagume vinthu viponi pakupempherera abale na alongo wathu? (Onani ndime 14-16) *
14. Ko tingawonese tani kuti tikonda abale na alongo wathu?
14 Kuti titewedzere Yesu, tichadekanalini kumbandoikhira nzeru pa vofuna vathu basi. Koma nthawe zose timbapempherere abale na alongo wathu. Tikambachita vimwevi, tiwonesa kuti tinkubvera lamulo ya Yesu yakuti timbakondane ndipo tiwonesa Yahova kuti chikondi chathu pa abale na alongo ni chikulu maninge. (Yoh. 13:34) Kupempherera abale na alongo wathu sikuti nkundotaya nthawe. Mawu ya Mulungu yafotokoza kuti ‘pemphero yogwigwirira ya munthu wolungama inamphanvu maninge.’—Yak. 5:16.
15. Ndawa chani tifunika kumbapempherera abale na alongo wathu?
15 Tifunika kupempherera abale na alongo wathu ndawa yakuti iwo ankugumana na mabvuto yazinji. Tingakumbire Yahova kuti awathandize kupirira matenda, matsoka yachilengedwe, nkhondo, kudzudziwa panango mabvuto yanango. Tingachite pomwe bwino kumbapempherera abale na alongo wathu omwe ankuyesesa mwakhama kuthandiza wosowa. Panango imwepo munkudziwako munthu yemwe ankubonera na mabvuto ninge yatafotokoza aya. Peno nteno, mungachite bwino kuchita kuwagumiratu dzina mukambawapempherera. Tikambakumbira Yahova kuti awathandize kupirira, ndiye kuti tiwakondadi abale wathu.
16. Ndawa chani tichadekana kupempherera omwe ankutsogolera pakati pathu?
16 Wanthu omwe ankutsogolera mumpingu angatembeje maninge tikambawapempherera ndawa mapemphero mwayo yangawathandize. Mtumi Paulo ambadziwa kuti ni vofunika kuti anango ambamupempherere. Iye adanemba kuti: ‘Munipemphererembo inepano, kuti nikafungula pakamwa pangu kuti niyankhule, nimbakwanise kuyankhula mwaufulu kuti nidziwise anango chintsintsi chopatulika cha ntontholo wabwino.’ (Aef. 6:19) Ntsiku zinombo pali abale azinji omwe ankutsogolera mwakhama. Tingawonese kuti tiwakonda peno tikumbira Yahova kuti adalise basa yawo.
PENO MWAKUMBIRIWA KUTI MUCHITE PEMPHERO PAGULU
17-18. Ko tingakumbiriwe kuti tipemphere pagulu pa vochitika viponi, koma timbakumbukire chani?
17 Nthawe zinango tikumbiriwa kuti tichite pemphero yoimira anango. Mwakulinganiza, mulongo yemwe ankuchitisa pfunziro ya Baibolo, angakumbire mulongo munzake yemwe wamuperekeza kuti achite pemphero. Peno mulongo woperekeza ankumudziwalini bwinobwino munthu yemwe ankupfunzisiwa Baibolo, panango angawone kuti vingakhale bwino kuti andochita pemphero yomalizira. Akachita teno, ndipo pangakwanise kuwona vangatomole akambapempherera wopfunzira.
18 M’bale angakumbiriwe kuti achite pemphero pansonkhano wokonzekera utumiki panango pamisonkhano ya mpingu. Abale omwe apasiwa mbali mweyi ambakumbukire cholinga cha nsonkhano moyu. Pochita pemphero, timbakumbukire kuti imweyi ni nthawelini yopereka malangizo panango kuchita vilengezo. Kazinjikazinji, 5 minutu imala na nyimbo na pemphero pamisonkhano ya mpingu. Ndipomwapa, m’bale yemwe wauziwa kuti achite pemphero osati ‘ambayankhule vizinji,’ makamaka pa pemphero yofungulira nsonkhano.—Mat. 6:7.
PEMPHERO IMBAKHALE CHINTHU CHOFUNIKA MANINGE PAMOYO WATHU
19. Nchani chingatithandize kuti ntsiku ya Yahova idzatigumane tili okonzeka?
19 Timbakonde maninge kupemphera ndawa yakuti ntsiku yomwe Yahova adzaweruze yafendera maninge. Pakulewa va ntsiku mweyi Yesu adati: ‘Ndipomwapa khalani maso ndipo mumbapemphere mogwigwirira nthawe zose kuti mudzakwanise kuthawa vinthu vose vomwe vidzachitike.’ (Luka 21:36) Inde, kupemphera kungatithandize kukhala na chikhulupiriro cholimba ndipo ntsiku yomwe Mulungu adzaweruze ingadzatigumane tili okonzeka.
20. Ko tingachite tani kuti mawu yathu yambakhale ninge vofukiza vonunkhira bwino?
20 Ko takambirana chani munkhani ino? Takambirana kuti timbatembeje mwayi wa pemphero. Tawona kuti vinthu vofunika maninge vatingapempherere vimbakhale vobverana na chifuniro cha Yahova. Tawona pomwe kuti tichadekana kutembeja Mulungu ndawa yopereka Mwana wake, ndawa yochita makonzedwe ya Ufumu ndipo timbapempherere pomwe abale na alongo wathu. Yahova afuna pomwe kuti timbapemphere kuti atithandize kugumana vosowa va ntsiku na ntsiku nakuti tikhale na chikhulupiriro cholimba. Tikambasankhula bwino mawu yati tilewe mpemphero, tiwonesa kuti tinkutembejadi mwayi watinawo wopemphera. Mawu yathu yambakhale ninge vofukiza vonunkhira bwino ‘kuti iye akondwe.’—Miy. 15:8.
NYIMBO NA. 45 Kusinkhasinkha kwa Mtima Wanga
^ Tinkutembeja maninge mwayi watinawo woyankhula na Yahova mpemphero. Tinkufuna kuti mapemphero yathu yambakhale ninge vofukiza vonunkhira bwino kuti iye ambakondwe. Munkhani ino, tikambirane vomwe tingagume m’mapemphero yathu. Tiwone pomwe vatingachite peno tauziwa kuti tipemphere pagulu.
^ MAWU YOFOTOKOZERA MAFOTO: Mwamuna na nkazi wake ankupempherera mwana wawo kuti akhale wotetezeka kushikola, akupempherera ababa wokalamba omwe ankudwala nakuti wopfunzira Baibolo apite patsogolo.
^ MAWU YOFOTOKOZERA MAFOTO: M’bale wachilumbwana ankutembeja Yahova ndawa ya ntsembe ya dipo ya Yesu, ndawa yotikonzera dziko yabwino na chakudya chabwino.
^ MAWU YOFOTOKOZERA MAFOTO: Mulongo ankukumbira Yahova kuti adalise Bungwe Yotonga na mzimu wake nakuti athandize omwe ankubonera na matsoka yachilengedwe na kudzudziwa.
