Ko nilini pomwe Ufumu wa Mulungu udzayambe kutonga dziko yapasi?
Ntsiku inango ateweri wa Yesu angada kudziwa kuti nilini pomwe Ufumu moyu udzayambe kutonga. Yesu adadawira kuti palibe achadziwa bwino-bwino kuti nilini pomwe Ufumu udzayambe kutonga padziko. (Machitidwe 1:6, 7) Koma m’mambuyo, wenze adawawuzakale vomwe vidzachitike ndipo adati ‘mukadzawona vimwevi, mudzadziwe kuti Ufumu wa Mulungu wafendera’ ndipo nthawe yakuti uyambe kutonga dziko yafika.—Luka 21:31.
KO NI VOCHITIKA VIPONI VOMWE YESU ADALEWA KUTI VIDZACHITIKE?
Yesu adati: ‘Ntundu udzawukirane na ntundu unzake ndipo ufumu udzawukirane na ufumu unzake. Kudzachitike vivomezi vamphanvu, ndipo kudzakhale miliri na njala m’malo yosiyana-siyana.’ (Luka 21:10, 11) Ninge momwe vonemba pa manja na lapizera vichadziwikisira munthu, vizindikiro vomwe Yesu adalewa kuti vidzachitike vomwe vinkuchitika nthawe ibodzi vinkuchitisa kuzindikira kuti, nthawe yakuti ‘Ufumu wa Mulungu uyambe kutonga yafika.’ Ko vochitika mwevi vinkuchitikadi nthawe ibodzi padziko yose yapasi? Wonani vochitika ivi.
NKHONDO
Mu 1914, kudachitika nkhondo yomwe idapha wanthu azinji ndipo idadzonga vinthu vizinji. Wonemba mbiri achati gole ya 1914 ni gole yomwe idachinja moyo wa wanthu ndawa yakuti ni pomwe nkhondo yoyamba padziko yapasi idayamba. Pa nkhondo mwiyo adayamba kuphatisira basa mabilindade, mpfuti zamachini, mphepo yakuyipa na vitsulo vinango vakupha. Patsogolo pake padachitika nkhondo yachiwiri ya padziko yose, nkhondo mweyi ndiyo idayambisa mabomba atomika. Wanthu akhala ankumenya nkhondo zosiyana-siyana kundoyambira mu 1914 ndipo nkhondo mwezi zapha wanthu mamidyawu yazinji maninge.
2. VIVOMEZI
Gole iliyose kuchachitika vivomezi pafupi-fupi 100 vomwe vichakhala vikulu-vikulu vomwe ‘vichadzonga vinthu vizinji,’ inkulewa tenewuyu bukhu ya Academia Britânica. Ndipo bungwe ya Serviço Geológico ya ku Estados Unidos, inena kuti ‘malingana na mbiri yakale (kuyambira mu 1900) tidikhira vivomezi vikulu-vikulu 16 pa gole iliyose.’ Anango angalewe kuti tinanjira zodziwira vivomezi vikalibe vachitika ndipo tingavipewe, koma chaivo ni ivi, vivomezi vikulu-vikulu padziko yapasi vinkupha wanthu azinji.
3. KUSOWA KWA CHAKUDYA
Kusowa kwa chakudya kunkuchitika padziko yose ndawa ya nkhondo, viphuphu, kugwa kwa chuma, kusowa malo yolima, kuleka kudziwa kuti nyengo yakuyipa inkubwera. Mu ‘gole ya 2018,’ pologalama yowona va chakudya padziko yose idati: ‘Padziko yose wanthu 821 midyawu apitiwa njala, ndipo 124 midyawu ankugona nayo.’ Kuperewera kwa chakudya chopasa thanzi kwachitisa kuti wana pafupi-fupi 3 midyawu na hafu ambafe gole iliyose. Pa wana wose womwe adafa mu 2011 padziko yose, kuthamingira hafu adafa ndawa ya kusowa chakudya chopasa thanzi.
4. MATENDA NA MILIRI
Bungwe yowona va umoyo padziko idalewa kuti: ‘Kundoyambira mu sekulo 21, matenda na miliri vidayamba kuyingizirika. Matenda yomwe yadayamba kale-kale ninge kolera, malariya na matenda yanango yosiyana-siyana yalipo ntsiku zino. Ndipo pali yanangosoti yanyowani yomwe yankubukiriwa ninge SARS, fuluwenza, MRS, Ebola na Zika.’Ndipo chamanjemanje apa pagumanikapomwe matenda ya Koronaviru. Podiya kuti masientista na mamédiko apfunzira vizinji pa nkhani ya matenda, alibe kugumana chithandizo kuti angapereke ku matenda yose.
5. BASA YOLALIKIRA PA DZIKO YOSE
Yesu adafotokoza chizindikiro chinango. Iye adati: ‘Ntontholo wabwino wa Ufumu moyu udzalalikiwe padziko yose yapasi komwe kuli wanthu kuti ukhale umboni ku mitundu yose, pamwapo mapeto yadzafike.’ (Mateyu 24:14) Pomwe wanthu padziko yose yapasi ankuganizira za mabvuto, wanthu oposha 8 midyawu wa mitundu yose ankulengeza va ntontholo wabwino wa Ufumu wa Mulungu kwa wathu wa m’madziko yoposha 240 pa kuphatisira basa viseweredwe voposha 1.000. Vimwevi venze vikalibe kuchitikako mu mbiri yose ya wanthu.
PHINDU YA KUDZIWA VIMWEVI
Vizindikiro vomwe Yesu adanena vinkuchitika ntsiku zino. Ndawa chani tichadekana kukhala na chidwi na mpfundo mweyi? Ndawa Yesu adati: ‘Mukadzawona vimwevi vinkuchitika, dziwani kuti Ufumu wa Mulungu wafika.’—Luka 21:31.
Manje-manje, Ufumu ukwanirise vomwe Mulungu achada padziko yapasi
Chizindikiro chomwe Yesu adapereka komasoti kulewengera magole ya m’Baibolo, kutithandiza kubvesa kuti Mulungu adakhazikisa Ufumu wake kudzulu mu gole ya 1914. a Panthawe mweyo, adaikha Mwana wake Yesu Khrisitu kukhala Mpfumu. (Salimo 2:2, 4, 6-9) Manje-manje Ufumu wa Mulungu uyambe kutonga padziko, ndipo uchose maboma yose ya wanthu ndipo udzakonze dziko kukhala paradaiso kuti wanthu adzakhalemo mpakana kale-kale.
Dziwani kuti, mawu ya mu pemphero yachitsanzo yomwe Yesu adapfunzisa yadzakwanilisiwe, yomwe yachati: ‘Ufumu wanu ubwere. Chifuniro chanu chichitike ninge kudzulu chibodzi-bodzimbo pasi pano.’ (Mateyu 6:10) Ko Ufumu moyu wakhala unkuchita chani kundoyambira pomwe udayamba kutonga mu 1914? Ndipo tinkudikhira chani Ufumu moyu ukadzayamba kutonga wanthu wose?
a Kuti mudziwe vizinji va gole ya 1914, lewengani bukhu yakuti: Kodwani na moyo mpaka kalekale! yofalisiwa na Mboni za Yahova, pa msolo 32.
