1. Ko Yahova ankuwatsimikizira chani wanthu womwe alapa?

 PODIYA kuti Yahova ni Mulengi wathu, wotipasa malamulo na woweruza, iye ni Baba wathu wachikondi. (Sal. 100:3; Yes. 33:22) Tikamuphonyera Yahova koma nkulapa na moyo wose, iye sikuti andofuna chabe kutikhululukira koma akhala wokonzeka kuchita vimwevi. (Sal. 86:5) Pakuphatisa basa mneneri Yesaya Yahova adawatsimikizira wanthu wake kuti: ‘Podiya kuti machimo yanu yakhale yofuwira ninge magazi, yadzachene ninge thonje.’—Yes. 1:18.

2. Ko tingachite tani kuti timbakhale pa ntendere na anzathu?

² Pakuti ndise wochimwa, tingayankhule panango kuchita vinthu vokalipisa anzathu. (Yak. 3:2) Koma vimwevi vikuthandauzalini kuti tingakwaniselini kukhala nawo pa ushamwali neye. Tingakwanise peno tingapfunzire kukhululukirana. (Miy. 17:9; 19:11; Mat. 18:21, 22) Peno munzathu watiphonyera vinthu ving’onoving’ono, Yahova afuna kuti timbamukhululukire. (Akol. 3:13) Tinachifukwa chobveka chochitira vimwevi. Chifukwa chake nchakuti Yahova atikhululukira ‘na moyo wose.’—Yes. 55:7.

3. Ko tikambirane chani mu nkhani ino?

³ Munkhani ino tikambirane momwe wathu wochimwa ise tingatewedzerere Yahova pa nkhani yokhululuka. Tiwone midawiro ya mibvunzo aya: Ko ni machimo yaponi yomwe tingafunikane kukauza akulu? Ndawa chani Yahova ankutilimbikisa kuti timbakhululukirane? Ndipo tingapfunzire chani kwa abale na alongo womwe adawawiwa maninge ndawa yophonyerewa na anango?

4. (a) Ko mtumiki wa Yahova achadekana kuchita chani peno wachita chimo ikulu? (b) Ko akulu ambachite chani posamalira nkhani ya munthu yemwe wachimwa?

⁴ Peno munthu ankuchita machimo yakuluyakulu timbawauze akulu. Machimo yanango yandandalikiwa pa 1 Akorinto 6:9, 10. Munthu akambachita machimo yakuluyakulu ndiye kuti ankuphwanya chilamulo cha Mulungu. Mkhrisitu akachita machimo yakuluyakulu mwaya achadekana kuuza Yahova m’pemphero na kufenderera akulu wa mumpingu. (Sal. 32:5; Yak. 5:14) Ko akulu anaudindo uponi pankhani zatene? Yahova yekha ndiye anaudindo wokhululukira munthu na moyo wose. Ndipo achita vimwevi pophatisira basa ntsembe ya Mwana wake. * Olo kuti viri teno, Yahova wawapasa akulu udindo wophatisa basa Malemba kuti adziwe peno munthu yemwe wachita chimo angafunike kupitiriza kukhala mu mpingu panango neye. (1 Akor. 5:12) Kuti akwanise kuweruza bwino angafunike kudawira mibvunzo aya: Ko iye wachitira dala? Ko iye ambabisa chimo yake? Ko iye wakhala ankuchita chimo mweyo kwa nthawe itali? Ndipo mbvunzo wodikana maninge ni wakuti, ko iye walapadi chaivo? Ko panavizindikiro vakuti Yahova angamukhululukire?—Mac. 3:19.

5. Ko basa ya akulu ibweresa madaliso yaponi?

⁵ Akulu akambasamalira nkhani zatene, ambachite vinthu vomwe Yahova angakondwere navo. (Mat. 18:18) Ko kuchita vimwevi kungaphindulise tani abale na alongo? Chingakhale chanzeru kuchosa munthu wosalapa mu mpingu, ndawa yakuti wakhumudwisa Yahova pabodzi na atumiki wake. (1 Akor. 5:6, 7, 11-13; Tito 3:10, 11) Vimwevi vingathandize pomwe munthu yemwe wachimwa kuti alape nakuti akhululukiriwe na Yahova. (Luka 5:32) Peno munthu wochimwa walapa, akulu amupempherera kuti akhale pomwe pa ushamwali wabwino na Yahova.—Yak. 5:15.

6. Peno munthu wafika pakuchosewa, ko nivokwanisika kukhululukiriwa na Yahova? Fotokozani.

⁶ Peno munthu angawonese kuti ankufunalini kulapa panthawe yomwe wagumana na akulu, angachosewe mumpingu. Peno iye waphwanya malamulo ya boma, akulu angamutetezelini pa mabvuto yomwe angagumane nayo. Yahova wabvuma kuti maboma yambaweruze na kulanga munthu aliyese yemwe waphwanya malamulo, vilibe basa peno ni wolapa panango neye. (Aro. 13:4) Peno iye patsogolo pake angadzilinge nkulapa pa vomwe adachita, Yahova ni wokonzeka kumukhululukira. (Luka 15:17-24) Yahova angamukhululukire podiya kuti iye adachita chimo ikulu.—2 Mbiri 33:9, 12, 13; 1 Tim. 1:15.

7. Ndawa chani tichadekana kumukhululukira munzathu podiya kuti watiphonyera maninge?

⁷ Nivolimbikisa maninge kudziwa kuti tilibe mphanvu youza Yahova kuti akhululukire munthu panango neye! Olo viriteno pali vatichadekana kuchita. Ko tichadekana kuchita chani? Nthawe zinango munthu akatiphonyera, angazindikire kuphonya kwake nkubwera kudzatikumbira kuti timukhululukire. Koma nthawe zinango angakwaniselini kubwera kudzatipepesa. Podiya kuti viriteno, tichadekana kumukhululukira basi m’malo mwa kumusungira chakumoyo. Koma vifuna khama kuti timukhululukire munthu ndipo nthawe zinango vingatenge nthawe ndawa yakuti adatikalipisa. Nsanja ya Olonda ya 15 Setembro, 1994, idalewa kuti: “Mukakhululukira munthu yemwe wakuphonyerani vitanthauzalini kuti mukuchepesa vomwe iye wakuchitirani. Akhrisitu ise tichadekana kuyesesa kuyebwa vomwe munzathu watichitira nkusiya  vose m’manja mwa Yahova. Iye ni Woweruza wachilungamo ndipo adzawonesese kuti chilungamo chachitika panthawe yake.” Ndawa chani Yahova ankutilimbikisa kuti timbakhululukire anzathu tichimbatsimikiza kuti iye ayisamalire bwino nkhani?

8. Ko tikambakhululukira anzathu tingawonese tani kuti tinkutembeja chifundo chomwe Yahova adatiwonesa?

⁸ Tikambakhululukira anzathu ndiye kuti tinkutembeja chifundo chomwe Yahova adatiwonesa. Nthawe zinango Yesu adafotokoza fanizo ya bwana yemwe adauza nyabasa wake kuti osati alipire chikwerete chomwe adakakwanisalini kulipira. Koma nyabasa moyu yemwe adakhululukiriwa adakangira kuchitira chifundo mwanzake yemwe wenze adamukwereta kobiri ing’onong’ono. (Mat. 18:23-35) Ko pamwapa Yesu ankutipfunzisa chani? Tikupfunzira kuti peno tinkutembejadi chifundo chomwe Yahova adatiwonesa, tichadekana kuyesesa kukhululukira anzathu. (Sal. 103:9) Ntsanja ya ulonda inango idafotokoza nkhani mweyi kuti: “Podiya kuti tiwakhululukire vinthu vizinji tani anzathu, vingalinganelini na vomwe Yahova adatikhululukira pakuphatisa basa Yesu.”

9. Ko Yahova awonesa chifundo kwa wanthu wotani? (Mateyu 6:14, 15)

⁹ Wanthu wokhululukira anzawo akhululukiriwambo. Yahova awonesa chifundo kwa wanthu womwe ni wachifundo. (Mat. 5:7; Yak. 2:13) Yesu adabvekesa bwino mpfundo mweyi pa nthawe yomwe adapfunzisa wopfunzira wake kupemphera. (Lewengani Mateyu 6:14, 15.) Vomwe Yahova adauza mtumiki wake Yobu vinkutipfunzisa pomwe mpfundo ibodzibodzi. Vomwe Elifazi, Bilidadi na Zofari adachita vidamuwawa maninge Yobu, koma Yahova adauza Yobu kuti uwapempherere. Yobu padachita vimwevi adadalisiwa maninge na Yahova.—Yobu 42:8-10.

10. Peno tingasungire munzathu chakumoyo, ko nimbani angadzongeke? (Aefeso 4:31, 32)

¹⁰ Munthu akambasunga chakumoyo adzidzonga yekha. Yahova afuna kuti timbakhale womasuka ndawa yokhululukira mwanzathu osati kumusungira chakumoyo. (Lewengani Aefeso 4:31, 32.) Iye ankutilimbikisa kuti tisiye ‘ukali na kupsa mtima.’ (Sal. 37:8) Tingawonese kuti ndise wanzeru peno tingatewedze malangizo mwaya. Kusunga chakumoyo kungachitise kuti timbadwaledwale ndipo tingambaganizelini bwino. (Miy. 14:30) Peno tingamwe logo tingafe ndise osati munthu munango. Nchibodzibodzimbo, peno tingasunge chakumoyo sikuti vingawawe munthu muyo koma vingashupe isepano. Pamwapa mpfundo niyakuti tikambakhululukira anzathu tidziphindulisa tekha. (Miy. 11:17) Tikhala na ntendere wamumtima ndipo tipitiriza kutumikira Yahova bwinobwino.

11. Ko Baibolo ilewa chani pa nkhani yobwezera? (Aroma 12:19-21)

¹¹ Kubwezera ni kwa Yahova. Yahova alibe kutipasa udindo wobwezera peno munthu munzathu watiphonyera. (Lewengani Aroma 12:19-21.) Pakuti isepano ndise wochimwa, tiwona vinthu mophonyeka ndipo tingakwaniselini kuweruza bwinobwino ninge momwe Yahova angachitire. (Aheb. 4:13) Ndipo nthawe zinango tisokonezeka maninge vinthu vikaphonyeka ndipo tingakwaniselini kuweruza bwino. Yahova adauzira Yakobo kunemba kuti: ‘Ukali wa munthu ubalalini chilungamo cha Mulungu.’ (Yak. 1:20) Ndipomwapa timbatsimikize kuti Yahova ndiye angakonze bwinobwino vinthu ndipo adzachite vimwevi pa nthawe yake.

12. Ko tingawonese tani kuti titsimikiza kuti Yahova ni wachilungamo?

 ¹² Tikambakhululukira anzathu tiwonesa kuti Yahova ni wachilungamo. Tikambasiya vose m’manja mwa Yahova ndiye kuti tinkutsimikiza kuti iye adzamalise mabvuto yose yobwera ndawa ya uchimo. Mu dziko inyowani yomwe yafendera, palibe pomwe wati adzabve kuwawiwa ndipo vinthu voipa ‘vidzabwererelini pomwe mumtima.’ (Yes. 65:17) Koma peno ndise wokalipa ndawa ya vomwe munzathu watiphonyera, ko nivokwanisikadi kuyebwa vomwe iye watichitira? Wonankoni momwe anango adakwanisira kuchita vimwevi.

13-14. Ko mwapfunzira chani pa momwe Tony adakhululukirira José?

¹³ Abale na alongo anango adasaina kundokhululuka podiya kuti enze adaphonyerewa maninge na anzawo. Ko iwo adaphindula tani ndawa yochita vimwevi?

¹⁴ Tony * yemwe akhala ku Filipinas padakhala magole yazinji ali Mboni, adazindikira kuti nkulu wake adaphewa na munthu munango dzina yake José. Tony wenze wokalipa maninge ndipo ambafuna kubwezera. Pa nthawe mweyi nkuti José ali kudjeri ndawa vomwe adachita. Patsogolo pake padati José wabulisiwa kudjeri, Tony adachita kulumbira kuti akandomugumana amupheretu. Iye mpakana adachita kugula mpfuti kuti akwanirise cholinga chake. Tony adayamba kupfunzira Baibolo na Mboni za Yahova. Iye adalewa kuti: “Paningapfunzira Baibolo, nidazindikira kuti ninkufunika kuchinja kaganizidwe kangu. Ndipo vimwevi vimbaphatanidzapo kusiya ukali wangu.” Panthawe mweyo Tony adabatizika ndipo patsogolo pake adadzakhala nkulu mumpingu. Ndoganizani mwadadabwira padazindikira kuti José adachinjambo nkukhala wa Mboni za Yahova! Padagumana adakumbatirana ndipo Tony adauza José kuti adamukhululukira. Tony adati vimwevi vidamuthandiza kukhala wokondwa maninge podiya kuti venze voshupa pakuyamba. Yahova adamudalisa Tony ndawa ya kukhululuka kwake.

15-16. Ko mwapfunzira chani kwa Peter na Sue pankhani yokhululuka?

¹⁵ Mu 1985, Peter na Sue adayenda ku  Nyumba ya Ufumu kuti akachite misonkhano. Koma misonkhano ili nkati adadabwa kubva kuti chinthu chaphulika. Munthu munango adachita kuteya bomba mu Nyumba ya Ufumu mweyi kuti idzongeke. Kuphulika kwa bomba muku kudachitisa kuti matu ya Sue yafungiretu ndipo mawonekedwe yake yadachinja. * Peter na Sue ambandokhalira kudandaula kuti ‘nimbani wachita vimwevi? Munthu moyu ni woipa maninge.’ Magole yazinji patsogolo pake, munthu ule yemwe adathusa boma yemwe wenzelini wa Mboni adadzadziwika ndipo adaikhiwa mudjeri. Peter na Sue padabvunziwa kuti peno adamukhululukira munthu moyu, adadawira kuti: “Yahova atipfunzisa kuti kusunga chakumoyo kungachitise kuti timbandokhalira kudwaladwala ndipo kungadzonge kaganizidwe kathu. Ndipomwapa pavidandochitika vimwevi tidakumbira Yahova kuti atithandize kuchosa ukali kuti tikhale na moyo wabwino.”

¹⁶ Ko venze vosashupa kuti iwo amukhululukire munthu moyu? Neye. Mwamuna adalewa kuti: “Olo manjeuno nikambawona momwe nkazi wangu ankubonerera, tose vitiwawa ndipo tikalipa maninge. Koma tikambayesesa kupewa kumbandokhalira kuganizira nkhani mweyi, ukali wathu uchoka ndipo tose awiri tinamaganizo yakuti peno munthu moyu yemwe adateya bomba angadzakhale wa Mboni kutsogolo, tidzamutambire na manja yawiri. Vimwevi vidatipfunzisa kuti tikambaphatisa basa mpfundo za m’Baibolo, tingakhale womasuka. Ndipo mpfundo za m’Baibolo zingatimasule munjira yomwe tingaganiziralini. Tilimbikisiwa pomwe tikambaganizira kuti Yahova manjemanje adzamalise mabvuto yose.”

17. Ko mwapfunzira chani na momwe Myra adakhululukira mwamuna wake?

¹⁷ Myra adapfunzira choonadi ali kale pabanja ndipo wenze na wana awiri ang’onoang’ono. Mwamuna wake ambafunalini kupfunzira choonadi. Panthawe mweyi mwamuna wake adachita chigololo ndipo adamuthawa. Myra adalewa kuti: “Mwamuna wangu padanithawa nkunisiya na wana wangu awiri, vidaniwawa maninge, nimbadziwona kuti nilibe  na basa, nimbadzikaikira ndipo nimbandokhala wokalipa.” Banja yake paidamala, iye adapitiriza kuwawiwa mtima ndawa yosiyiwa. Myra adapitiriza kulewa kuti: “Vidaniwawa kwa minyezi yazinji ndipo nidazindikira kuti vimwevi vachitisa kuti ushamwali wangu na Yahova pabodzi na anzangu ukhale wosalimba.” Myra ntsiku zino alewa kuti iye adachosa ukali wake ndipo andokhaliralini kumuimba mulandu mwamuna wake ndawa yakuti adamusiya. Shungu yake ni yakuti mwamuna moyu kutsogolo adzayambe kutumikira Yahova. Myra andonyang’ana kutsogolo basi. Podiya kuti ankulera yekha wana, iye adakwanisa kuwapfunzisa ndipo manjeuno ankutumikirambo Yahova. Vimwevi vamuthandiza kuti ambakhale wokondwa maninge.

18. Pakuti Yahova ni Woweruza wachilungamo, ko timbakhale wotsimikizira chani?

¹⁸ Ni volimbikisa maninge kudziwa kuti tilibe udindo wouza Yahova momwe iye aweruzire munthu. Pakuti Yahova ni Woweruza Nkulu, iye adziwa yekha vomwe angachite munthu akaphonyesa. (Aro. 14:10-12) Ndipomwapa timbakhale otsimikiza kuti Yahova nthawe zose ambaweruze mwachilungamo mobverana na mpfundo zake zosiyanisira chabwino na choipa. (Gen. 18:25; 1 Maf. 8:32) Iye angachitelini vinthu vilibe chilungamo ne pang’ono!

19. Ko Yahova yemwe ni wachilungamo adzachite chani kutsogolo?

¹⁹ Tinashungu yakuti ifike nthawe yomwe Yahova adzamalise mabvuto yose yobwera ndawa ya uchimo. Panthawe mweyo, kukwinyirira kwathu kose ndawa ya voipa vomwe vatichitikira kudzamaliretu. (Sal. 72:12-14; Chiv. 21:3, 4) Tidzakwaniselini pomwe kukumbukira vinthu va kalekale. Koma pakudikhira nthawe yabwino mweyi kuti ifike, pakali pano titembeja maninge Yahova ndawa atipasa mphanvu kuti tikwanise kumutewedzera pankhani yokhululuka.