Vomwe wanthu achanena pa nkhani ya pemphero
“Nikambapemphera nichabva ninge kuti Mulungu ali pafupi na ine ndipo waniphata djanja nkumbanitsogolera nikakhala kuti nasokera.”—MARÍA.
“Nkazi wangu adamwalira pambuyo pakuti wakhala ankudwala matenda ya khansa kwa magole 13. Nikumbukira kuti pa nthawe mweyi nimbapemphera kwa Mulungu ntsiku iliyose ndipo nimbawona kuti ankunibvesera ndipo ambabvesa momwe vinkuniwawira. Nikapemphera nimbagumana ntendere wa muntima.”—RAÚL.
“Pemphero ni mphaso yabwino maninge yomwe Mulungu adatipasa.”—ARNE.
María, Raúl, Arne, komasoti na wanthu anango azinji awona kuti pemphero ni mphaso yapadera. Iwo awona kuti akapemphera akwanisa kuyankhula na Mulungu, kumutembeja na kumukumbira kuti awathandize. Akhulupirira na ntima wose lonjezo ya m’Baibolo yonena va pemphero kuti: ‘Ise timuthemba kuti chilichose chomwe tingamukumbire mobverana na chifuniro chake, atibvera.’—1 Yohane 5:14.
Koma wanthu azinji akhulupiriralini vomwe Baibolo ichanena pa nkhani ya pemphero. Mwakulinganiza, munthu munango dzina yake Steve adanena kuti: “Pomwe nenze na magole 17, anzangu atatu adafa pa ngozi ya karo pomwe anango awiri adamira m’madzi.” Ko Steve adachita tani? Iye adati: “Nidapemphera kwa Mulungu kuti anithandize kubvesa vomwe vidachitika, koma alibe kunidawira. Pamwapo nidawona kuti palibe chifukwa chopempherera.” Wanthu azinji omwe awona kuti mapemphero yawo yalibe kudawiriwa, ayamba kuganiza kuti pemphero ni yosathandiza.
Wanthu anango anavifukwa vinango vowachitisa kuganiza kuti pemphero ni yosathandiza. Mwakulinganiza, anango anena kuti Mulungu adziwa vose vomwe tinkudekana pangafunikelinipomwe kumuuza mpemphero.
Pomwe anango akhulupirira kuti Mulungu abveseralini mapemphero yawo ndawa ya vomwe adaphonyesa mbuyo. Munthu munango dzina yake Jenny adanena kuti: “Bvuto yangu ni yakuti nidachita vinthu vomwe nidziyimba navo mulandu ndipo nidziwona ninge kuti nilibe basa. Nidziuza kuti ndinelini wodekana kuti Mulungu ambabvesere mapemphero yangu.”
Ko imwepo muyiwona tani nkhani ya pemphero? Peno imwepo muganizambo ninge wanthu mwawa pa nkhani ya pemphero, mungakondwe kudziwa kuti Baibolo ipereka midawiro yabwino pa nkhani mweyi. Baibolo inena mpfundo zothembeka pa nkhani ya pemphero, a ndipo ingakuthandizeni kugumana midawiro ya mibvunzo ninge aya:
-
Ko Mulungu achabva mapemphero yathu?
-
Ko ndawa chani Mulungu adawiralini mapemphero yose?
-
Ko mungachite tani kuti Mulungu ambabvesere mapemphero yanu?
-
Ko pemphero ingakuthandizeni tani?
a M’Baibolo mu na mapemphero yazinji ya atumiki wa Mulungu, kuphatanidzapo ya Yesu Khrisitu. M’Malemba ya Chiheberi yomwe azinji anena kuti ni chipangano chakale, mugumanika mapemphero yoposha 150.
Panango mungakondepomwe kudziwa ivi
VOMWE ALUMBWANA ABVUNZA
Ndawa chani tichadekana kupemphera?
Ko pemphero ni njira ibodzi yomwe ichabverana na maganizo panango ni vinthu vinango?
