Yesu adapfunzisa wanthu kuti ambakhale mwantendere na anzawo. Koma nthawe inango iye adauza opfunzira wake kuti: ‘Ayi kuganiza kuti nidabweresa ntendere padziko yapasi, nilibe kubweresa ntendere koma chibemba. Pakuti nidabwera kudzagawanisa wanthu. Nidabwera kudzachitisa munthu kutsutsana na ababa wake, mwana nkazi kutsutsana na amayi wake, nakuti mtsikana wolowodwa atsutsane na apongozi wake akazi.’ (Mat. 10:34, 35) Ko Yesu ambafuna kulewa chani pamwapa?

Sikuti Yesu ambafuna kuti wanthu ambakhale wosabverana, koma kundoti ambadziwiratu kuti vomwe iye ankupfunzisa vingachitise kuti mabanja yanango yakhale yosabvana. Ndipomwapa, wanthu womwe ambafuna kukhala wopfunzira wa Yesu, angadekana kudziwiratu kuti wanthu anango wa m’banja mwawo angabveranelini navo. Peno iwo adakayamba kutsutsiwa na munzawo wa mu ukwati panango azibalembo anango, vidakakhala voshupa kuti apitirize kukhulupirira vomwe Yesu ankupfunzisa.

Baibolo ichalimbikisa Akhrisitu kuti ‘ambakhale mwantendere na wanthu wose.’ (Aro. 12:18) Koma vomwe Yesu adapfunzisa vingakhale ninge ‘chibemba’ m’mabanja yanango. Vimwevi vichitika makamaka peno anango m’banja abvuma vipfunziso va Yesu, koma anango ankufunalini ndipo ankutsutsa. Vikakhala tene, ndiye kuti munthu yemwe ankupfunzira choonadi wakhala na ‘adani’ wa pamuyi pake chaipo.—Mat. 10:36.

Opfunzira wa Yesu omwe ali m’banja ya wanthu wosiyana vipembedzo, kazinjikazinji agumana na viyeso vochitisa kuti vikhale voshupa kukhala wokhulupirika kwa Yahova na Yesu. Mwakulinganiza, azibale omwe ni Mbonilini angamuchichimize m’bale wawo kuti akhalepo pa vochitika va kutchetchi kwawo. Vimwevi vikachitika, chili kwa iwo kusankha kuti akondwerese mbani. Yesu adalewa kuti: ‘Aliyese yemwe akonda maninge ababa wake panango amayi wake kuposha inepano, ni wosayenerera kwa ine.’ (Mat. 10:37) Pamwapa sikuti Yesu ambalimbikisa wopfunzira wake kuti aleke kumbawakonda chaivo azibereki wawo. Koma ambandowalimbikisa kuti ambazindikire vinthu vofunika maninge. Peno wanthu wa m’banja mwathu ankutitsutsa ndawa yotumikira Yahova, tipitiriza kuwakonda. Koma tizindikira pomwe kuti tichadekana kukonda maninge Mulungu osati wanthu.

Vikhala vowawa maninge peno wanthu wa m’banja mwathu ankutitsutsa. Koma wopfunzira wa Yesu achadekana kukumbukira mawu ya Yesu yakuti: ‘Aliyese wosatambira muti wake wodzudzikirapo na kunilondola, ni wosayenera kwa ine.’ (Mat. 10:38) M’mawu yanango tingalewe kuti, Akhrisitu awona kuti kutsutsiwa na wanthu wa m’banja mwawo yandokhala mbali ya moyo wachikhrisitu ndipo achadekana kupirira. Koma iwo adziwa pomwe kuti khalidwe yawo yabwino ingathandize azibale womwe ni Mbonilini kuti kutsogolo adzayambe kupfunzira Baibolo.—1 Pet. 3:1, 2.