Mwakulingana na mwevi, azinji ise manje-manje tigumane na ‘chimphepo’ chopasa mantha chomwe Yesu adachichemera kuti ‘chidzunzo chikulu.’ (Mateyu 24:21) Vidzakhale voshupa kuthawa chidzunzo mwechi. Koma pali chatingachite kuti tidzapulumuke. Ko ni chinthu chanyi?

Pa ulaliki wa paphiri, Yesu adalangiza kuti: ‘Pitirizani kufaga-faga Ufumu wa [Mulungu] na chilungamo chake.’ (Mateyu 6:33) Ko tingachite tani vimwevi?

Fagani Ufumu wa Mulungu chakuyamba. Kuthandawuza kuti tichadekana kuwona kuti Ufumu wa Mulungu ni wakudekana kuposha chilichose. (Mateyu 6:25, 32, 33) Ndawa chani tichadekana kuchita teno? Ndawa palibe munthu angakwanise kumalisa mabvuto ya wanthu. Ni Ufumu wa Mulungu wokha womwe ungamalise nthamu.

Fagani chilungamo chake. Tichadekana kuyesesa kutewedza malamulo yolungama ya Mulungu na mpfundo zake. Ndawa chani? Ndawa tikambasalula tekha chabwino na choyipa, ni mabvuto yokha-yokha. (Miyambo 16:25) Koma tikambabvera Mulungu, timukondweresa ndipo vitifambira bwino.—Yesaya 48:17, 18.

Pitirizani kufaga-faga Ufumu wa Mulungu na chilungamo chake chakuyamba. Yesu adaleweratu kuti anango ambadzakonde maninge chuma, pakuganiza kuti kuunganiza mali zizinji ndiko kungakonze tsogolo. Adalewa pomwe kuti anango  ambadzatangwanike mpakana kusowa mpata wofaga-faga Ufumu wa Mulungu.—Mateyu 6:19-21, 25-32.

Koma Yesu adapolomisa kuti wale omwe angachirikize Ufumu wa Mulungu adzakhale na vomwe ankuvifuna pakalipano ndipo adzagumane madaliso yazinji kutsogolo.—Mateyu 6:33.

Podiya kuti wopfunzira wa Yesu wakumbuyo ambafaga-faga Ufumu wa Mulungu na chilungamo chake, iwo alibe kuwonako kumala kwa mabvuto. Koma adatetezewa. Adatetezewa tani?

Iwo angatewedza malangizo ya Mulungu yachilungamo. Ndipomwapa angatetezeka ku mabvuto yobwera ndawa yosabvera Mulungu. Kukhulupirira mwamphanvu kuti Ufumu udzabwere, kudawathandiza kupirira nthamu. Ndipo Mulungu adawapasa ‘mphanvu kuposha yobadwa nayo’ kuti akwanise kupirira.—2 Akorinto 4:7-9.

Akhrisitu woyambirira adabvera lamulo ya Yesu yakuti ambayikhe Ufumu wa Mulungu pamalo yakuyamba. Iwo angalalikira ntontholo wabwino wa Ufumu m’madera yose yakwawo. (Akolose 1:23) Ko alipo ankuchita vimwevi ntsiku zino?

Inde! Mboni za Yahova zinkudziwa kuti pasala kanthawe kadiki-diki kuti Ufumu wa Mulungu umalise vinthu voipa padziko. Ndipomwapa iwo ankuchita vose vangakwanise kuti akwanirise mawu ya Yesu yakuti: ‘Ntontholo wabwino moyu wa Ufumu udzalalikiriwe padziko yose yapasi, kuti ukhale umboni ku mitundu yose, pamwapo mapeto yadzafike.’—Mateyu 24:14.

Ko imwepo mungachite tani mukabva ntontholo wabwino? Tikukulimbikisani kutewedzera wanthu woyambirira omwe angakhala ku Makedoniya mu thawundi ya ku Bereya. Pomwe iwo adatambira ntontholo wabwino wa Ufumu kuchokera kwa Paulo, iwo adautambira ‘na moyo wose.’ Ndipo ‘angafaga-faga Malemba mwakusamala’ kuti atsimikizire peno auziwa vazedi. Akateno angaphatisira basa vomwe apfunzira.—Machitidwe 17:11, 12.

Imwepo mungachitembo vibodzi-bodzi. Mwakuyikha Ufumu wa Mulungu pamalo yakuyamba na chilungamo chake, imwepo mudzagumane pothawira na potetezeka manjewuno na kudzatambira moyu wosapera padziko yapasi.