NKHANI YOPFUNZIRA 27
‘Dikhirani Yahova’
‘Dikhira Yahova, limba moyo ndipo uchite vinthu mwamphanvu.’—SAL. 27:14.
NYIMBO NA. 128 Tizipirira Mpaka Mapeto
VOMWE TIPFUNZIRE *
1. (a) Ko Yahova watipasa chidikhiro chiponi? (b) Ko ‘kudikhira Yahova’ kutanthauza chani? (Onani “Mathandauzo ya mawu yanango.”)
YAHOVA wapereka chidikhiro chabwino kwa wose omukonda. Manjemanjepa amalise matenda, vowawa na impfa. (Chiv. 21:3, 4) Wanthu ‘wopfatsa’ omwe ankumudikhira, adzawathandize kukonza dziko yapasi kuti ikhale paradaiso. (Sal. 37:9-11) Panthawe mweyo adzatithandize kukhala naye paushamwali wabwino kuposha manjeuno. Tinkudikhira vinthu vabwino maninge! Koma ko nchani chinkutitsimikizira kuti vomwe Mulungu watipolomisa vidzachitikedi? Tinkutsimikizira tene ndawa yakuti Yahova nthawe zose akwanirisa vawapolomisa. Ndipomwapa tinachifukwa chobveka ‘chodikhirira Yahova.’ * (Sal. 27:14) Tingachite bwino kukhala wodekha pakudikhira kuti akwanirise vawatipolomisa.—Yes. 55:10, 11.
2. Ko Yahova ankuchita kale vinthu viponi?
2 Panavizinji vomwe vinkutitsimikizira kuti Yahova akwanirisadi vomwe watipolomisa. Ndowonankoni nkhani yokomedza iyi. M’bukhu ya Chivumbulutso, Yahova adapolomisa kuti muntsiku zathu zino adzachitise kuti wanthu wosiyana dziko, khaindi, dzinza na chiyankhulidwe amutumikire mobverana. Ntsiku zino wanthu mwawa adziwika kuti wa ‘gulu ikulu.’ (Chiv. 7:9, 10) Podiya kuti pagulu mweyi pali amuna, akazi na wana wavikhalidwe na viseweredwe vosiyanasiyana, wose ali m’banja yapadziko yose yobverana. (Sal. 133:1; Yoh. 10:16) Wanthu wa m’gulu ikulu mweyi ankulalikira mwakhama maninge. Iwo ni wokonzeka kufotokoza va chidikhiro chawo cha padziko yapasi kwa munthu aliyese yemwe angafune kubvesera. (Mat. 28:19, 20; Chiv. 14:6, 7; 22:17) Peno imwepo ndimwembo wa m’gulu ikulu, tinashuwa kuti munkutsimikizambo kuti munkudikhira vinthu vabwino maninge.
3. Ko Satana anacholinga chiponi?
3 Satana andofuna kukukangisani kudzatambira vomwe Mulungu wapolomisa. Cholinga chake ni kukuchitisani kukhulupirira kuti Yahova alibe namwe basa ndipo adzakwaniriselini vomwe wakupolomisani. Satana akakwanisa kutisokoneza tene, tingakhalelini wolimba moyo ndipo tingasiye kutumikira Yahova. Ninge momwe tiwonere, Satana adayesesa kumuyesa Yobu mwanjira imweyiretu kuti amulekese kutumikira Yahova.
4. Ko tipfunzire chani munkhani ino? (Yobu 1:9-12)
4 Munkhani ino, tikambirane vomwe Satana adachita kuti amukangise Yobu kukhala wokhulupirika kwa Yahova. (Lewengani Yobu 1:9-12.) Tiwone vomwe tinkupfunzira pa chitsanzo cha Yobu. Tiwone pomwe kuti ndawa chani tichadekana kumbatsimikizira kuti Mulungu atikonda nakuti adzakwanirisedi vadatipolomisa.
SATANA ADAYESESA KUTI AMULUZISE CHIDIKHIRO YOBU
5-6. Ko nchani chidachitikira Yobu mukanthawe kang’onong’ono?
5 Vinthu vimbamufambira bwino maninge Yobu. Iye wenze pa ushamwali wabwino maninge na Yahova, wenze na banja ikulu ndipo wenze wolemera maninge. (Yobu 1:1-5) Koma muntsiku ibodzi chabe, Yobu adaluza vose vimwevi. Chinthu chomwe chidayamba kuluzika ni chuma chake. (Yobu 1:13-17) Patsogolo pake, wana wake wose adafa panthawe ibodzi. Ndoganizani momwe vimwevi vidamuwawira Yobu! Abereki viwawawa olo kuti aferewa mwana m’bodzi basi. Manje ndoganizani momwe Yobu na nkazi wake adabvera padabva kuti wana wawo wokwana 10 afa kabodzi na kabodzi. Ndipomwapa ni vosadabwisa kuwona kuti Yobu adafika pakung’amba vovala vake nkudzigwesera pantsi.—Yobu 1:18-20.
6 Patsogolo pake Satana adamubweresera matenda Yobu yomwe yadachitisa kuti iye anyozeke maninge. (Yobu 2:6-8; 7:5) Koma pakuyamba, Yobu wenze wolemekezeka maninge m’muyi mwawo. Wanthu ambabwera kwa iye kudzakumbira malangizo. (Yobu 31:18) Koma apa manje palibe yemwe ambamufendera. Iye wenze adaleka kuikhiriwa nzeru na azishamwali wake, azibale wake mpakana azinyabasa wa pamuyi pake chaipo!—Yobu 19:13, 14, 16.
Ntsiku zino, abale na alongo wathu angagumanembo na mabvuto ninge yomwe Yobu adagumana nayo (Onani ndime 7) *
7. (a) Ko Yobu angaganiza kuti ankubonera ndawa ya chani, koma iye adapewa kuchita chani? (b) Ko Mkhrisitu angagumane na mabvuto yaponi yolingana na yomwe tinkuwona pafoto apa?
7 Satana ambafuna kuti Yobu akhulupirire kuti iye ankugumana na mabvuto ndawa yakuti Yahova wasiya kumukonda. Mwakulinganiza, panthawe yomwe wana 10 wa Yobu enze mnyumba nkumbadyera pabodzi, Satana adabweresa chimphepo champhanvu nkugwesa nyumba mweyo. (Yobu 1:18, 19) Satana adachitisa pomwe moto kuchokera kudzulu nkudzanyekesa vipfuwo va Yobu na anyabasa wake. (Yobu 1:16) Pakuti moto na chimphepo vidabwera munjira yodabwisa maninge, Yobu adaganiza kuti wachitisa ni Yahova. Vimwevi vidamuchitisa kuganiza kuti panango viripo vawamuphonyera Yahova. Koma olo nteno iye alibe kuwaimba mulandu Ababa wake wakudzulu. Yobu ambadziwa bwino kuti Yahova ndiye adamupasa chuma chewenze nacho. Ndipomwapa iye adaganiza kuti peno vidakwanisika kutambira vinthu vabwino, ndiye kuti olo voipa vingashotembolini kubwera. Iye adalewa kuti: ‘Dzina ya Yahova ipitirize kutamandiwa.’ (Yobu 1:20, 21; 2:10) Podiya kuti Yobu adaluza wana na chuma chose, adapitiriza kukhala wokhulupirika kwa Yahova basi. Koma Satana alibe kuimira pamwapa.
8. Ko patsogolo pake Satana adaphatisa basa njira iponi pakuyesa Yobu?
8 Patsogolo pake Satana adaphatisa basa wanthu atatu omwe adabwera ninge ni azishamwali wa Yobu, koma ambandofuna kumuchitisa kudzibva kuti alibe na basa. Iwo adamutsimikizira Yobu kuti ankubonera tene ndawa yakuti pali vomwe adaphonyesa. (Yobu 22:5-9) Iwo adangingimira basi kumuuza kuti adakati ulibe kuphonya chinthu sembe unkuboneralini tene ndipo palibe vaungachite kuti Mulungu ayambe pomwe kukondwa nawe. (Yobu 4:18; 22:2, 3; 25:4) Iwo adayesesa kumuchitisa Yobu kuganiza kuti Mulungu ankumukondalini, alibe naye basa ndipo olo achisiya kumutumikira pangakhale palibe bvuto. Mawu mwaya yadamuchitisa Yobu kuganiza kuti mabvuto yake yadzamalelini.
9. Ko nchani chidathandiza Yobu kukhala wolimba?
9 Chitani ninge munkuwona vomwe vinkuchitika. Yobu ali khale padotha ndipo ankubva kuwawa maninge. (Yobu 2:8) Azinzake ankupitiriza kumuuza kuti ankubonera tene ndawa pali vadaphonya ndipo vingakonzekelini. Iye vinkumuwawa maninge ndawa adaluza wana wake ndipo ankubonera pomwe na matenda. Pakuyamba Yobu ankuwadawiralini chinthu. (Yobu 2:13–3:1) Peno azinzake mwawa ambaganiza kuti akwanise kumulekesa kutumikira Yahova, ndiye kuti ambandodzinamiza. Tinkulewa teno ndawa panthawe mweyi Yobu adawauza motsimikiza kuti: ‘Mpaka inepano kufa, nidzasiyelini kukhala wokhulupirika kwa Yahova.’ (Yobu 27:5) Ko nchani chidathandiza Yobu kukhala wolimba tene podiya kuti ambabonera? Kudziwa kuti Yahova amukonda ndiko kudamuthandiza. Iye ambadziwa pomwe kuti olo afe, Yahova adzamumukise.—Yobu 14:13-15.
KO TINGAMUTEWEDZERE TANI YOBU?
10. Ko nkhani ya Yobu inkutipfunzisa chani?
10 Nkhani ya Yobu inkutipfunzisa kuti Yahova adziwa bwino vomwe vinkutichitikira pamoyo wathu ndipo Satana angakwaniselini kutilekesa kumutumikira. Nkhani mweyi ingatithandize pomwe kubvesa kuti ndawa chani Yahova alekerera kuti timbabonere. Onankoni vinango vatinkupfunzira kuchokera kwa Yobu.
11. Ko nchani chingachitike tikapitiriza kuthemba Yahova? (Yakobo 4:7)
11 Yobu adawonesa kuti tikapitiriza kuthemba Yahova, tingakwanise kupirira mayesero yomwe Satana ankutibweresera. Malemba yafotokoza kuti tikachita teno, Ndyerekezi adzatithawe.—Lewengani Yakobo 4:7.
12. Ko chidikhiro chakuti wakufa adzamukisiwe chidamulimbisa tani Yobu?
12 Tichadekana kumbakhulupirira maninge kuti wakufa adzamukisiwe. Ninga mwatafotokozera kale kumayambiriro, Satana ayesesa kuti timbagope maninge impfa kuti atikangise kukhala wokhulupirika kwa Yahova. Satana adati Yobu angabvume kupereka chilichose ndipo angasiye kukhala wokhulupirika kwa Yahova pakundofuna kupulumusa moyo wake. Pamwapa Satana ambadzinamiza. Ndawa yakuti olo vimbawonekadi ninge kuti Yobu apolelini, iye alibe kusiya kukhala wokhulupirika kwa Yahova. Iye adakwanisa kupirira ndawa yakuti ambatsimikiza kuti Yahova ni wabwino ndipo adzakonze vinthu panthawe yake. Yobu wenze na chitsimikizo chakuti peno iye afikane pakufa Yahova akanati kukonza vinthu, ndiye kuti adzamumukise kutsogolo. Iye ambatsimikiza maninge kuti wakufa adzamukisiwe. Isembo tikambakhulupirira maninge vimwevi, tidzabvumelini kuti kugopa kufa kutikangise kukhala wokhulupirika kwa Yahova.
13. Ndawa chani tifunika kuyadziwa bwino mayesero yomwe Satana adayesa nayo Yobu?
13 Tinkufunika kuyadziwa bwino mayesero yomwe Yobu adagumana nayo ndawa yakuti Satana ankuphatisambo basa vibodzibodzi pakutiyesa ntsiku zino. Ndobvankoni vomwe iye adafotokoza. Adati: ‘Munthu [osati Yobu chabe] angapereke chilichose kuti apulumuse moyo wake.’ (Yobu 2:4, 5) Pamwapa mpfundo ya Satana yenze yakuti isepano timukondalini Yahova ndipo tingasiye kumutumikira moyo wathu ukakhala pangozi. Iye ambatsindika pomwe kuti Mulungu atikondalini ndipo awonalini khama yatinkuchita kuti timukondwerese. Koma ise omwe tinkudikhira Yahova angakwaniselini kutinamiza.
14. Ko mayesero yangatithandize tani kuti tidzidziwe bwino? Perekani chitsanzo.
14 Tikagumana na mayesero, timbawone kuti ni mwayi wathu kuti tidzidziwe bwino. Mayesero yomwe Yobu adagumana nayo yadamuthandiza kuzindikira kuti ankufunika kukulisa khalidwe ya kudzichepesa. (Yobu 42:3) Isembo tingadzidziwe bwino tikagumana na mayesero. M’bale munango dzina yake Nikolay, * yemwe adaikhiwa mudjeri podiya kuti ambadwala maninge, adalewa kuti: “Ninge mwaviriri kuti sefa ithandiza kuwona vomwe viri mu ufa, djeri ichitisambo kuti makhalidwe ya Mkhrisitu yawonekere.” Tikazindikira vinthu vomwe tichitalini bwino, ndipo patingakwanise kuchinja.
15. Ko tichadekana kumbatetekera mbani, ndipo ndawa chani?
15 Tichadekana kumbatetekera Yahova, osati adani wathu. Yobu angatetekera panthawe yomwe Yahova angayankhula naye. Mulungu adamupasa mibvunzo Yobu yomuthandiza kudziwa kuti alibe kumusiya. Yobu adadawira mibvunzo mwaya modzichepesa maninge ndipo adawonesa kuti angatembeja Yahova ndawa yomukomera mtima. Iye adalewa kuti: ‘Ningandobva va imwepo, koma apa manje nachita kukuwonani na maso yangu.’ (Yobu 42:5) Panthawe yomwe Yobu angayankhula mawu mwaya, wenze adakali khale padotha uku thupi yake yose inavilondavilonda ndipo panthawe ibodzibodzi mweyo ambalira wana wake. Podiya kuti venze teno, Yahova adamutsimikizira kuti amukonda ndipo adzamusiyelini.—Yobu 42:7, 8.
16. Mobverana na Yesaya 49:15, 16, ko timbakumbukire chani tikagumana na mayesero?
16 Ntsiku zino, wanthu angambatinyozembo nkumbatilewa kuti tilibe na basa. Iwo angayesese kuipisa mbiri yathu na kumbanyoza gulu yathu. Ndipo ‘angambatichitire pomwe voipa va khaindi iliyose.’ (Mat. 5:11) Nkhani ya Yobu inkutipfunzisa kuti Yahova adziwa kuti tingapitirize kukhala wokhulupirika kwa iye podiya kuti tinkugumana na mayesero. Yahova atikonda ndipo adzasiyelini wanthu omwe amudikhira. (Lewengani Yesaya 49:15, 16.) Ayi kumbatetekera mabodza ya adani wa Mulungu. M’bale James wa ku Turquia yemwe banja yake idagumana na mayesero yazinji adalewa kuti: “Tidazindikira kuti tikambatetekera mabodza ya adani wa Mulungu tifoke. Ndipomwapa tidapitiriza kuikhira nzeru pa momwe Ufumu wa Mulungu udzamalisire mabvuto nkumbatumikira Yahova mwakhama. Vimwevi vidatithandiza kuti tipitirize kukhala okondwa.” Ninge Yobu, isembo timbatetekere Yahova. Tikachita teno, mabodza ya adani wathu yadzatifokeselini.
MUKAMBADIKHIRA YAHOVA MUDZAKHALE WAMPHANVU
Yobu adadalisiwa ndawa ya kukhulupirika kwake. Iye na nkazi wake adakondwa na madaliso ya Yahova kwa nthawe itali (Onani ndime 17) *
17. Ko munkupfunzira chani pa chitsanzo cha akazi na amuna wokhulupirika otomolewa pa Aheberi msolo 11?
17 Pali pomwe wanthu anango omwe adakhalambo wolimba pa mayesero ninge Yobu. Mukalata yomwe mtumi Paulo adanembera Aheberi, adatomola atumiki anango azinji ndipo adawati ni ‘ntambo ukulu wa mboni.’ (Aheb. 12:1) Iwo adagumana na mayesero yazinji, koma adayesesa kukhala wokhulupirika kwa Yahova. (Aheb. 11:36-40) Ko kupirira kwawo na khama yawo potumikira Yahova vidondoyendambo papezi? Neye. Ni shuwadi kuti adaferamo osawonako kukwanirisika kwa mapolomisi ya Mulungu, koma iwo adapitiriza kudikhira Yahova. Ndipo ndawa yokhulupirira kuti Yahova ankukondwa nawo, enze otsimikiza kuti vomwe iye adapolomisa vidzachitikedi. (Aheb. 11:4, 5) Chitsanzo chawo chingatithandizembo kupitiriza kudikhira Yahova.
18. Ko imwepo ndimwe otsimikiza kuchita chani? (Aheberi 11:6)
18 Tinkukhala mudziko yomwe ikundoyenda ichiyipiraipira. (2 Tim. 3:13) Satana alibe kuleka kuyesa atumiki wa Mulungu. Podiya kuti iye ankutibweresera mabvuto tene, naboni tikhale otsimikiza kutumikira Yahova mwakhama na ‘kupitiriza kumudikhira.’ (1 Tim. 4:10) Kumbukirani kuti Yobu padathandiziwa pamabvuto yake, adazindikira kuti ‘Yahova ni wachikondi na wachifundo maninge.’ (Yak. 5:11) Isembo naboni tipitirize kukhala wokhulupirika kwa Yahova tichimbatsimikiza kuti iye adalisa wanthu ‘omufagafaga na moyo wose.’—Lewengani Aheberi 11:6.
NYIMBO NA. 150 Bwerani kwa Mulungu Kuti Mupulumuke
^ Tikambaganizira munthu yemwe adapirira mayesero yakuluyakulu, nthawe mweyo tikumbukiratu Yobu. Ko tingapfunzire chani kuchokera pa vomwe vidachitikira mwamuna moyu wokhulupirika? Tinkupfunzira kuti Satana angakwaniselini kutilekesa kutumikira Yahova. Tinkupfunzira pomwe kuti Yahova nthawe zose adziwa bwino vomwe tinkugumana navo. Ndipo ninge momwe Yahova adathandizira kuti mayesero ya Yobu yamale, adzamalisembo mabvuto yose yomwe tinkugumana nayo. Vochita vathu vikambawonesa kuti titsimikiziradi vimwevi, tingakhalembo mugulu ya wanthu omwe ‘ankudikhira Yahova.’
^ MATHANDAUZO YA MAWU YANANGO: Mawu yachiheberi yolewa va ‘kudikhira,’ yatanthauza ‘kuyembekezera’ chinthu chomwe unashuwa kuti chichitikedi. Yatanthauza pomwe kuthemba munthu panango kumukhulupirira na moyo wose.—Sal. 25:2, 3; 62:5.
^ Madzina yanango yachinjiwa.
