Ko mungachite tani kuti Mulungu ambabvesere mapemphero yanu?
Yahova Mulungu ni ‘wakubva pemphero.’ (Salimo 65:2) Tingakwanise kuyankhula naye kulikose na nthawe iliyose, mokuwa panango chamuntima. Yahova afuna kuti timbamutomole kuti “Ababa” ndipo iye ni Baba wabwino maninge kuposha aliyese. (Mateyu 6:9) Ndawa yakuti Yahova ni wachikondi iye atipfunzisa vomwe tingachite kuti ambabvesere mapemphero yathu.
TIMBAPEMPHERE KWA YAHOVA MU DZINA YA YESU
“Mukambakumbira chilichose kwa Ababa mu dzina yangu, iye adzakupaseni.”—Yohane 16:23.
Mawu mwaya ya Yesu yankuwonesa bwinobwino kuti Yahova ankufuna kuti timbapemphere kwa iye, osati kuphatisa basa mafano, wanthu ochena ntima, angelo panango wanthu omwe adamwalira. Tikambapemphera kwa Mulungu pakuphatisa basa dzina ya Yesu, tiwonesa kuti tizindikira udindo wodekana maninge wa Yesu. Iye adanena kuti: “Palibe yemwe angafike kwa Ababa ne kuphatisa basa dzina yangu.”—Yohane 14:6.
TIMBAYANKHULE NA NTIMA WOSE
‘Muuzeni va muntima mwanu.’—Salimo 62:8.
Pomwe tinkupemphera kwa Yahova tichadekana kuyankhula ninge momwe tingayankhulire na baba wathu wachikondi. M’malo mondowerenga pemphero yathu yochokera m’bukhu panango kundobwerezera vomwe tidazolowera, tichadekana kuyankhula mwaulemu komasoti mochokera pasi pa ntima.
TIMBAPEMPHERE MOBVERANA NA VOMWE MULUNGU ANKUFUNA
‘Chilichose chomwe tingamukumbire mobverana na chifuno chake, atibvera.’—1 Yohane 5:14.
M’Baibolo, Yahova atiuza vomwe adzatichitire na vomwe ankufuna kuti isepano timbamuchitire. Kuti mapemphero yathu yambakhale yodekana kwa Mulungu tinkudekana kupemphera ‘mobverana na chifuno chake.’ Kuti tichite vimwevi tinkudekana kupfunzira Baibolo na cholinga chakuti timudziwe bwinobwino. Tikachita vimwevi mapemphero yathu yadzamukondwerese.
KO TINGAPEMPHERERE VINTHU VIPONI?
Tingakumbire kuti atipase vomwe tinkudekana. Tingamukumbire Mulungu kuti atithandize kugumana vodekana pa moyo ninge chakudya, vovala na malo yokhala. Tingamukumbire kuti atipase nzeru kuti tisalule bwino vochita panango mphanvu kuti tikwanise kupirira mabvuto. Tingapemphere pomwe kuti atithandize kukhala na chikhulupiriro, atikhululukire panango kuti atithandize pa mabvuto yathu.—Luka 11:3, 4, 13; Yakobo 1:5, 17.
Timbapempherere anango. Azibereki wachikondi akondwa wana wawo akambakondana. Nayembo Yahova afuna kuti wana wake padziko yapasi ambakondane. Ndawa ya vimwevi, vingakhale bwino kupempherera mwamuna panango nkazi wathu, wana wathu, azibale na azishamwali wathu. Yakobo adanemba kuti: ‘Mumbapemphererane.’—Yakobo 5:16.
Timbatembeje. Pa kulewa va Mulengi wathu, Baibolo ichati: ‘Adachita vabwino. Adakupasani mvula kuchokera kudzulu na nthawe yomwe vokolola vanu vikhala vizinji. Adadzadza m’mintima yanu na chakudya na kukondwa.’ (Machitidwe 14:17) Tikambaganizira vinthu vose vomwe Mulungu ankuchita kwa isepano, tifunisisa kumutembeja m’pemphero. Tiwonesapomwe kuti tinkutembeja vomwe adachita tikambabvera malamulo yake.—Akolose 3:15.
TIMBAKHALE ODEKHA NKUMBAPITIRIZA KUPEMPHERA
Nthawe zinango tingakhumudwe ndawa yakuti mapemphero yathu yochokera pasi pa ntima yalibe kudawiriwa mwakankulumize. Vikakhala teno, ko tichadekana kuganiza kuti Mulungu alibe nase basa? Neye ntenolini. Ganizirani vitsanzo ivi vomwe vinkuwonesa kuti tichadekana kupitiriza kupemphera.
Steve, yemwe tamutomola mu nkhani yakuyamba adanena kuti: “Pemphero ndiyo yomwe idanithandiza kukhala pomwe wokondwa.” Ko ni chani chomwe chidamuchinjisa maganizo pa nkhani ya momwe angayionera pemphero? Iye adayamba kupfunzira Baibolo ndipo adapfunzira kudekana kwa pemphero na kusaleka kupemphera. Iye adati: “Inepano nipemphera kwa Mulungu kumutembeja na thandizo yose yomwe anipasa pakuphatisa basa azishamwali wangu okondewa. Manjeuno ndine wokondwa maninge kuposha kale.”
Tani va Jenny, yemwe ambaganiza kuti ni wosadekana kuti Mulungu ambabvesere mapemphero yake? Iye adati: “Pa nthawe yomwe nimbadzibva kuti ndine wachabechabe, nidapemphera kwa Mulungu kuti anithandize kudziwa chomwe chimbanichitisa kubva teneuyo.” Ko vimwevi vidamuthandiza tani? Jenny adanena kuti: “Kuyankhula na Mulungu kwanithandiza kuwona vinthu moyenera, nkuzindikira kuti podiya kuti ntima wangu unkunitsutsa, Mulungu anitsutsalini. Kwanithandiza pomwe kuti nileke kufoka.” Ko phindu yake idakhala iponi? Iye adati: “Pemphero yanithandiza kuwona Yahova kuti ni Mulungu wachikondi, Baba wangu na shamwali wangu chaiye ndipo nthawe zose ambanithandize nikambayesesa kuchita vomwe iye ankufuna.”
Isabel adanena kuti akawona mwana wake Gerard ankukondwa na moyo podiya ni wopunduka azindikira kuti Mulungu adadawira mapemphero yake
Chitsanzo chinango pa nkhani mweyi ni cha Isabel. Pomwe iye wenze na mimba, mafulumero yadamuuza kuti mwana wake adzabadwe wopunduka. Iye adakhumudwa maninge ndipo wanthu anango adamuuza kuti achose mimba mweyo. Iye adanena kuti: “Nidabva ninge nife ndawa yakubva kuwawa maninge muntima.” Manje ko iye adachita chani? Iye adati: “Nidamugwigwirira Mulungu kuti anithandize.” Nthawe idapita ndipo mwana mwamuna adabadwa ndipo wenze wopundukadi. Ko Mulungu adadawira mapemphero yake? Inde. Koma mwanjira yanyi? Iye adati: “Nikawona mwana wangu yemwe ana magole 14 manjeuno yemwe achakhala wokondwa podiya ni wopunduka, inepano niwona kuti Mulungu adadawira mapemphero yangu. Ninkulewa tene ndawa yakuti nikuwona mwana moyu kuti ni daliso ikulu maninge yomwe Yahova adanipasa.”
Mawu yochokera pasi pa ntima ninge mwaya yatikumbusa va wonemba masalimo munango. Iye adati: ‘Koma imwe Yahova mudzabve pemphero ya wanthu ofatsa. Mudzalimbise mitima yawo ndipo mudzawatetekere mwatcheru.’ (Salimo 10:17) Vimwevi ni vifukwa vobveka votichitisa kuti tipitirize kupemphera!
M’Baibolo mu na mapemphero yazinji ya Yesu. Pemphero yodziwika maninge ni yomwe adapfunzisa opfunzira wake. Ko tinkupfunzira chani pa pemphero mweyi?
Panango mungakondepomwe kudziwa ivi
NTSANJA YA ULONDA
Ko ndawa chani tichadekana kupemphera?
pemphero yachitsanzo, yomwe nthawe zinango ichemerewa kuti pemphero ya Ambuya, Yesu adatiwonesa vinthu vomwe tichadekana kuviganizira pa pakupemphera.
