1-2. Ko Mboni zizinji zinkugumana na mabvuto yaponi?

MTUMI Paulo adalimbikisa Timoteyo na Akhrisitu wose kuti ambalalikire mwakukwana. (2 Tim. 4:5) Naboni tose tiyatengere siriyasi malangizo ya Paulo. Abale na alongo wathu azinji achadekana kukhala wolimba moyo maninge kuti akwanise kulalikira. (2 Tim. 4:2) Ndoganizani mwaviriri voshupa kwa abale wathu m’madziko yomwe basa yathu ni yolambiziwa panango kuwaikhira malamulo. Iwo achalalikira mwa kuikha pangozi ufulu wawo.

² Wanthu wa Yahova ankugumana na mabvuto yosiyanasiyana yomwe yankuwadzongera thupi. Mwakulinganiza, anango achaphata basa kwa maola yazinji kuti asamalire mabanja yawo. Iwo afuna kuchita vizinji mu umboni, koma kumapeto kwa sondo akhala woneta maninge. Anango angakwaniselini kuchita vizinji ndawa ya matenda yokhalisa panango ukalamba ndipo andokhala pamuyi. Ndipo anango ankulimbana na maganizo yodziwona kuti ni wosafunika kwa Yahova. Mulongo munango dzina yake Mariya, * adati: ‘Ninkumenya nkhondo yolimbana na maganizo yodziwona kuti ndine wosafunika ndipo vinichitisa kuti nimbakhale wokwinyirira. Vikakhala tene nidziimba mulandu ndawa vinitengera nthawe na mphanvu kuti nikwanise kuyenda mu umboni.’

3. Ko tikambirane chani mu pfunziro ino?

³ Viribe basa kuti tinkugumana na mabvuto yanyi, Yahova ankutipolomisa kutipasa mphanvu. Sikuti iye andotithandiza kuti tigwebane na mabvuto yathu, koma achatithandiza kuti tichite vabwino pa basa yake. Mu pfunziro ino tiwone momwe Yahova achachitira vimwivi. Koma naboni tiyambe na kuwona momwe  iye adathandizira Paulo na Timoteyo kuti agwebane na mabvuto yawo pakukwanirisa utumiki wawo.

4. Ko Paulo ambagwebana na mabvuto yaponi?

⁴ Paulo adagwebana na mabvuto yazinji. Iye angadikana mphanvu makamaka pomwe angadzudziwa, kumenyewa na minyala na kuikhiwa mudjeri. (2 Akor. 11:23-25) Paulo adafotokoza kuti iye ambagwebana na bvuto yodziwona kuti alibe na basa. (Aro. 7:18, 19, 24) Kuingizira mwapa, iye ambagwebana pomwe na bvuto inango yomwe yenze ninge ‘minga mthupi mwake.’ Panthawe inango iye adagwigwirira Mulungu kuti amuchosere minga mwiyi.​—2 Akor. 12:7, 8.

5. Olo kuti Paulo adagumana na mabvuto yazinji, ko nchani chomwe iye adakwanisa kuchita?

⁵ Podiya kuti Paulo adagumana na mabvuto yose mwaya, iye adatambira mphanvu yochokera kwa Yahova. Mphanvu mwiyi idamuthandiza kukwanirisa utumiki wake. Mwakulinganiza, pewenze mudjeri yosachoka​—pamuyi ku Roma—​iye adalalikira kwa atsogoleri wachiyuda ndipo panango mpakana kwa akulu-akulu wa boma. (Mac. 28:17; Afil. 4:21, 22) Iye adalalikira pomwe kwa masocha yomwe yambamunyang’anira na kwa wanthu womwe angayenda kukamuwona. (Mac. 28:30, 31; Afil. 1:13) Ni panthaweletu mwiyi pomwe Paulo adanemba makalata yanango, ndipo mpakana manje makalata mwaya ni yothandiza kwa Akhrisitu chaiwo. Kuingizira mwapa, paulo adatumikira pomwe ninga chitsanzo ku mpingu wa ku Roma. Ndipomwapa Baibolo ichati abale wa kumuku adapfunzira ‘kukhala wolimba moyo pakufotokoza mawu ya Mulungu.’ (Afil. 1:14) Ni shuwadi kuti nthawe zinango ambakwanisalini kuchita vizinji, koma iye angayesesa momwe angakwanisire. Manje phindu yake? Paulo adafotokoza kuti: ‘Vomwe vidanichitikira vile vathandiza kuti ntontholo wabwino upite patsogolo.’​—Afil. 1:12.

6. Mobverana na 2 Akorinto 12:9, 10, nchani chidathandiza Paulo kukwanirisa utumiki wake?

⁶ Paulo angadziwa kuti adakati Yahova alibe kumupasa mphanvu, adakakwanisalini kuchita chinthu. Iye angadziwa kuti mphanvu ya Mulungu ‘imbawonekera iye akakhala wofoka.’ (Lewengani 2 Akorinto 12:9, 10.) Yahova adaphatisira basa mzimu wake wakuchena pakupasa mphanvu Paulo. Mwanjira mwiyi, iye adakwanirisa bwino-bwino utumiki​—wake podiya kuti angagwebana na mabvuto ninge kudzudziwa, kuikhiwa mudjeri na mabvuto yanango.

7. Ni mabvuto yaponi yomwe Timoteyo angadekana kuyapirira kuti akwanise kuchita utumiki wake?

 ⁷ Podiya kuti Timoteyo wenze mulumbwana kusiyana na Paulo, nayembo angadekanambo kuthemba mphanvu ya Mulungu kuti imuthandize kukwanirisa utumiki wake. Timoteyo angayenda pabodzi na Paulo maulendo yatali-yali kukalalikira. Ndipo nthawe zinango Paulo adakumbira Timoteyo na kulimbikisa mipingu. (1 Akor. 4:17) Panango Timoteyo angadziwona kuti akalibe wafikapo kuti angaphate basa ninge mweyi. Panango vimwevi ndivo vidachitisa kuti Paulo amupase malangizo aya:​—‘Ayi kubvuma kuti munthu aliyese akuderere pakuwona kuti ndiwe m’ng’ono.’ (1 Tim. 4:12) Kuingizira mwapa, nthawe yose mweyi Timoteyo angadekana kugwebana na bvuto yomwe yenze ninge minga mthupi mwake ndawa ‘iye angadwaladwala.’ (1 Tim. 5:23) Koma Timoteyo angadziwa kuti akathemba mphanvu ya mzimu wa Yahova vimufambire. Na thandizo ya mzimu wakuchena, iye wenze na mphanvu yakudikana kuti alalikire ntontholo wabwino na kutumikira abale.​—2 Tim. 1:7.

8. Ko ntsiku zino Yahova achatipasa tani mphanvu?

⁸ Ntsiku zino, Yahova achapasa atumiki wake ‘mphanvu kuposha yobadwa nayo’ kuti akwanise kumutumikira mokhulupirika. (2 Akor. 4:7) Naboni tiwone njira zinayi za momwe Yahova achatipasira mphanvu zomwe ni: pemphero, Baibolo, akhrisitu anzathu na basa yolalikira.

9. Ko pemphero ingatithandize tani?

⁹ Achatilimbikisa pakuphatisa basa pemphero. Pa Aefeso 6:18, Paulo ankutilimbikisa kuti timbapemphere kwa Mulungu ‘nthawe zose.’ Mulungu adzatidawire pakutipasa mphanvu yokwanira. Jonnie, yemwe ankukhala ku Bolívia, adawona momwe Yahova adamuthandizira pamabvuto yake. Nkazi wake na azibereki adadwala maninge panthawe ibodzibodzi. Kwa Jonnie venze voshupa kuti awasamalire wose atatu pa vosowa vawo. Amayi wake adafika pa kumwalira ndipo padapita nthawe itali kuti nkazi wake na ababa wake achire. Pakukumbukira nthawe mwiyi Jonnie adati: ‘Panthawe yomwe nidadzibva kupanikizika maninge, chomwe chidanithandiza ni kufotokozeratu sitiriti mabvuto yangu mpemphero.’ Yahova adapasa Jonnie mphanvu zomwe angadikana kuti akwanise kupirira. Ronald yemwe ni nkulu ku Bolívia, adazindikira kuti amayi wake anakhansa. Ni vobvesa ntsisi kuti iwo adamwalira padandomala mwezi ubodzi. Ko nchani chidamuthandiza kuti apirire bvuto mwiyi? Iye adati: ‘Inepano pakupemphera kwa Yahova, nimuuziratu vose vomwe viri m’moyo mwangu. Ninkudziwa kuti Yahova anibvesa kuposha munthu aliyese. Shuwadi, iye achanidziwa bwino.’ Vingachitike kuti panthawe zinango, mabvuto yathu yangatikulire mpakana kusowa chonena mpemphero. Koma Yahova ankutikumbira kuti timbapemphere kwa iye podiya kuti vingakhale voshupa kufotokoza momwe tinkubvera.​—Aro. 8:26, 27.

10. Mobverana na Aheberi 4:12, ndawa chani ni vodikana maninge kumbalewenga Baibolo na kuiganizira?

¹⁰ Achatilimbikisa pakuphatisa basa Baibolo. Paulo angatambira mphanvu na chitonthozo kuchokera m’Malemba. Nchibodzibodzimbo kwa isepano. (Aro. 15:4) Ni vodikana maninge kuti tikambalewenge Mawu ya Mulungu timbayaganizire. Tikambachita vimwevi, Yahova adzaphatisire basa mzimu wake wakuchena kuti atiwonese momwe Baibolo ingatithandizire pakugwebana na mabvuto yathu. (Lewengani Aheberi 4:12.) Ronald, yemwe tamufotokoza ule adati: ‘Nidaphindula maninge ndawa yokhala na chizolowezi cholewenga Baibolo usiku uliwose. Nichaganizira maninge makhalidwe ya Yahova na momwe iye achawonesera chikondi kwa atumiki wake. Vimwivi  vidanithandiza kuti nikhale pomwe na mphanvu.’

11. Ko Baibolo idapasa tani mphanvu mulongo yemwe wenze wokwinyirira?

¹¹ Kuganizira Mawu ya Mulungu kuchatithandiza kuwona mabvuto yathu munjira yabwino. Wonani vomwe vidachitikira mulongo munango. Iye wenze wokwinyirira maninge ndawa ya impfa ya mwamuna wake. Nkulu munango adamupasa maganizo yakuti akalewenge bukhu ya Yobu. Mulongo moyu adakalewengadi. Pomwe adayamba kulewenga, chinthu choyamba chomwe iye adayamba kuganiza ni kuweruza momwe Yobu angaganizira. Iye ambati: ‘Yobu! Ayi kumbaganiza tene!’ Pamwapo iye adazindikira kuti iyembo anamaganizo yophonyekambo ninge Yobu. Kulewenga bukhu ya Yobu kudathandiza mulongo wathu kuchinja momwe iye angaganizira na kugumana mphanvu kuti apirire impfa ya mwamuna wake.

12. Ko Yahova achatilimbikisa tani pakuphatisa basa akhrisitu anzathu?

¹² Achatilimbikisa pakuphatisira basa akhrisitu anzathu. Njira inango yomwe Yahova achatipasira mphanvu ni kuphatisa basa akhrisitu anzathu. Paulo adanembera akhrisitu anzake kuti: ‘Pakuti ninashungu yakuti nidzakuwoneni, kuti tidzalimbikisane mwa chikhulupiriro chanu na changu.’ (Aro. 1:11, 12) Mary, watafotokoza kale ule, adathandiziwa maninge na abale. Iye adati: ‘Yahova adaphatisa basa abale na alongo womwe ambayadziwalini mabvuto yangu. Iwo adayankhula mawu yomwe yadanilimbikisa, ndipo adanitumizira makalata yomwe ningadekanadi panthawe mwire. Chinango chomwe chinilimbikisa ni kumasuka na alongo womwe adagumanambo na mabvuto ninga yangu ndawa yakuti vomwe iwo adachita vinganithandizembo. Akulu nthawe zose achachita vinthu voniwonesa kuti ndine wodikana mumpingu.’

13. Ko tingalimbikisane tani kumisonkhano?

¹³ Malo yanango yomwe tingalimbikisirane ni kumisonkhano. Mukagumanika pamisonkhano, tani mumbakhale woyamba kulimbikisa anango? Muuzeni m’bale panango mulongo kuti: ‘Nichakukondani imwepo’ panango kuti ‘nitembeja vose vomwe muchachita.’ Mwakulinganiza, misonkhano ikanati yayamba, nkulu munango dzina yake Peter adauza mulongo munango yemwe mwamuna wake ni mbonilini kuti: ‘Imwepo mungadziwelini momwe ine nichalimbikisiriwa nikambakuwonani munkuimisa djanja kuti mudawire.’ Pamwapo mulongo ule adagwesa misozi. Ndipo motembeja adati: ‘Imwepo munkudziwalini kuti ningadikanadi kubva mawu ninge mwaya lero.’

14. Ko basa yolalikira ingatithandize tani?

¹⁴ Achatilimbikisa pakuphatisa basa ulaliki. Tikambauza anango nkhani za m’Baibolo, tichabva bwino peno abvume panango neye. (Miy. 11:25) Mulongo munango dzina yake Stacy adawona momwe ulaliki uchapasira mphanvu. M’bodzi wa m’banja mwawo adachosewa ndipo vidamukwinyiririsa maninge. Iye angadzibvunza kuti: ‘Ko chiripo chomwe nidakachita kuti nimuthandize?’ Vimwevi vidamusokoneza maganizo. Ni chani chidamuthandiza Stacy kugwebana na bvuto mweyi? Ni kulalikira. Pomwe iye angatangwanika na kulalikira, vingamuchitisa kuti aganizire maninge wanthu wamugawo yake womwe angadikana kuthandiziwa. Iye adati: ‘Panthawe yose mwaire, Yahova adanipasa mapfunziro ya Baibolo yomwe yadapita patsogolo mwakanfulumize. Vimwevi vidanilimbikisa maninge. Chinthu chomwe chinidjimbikirisa pamoyo wangu ni kulalikira.’

15. Ko mwapfunzira chani pa mawu ya Mary?

¹⁵ Abale na alongo anango achawona kuti angachitelini vizinji mu umboni ndawa ya momwe vinthu viriri pamoyo wawo. Ko imwepo muchabvambo tene? Peno nteno, kumbukirani kuti Yahova achakondwa mukambachita vomwe mungakwanise. Onani pomwe chitsanzo  cha Mary. Pomwe iye adafulukira mumpingu wa chiseweredwe chinango, ambawona kuti ankuchitalini vizinji. Mary ankufotokoza kuti: ‘Chomwe ningakwanisako kuchita ni kuperekera ndemanga ifupi, kulewenga lemba na kupereka katsamba mu umboni.’ Mary ambadzilinganiza na anikachiro wa chiseweredwe ndipo angakhumudwa navo. Koma iye adachinja kaganizidwe kake. Iye adayamba kubvesa kuti Yahova angamuphatisire basa olo kuti iye angadziwalini bwinobwino cheseweredwe. Iye adati: ‘Choonadi cha m’Baibolo chinamphanvu ndipo chingachinje moyo wa wanthu.’

16. Peno imwepo mungachokelini pamuyi, nchani chingakuthandizeni kuti mugumane mphanvu?

¹⁶ Panango imwepo munkufuna kuyenda mu umboni, koma mungakwaniselini kuchoka pamuyi. Tsimikizirani kuti Yahova ankukubvesani. Iye anagakonze njira yakuti imwepo muchitire umboni kwa wale womwe achakusamalirani, manfulumero na mamediko. Kuthimizira mwapa, ayi kulinganiza vomwe munkuchita manjeuno na vomwe mungachita kalekale, ndawa vingakupaseni ulesi. Yesesani kubvesa vomwe Yahova ankuchita manjeuno kuti akuthandizeni. Mukateno mudzakhale na mphanvu kuti mukwanise kupirira mabvuto yanu muli wokondwa.

17. Mobverana na Mlaliki 11:6, ndawa chani tichadekanalini kuleka kulalikira?

¹⁷ Isepano tichachita khama kuti tibzale mbewu za choonadi, koma tidziwalini kuti ni iponi yomwe idzamere mpakana kukula. (Lewengani Mlaliki 11:6.) Ganizirani chitsanzo cha Barbara. Iye anamagole yopitirira 80 koma ankupitiriza kulalikira pakuphatisa basa makalata. Mu kalata inango iye adaikhamo Nsanja ya Olonda ya 1 Março 2014 yomwe yenze na nkhani yakuti: ‘Kodi Ndi Zinthu Ziti Zimene Mulungu Wakuchitirani?’ Mosadziwa, kalata yake idatumiziwa kwa banja inango yomwe yenze idasiya kukhala Mboni. Iwo adewerenga ntsanja ire mobwerezabwereza. Mwamuna adabva ninge kuti Yahova ankuyankhula na iye sitiriti. Banja ire idayamba​—kugumanika pamisonkhano pambuyo pa magole 27 ndipo iwo adabwerera pomwe nkukhala wa Mboni za Yahova. Ganizirani momwe Barbara adakhalira wokondwa na kulimbikisika ndawa ya vomwe vachitika pakutumiza kalata ibodzi basi!

18. Ko tingachite chani kuti titambire mphanvu zochokera kwa Mulungu?

¹⁸ Yahova ananjira zizinji zotipasira mphanvu. Ninge mwatawonera, iye achatipasa pakuphatisa​—basa pemphero, Baibolo, akhrisitu anzathu na basa—​yolalikira. Naboni timbaphatisire bwino basa mwayi uliwose. Tikachita teno, tidzawonese kuti tinkutsimikiza kuti, sikuti Yahova angandokwanisa kutithandiza koma ankufunadi kutithandiza. Naboni timbathembe Ababa wathu wakudzulu nthawe zose ndipo timbatsimikizire kuti iye adzakondwe ‘kuwonesa mphanvu zake kwa wale womwe mtima wawo ni wantero kwa iye.’​—2 Mbiri 16:9.