1. Ko ni vinthu viponi vomwe vichitisa wanthu kukhala na mantha?

 NDOWONANKONI vomwe vidachitikira Mboni zinango pa moyo wawo. Nestor na nkazi wake María, angada kuti akatumikire kudera yosowa. * Kuti akwanirise cholinga chawo chimwechi, angadekana kuyesesa kukhala moyo wosafuna vizinji. Koma angawona kuti angakwaniselini kumbakakhala wokondwa akambakakhala na kobiri zochepa. Pa nthawe yomwe Biniam adakhala wa Mboni za Yahova mu dziko yomwe basa yathu ingatsutsiwa maninge, adazindikira kuti pakuti iye ni mtumiki wa Mulungu adzadzudziwe. Vimwevi vidamupasa mantha maninge. Ndipo iye angachita pomwe mantha maninge akaganizira vomwe wa m’banja yake angachite ndawa yakuti iye wakhala wa Mboni. Valérie adagumaniwa na khansa yoipa maninge ndipo wenze na nkhawa kuti peno amugumane tani nfulumero yemwe angakwanise kumubvesa ndawa ya vikhulupiriro vake pa nkhani ya magazi. Iye wenze na nkhawa maninge ndipo ambachita mantha kuti panango amalizire kufa.

2. Ndawa chani tichadekana kuyesesa kumalisa mantha yathu?

² Ko imwepo mudakhalako kale na mantha yatene? Nivosachita kubvunza. Tikaleka kudziwa momwe tingamalisire mantha yathu, tingasalule vinthu mosaganiza bwino mpakana kudzonga ushamwali wathu na Yahova. Vimwevi ndivo vomwe Satana ankufuna. Iye angatichitise pomwe mantha kuti tileke kubvera malamulo ya Yahova kuphatanidzapo lamulo yakuti ndokoni mukalalikire ntontholo wabwino. (Chiv. 12:17) Satana ni woipa, alibe chifundo ndipo ni wamphanvu. Koma ni vokwanisika kuti imwepo mudziteteze. Mungachite tani?

3. Nchani chingatithandize kumalisa mantha yathu?

 ³ Tikambatsimikiza maninge kuti Yahova atikonda ndipo ali ku saidi yathu, Satana angakwaniselini kutigonjesa. (Sal. 118:6) Mwakulinganiza, munthu yemwe adanemba Salimo 118 ambagumana na mabvuto yazinji. Iye wenze na wanthu azinji womwe ambamuzonda kuphatanidzapo wanthu womwe enze na maudindo yakuluyakulu (vesi 9, 10). Nthawe zinango iye ambaboneresewa maninge na wanthu (vesi 13). Ndipo iye adatambira malangizo yamphanvu yochokera kwa Yahova (vesi 18). Podiya kuti venze teno, wamasalimo moyu adaimba kuti: ‘Nidzagopelini chinthu.’ Manje nchani chidamuthandiza kuti ambadzibve kuti niwotetezeka? Iye ambadziwa kuti podiya kuti Yahova wamupasa malangizo yamphanvu, ankupitiriza kumukonda basi. Wamasalimo moyu wenze wotsimikiza maninge kuti podiya kuti agumane na bvuto ya khaindi yanyi, Mulungu wake wachikondi nthawe zose niwokonzeka kumuthandiza.—Sal. 118:29.

4. Peno titsimikizira kuti Mulungu atikonda, ko tingakwanise kumalisa mantha pa vinthu viponi?

⁴ Patekha timbatsimikizire maninge kuti Yahova atikonda. Kuchita vimwevi kungatithandize kugwebana na vinthu vitatu ivi vomwe vibweresa mantha: (1) mantha yakuti tikwaniselini kusamalira banja yathu; (2) kugopa wanthu, na (3) kugopa kufa. Wanthu watafotokoza mu ndime yoyambirira ire, adakwanisa kugwebana na vinthu vochitisa mantha ndawa yakuti angatsimikiza kuti Mulungu awakonda.

5. Ni vinthu viponi vomwe vingachitise msolo wabanja kukhala na nkhawa ikulu? (Onani foto ya pakhava.)

⁵ Mkhrisitu yemwe ni msolo wabanja autengera siriyasi udindo wosamalira banja. (1 Tim. 5:8) Peno imwepo ndimwe msolo wa banja, panango nkati mwa nthenda iyi vakhala vokushupani maninge ndawa yakuti mudaluza basa yanu. Panango mwenze na nkhawa yakuti, pakuti mwaluza basa ndiye kuti mumbakwaniselini kugumana chakudya chokwana pamuyi panu. Panango mwenze pomwe na mantha yakuti pakuti mwaluza basa yanu, mukwaniselini kugumana pomwe inango. Apo neye, bvuto yanu ni yolingana na ya Nestor na María watafotokoza kumayambiriro ndipo munkuzeza kuti muyambe moyo wosafuna vizinji kuti mukwanise kukatumikira kudera yosowa. Satana vinkumufambira maninge akambagopsa wanthu mwanjira mweyi.

6. Ko Satana ayesesa kutichitisa kuti timbakhulupirire chani?

⁶ Satana ayesesa kutichitisa kuti timbakhulupirire kuti Yahova alibe nase basa ndipo alibe nthawe yotithandiza kugumana vosowa va banja yathu. Tikambakhulupirira bodza mweyi, tingamalizire kubvuma basa iliyose yomwe yagumanika podiya kuti inkubveranalini na mpfundo za m’Baibolo.

7. Ko Yesu ankutitsimikizira chani?

⁷ Yesu yemwe awadziwa bwino Ababa kuposha munthu aliyese, ankutitsimikizira kuti Mulungu ‘adziwa bwino vomwe tinkufunikira olo tikanati tamukumbira.’ (Mat. 6:8) Ndipo Yesu adziwa bwinobwino kuti Yahova ni wokonzeka kutithandiza kugumana vosowa pa moyo wathu. Kwa Mulungu isepano Akhrisitu tili ninge wana wake wa pamoyo. Pakuti Yahova ni msolo wa banja, angakangirelini kukwanirisa vomwe ankuuza misolo ya banja pa 1 Timoteyo 5:8.

8. (a) Nchani chingatithandize kumalisa mantha yakuti tikwaniselini kusamalira banja yathu? (Mateyu 6:31-33) (b) Ko tingaitewedzere tani banja inkuwonesewa pafoto iyi yomwe yabweresera chakudya mulongo?

⁸ Tikambatsimikizira maninge kuti Yahova atikonda tose pa banja yathu, tingakayikirelini kuti iye adzatithandize kugumana vomwe  tinkusowa. (Lewengani Mateyu 6:31-33.) Yahova ni wopasa maninge ndipo niwofunisisa kutithandiza kugumana vosowa. Pomwe iye adakonza dziko yapasi, adaikhamo vinthu vizinji maninge kuti tikwanise kukhala na moyo. Ndawa ya chikondi chake, iye adadzadza dziko yapasi na vinthu votithandiza kukhala wokondwa. (Gen. 2:9) Podiya kuti nthawe zinango pa moyo wathu tingakhale na vinthu ving’onong’ono, osati timbayebwe kuti ving’onong’ono vimwevo tavigumana ndawa yakuti Yahova watithandiza. (Mat. 6:11) Timbakumbukire nthawe zose kuti vomwe tinkudzimana manjeuno, ni vochepa maninge tikalinganiza na vomwe Yahova ankutichitira. Ndipo kutsogolo uku iye adzatipase moyo wosapera. Nestor na María adafikambo pakuzindikira mpfundo mweyi.—Yes. 65:21, 22.

9. Ko mwapfunzira chani pa chitsanzo cha Nestor na María?

⁹ Nestor na María enze na moyo wochitako bwino ku Colômbia. Iwo adalewa kuti: “Tidapfunzira kuti vikhala bwino kukhala na moyo wosafuna vizinji kuti tichite vizinji pa utumiki. Koma tenze na mantha kuti peno tikachite tani kobiri zikakatimalira.” Manje nchani chidawathandiza kumalisa mantha yawo? Iwo adaganizira va momwe Yahova achawonesera chikondi pakusamalira atumiki wake munjira zosiyanasiyana. Ndawa yotsimikiza maninge kuti Yahova adzawasiyelini, iwo adabvuma kusiya basa ya kobiri zizinji. Iwo adagulisa nyumba yawo ndipo adayenda kukathandiza kudera yosowa. Ko iwo ankubva tani pa vomwe adasalula? Nestor adalewa kuti: “Tidachita kuwona tekha momwe idakwanilisikira lemba ya Mateyu 6:33 pamoyo wathu. Tilibe kusowako chinthu ndipo manjeuno ndise wokondwa maninge.”

10. Ndawa chani ni vosadabwisa kuona kuti wanthu akugopsa wanthu anzawo?

¹⁰ Wanthu akhala ankuchitira voipa anzawo kundochokera kalekale. (Mla. 8:9) Mwakulinganiza, wanthu akandokhala na udindo agumanirapo mwayi wakuti ambadzudze anzawo, vigananga vinkudzonga maninge, aluno akabulali ku shikola, mpakana kumbanyoza anzawo womwe achapfunza nawo ndipo wanthu anango akhalalini bwino na wanthu wa m’banja yawo. Ndipomwapa ni vosadabwisa kuwona kuti wanthu achita mantha na wanthu anzawo. Manje mungachite kubvunza kuti ndawa chani Satana aphatisa basa wanthu pakufuna kugopsa anango?

11-12. Ko Satana aphatisa basa tani wanthu pakufuna kutigopsa?

 ¹¹ Satana ayesesa kuti timbagope wanthu anzathu kuti tikangire kuchita vomwe tinkufuna nakuti tileke kuphata basa yolalikira. Maboma ya mu nthawe ya Satana ino yakhala yankulambiza basa yathu na kutidzudza maninge. (Luka 21:12; Chiv. 2:10) Wanthu azinji wa mudziko ya Satana ino akhala ankufalisa mabodza yolewa va Mboni za Yahova. Wanthu womwe achakhulupirira mabodza mwaya, ayamba kutidzudza mu njira zosiyanasiyana. (Mat. 10:36) Ko vitidabwisa kuwona kuti Satana ankutidzudza teneuyu? Ne pang’ono. Viri teno ndawa yakuti iye wakhala ankuphatisa basa njira mweyi kundochokera mu nthawe ya Akhrisitu oyambirira!—Mac. 5:27, 28, 40.

¹² Kuchosapo pakuphatisa basa maboma kuti atichitise mantha, pali pomwe njira inango yomwe Satana achaphatisa basa. Wanthu anango achita mantha maninge kuti azibale wawo aganize chani akawawona kuti akhala Mboni. Iwo awakonda maninge azibale wawo mwawo ndipo afunambo kuti adziwe Yahova na kuyamba kumukonda. Ndipomwapa akwinyirira maninge akawona azibale wawo mwawa ankunyoza maninge Mulungu pabodzi na atumiki wake. Nthawe zinango wanthu womwe poyamba angatsutsa, patsogolo pake apfunzira choonadi. Koma ko tingachite tani peno vomwe tichakhulupirira vachitisa kuti azibale wathu aleke kubverana nase?

13. Ko kuzindikira kuti Yahova atikonda kungatithandize tani peno wanthu wa m’banja mwathu ankubveranalini nase? (Salimo 27:10)

¹³ Mawu yogumanika pa Salimo 27:10 ni yolimbikisa maninge. (Lewengani.) Tikambakumbukira momwe Yahova achatikondera, tidzibva wotetezeka podiya pa nthawe yomwe tikutsutsiwa maninge. Timbatsimikizire kuti Yahova adzatidalise ndawa ya kupirira kwathu. Iye ndiye angatisamalire bwino mwakuthupi na mwauzimu kuposha momwe munthu angachitire! Vimwevi ndivo vomwe Biniam watafotokoza kumayambiriro adazindikirambo.

14. Ko mwapfunzira chani kuchokera kwa Biniam?

¹⁴ Biniam adakhala wa Mboni za Yahova podiya kuti angadziwa kuti adzudziwe. Koma wonani momwe kutsimikizira kwake kuti Yahova amukonda kudamuthandizira kuti amalise mantha. Iye adalewa kuti: “Nidadzudziwa munjira yomwe ningaganiziralini. Koma chomwe chimbanipasa mantha maninge ni kudzudziwa na wanthu wa m’banja mwangu, osati na boma. Nimbachita mantha kuti panango nikakhala wa Mboni za Yahova, ababa wangu womwe ni  Mbonilini awone kuti nasokonezeka.” Koma olo kuti venze teno, Biniam angatsimikizira maninge kuti Yahova angasiyelini atumiki wake. Biniam adalewa kuti: “Nidayamba kuganizira momwe Yahova adathandizira wanthu anango pa bvuto yosowa kobiri na kudzudziwa. Nidazindikira kuti nikapitiriza kukhala wokhulupirika kwa Yahova, iye adzanidalise. Panidamangiwa mobwerezabwereza nkumbadzudziwa, nidachita kuwona nekha momwe Yahova adanithandizira kuti nipitirize kukhala wokhulupirika kwa iye.” Yahova adakhala Baba kwa Biniam ndipo atumiki wake adakhala ninge banja kwa iye.

15. Ndawa chani nkuphonyalini kugopa kufa?

¹⁵ Baibolo ilewa mobveka bwino kuti impfa ni mdani. (1 Akor. 15:25, 26) Tingambagope maninge impfa makamaka peno isepano panango munthu wa m’banja mwathu wadwala maninge. Koma ko ndawa chani tigopa kufa? Ni ndawa yakuti Yahova adatikonza na shungu yakuti timbakhale na moyo mpakana kalekale. (Mla. 3:11) Kugopa impfa mwachikatikati kungatithandize kuti titeteze moyo wathu. Mwakulinganiza, tingakwanise kusalula vochita mwanzeru pa nkhani ya vakudya vomwe tingambadye deire, kukhala na ndandanda yochita masenzeka yolimbisa thupi, kufaga chithandizo chabwino kwa madokota na kupewa kuchita vinthu voikha moyo wathu pangozi.

16. Pakuti mwachibadwa tigopa kale impfa, ko Satana ayesesa kuchita chani?

¹⁶ Satana adziwa bwinobwino kuti isepano tikonda moyo wathu. Ndipomwapa agumanirapo mwayi wolewa kuti tingabvume kuluza chilichose kuti tichinjanise na moyo wathu ndipo tingabvume olo kuluza ushamwali wathu na Yahova kuti tipulumuse moyo wathu manjeuno. (Yobu 2:4, 5) Koma tinkudziwa kuti nkunama kwake Satana! Pakuti iye ‘ndiye adayambisa impfa,’ iye ayesesa kuti timbaigope maninge mpakana tisiyane na Yahova. (Aheb. 2:14, 15) Nthawe zinango Satana angachitise wanthu kuti ambadzudze atumiki wa Yahova panango kuwauza kuti ulumbire kuti kuyambira lero ndinelini pomwe wa Mboni. Nthawe zinango Satana angafune kutisokoneza pa nkhani yotambira chithandizo cha kushipitali. Manfulumero panango wanthu wa m’banja mwathu womwe ni Mbonilini, angambatilimbikise kuti tibvume kuikhiwa magazi, vomwe ni vinthu vosabverana na malamulo ya Mulungu. Apo neye munthu munango angatilimbikise kuti titambire chithandizo cha mankhwala chomwe nchosabverana na mpfundo za m’Malemba.

17. Mobverana na Aroma 8:37-39, ndawa chani tichadekanalini kugopa kufa?

¹⁷ Nishuwadi kuti isepano tifunalini kufa, koma tinkudziwa kuti Yahova angalekelini kutikonda peno vimwevi vingatichitikire. (Lewengani Aroma 8:37-39.) Shamwali wa Yahova akafa, iye apitiriza kumukumbukira ninge mwevenzere adakali na moyo. (Luka 20:37, 38) Iye anashungu yodzamumukisa pomwe. (Yobu 14:15) Yahova adalipira kale vose kuti ‘tikwanise . . . kudzakhala na moyo wosapera.’ (Yoh. 3:16) Tikudziwa bwino kuti Yahova atikonda maninge ndipo atiikhira nzeru. Ndipomwapa m’malo mothamingira kusiya Yahova peno tadwala panango tauziwa kuti tiphewe, tingachite bwino kukumbukira kuti iye angatilimbikise, kutipasa nzeru na mphanvu. Vimwevi ndivoletu vadachita Valérie na mwamuna wake.—Sal. 41:3.

18. Ko tinkupfunzira chani kuchokera kwa Valérie?

¹⁸ Pewenze na magole 35, Valérie adagumaniwa na khansa yoipa maninge. Wonani momwe kutsimikiza kuti Yahova amukonda kudamuthandizira kuti aleke kugopa impfa. Iye adati: “Padandonigumana na khansa mweyi, inepano na mwamuna wangu vidatiwawa maninge.  Nimbafunika kuchitiwa operasau ikulu kuti nikhale na moyo. Nidacheza na manfulumero yazinji koma wose ambalamba kunichita operasau yosaphatisa basa magazi! Podiya kuti viritene Yahova waniwonesa chikondi maninge pa moyo wangu. Inembo ninamwayi wakumuwonesa kuti nimukonda. Nthawe zizinji nakhala nikuuziwa vinthu vosalimbikisa, koma vimwevi vindonipasa mphanvu yopitiriza kutumikira Yahova m’malo mopasa mpata Satana kuti awine. Ndipo vidakwanisika kuchitiwa operasau yosaphatisa basa magazi. Podiya kuti namanje nidakadwaladwala basi, Yahova ankupitiriza kutipasa vosowa vathu pa moyo. Mwakulinganiza, nikanati kuchitiwa operasau tidapfunzira Nsanja ya Olonda ya msolo wakuti: ‘Limbani Mtima Pokumana ndi Mavuto.’ * Nkhani mweyi idatilimbikisa maninge ndipo timbayiwerenga mobwerezabwereza. Kupfunzira nkhani zatene na kukhala na chizolowezi chombawerenga Baibolo nthawe zose, kudathandiza inepano na mwamuna wangu kuti tisalule vochita mwanzeru nakuti tikhale na ntendere wamuntima.”

19. Nchani chomwe chichitike manjemanje?

¹⁹ Mothandiziwa na Yahova, Akhrisitu wose padziko yapasi angakwanise kugwebana na mabvuto yomwe Satana ankuwabweresera. (1 Pet. 5:8, 9) Imwepo mungakwanisembo. Manjemanje Yahova adzatumize Yesu na angelo wake kuti ‘adzacheneke basa za Ndyerekezi.’ (1 Yoh. 3:8) Ndipo ‘palibe chomwe chidzagopse atumiki wa Mulungu padziko pano panango kuwachitisa mantha.’ (Yes. 54:14; Mika 4:4) Koma pakudikhira nthawe mweyo, tose padakalipano tichadekana kuyesesa kuti timalise mantha yathu.

20. Nchani chingatithandize kumalisa mantha yathu?

²⁰ Tichadekana kuyesesa kupitiriza kumbatsimikizira kuti Yahova atikonda ndipo nthawe zose achateteza atumiki wake. Kuti tikwanise kuchita vimwevi, tichadekana kumbaganizira na kukambirana momwe Yahova adatetezera atumiki wake kalekale. Ndipo tingachite pomwe bwino kuganizira momwe Yahova adatithandizira pa nthawe yomwe tidagumana na mabvuto. Mothandiziwa na Yahova, tingakwanise kumalisa mantha yathu!—Sal. 34:4.