ATSIKANA awiri angafamba ku malo yanango yogulisira vinthu, ku thawundi ya Baguio ku Filipinas. Iwo adawona kashelufu kolalikirira koma adandopita vuu osayima. Mulongo Helena yemwe angalalikira pa kashelufu mwaka adawasekerera maninge, koma iwo adapitiriza kufamba. Podiya venze tene adakhala wodabwa na momwe Helena angawasekererera.

Patsogolo pake, iwo pangabwerera kumuyi pabasi, adawona Nyumba ya Ufumu ilimate chikwangwani cha jw.org. Iwo adakumbukira za kashelufukale komwe iwo adakawona pakuyamba. Iwo adaima nkuwona ndandanda ya misonkhano ya mipingu yosiyana-siyana ilimate pa Nyumba ya Ufumu.

Atsikana mwawa adadzabwera kudzasonkhana. Ko padandoti iwo angena, adawona mbani mu Nyumba ya Ufumu? Adawona Helena! Iwo adamuzindikira kuti ni munthu ule yemwe angawasekerera. Helena adati: ‘Pomwe iwo ambanifenderera, nidayamba kuganiza kuti, nchani chanaphonyesa?’ Koma m’bodzi adauza Helena kuti, mwayebwa kuti tagumana kule!

Atsikana wale adakomedzewa maninge na misonkhano ndipo adadzibva kuti ali kumuyi kwawo. Padawona kuti anango ankukhirina mu Nyumba ya Ufumu misonkhano payadamala, adabvunza kuti, ko tingathandizembo kukhirina? M’bodzi wa atsikana mwawa ankukhalalini ku Filipinas, koma munango uyu ashotalini kumisonkhano ndipo adayamba kupfunzira Baibolo. Vose ndawa ya kusekerera!