LISA * adalewa kuti: “Abale na alongo enze wabwino mtima pochita nane vinthu.” Iye adati vimwevi ndivo vidamuthandiza kupfunzira choonadi. Vimwevi ndivo vidachitikirambo Anne, yemwe adati: “Sikuti abale na alongo ambanikomera mtima pa voyankhula chabe, koma na vochita vawo.” Ntsiku zino alongo mwawa akonda kuwerenga Baibolo na kuganizira vomwe apfunzira ndipo ayebwalini vomwe abale na alongo adawachitira.

Ko tingachite tani kuti tikhale wabwino mtima pochita vinthu na anzathu? Naboni tikambirane njira ziwiri izi: Voyankhula na vochita vathu. Patsogolo pake tiwone kuti timbakhale wabwino mtima kwa mbani.

Mkazi wakhama wofotokozewa pa Miyambo msolo 31 angayesesa ‘kukhala wabwino mtima’ pa voyankhula vake. (Miy. 31:26) Iye ambawonesesa kuti voyankhula vake vikubverana na ‘chilamulo.’ Olo amuna angachitembo bwino kuyesesa kuti voyankhula vawo vimbabverane na ‘chilamulo.’ Azibereki azinji adziwa bwino kuti wana wawo angakhalelini wokondwa peno awayankhulalini bwino. Peno azibereki angambawayankhule wana wawo mowakalipira ndiye kuti vinthu vingamalelini bwino. Ndipomwapa azibereki angachite bwino kuyesesa kukhala wabwino mtima akambayankhula na wana wawo.

Peno imwepo ndimwe m’bereki panango neye, ko mungachite tani kuti mumbakhale wabwino mtima poyankhula? Mdawiro unkugumanika pa Miyambo 31:26: Mawu yoyambirira mu vesi mweyi yalewa kuti: ‘Iye afungula pakamwa pake mwanzeru.’ Vimwevi vinkutanthauza kuti timbasankhule bwino mawu yathu ndipo timbayankhule moganizira anango. Tingachite bwino nthawe zose tikanati kuyankhula kudzibvunza kuti: ‘Ko vomwe ninkufuna kuyankhula ivi vithandizedi kuti pakhale ntendere, panango vichitise kuti nkhani iyipiretu?’ (Miy. 15:1) Ni vanzeru maninge kuganizira mbvunzo moyu.

Lemba ya Miyambo 12:18 ilewa pomwe kuti: ‘Mawu yoyankhuliwa mosaganiza bwino yalasa ninge chibemba.’ Tikawona kuti vomwe tikufuna kuyankhula vikalipise anzathu, tingachite bwino kundokhala chete. Inde, kuyesesa ‘kukhala wabwino mtima’ poyankhula kungatithandize kupewa kuyankhula mawu yokalipisa anzathu. (Aef. 4:31, 32) Olo pa nthawe yomwe tinkuganizalini bwino, tingachite bwino kuyesesa kuyankhula mawu yomwe yangakondwerese anzathu. Yahova adapereka chitsanzo chabwino pa nkhani mweyi panthawe yomwe angalimbikisa mtumiki wake Eliya. Mngelo yemwe angaimira Yahova adayankhula na Eliya ‘modekha.’ (1 Maf. 19:12) Koma sikuti kukhala wabwino mtima nkundoyankhula mawu yabwino basi. Tichadekana soti kukhala wabwino mtima pa vochita. Ko tingachite tani vimwevi?

Tikambatewedzera Yahova, tingayesese kuti voyankhula na vochita vathu vikhale vabwino. (Aef. 4:32; 5:1, 2) Lisa watatomola kumayambiriro, adafotokoza kuti wa Mboni za Yahova enze wabwino mtima pochita naye vinthu. Iye adati: “Panthawe yomwe banja yathu ingadekana kufuluka mochita kuchichimiziwa, mabanja  yawiri ya Mboni yadabwera kudzatithandiza kulongedza. Panthawe mweyi, nenze nikanati kuyamba kupfunzira Baibolo!” Vomwe mabanja mwaya yadachita vidathandiza Lisa kuti ayambe kupfunzira choonadi.

Anne watatomola patsogolo pake, nayembo ankutembeja maninge ndawa yakuti wa Mboni adamuchitira vinthu vabwino. Iye adati: “Pakuti wanthu azinji kudziko uku ni woipa mtima, vimbanishupa maninge kuti nithembe munthu.” Iye adapitiriza kuti: “Panidagumana na Mboni za Yahova, nidayamba kuwakaikira. Nimbachita mantha maninge ndipo nimbadzibvunza kuti, ‘ndawa chani mwawa akufunisisa kuti nimbacheze nawo?’ Koma nidayamba kuthemba maninge munthu yemwe anganipfunzisa Baibolo ndawa yakuti wenze wabwino mtima pochita nane vinthu.” Ko vimwevi vidabweresa phindu yanyi? Iye adati: “Patsogolo pake nidayamba kuikhira nzeru maninge pa vomwe ningapfunzira.”

Wonani kuti vidakwanisika kuti Lisa na Anne apfunzire choonadi ndawa yakuti wanthu wa mumpingu adawachitira vinthu vabwino. Vomwe wanthu mwawa adawachitira, vidawafika pamoyo maninge.

Mwachibadwa wanthu anango akondakale kuyankhula mawu yabwino na kusekerera. Ni vokomedza maninge kuwona kuti chikhalidwe cha m’madera yanango chichitisa kuti wanthu ambakhale wabwino mtima. Peno chikhalidwe chathu chikutichitisa kale kukhala wabwino mtima, osati timbaganize kuti tinkulingana kale na Mulungu pa nkhani mweyi.—Linganizani na Machitidwe 28:2.

Kukhala wabwino mtima ni khalidwe yomwe mzimu wa Mulungu uchapereka. (Agal. 5:22, 23) Ndipomwapa kuti tikulise khalidwe mweyi timbachite vinthu mobverana na vomwe mzimu moyu ungatilimbikise kuchita. Kuti tikhale na shungu mweyi tingachite bwino kuyesesa kutewedzera Yahova na Yesu. Ndipo isepano Akhrisitu tichita vimwevi ndawa yoganizira maninge anango. Chifukwa chinango chomwe chitichitisa kukhala na khalidwe mweyi ni kukonda maninge Yahova na anzathu. Yahova akondwa maninge tikambawonesa khalidwe mweyi ndawa yokonda anzathu ndipo iye angatilimbikise kuti tichite vizinji.

Vikhala vosashupa kukomera mtima wanthu wodziwika panango womwe adatichitirako kale vinthu vabwino. (2 Sam. 2:6) Njira inango yowonesera khalidwe mweyi ni kutembeja munthu yemwe watichitira vinthu vabwino. (Akol. 3:15) Manje tani peno munthu ankutiwonesalini khalidwe mweyi?

Peno nteno tingachite bwino kuganizira kuti Yahova ni chitsanzo chabwino maninge pa nkhani yokhala wabwino mtima ndipo Mawu yake yatiuza phindu yowonesa khalidwe mweyi. Mawu yakuti ‘kukoma mtima kukulu’ yaphatisiwa basa maulendo yazinji m’Malemba yachigiriki yachikhrisitu. Ko Mulungu ankuwonesa tani kuti ni wabwino mtima kwa isepano?

Ndoganizirani va kuwanda kwa wanthu womwe Yahova adawakomera mtima pa kuwapasa vosowa vawo kuti apitirize kukhala na moyo. (Mat. 5:45) Ndipo Yahova adakomera mtima wanthu wose olo pa nthawe yomwe enze akanati kumudziwa. (Aef. 2:4, 5, 8) Mwakulinganiza, iye adapereka Mwana wake wapamoyo kuti awombole wanthu wose. Mtumi Paulo adalewa kuti Yahova adapereka dipo ndawa ya ‘kukoma mtima kwake kukulu.’ (Aef. 1:7) Podiya kuti nthawe na nthawe timuphonyera Yahova, iye ankupitiriza kutitsogolera na kutipfunzisa. Malangizo yake yali ‘ninge mame.’ (Deut. 32:2) Isepano tingakwaniselini kumubwezera pa vabwino vadatichitira. Ndipo kutsogolo uku adzatichitire pomwe vabwino vizinji.—Linganizani na 1 Petulo 1:13.

Nivolimbikisa maninge kudziwa kuti Yahova adzalekelini kutikomera mtima. Ndipomwapa m’malo mwakuti timbachite kusankhula wanthu wati tikomere mtima, tingachite bwino kuyesesa kuchitira vabwino wanthu wose ntsiku na ntsiku. (1 Ates. 5:15) Tikambayesesa mwakhama kukomera mtima wanthu, tingakhale ninge kadzuwa kothuma bwino pa nthawe ya mphepo. Viri teno ndawa yakuti tingalimbikise wanthu wa m’banja mwathu, Akhrisitu anzathu, anzathu wa kushikola na mavizinyu yathu.

Ganizirani vamungayankhule na kuchitira wanthu wa m’banja yanu panango mu mpingu kuti muwawonese kukoma mtima. Vingachitike kuti mu mpingu mwanu munamunthu yemwe mungafunike kumuthandiza basa za pamuyi, za kumunda panango kumugulira vinthu. Ndipo peno muli mu utumiki nkugumana munthu yemwe ankubonera, ko mungayesese kumuthandiza pa vomwe ankusowa?

Naboni tose tiyesese ‘kukhala wabwino mtima’ mu voyankhula na vochita vathu. Tikateno tidzawonese kuti tinkutewedzeradi Yahova.