Mu msolo wapita ule, tawona vizindikiro vomwe Yesu adalewa. Vizindikiro mwevi vichapereka umboni wakuti Ufumu wa Mulungu udakhazikisiwa kale kudzulu ndipo Mpfumu yake ni Yesu Khrisitu.

Baibolo ichati, pomwe Yesu adakhala Mpfumu, chakuyamba adathamangisa Satana pabodzi na viwanda vake kuchoka kudzulu kubwera padziko yapasi. Ndipo vinthu vose vakuyipa vomwe vinkuchitika padziko yapasi iye ndiye ankuchitisa ndipo vinkupitiriza kuyipira-yipira kundoyambira mu 1914.—Chivumbulutso 12:7, 9.

Podiya kuti vinthu vikuyipira-yipira padziko, Yesu ninge Mpfumu ya Ufumu wa Mulungu, wachita vinthu vizinji kuti athandize wanthu padziko yose yapasi. Tinkutembeja ndawa ya mapfunziro yomwe Yesu adaleweratu kuti yadzachitike, ndipo azinji akupfunzira na kuphatisira basa mpfundo za m’Baibolo pa moyo wawo wa ntsiku na ntsiku. (Yesaya 2:2-4) Mamidyawu yazinji ya wanthu apfunzira kukhala wakhama pabasa, kukhala na moyo wabwino pabanja, na momwe  angaphatisirire basa vinthu vakuthupi mosakhala kapolo wavene. Wanthu akupfunzira momwe angaphindulire manjewuno na kukhala ntundu wa wanthu womwe Mulungu achada mu Ufumu wake.

Podiya kuti Yesu ankutonga kale kudzulu, maboma ya wanthu yadakatonga padziko yapasi. Ndipomwapa Mulungu adawuza Yesu kuti: ‘Yenda kagonjese wanthu pakati pa azondi wako.’ (Salimo 110:2) Manje-manje Yesu adzadzonge wose wotsutsa na kupulumusa wanthu wobvera Mulungu.

Manje-manje, Ufumu wa Mulungu udzachite ivi:

• Udzadzonge vipembedzo vose vabodza. Vipembedzo vakhala vikupfunzisa vinthu vabodza vokhudza Mulungu ndipo vachitisa kuti moyo wa wanthu ukhale woshupa. Baibolo ichalinganiza vipembedzo vakunama na hule. Ndipo wanthu azinji vidzawadzidzimuse hule mweyi ikadzadzongewa.—Chivumbulutso 17:15, 16.

• Udzamalise maboma ya wanthu. Ufumu wa Mulungu udzamalise maboma yose ya wanthu.—Chivumbulutso 19:15, 17, 18.

• Udzachose wanthu wakuyipa. Ko vidzakhale tani kwa wale womwe ankupitiriza kuchita vakuyipa na kulamba kubvera Mulungu? ‘Koma woyipa adzachosewe padziko yapasi ndipo wachinyengo adzazuliwemo.’—Miyambo 2:22.

• Udzacheneke Satana na viwanda vake. Satana na viwanda vake adzakwaniselini ‘kusokeresa wanthu ne pang’ono.’ —Chivumbulutso 20:3, 10.

Ko nchani chati chidzachitikire wale womwe achabvuma kubvera Ufumu wa Mulungu?

Akambadzatonga dziko yapasi ali kudzulu, Yesu adzakwanirise vinthu vizinji kuposha vomwe maboma ya wanthu yangachite. Iye adzatonge pabodzi na wa 144.000, womwe adasaluliwa pakati pa mitundu ya wanthu. (Chivumbulutso 5:9, 10; 14:1, 3) Iye adzawonesese kuti vomwe Mulungu achada vikukwanirisika padziko yapasi. Ko ni chani chomwe Ufumu wa Mulungu udzachitire wanthu padziko yapasi?

• Udzachose matenda na impfa. ‘Palibe yemwe adzakhale mu dziko mweyo yemwe adzalewe kuti: ‘Ninkudwala,” ndipo ‘impfa idzakhalekolini soti.’—Yesaya 33:24; Chivumbulutso 21:4.

• Udzabwerese ntendere chaiwo na chitetezo. ‘Ntendere wa wana wako udzakhale uzinji,’ ndipo ‘aliyese adzakhale m’nyantsi mwa muti wake wa uva na muti wake wa nkhuyu ndipo padzakhalelini wowagopsya.’—Yesaya 54:13; Mika 4:4.

• Udzabwerese basa yabwino. ‘Ndipo wanthu wangu wakusaluliwa mwapadera adzaphindule mwakukwana na basa ya manja yawo. Adzaphatelini basa papezi.’—Yesaya 65:22, 23.

• Udzamalise mabvuto. ‘Chipululu na malo yalibe madzi vidzakondwe, ndipo dera yachipululu idzakondwe. Ndipo idzachite mafololi nkukhala yokhuza ninge fololi ya safiloni.’—Yesaya 35:1.

• Udzapfunzise wanthu vomwe angadzachite kuti adzakhale kosapera. ‘Pakuti moyo wosapera adzaugumane akambapfunzira na kudziwa va imwepo Mulungu chayiye, na va Yesu Khrisitu wamudatuma.’—Yohane 17:3.

Mulungu achada kuti imwepo mudzakondwe na madaliso mwaya. (Yesaya 48:18) Msolo wapatsogolo unkufotokoza vamungachite kuti mudzakhale mu dziko mweyi.