1. Ko Yesu adawasiyira chitsanzo chiponi wopfunzira wake, ndipo iwo adachita chani? (Onani foto ya pakhava.)

PEWENZE padziko yapasi, Yesu adapitiriza kulalikira mwakhama achimbatsimikiza kuti anango ambamubvesere, ndipo ambafuna kuti wopfunzira wakembo ambachite chibodzibodzi. (Yoh. 4:35, 36) Peenze pabodzi na Yesu, wopfunzira wake ambalalikira mwakhama. (Luka 10:1, 5-11, 17) Koma padandoti Yesu wamangiwa nkuphewa, wopfunzira wake enze alibe pomwe shungu yolalikira. (Yoh. 16:32) Padati wamukisiwa, Yesu adalimbikisa wopfunzira wake kuti aikhire nzeru pa kulalikira. Ndipomwapa padati wabwerera kudzulu, wopfunzira wake adayamba kulalikira mwakhama maninge, mpakana wanthu womwe ambawazonda adachita kuwakalipira kuti: ‘Mwawona vamwachita! Imwepo mwadzadza Yerusalemu na vipfunziso vanu.’​—Mac. 5:28.

2. Ko Yahova adadalisa tani basa yolalikira?

² Yesu adatsogolera basa ya Akhrisitu woyambirira ndipo wanthu azinji ambabvesera. Mwakulinganiza, mu Penekosite wa mu 33, wanthu wokwana 3.000 adabatizika. (Mac. 2:41) Vimbakomedza kuwona momwe namba ya wopfunzira inkuwandira. (Mac. 6:7) Koma Yesu adalewa kuti basa yolalikira idzakhale na maphindu yazinji mu ntsiku zomalizira.​—Yoh. 14:12; Mac. 1:8.

3-4. Ndawa chani m’madera yanango ni voshupa kulalikira, ndipo tiwone chani mu nkhani ino?

³ Tose tinkuyesesa kulalikira tichimbatsimikiza kuti wanthu atibvesere. Ndipo m’madera yanango ni vosashupa. Ndawa chani? Ndawa yakuti wanthu azinji ni wofunisisa kupfunzira  Baibolo. Mpakana anango atokhala thethethe kuti andodzagumanako na wa Mboni. Koma m’madera yanango ni voshupa kuti wofalisa alalikire. Wanthu ni kazinjikazinjilini kugumanika pamuyi, ndipo olo agumanike muwawone kuti nkhani za m’Baibolo alibe nazo basa.

⁴ Peno munkukhala kudera yoshupa tene, ndiye kuti mpfundo za mu nkhani ino zikuthandizeni. Naboni tiwone vomwe abale anango ankuchita kuti alalikire wanthu azinji. Ndipo tiwone pomwe kuti ndawa chani tichadekana kukhala wakhama vilibe basa kuti wanthu ankubvesera panango neye.

5. Ko Mboni za Yahova zizinji zinkugumana na mabvuto yaponi?

⁵ Kwa Mboni zizinji vinkuyenda vichishupirashupira kuti agumane wanthu pamuyi pawo. Wofalisa anango ankukhala m’madera yomwe yananyumba panango maprediyo yotetezewa maninge. Panango gwarda angalambize kuti munthu yemwe alibe kuchita kuchemerewa na munichiro muyi angene. Wofalisa anango achakwanisa kulalikira muyi na muyi koma agumanakolini olo m’bodzi. Ndipo wofalisa anango ankulalikira m’mamiyi yakutali yomwe kulibe wanthu azinji. Iwo achafamba nsenga utali kuti andokachezako na munthu m’bodzi basi, koma mwa tsoka yanyi ne kumugumana. Peno imwepo munkugumanambo na mabvuto ninge mwaya, ayi kufoka. Manje mungachite chani kuti mupirire mabvuto nwaya koma vinthu nkumbakufambirani mu utumiki?

6. Ko wolalikira na wakupha ntsomba ankulingana tani?

⁶ Yesu adalinganiza basa yolalikira na basa ya munthu wakupha ntsomba. (Maliko 1:17) Anango vingawatengere ntsiku koma ne kuphako olo ibodzi. Koma m’malo mwakuti andolekeratu, akonza mapulani. Iwo achachinja nthawe, malo na kateyedwe. Isepano tingachinjembo teneuyu pa basa yathu yolalikira. Onankoni mpfundo zinango.

7. Ni phindu yanyi ingabwere tikambayesesa kulalikira wanthu pa nthawe zosiyanasiyana?

⁷ Yesesani kufaga wanthu pa nthawe zosiyanasiyana. Isepano tingakwanise kucheza na wanthu azinji pokhapokha tikambawayendera panthawe yomwe tingawagumane pamuyi. Ndipo pananthawe yomwe munthu aliyese achagumanika pamuyi. Wofalisa azinji achakwanisa kugumana wanthu azinji m’mamiyi mwawo akambawayendera masikati panango maulo. Vinkuwoneka kuti azinji panthawe mweyi achakhala na mpata wocheza. Panango imwepo mungakomedzewe na vomwe David yemwe ni nkulu adalewa. Iye adati akamaliza kulalikira gawo na munzake, achabwerera pomwe m’manyumba momwe alibe kugumanamo wanthu. Iye adati: ‘Vitikomedza tikagumana wanthu pa ulendo wachiwiri.’ *

8. Ko tingaiphatise tani basa lemba ya Mlaliki 11:6 mu utumiki?

⁸ Tichadekanalini kufoka. Ndipo lemba yomwe yatakula msolo wa nkhani ino inkutilimbikisa kuchita vimwevi. (Lewengani Mlaliki 11:6.) David watafotokoza kumayambiriro ule alibe kufoka. Olo kuti adayesayesa kuwayendera wanthu m’manyumba yawo, alibe kuwagumana. Koma mwamwayi wanyi, adagumana mwamuna pa nyumba ibodzi. Iye wenze na chidwi ndipo adalewa kuti: ‘Ine nakhala pano kwa magole 8 manje, koma nikanati nafikiwako na Mboni za Yahova.’ David adati: ‘Nidazindikira kuti ukamalizira kumugumana munichiro muyi, nthawe zizinji achakhala wachidwi.’

9. Ko wofalisa anango achita chani peno ni voshupa kugumana wanthu?

 ⁹ Yesankoni kuyenda gawo inango. Wofalisa anango akawona kuti vinkushupa kugumana wanthu m’manyumba mwawo, achayenda kalalikira m’magawo yanango. Mwakulinganiza, iwo viwafambira akambalalikira m’misewu pakuphatisa basa tumashelufu. Mwanjira mweyi, iwo achakwanisa kulalikira wanthu wakuti pamuyi pawo ni voshupa kufikapo ndawa ni potetezeka. Ndipo wofalisa azinji adazindikira kuti wanthu achakhala wofikika mukawagumana ku malo yosungirako vinyama, ku bazali na malo yanango yogulisira malonda. Floiran yemwe ni wonyang’anira dera ku Bolívia adati: ‘Ise tikonda kuyenda kumalo yosungirako vinyama, ku bazali na malo yanango yogulisira malonda pakati pa 13 na 15 ora. Panthawe mweyi wogulisa akhalalini bize maninge. Nthawe zose ticheza nawo bwino ndipo tiyambisa mapfunziro yazinji ya Baibolo.’

10. Ko imwepo mungaphatisire basa njira ziponi kuti mugumane wanthu?

¹⁰ Yesani njira zinango. Tilinganize kuti imwepo mwayesayesa kuti mugumane munthu munango kazinjizinji. Imwepo mudayenda kumuyi kwake panthawe zosiyanasiyana koma mulibe kumugumana. Ko pananjira inango yamungachite kuti mumugumane munthu moyu? Mulongo munango dzina yake Katarína adati: ‘Ine nikonda kunembera makalata wanthu womwe niwagumanalini pamuyi. Nichanembapo vinthu vomwe nidakakambirana naye sembe namugumana.’ Ko tapfunzira chani pa chitsanzo mwichi? Mukambalalikira, yesayesani mwamungagumanire wanthu wose wa mudera yanu. Peno mungakwaniselini kuyankhula nawo mwa njira inango, yesani njira inango.

11. Ndawa chani wanthu anango achadalini kubvesera ntontholo wathu?

¹¹ Wanthu anango achadalini kubvesera ntontholo wathu. Iwo achabvesalini kuti ndawa chani achadekana kupfunzira va Mulungu na va Baibolo. Akambawona mabvuto yomwe yali mudziko, iwo achakhulupiriralini Mulungu. Ndipo Baibolo alibe nayo chidwi, ndawa yakuti achawona azitsogoleri wachipembedzo womwe achati achatewedza Baibolo ankuchita vinthu vachinyengo. Anango ni wopanikizika na basa zawo, mabanja yawo panango mabvuto yawo ndipo achawona kuti Baibolo ingawathandizelini. Ko tingachite tani kuti tipitirize kukhala wokondwa podiya kuti wanthu achalemekezalini ntontholo wathu?

12. Ko kuphatisa basa malangizo ya pa Afilipi 2:4 kungatithandize tani mu umboni?

¹² Awoneseni kuti muchawaganizira. Wanthu azinji womwe pakuyamba ambafunalini kubvesera ntontholo wabwino adachinja padawona kuti tichawaganiziradi. (Lewengani Afilipi 2:4.) Mwakulinganiza, David yemwe tamufotokoza pakuyamba adati: ‘Munthu akalewa kuti ninkufunalini, m’malo mwakuti tichose Baibolo na mabukhu, tichayamba tamubvunza kuti: ‘Mungatiuzeko kuti ndawa chani munkufunalini?’’ Wanthu achafika pakubvesa wanthu anango akambawaikhira nzeru. Iwo angakumbukelini bwino-bwino vomwe tidacheza nawo, koma angakwanise kukumbukira momwe tidachitira nawo vinthu. Podiya kuti munichiro muyi achatipasalini mpata kuti tiyankhule, tingakwanise kuwonesa kuti tichawaganizira na momwe tingachitire vinthu na momwe nkhope yathu inkuwonekera.

13. Ko tingachinje tani ntontholo wathu kuti ubverane na vosowa va munikachiro muyi?

¹³ Njira ibodzi ya momwe tingawonesere kuti tichaganizira wanthu, ni kuchinja ntontholo wathu kuti ubverane na momwe vinthu viriri pamoyo wawo. Mwakulinganiza, ko panyumba ya munthu pankuwonesa kuti iye anawana? Ko baba panango mayi ni mbani angawonese chidwi na malangizo ya m’Baibolo yolewa va momwe angalelere wana na momwe angakhalire na banja yokondwa? Ko tinkuwona maloko yazinji pansuwo? Vikakhala teno tingachite bwino kufotokoza kuwanda kwa ugananga komwe kunkuchitisa wanthu azinji kukhala na mantha. Vimwevi vingachitise kuti munikachiro muyi afune kudziwa kuti peno ntsiku inango mabvuto yadzamale. Nthawe zose mukagumana munthu wachidwi, muwoneseni momwe malangizo ya m’Baibolo yangamuthandizire. Katarína  yemwe tamufotokoza kale ule adati: ‘Ine nichaganizira momwe choonadi chidachinjira moyo wangu kuti ukhale wabwino.’ Mwa njira mweyi Katarína achakwanisa kufotokoza mofika pamoyo ndipo wanthu womwe achamubvesera achabvesa bwino-bwino.

14. Mobverana na Miyambo 27:17, ko kuyenda na mwanzathu mu umboni kungatithandize tani?

¹⁴ Bvumani thandizo ya anango. Mtumi Paulo adapfunzisa Timoteyo momwe angapfunzisire. Iye adamulimbikisa soti kuti ambathandize anango mwakuphatisira basa njira zopfunzisira. (1 Akor. 4:17) Ninge Timoteyo isepanombo tingapfunzire vizinji na kwa abale omwe anabuya mu mpingu mwathu. (Lewengani Miyambo 27:17.) Wonani chitsanzo cha m’bale munango dzina yake Shawn. Iye adatumikira ninge mpainiya kwa nthawe itali mu dera ya ku muyi komwe wanthu azinji angakonda matchetchi yawo. Ko iye adachita tani kuti apitirize kukhala wokondwa pakulalikira? Iye adati: ‘Vikakhala vokwanisika nimbatenga munzangu pakuyenda mu umboni. Vimweyivi vimbatithandiza kuti timbalimbikisane na kupasana maluso pakuchoka nyumba inango kuyenda inango. Mwakulinganiza, timbakambirana momwe yafambira macheza pa nyumba yomwe tachoka. Vimwevi vimbatithandiza kuwona vomwe tingachinje tikafika pa nyumba inango.’

15. Ndawa chani pemphero niyodikana mu umboni?

¹⁵ Kumbirani thandizo kwa Yahova. Nthawe zose mukambayenda kukalalikira mumbamukumbire Yahova kuti akuthandizeni. Palibe yemwe vingamufambire bwino mu umboni alibe mzimu wakuchena wa Mulungu. (Sal. 127:1; Luka 11:13) Mukambapemphera, mumbaleweretu vomwe muchada kwa Yahova. Kumbirani Yahova kuti akuthandizeni kugumana munthu yemwe achada kubva ntontholo wathu na kupfunzira va iye. Chitani vamungakwanise ndipo chitani khama mwakuyankhula na aliyese yemwe mungagumane naye.

16. Ndawa chani kuchita pfunziro ya pawekha kuchatithandiza mu umboni?

¹⁶ Khalani na nthawe yochita pfunziro ya pamwekha. Mawu ya Mulungu yachati Akhrisitu achadikana ‘kuzindikira chomwe Mulungu achada, chabwino, chobvumizika na changwiro.’ (Aro. 12:2) Tikambapfunzira Baibolo, tichamudziwa bwino Yahova. Ndipomwapa tikambalalikira va iye wanthu achakwanisa kuona kuti shuwadi tichakhulupirira mwa iye na vipfunziso vake. Katarina yemwe watomolewa pakuyamba adati: ‘Nthawe pang’ono kumbuyoku ine nidanena kuti ningadikana kuthimizira chikhulupiriro changu pa mpfundo zoyambirira za m’baibolo, ndipomwapa nidayamba kupfunzira mosamala maninge vinthu vomwe vichawonesa kuti kulidi Mulengi, nakuti Baibolo ni Mawu ya Mulungu nakuti Mulungu anagulu yomwe inkumutumikira ntsiku zino.’ Katarina adati kukhala na pfunziro ya pawekha kuchalimbisa chikhulupiriro ndipo kuchaingizira chimwemwe mu umboni.

17. Ndawa chani Yesu adakhala na maganizo yolimbikisa pautumiki wake?

¹⁷ Anango alibe kufuna kubva ntontholo womwe Yesu angalalikira. Podiya venze teno, iye adapitiriza kukhala na maganizo yolimbikisa pa nkhani ya utumiki wake. Ndawa chani? Ndawa yakuti iye angadziwa kuti wanthu angadekana maninge kupfunzira choonadi ndipo angada kuthandiza wanthu azinji kuti atambire ntontholo wa Ufumu. Iye angadziwa soti kuti anango angafunelini kubva pakuyamba koma patsogolo pake angachinje. Chitsanzo pa nkhani mweyi ni banja chaiyo ya Yesu. Iye adalalikira kwa magole yatatu na hafu koma palibe ne m’bale wake m’bodzi  adakhala wopfunzira wake. (Yoh. 7:5) Koma pomwe Yesu adamukisiwa, iwo adadzakhala Akhrisitu.​—Mac. 1:14.

18. Ndawa chani tichapitiriza kulalikira?

¹⁸ Ise tingakwaniselini kudziwa yemwe angadzakhale mtumiki wa Yahova. Anango achatenga nthawe kusiyana na anago pakupfunzira chonadi. Ndipo podiya kuti pakuyamba angadalini kubva, angayambe ‘kulemekeza Mulungu’ pakuona khalidwe yathu yabwino na maganizo yolimbikisa.​—1 Pet. 2:12.

19. Mobverana na 1 Akorinto 3:6, 7, ko tichadekana kuzindikira chani?

¹⁹ Ise tichabzala na kuthiriza, koma tichadziwa kuti ni Yahova yemwe anaudindo ukulu maninge pa utumiki wathu. (Lewengani 1 Akorinto 3:6, 7.) M’bale Getahum, yemwe akutumikira ku Etiópiya adati: ‘Kwamagole yoposha 20, nenze nekha Mboni ya Yahova kugawo yophatiwa basa pang’ono. Koma manje tilipo ofalisa 14. Pa wofalisa mwawa, 13 adabatizika kuphatanidzapo nkazi wangu na wana wathu atatu. Pa averedji, wanthu 32 achagumanika pamisonkhano yathu.’ Getahun ni wokondwa ndawa ya kudikhira Yahova moleza moyo pakuthandiza anango kuti akhalembo mugulu yake.​—Yoh. 6:44.

20. Ko tinkulingana munjira ziponi na gulu yopulumusa wanthu pangozi?

²⁰ Kwa Yahova, wanthu wose ni wodekana. Iye akutipasa udindo wophata pabodzi basa na Mwana wake pakusonkhanisa wanthu wamitundu yose mapeto yakanati yafika. (Hag. 2:7) Basa yathu yolalikira ni yolingana na basa yopulumusa wanthu pangozi. Ndipo ise tiri ninge gulu ya wanthu womwe atumiwa kukapulumusa wanthu omwe ali pangozi. Panango wanthu ang’onong’ono pa gulu ile ndiwo angakwanise kuwasokolola, koma wose apulumusambo. Nchibodzibodzimbo na basa yathu yolalikira. Tidziwalini kuti ni mbani wati apulumuse munthu mudziko ya Satana ino. Koma vomwe tinkudziwa ni vakuti Yahova angaphatise basa aliyese pagulu yathu. Andreas yemwe ankukhala ku Bolívia adati: ‘Ine ninkuwona kuti munthu akapfunzira chonadi cha m’Baibolo nkubatizika, ndiye kuti vachitika ndawa ya khama ya tose.’ Ayi kuti timbayebwe vimwevi tikambalalikira. Tikachita tene, Yahova adzatidalise ndipo tdzayambe kukondwa na basa yolalikira.