1. Mobverana na Mlaliki 7:20, ko Mpfumu Solomo adafotokoza mpfundo iponi yomwe ni yazedi?

 MPFUMU Solomo adalewa kuti: ‘Palibe wolungama ne m‘bodzi padziko pano yemwe achita vabwino vokhavokha osachimwa.’ (Mla. 7:20) Vimwevi ni shuwadi ndawa yakuti tose tiphonyesa. (1 Yoh. 1:8) Ndipomwa tose tifuna kuti Mulungu na wanthu anzathu ambatikhululukire tikaphonyesa.

2. Ko tikubva tani tikakhululukiriwa na shamwali wathu wapamoyo?

² Tinashuwa kuti imwepo munkukumbukira nthawe yomwe mudakalipisako shamwali wanu wapamoyo. Mwenze wofunisisa kukambirana naye kuti mukonze pomwe ushamwali wanu. Ndipomwapa imwepo mudadzichepesa nkumukumbira kuti akukhululukireni. Ko mudabva tani padakukhululukirani? Ni vosachita kubvunza kuti mudakondwa maninge.

3. Ko tikambirane chani munkhani ino?

³ Ndise wofunisisa kuti Yahova akhale Shamwali wathu wapamoyo. Koma nthawe zinango tingachite panango kuyankhula vinthu vomwe vingamukalipise. Manje vikakhala teno, ko tingatsimikize tani kuti iye ni wokonzeka kutikhululukira? Ko kukhululukiriwa na munthu munzathu ni kosiyana tani na kukhululukiriwa na Yahova? Ndipo tingachite tani kuti Mulungu ambatikhululukire?

4. Ndawa chani tingakhale wotsimikiza kuti Yahova nthawe zose ni wokonzeka kukhululuka?

⁴ Baibolo ititsimikizira kuti Yahova ni wokonzeka kukhululuka. Panthawe yomwe iye angadzidziwikisa kwa Mose paphiri ya Sinai, Iye adayankhula naye pakuphatisa basa mngelo kuti: ‘Yahova,  Yahova, Mulungu wachifundo, wosafulumiza kukalipa, wodzala na chifundo na kukoma mtima kosapera na choonadi. Wosungira mibadwo yazinji kukoma mtima kosapera na wokhululukira vophonya na machimo.’ (Eks. 34:6, 7) Yahova ni wachifundo maninge ndipo nthawe zose ni wokonzeka kukhululukira wanthu womwe alapa.—Neh 9:17; Sal. 86:15.

5. Mobverana na Salimo 103:13, 14, ko Yahova achita chani ndawa yotidziwa bwino?

⁵ Pakuti Yahova ni Mulengi wathu, iye atidziwa bwinobwino. Ndoganizani so! Iye adziwa bwinobwino munthu aliyese padziko pano. (Sal. 139:15-17) Ndipomwapa iye akwanisa kuwona machimo yomwe tidatengera kwa azibereki wathu. Iye adziwa pomwe mwatidakulira na vomwe vinkuchitisa kuti timbachite vinthu vosiyana maninge na anzathu. Pakuti Yahova atidziwa bwino tene, vimwevi vimuthandiza kuti ambachite nase vinthu mwachifundo.—Sal. 78:39; lewengani Salimo 103:13, 14.

6. Ko Yahova adawonesa tani kuti ni wofunisisa kutikhululukira?

⁶ Yahova adawonesa kuti ni wofunisisadi kutikhululukira. Iye abvesa bwino vochita vathu ndawa yakuti tidatengera uchimo na impfa kuchokera kwa munthu woyambirira Adamu. (Aro. 5:12) Penze palibe njira inango yomwe tidakakwanisira kudzimasula tekha panango kumasula anzathu. (Sal. 49:7-9) Podiya kuti venze teno, Mulungu wathu wachikondi adatibvera chifundo ndipo adachita makonzedwe yotimasula. Ko iye adachita tani vimwevi? Lemba ya Yohane 3:16 inkufotokoza kuti Yahova adatumiza Mwana wake wobadwa yekha kuti adzatifere. (Mat. 20:28; Aro. 5:19) Yesu adabvuma kufa kuti amasule aliyese yemwe angamukhulupirire. (Aheb. 2:9) Ndoganizani momwe vidamuwawira Yahova kuwona Mwana wake ankufa impfa yochitisa manyazi! Adakati Yahova afunalini kutikhululukira, adakabvumalini kuti Mwana wake afe mwanjira mweyi.

7. Ko m’Baibolo munawanthu anango aponi omwe Yahova adawakhululukira na moyo wose?

⁷ M’Baibolo munavitsanzo vizinji va wanthu womwe Yahova adawakhululukira. (Aef. 4:32) Ko imwepo mwakumbukirako mbani? Panango mwakumbukira Mpfumu Manase. Munthu woipa moyu adachita vinthu vizinji vokalipisa Yahova. Iye adatsogolera wanthu kuti ambapempherere mafano ndipo adapha wana wake chaiwo pakuwapereka ntsembe ku milungu yachikunja. Iye mpakana adafika pakukonza  chifano nkukachiikha mukachisi wa Yahova. Pakufotokoza va iye, Baibolo ilewa kuti: ‘Iye adachita voipa vizinji pamaso pa Yahova kuti amukalipise.’ (2 Mbiri 33:2-7) Koma Manase padalapadi chaivo, Yahova adamukhululukira na moyo wose. Yahova mpaka adafika pakumubwezeresa pa udindo wake kuti yambe pomwe kutonga. (2 Mbiri 33:12, 13) Panango imwepo mwakumbukira pomwe Mpfumu Davide yemwe adachita machimo yakuluyakulu pamaso pa Yahova, kuphatanidzapo chigololo na kupha munthu. Koma iye padalapa chaivo na kuzindikira kuphonya kwake, Yahova adamukhululukira basi. (2 Sam. 12:9, 10, 13, 14) Ndipomwapa osati timbakaikire kuti Yahova ni wokonzeka kukhululuka. Ndipo ninge momwe tiwonere, Yahova afulumiza maninge kutikhululukira kusiyana na wanthu anzathu.

8. Pakuti Yahova ndiye yekha Woweruza wachilungamo, ko vimwevi vimuthandiza tani kuti ambakhale wokonzeka kukhululuka?

⁸ Yahova ni ‘Woweruza wa dziko yose yapasi.’ (Gen. 18:25) Woweruza wabwino achadekana kukhala munthu wodziwa bwino malamulo. Yahova alimbo teneretu ndawa yakuti iye ni Woweruza ndipo panthawe ibodzibodzi mweyo ni wopereka pomwe malamulo. (Yes. 33:22) Yahova akwanisa kuzindikira peno munthu analazau panango ni wophonya ndipo palibe munthu angamuposhe pankhani mweyi. Ko woweruza wabwino achita pomwe chani? Iye ayamba waidziwa bwino nkhani yose akanati kugemula chinthu. Ndipo Yahova ndiye yekha yemwe achita bwino maninge pankhani mweyi.

9. Ko Yahova ayamba wachita chani kuti asaine kukhululukira munthu panango neye?

⁹ Pakuti Yahova ni wosiyana maninge na woweruza wa padziko pano, iye akwanisa bwinobwino kudziwa chilichose pankhani yomwe yachitika. (Gen. 18:20, 21; Sal. 90:8) Iye achitalini ninge wanthu omwe aweruza pakundotengera vomwe awona na kubva basi. Akanati kuweruza munthu, iye ayamba wabvesa bwino vomwe munthu wachita, vomwe vamuchitisa kuti achite, momwe iye adakulira, kuwanda kwa vinthu vomwe iye adziwa na momwe iye ankubvera panthawe mweyo. Yahova akwanisa pomwe kuwona momwe mtima uliri. Iye akwanisa pomwe kubvesa vomwe vamuchitisa munthu kuti aphonye. Palibe chinthu chomwe chingakhale chobisika kwa Yahova. (Aheb. 4:13) Yahova akafika pakumukhululukira munthu, ndiye kuti wayamba wadziwa bwino vose pankhani yomwe yachitika.

10. Ndawa chani tingalewe kuti Yahova nthawe zose aweruza mwachilungamo? (Deuteronomo 32:4)

¹⁰ Nthawe zose Yahova aweruza mwachilungamo ndipo alibe tsankho. Sikuti Yahova akhululukira munthu ndawa yakuti ni wooneka bwino, ni wolemera, ni wodziwika ndipo ni wabuya pa vinthu vizinji. (1 Sam. 16:7; Yak. 2:1-4) Palibe munthu angamukangise Yahova kudziwa vose pankhani yomwe yachitika. (2 Mbiri 19:7) Iye aweruzalini nkhani ali wokalipa panango pakutengera momwe ankubvera. (Eks. 34:7) Yahova ni Woweruza wabwino maninge ndawa yakuti ayamba wadziwa vose pankhani yomwe yachitika.—Lewengani Deuteronomo 32:4.

11. Ko Yahova ni wosiyana tani na wanthu pankhani yokhululuka?

¹¹ Wanthu omwe adanemba Malemba yachiheberi angadziwa bwinobwino kuti Yahova ni wosiyana maninge na wanthu pankhani yokhululuka. Pakulewa va mawu yachiheberi yomwe yadaphatisiwa basa pankhani yokhululuka, bukhu inango idati: “Iwo adaphatisa basa mawu yabodzibodzi pakuwonesa momwe Mulungu adakhululukirira wanthu wose, ndipo alibe kuphatisako basa mawu yowonesa kuti  Mulungu wakhululukira na moyo wose munthu munango koma munango ne kumukhululukira chaivo.” Ni Yahova yekha yemwe anamphanvu yokhululukira na moyo wose munthu yemwe walapadi chaivo. Ko tiphindula tani Yahova akatikhululukira?

12-13. (a) Ko munthu aphindula tani akakhululukiriwa? (b) Ko Yahova akamukhululukira munthu aikumbusira pomwe nkhani mweyo

¹² Tikambatsimikiza na moyo wose kuti Yahova watikhululukira, ‘titsitsimuliwa maninge,’ tikhala na ntendere wamumtima ndipo tikhala na chikumbumtima chochena. Ni ‘Yahova yekha’ basi yemwe angakwanise kutikhululukira tene. (Mac. 3:19) Yahova akatikhululukira, atithandiza kukhala pomwe pa ushamwali na iye ndipo vindokhala ninge palibe chomwe tidaphonyesa.

¹³ Yahova akatikhululukira, aikumbusiralini pomwe nkhani mweyo panango kutilanga ndawa ya vinthu vomwe tidaphonyesa kalekale. (Yes. 43:25; Yer. 31:34) Yahova atenga vophonya vathu nkuviikha kutali ninge mwaviriri kuti ‘kumachibese ni kutali maninge na kumaulo.’ * (Sal. 103:12) Ndise wotembeja maninge kuwona kuti Yahova ni wokonzeka kutikhululukira. (Sal. 130:4) Koma ko tingachite tani kuti Yahova ambatikhululukire?

14. Ko tawona kuti Yahova ayamba wachita chani akanati kusaina kukhululukira munthu?

¹⁴ Ninge mwatawonera, sikuti Yahova akhululukira munthu pakutengera kukula kwa chimo yawachita. Tapfunzira pomwe kuti Yahova atikhululukira ndawa yakuti ni Mulengi wathu, wotipasa malamulo na woweruza wabwino. Naboni manje tiwone vomwe Yahova achaganizira akanati kusaina kumukhululukira munthu panango neye.

15. Mobverana na Luka 12:47, 48, ko Yahova ayamba waganizira chani akanati kukhululukira munthu?

¹⁵ Chakuyamba, Yahova ayamba waganizira peno munthu muyo ambadziwa kuti vomwe ankuchita ni voipa. Yesu adabvekesa bwinobwino mpfundo mweyi pa Luka 12:47, 48. (Lewengani.) Peno munthu ankuchita kupulana kuchita chinthu chomwe ankudziwiratu kuti Mulungu aipidwa nacho ndipo ankudzitsutsalini mpakana kuchitadi, ndiye kuti wachita  chimo ikulu. Yahova angasaine kundoleka kukhululukira munthu watene. (Maliko 3:29; Yoh. 9:41) Koma nthawe zinango tichita vinthu uku tinkudziwiratu kuti ni voipa. Manje vikakhala tene pangakhale mwayi wokhululukiriwa? Inde, ndipo vimwevi vinkutiyendesa pa chinthu chinango chomwe Yahova achaganizira akanati kukhululukira munthu.

16. Ko kulapa nkutani, ndipo ndawa chani ni kodikana peno tinkufuna kuti Yahova atikhululukire?

¹⁶ Chinthu chinango nchakuti Yahova achaganizira pomwe peno munthu muyo walapadi. Ko kulapa kutanthauza chani? Kulapa kutanthauza “kuchinja kaganizidwe kathu, khalidwe yathu na volinga vatinavo.” Kuphatanidzapo pomwe kudziringa ndawa ya voipa vatachita panango kudziringa ndawa tilibe kukwanisa kuchita vinthu vabwino vomwe tingadekana kuchita. Munthu yemwe walapadi sikuti andokwinyirira ndawa ya voipa vawachita, koma ndawa yakuti voipa vimwevo vachitisa kuti ushamwali wake na Yahova udzongeke. Kumbukirani kuti Mpfumu Manase na Davide wose adachita machimo yakuluyakulu. Koma Yahova adawakhululukira ndawa yakuti enze adalapa chaivo. (1 Maf. 14:8) Inde, Yahova awona vizindikiro vowonesa peno munthu walapadi ndipo amukhululukira. Koma kundodziringa na voipa vatidachita nkosakwana. Timbakhale wokonzeka kuchitapo kanthu. * Vimwevi vinkutifikisa pa chinthu chinango chomwe Yahova achaganizira akanati kukhululukira munthu.

17. Ko kuchinja kutanthauza chani, ndipo ndawa chani tichadekanalini kumbabwerezera machimo ya kalekale? (Yesaya 55:7)

¹⁷ Chinthu chinango chomwe Yahova achachita ni kuwona peno munthu muyo wasiya kuchita voipa. Vimwevi vinkutanthauza kuti iye achadekana “kulekeratu” kuchita makhalidwe yoipa. M’mawu yanango tingalewe kuti iye ambasiye voipa nkuyamba kuchita vinthu mobverana na malamulo ya Yahova. (Lewengani Yesaya 55:7.) Iye achadekana kuchinja kaganizidwe kake na kubvuma kumbachita vinthu mobverana na momwe Yahova achaganizira. (Aro. 12:2; Aef. 4:23) Iye ambakhale wokonzeka kusiya moyo wake wakale na vochita  vake voipa. (Akol. 3:7-10) Koma kuti Yahova atikhululukiredi na kutichenesa pa machimo yathu, tichadekana kukhulupirira ntsembe ya Yesu Khrisitu yomwe iye adapereka. Yahova angaphatise basa ntsembe ya Mwana wake kuti atikhululukire akawona kuti tinkuyesesa kuchinja khalidwe yathu yoipa.—1 Yoh. 1:7.

18. Ko tapfunzira chani pankhani ya kukhululuka kwa Yahova?

¹⁸ Naboni tiwoneko pomwe mwachigwato mpfundo zatakambirana. Tawona kuti palibe munthu angaposhe Yahova pankhani yokhululuka. Chinthu choyamba chomwe chinkutitsimikizira vimwevi nchakuti iye ni wokonzeka kukhululuka. Chachiwiri nchakuti iye atidziwa bwino. Iye adziwa bwino momwe tiliri na momwe tidakulira. Ndipo vimwevi vimuthandiza kuti awone peno talapadi chaivo. Ndipo chachitatu nchakuti iye akatikhululukira, aikumbusiralini pomwe nkhani mweyo. Vimwevi vitithandiza kuti timbakondwe pakumutumikira tiri na chikumbumtima chochena.

19. Ndawa chani tingakhale okondwa podiya kuti tidakali ochimwa ndipo tinkupitiriza kuphonyesa?

¹⁹ Koma pakuti tikali ochimwa, timbapitirize kuphonyesa basi. Koma ni volimbikisa kudziwa vomwe bukhu ya Estudo Perspicaz das Escrituras inkufotokoza. Volume 1, tsamba 210 ifotokoza kuti: “Pakuti Yahova ni wachifundo ndipo adziwa bwino vofoka va atumiki wake, iye aikhiralini nzeru maninge pa vinthu vomwe ankuphonyesa ndawa ya uchimo womwe adatengera kwa Adamu. (Sl 103:8-14; 130:3) Atumiki mwawa akambapitiriza kutewedza malangizo ya Mulungu, adzakhale okondwa maninge. (Afi 4:4-6; 1Yo 3:19-22).” Vimwevi ni volimbikisa maninge!

20. Ko tidzakambirane chani munkhani yomwe ikubwera?

²⁰ Ndise otembeja maninge kudziwa kuti Yahova ni wokonzeka kutikhululukira peno talapa pa vinthu vataphonyesa. Manje tingachite tani kuti timbakhululukirembo anzathu ninge Yahova? Ko tilingana na Yahova pankhani yokhululuka munjira ziponi, ndipo tisiyana naye munjira ziponi? Ko tingaphindule tani tikadziwa bwino momwe tiliri osiyana na iye? Nkhani yomwe ikubwera idzadawire mibvunzo mwaya.