• Adzasaluliwe na Mulungu. ‘Ine nakhazikisa mpfumu yangu . . . Nikupase makhaindi ya wanthu cholowa chako, nikupase dziko yose yapasi kukhala yako.’—Salimo 2:6, 8.

• Adzachokere mumzera wa Mpfumu Davide. ‘Pakuti kwa ise kwabadwa mwana, ise tapasiwa mwana mwamuna . . . Ulamuliro wake ninge wa kalonga udzafike kutali, ndipo ntendere udzaperelini pampando wachifumu wa Davide na mu ufumu wake kuti iye achitise ufumu moyu kukhazikika na kukhala wolimba.’—Yesaya 9:6, 7.

• Adzabadwire ku Betelehemu. ‘Iwepo Betelehemu . . . , mwa iwepo mudzabule munthu yemwe adzakhale ntongi . . . . Ukulu wake udzafike mpakana kumamaliziro kwa dziko yapasi.’—Mika 5:2, 4.

• Adzalambiwe na wanthu ndipo adzaphewe. ‘Adanyozewa ndipo adayesewa alibe basa . . . Iye adalasiwa ndawa ya vophonya vathu. Adaphwanyiwa ndawa ya machimo yathu.’—Yesaya 53:3, 5.

• Adzamukisiwe ndipo adzalemekezewe. ‘Mudzasiyelini moyo wangu m’manda. Mudzabvumelini kuti wokhulupirika wanu awone dindi . . . Kudjanja yanu yamakulu kuna chimwemwe mpakana kale-kale.’—Salimo 16:10, 11.

Mu mbiri yose ya wanthu, munthu m’bodzi yekha ndiye adakwanirisa viri padzulu ivi, ndipo munthu moyu ni Yesu Khrisitu. Ndipo mngelo adawuza Mariya mayi wake wa Yesu kuti: ‘Mulungu adzamupase mpando wachifumu wa Davide ababa wake, . . . mwakuti Ufumu wake udzaperelini ku nthawe zose.’—Luka 1:31-33.

Yesu alibe kubwera kudzatonga dziko. Koma iye adasaluliwa kukhala Mpfumu ya Ufumu wa Mulungu kudzulu. Ko ndawa chani iye ni wotonga wabwino? Wonani vomwe Yesu adachita ali padziko yapasi.

•   Yesu angasamalira wanthu. Yesu angathandiza amuna, akazi, alumbwana na wachikulire ndipo angawonalini nkhope. (Mateyu 9:36; Maliko 10:16) Pomwe wakhate adamugwigwirira kuti: ‘Peno muchada, munganichenese,’ Yesu adamubvera ntsisi nkumupolesa.—Maliko 1:40-42.

• Yesu adatipfunzisa momwe tingakondweresere Mulungu. Adati: ‘Mungakwaniselini kukhala kapolo wa Mulungu na wa chuma.’ Adanena soti kuti tichadekana kuchitira anango vomwe tichada kuti iwo atichitire, mpfundo yomwe manjewuno ichachemerewa kuti lamulo ya chikhalidwe. Kuingizira mwapo, adawonesa soti kuti Mulungu andokondwalini na vomwe tichachita koma na momwe tichaganizira na kubva. Ndipomwapa, kuti tikondwerese Mulungu tichadikana kuwonesesa vomwe vili m’moyo mwathu. (Mateyu 5:28; 6:24; 7:12) Yesu adatsindika kuti tingakhale wachimwemwe tikambapfunzira va Mulungu na kuvichita.—Luka 11:28.

• Yesu adatipfunzisa tanthawuzo ya chikondi. Voyankhula na vochita va Yesu vimbakhudza wobvera wake. ‘Wanthu azinji adadabwa na momwe angapfunzisira, ndawa iye angapfunzisa ninge munthu waudindo.’ (Mateyu 7:28, 29) Iye adawapfunzisa kuti: ‘Mumbakonde azondi wanu.’ Mpakana iye adapempherera wanthu womwe angada kumupha kuti: ‘Ababa, wakhululukireni ndawa ankudziwalini vankuchita.’—Mateyu 5:44; Luka 23:34.

Yesu ni woyenereradi kukhala ntongi wa dziko yapasi ndawa ni wokoma moyo. Ko nilini pomwe adzayambe kutonga dziko yapasi?