1. Ko nkhani yomwe idakambiwa pa nsonkhano wachigawo wa 1935 idakhudza tani mulumbwana munango?

MULUMBWANA munango wenze na magole 18 pangabatizika mu 1926. Azibereki wake enze Wopfunzira Baibolo, dzina yomwe Mboni za Yahova zingadziwika nayo panthawe mweire. Iwo enze na wana amuna atatu, na akazi awiri, ndipo adawapfunzisa kutamanda Yahova Mulungu na kutewedzera Yesu Khrisitu. Chenze chizolowenzi kwa Wopfunzira Baibolo wose wakale, kuphatanidzapo mulumbwana moyu, kudya vizindikiro gole iliyose pa Mlaliro wa Ambuya. Koma patsogolo pake, moyo wake udachinjiratu pomwe adabva nkhani yodekana maninge ya msolo wakuti: ‘Gulu ikulu.’ Nkhani mweyi idakambiwa na m’bale J. F. Rutherford pa nsonkhano wachigawo ku Washington, D.C., EUA. Ko nchani chomwe chidazindikiriwa pa nsonkhano moyu?

2. Ko m’bale Rutherford adafotokoza choonadi chiponi pangakamba nkhani yake?

² Munkhani mweyi, m’bale Rutherford adabvekesa kuti ni wanthu aponi womwe ali mu ‘gulu ikulu’ (King James Version), panango kuti ‘khamu ikulu’ yomwe inkufotokozewa pa Chivumbulutso 7:9. Panthawe mweyo, gulu mweyi ambaiti ni gulu yachiwiri yakudzulu ya wanthu womwe alibe chikhulupiriro polinganiza na Akhrisitu wodzozewa. M’bale Rutherford adaphatisira basa Malemba kuti abvekese kuti gulu ikulu ilibe kusaluliwa kuti ikakhale kudzulu, koma iwo ni gulu ya nkhosa zinango * womwe  adzapulumuke ‘pa chisautso chikulu’ ndipo adzakhale na moyo wosapera padziko. (Chiv. 7:14) Yesu adapolomisa kuti: ‘Ninankhosa zinango zomwe ni za mukholalini ino, zimwezi pomwe nichadekana kuzibweresa. Zidzabve mawu yangu, ndipo zidzakhale gulu ibodzi na nyakabusa m’bodzi.’ (Yoh. 10:16) Wa nkhosa zinango mwawa, ni Mboni za Yahova zokhulupirika zomwe zinachidikhiro chodzakhala padziko yapasi mparadaiso mpakana kale-kale. (Mat. 25:31-33, 46) Naboni tiwone momwe choonadi chinyowani chimwechi chidachinjira moyo wa wanthu wa Yahova kuphatanidzapo m’bale wachilumbwana ule wa magole 18.​—Sal. 97:11; Miy. 4:18.

3-4. Pa nsonkhano wachigawo wa 1935, ko wanthu azinji adazindikira chani va chidikhiro chawo, ndipo ndawa?

³ Yenze nthawe yokomedza maninge pa nsonkhano moyu, pomwe wokamba nkhani adauza wobvera kuti: ‘Mose omwe munachidikhiro chodzakhala padziko yapasi, imirirani.’ Ndipo wanthu woposha hafu ya 20.000 adaimirira. Patsogolo pake, m’bale Rutherford adanena kuti: ‘Wonani wanthu wa mugulu ikulu!’ Pamwapo m’manja mudamenyeka. Iwo padaimirira, adawonesa kuti abvesa kuti Mulungu alibe kuwasalula kuti akakhale kudzulu. Adazindikira kuti alibe kudzozewa na mzimu wa Mulungu. Ndipo ntsiku yachiwiri ya nsonkhano moyu, wanthu woposha 840 adabatiziwa ndipo azinji enze wa nkhosa zinango.

⁴ Nkhani pidapera, wanthu azinji pabodzi na mulumbwana ule watafotokoza kumayambiriro adasiya kudya nkate na kumwa vinyu pa Mlaliro wa Ambuya. M’bale munango wodzichepesa adati: ‘Chikumbuso cha mu mugole ya 1935, kenze komalizira kudya vizindikiro pakuti patsogolo pake nidazindikira kuti nilibe chidikhiro choyenda kudzulu ndipo nilibe kudzodzewa na mzimu wakuchena wa Yahova. Nidazindikira kuti ninachikhiro cha kudzathandiza kukonza dziko yapasi kuti ikhale paradaiso.’ (Aro. 8:16, 17; 2 Akor. 1:21, 22) Kundochokera mwapo, wanthu wa mu gulu ikulu awanda maninge ndipo ankuphata basa mobverana pabodzi na okhalira wa odzodzewa. *

5. Ko Yahova achawawona tani womwe adaima kudya vizindikiro?

⁵ Ko Yahova achawawona tani womwe adaleka kudya vizindikiro patsogolo pa 1935? Ko Yahova achaziwonatani Mboni za Yahova zomwe zichadya vizindikiro ntsiku zino, koma patsogolo pake nkuzindikira kuti ni wodzozewalini chaiwo? (1 Akor. 11:28) Anango achadya vizindikiro ndawa yakuti ankudziwalini bwino-bwino va chidikhiro chawo. Koma iwo akazindikira kuti angaphonya, nkulekeratu kudya, Yahova achawabvuma kuti akhale wa nkhosa zinango. Podiya kuti iwo angadyelini nkate na kumwa vinyu, achapitiriza kugumanika pa Chikumbuso pakuwonesa kutembeja pa vomwe Yahova na Yesu adawachitira.

6. Ko Yesu adalamula angelo kuti achite chani?

⁶ Pakuti chisautso chikulu chichitike manje-manje, ni volimbikisa maninge kuti tikambirane vomwe msolo 7 wa bukhu ya Chivumbulutso uchafotokoza pankhani ya Akhrisitu wodzozewa na gulu ikulu ya nkhosa zinango. Yesu adalamula angelo kuti apitirize kuphata mphepo zinayi zomwe zingacheneke dziko yapasi. Iwo adakali nazo phatirire kufikira wodzozewa wose adzadindiwe chidindo pakuwonesa kuti ni wobvumizika kwa Yahova. (Chiv. 7:1-4) Ninge mphoto ya kukhulupirika kwawo, abale wa Khrisitu wodzozewa adzakhale mafumu na ­wantsembe pabodzi na Yesu kudzulu. (Chiv. 20:6) Wose womwe ali m’banja ya Mulungu yakudzulu anashungu ya kudzawona anzawo wa mugulu mweyi ya 144.000 ankupasiwambo madaliso yawo.

7. Ninga mwaikufotokozera lemba ya Chivumbulutso 7:9, 10, ko Yohane adawona chani m’masomphenya, ndipo iwo akuchita chani? (Onani foto ya pakhava.)

⁷ Yohane padafotokoza va mafumu na antsembe wokwana 144.000, adawona soti ‘gulu ikulu’ yomwe yapulumuka pa Arumagedo. Mwakusiyana na gulu yakuyamba, gulu yachiwiri ni ikulu maninge na yosawerengeka. (Lewengani Chivumbulutso 7:9, 10.) Iwo ‘ali vale mikanjo yochena,’ pakuwonesa kuti alibe ‘kudziyipisa’ na dziko ya Satana koma adatumikira Mulungu na Khrisitu mokhulupirika. (Yak. 1:27) Iwo ankukuwa mokondwa ndawa ya vomwe Yahova na Yesu yemwe ni Mwanawankhosa wawachitira. Nthawe zose, iwo ali nyamule minthayi ya kanjedza, vomwe vinkuwonesa kuti akuzindikira kuti Yesu ni Mpfumu yoikhiwa na Yahova.​—Linganizani na Yohane 2:12, 13.

8. Mobverana na Chivumbulutso 7:11, 12, ko nchani chikuchitika kudzulu pomwe ankuwona gulu ikulu?

⁸ Lewengani Chivumbulutso 7:11, 12. Ko nchani chikuchitika kudzulu pomwe ankuwona gulu ikulu? Yohane adawona banja yose yakudzulu ya Yahova inkukondwa ndawa ya gulu ikulu yomwe inkutamanda Mulungu. Banja yakudzulu ya Yahova idzakhale yokondwa kuwona kukwanirisika kwa masomphenya mwaya pomwe gulu ikulu idzapulumuke pa chisautso chikulu.

9. Mobverana na Chivumbulutso 7:13-15, ko gulu ikulu inkuchita chani manjeuno?

⁹ Lewengani Chivumbulutso 7:13-15. Yohane ankufotokoza kuti gulu ikulu mweyi ‘idawatcha mikanjo yawo m’magazi ya Mwanawankhosa.’ Vimwevi vinkuthandawuza kuti iwo anachikumbuntima chakuchena ndipo ni wobvumizika kwa Yahova. (Yes. 1:18) Iwo adadzipereka nkukhala Akhrisitu wobatizika, achakhulupirira ntsembe ya dipo ya Yesu ndipo ali pa ushamwali wolimba na Yahova. (Yoh. 3:36; 1 Pet. 3:21) Iwo ni wodekanadi kuimirira pamaso pa mpando wachifumu wa Mulungu ‘na kumutumikira pa utumiki wopatulika usiku na masikati’ padziko yapasi pano. Olo manjeuno, iwo ni wodzipereka pochita mbali ikulu pa basa ya kulalikira na kupfunzisa wanthu va Ufumu wa Mulungu, ndipo achawona kuti basa mweyi ni yodekana.​—Mat. 6:33; 24:14; 28:19, 20.

10. Ko gulu ikulu idatsimikiziriwa chani, ndipo iwo adzawone polomisi iponi ikukwanirisika?

¹⁰ Gulu ikulu mweyi ni yomwe idapulumuka ku chisautso chikulu ndipo Mulungu ankupitiriza kuisamalira, ndawa ‘wokhala pampando wachifumu adzathambuludze tenti kwa iwo.’ Tinashuwa kuti vomwe wankhosa zinango adapolomisiwa vidzakwanirisike. Iwo adapolomisiwa kuti: ‘[Mulungu] adzapukuse misozi yose m’maso mwawo, ndipo impfa idzakhalepolini soti. Padzakhalelini kulira panango kubuula, ne kuwawiwa.’​—Chiv. 21:3, 4.

11-12. (a)Mwakubverana na vomwe viri pa Chivumbulutso 7:16, 17, ko wankhosa zinango adzatambire madaliso yaponi? (b) Ko wankhosa zinango angachite chani pachikumbuso, ndipo ndawa chani?

¹¹ Lewengani Chivumbulutso 7:16, 17. Manjeuno, anango mwa wanthu wa Yahova ankubonera na maganizo, njala, kugwa kwa chuma, panango ndawa ya vipiringu na nkhondo. Anango ankumangiwa ndawa ya chikhulupiriro chawo. Koma podiya viritene, wanthu mwawa womwe ni wankhosa zinango, ni wokondwa kudziwa kuti adzapulumuke pakuchenekewa kwa dziko yakuipa, ndipo adzakhale na chakudya chizinji chakuthupi na chauzimu. Pomwe dziko ya Satana ‘idzadzongewe,’ Yesu adzatsogolere womwe adzapulumuke padziko yapasi kuti ayende kukatambira ‘madzi ya moyo [wosapera].’ Ko ni vokomedzalini kuti gulu ikulu inachidikhiro chapadera? Ndipo mabiliyoni yazinji ya wanthu yadzafelini pomwe!​—Yoh. 11:26.

¹² Wa nkhosa zinango anachidikhiro chabwino maninge, ndipo adzatembeje Yahova na Yesu! Iwo alibe kusaluliwa kuti akakhale na moyo kudzulu, koma achakondwa na Yahova ndipo achitiralini njiru womwe adzayende kudzulu. Magulu yose mwaya yachatamanda Yahova na Khrisitu. Njira ibodzi yomwe wose achachitira vimwevi, ni kugumanika pa Nsinda wokumbukira impfa ya Yesu.

13-14. Ndawa chani aliyese achagumanika pa Chikumbuso cha impfa ya Yesu?

¹³ M’magole ya manje-manjepa, pafupi-fupi wanthu 1.000 womwe achagumanika pa chikumbuso, m’bodzi ndiye achadya nkate na kumwa vinyu. M’mipingu yazinji mulibe wanthu wakudya vizindikiro. Wanthu azinji womwe achagumanika pa chikumbuso anachidikhiro cha padziko yapasi. Manje ndawa chani wanthu mwawa achagumanika pa Nsinda wokumbukira impfa ya Yesu? Iwo achachita ninga momwe wanthu achachitira akayenda ku phwando ya ukwati wa shamwali wawo. Iwo achagumanika ndawa achada kuwonesa chikondi chawo na kuthandiza wolowolana. N’chibodzi-bodzimbo, wankhosa zinango achagumanika pachikumbuso ndawa yakuti achada kuwonesa chikondi chawo na kuthandiza Akhrisitu wodzozewa. Chinthu chinango chomwe achagumanikira, nkuda kuwonesa kutembeja kwawo pa ntsembe ya Yesu, yomwe idatifungulira mwayi wodzagumana moyo wosapera padziko yapasi.

¹⁴ Chifukwa chinango chikulu chomwe wankhosa zinango achagumanikira pachikumbuso nchakuti achabvera lamulo ya Yesu. Pomwe Yesu adayambisa Nsinda wapadera moyu na wapfunzira wake wokhulupirika, adawawuza kuti: ‘Mumbachite vimwevi pakunikumbukira.’ (1 Akor. 11:23-26) Ndipomwapa, wankhosa zinango ankupitiriza kuchita Mlaliro wa Ambuya mpakana panthawe yomwe wodzozewa wose adzayende kudzulu. Ndipo wankhosa zinango ankupitiriza kuchemera aliyese kuti agumanike pachikumbuso.

15. Ko munthu aliyese payekha angadzawonese tani kuti ankutamanda Mulungu na Khrisitu pachikumbuso?

¹⁵ Pachikumbuso, tichakhala na mwayi wotamanda Yahova na Khrisitu mu nyimbo na pemphero. Nkhani ya gole ino idzakhale na msolo wakuti: ‘Mumbatembeje pa vomwe Mulungu na Yesu adakuchitirani.’ Ndipo nkhani mweyi idzatithandize maninge kuti tidzatembeje Yahova na Khrisitu. Vizindikiro vikambadzafambisiwa, tose wogumanikapo tidzakumbukire va thupi na magazi ya Yesu tikambadzawona nkate na vinyu. Tidzakumbukire kuti Yahova adabvuma kuti Mwana wake afe m’malo mwa ise kuti tidzagumane moyo wosapera. (Mat. 20:28) Aliyese yemwe achakonda Ababa wathu wakudzulu na Mwana wake adzayesese kugumanika pa Chikumbuso.

16. Ko wodzozewa na wankhosa zinango ni wolingana mu njira ziponi?

¹⁶ Kusiyana chidikhiro kwa wodzozewa na nkhosa zinango kuchachitisalini kuti Yahova akonde mbali ibodzi. Ndipo magulu yose yawiri mwaya ni yodekana kwa iye. Tinkudziwa vimwevi ndawa yakuti, Mulungu adalipira ntengo ubodzi womwe ni moyo wa Mwana wake kuti awombole wodzozewa na wankhosa zinango. Iwo andosiyana chidikhiro basi. Magulu yose yawiri mwaya ni yokhulupirika maninge kwa Mulungu na kwa Khrisitu. (Sal. 31:23) Ndipo kumbukirani kuti mzimu wa Yahova uchaphata basa molingana kwa aliyese wa ise. Vimwevi vinkuwonesa kuti Yahova achakhuthulira mzimu wake wakuchena kwa aliyese mobverana na momwe iye ankuufunira peno ni wodzozewa panango neye.

17. Ni vinthu viponi vomwe Akhrisitu wodzozewa achaganizira?

¹⁷ Akhrisitu wodzozewa abadwalini na chidikhiro choyenda kudzulu. Mulungu achachita kuwaikhira m’moyo mwawo chidikhiro chimwechi. Iwo achaganizira va chidikhiro chawo, kuchipempherera, ndipo anashungu ya kukatambira madaliso yawo kudzulu. Koma iwo achadziwalini kuti thupi yawo ikakhale tani kudzulu. (Afil. 3:20, 21; 1 Yoh. 3:2) Podiya viritene, iwo achaganizira mwati akakhalire na Yahova, Yesu, angelo na Akhrisitu anango wodzozewa womwe adayenda kale kudzulu na mwati akatongere pabodzi mu Ufumu wakudzulu.

18. Ni vinthu viponi vomwe wa nkhosa zinango achaganizira?

¹⁸ Wa nkhosa zinango anachidikhiro chomwe nchachibadwa kwa wanthu ise. Iwo ankudikhira kudzakhala padziko yapasi mpakana kale-kale. (Mla. 3:11) Iwo ankudikhira nthawe yomwe adzathandizire kuti dziko yose ikhale paradaiso. Ndipo iwo ankudikhira mwashungu nthawe yomwe adzamange nyumba zawo, kukhuzisa malo, na kubereka wana womwe angafelini. (Yes. 65:21-23) Ndipo ankudikhirira kumbadzachitambo maulendo yakuwona malo yosiyana-siyana, mapiri, vipululu na kupfunzira vinthu vizinji va Yahova mu chilengedwe. Ndipo kuposha vose, vomwe vichawakomedza maninge n’vakuti ushamwali wawo na Yahova udzakhale wakulimba maninge.

19. Ko ni mwayi uponi womwe Chikumbuso chichapasa aliyese wa ise, ndipo nilini pati chidzachitike gole ino?

¹⁹ Yahova wapereka kwa mtumiki wake aliyese wodzipereka chidikhiro chabwino chakutsogolo. (Yer. 29:11) Nsinda wokumbukira impfa ya Khrisitu uchapereka mwayi kwa tose kuti titamande Yahova na Khrisitu pa vomwe iwo adatichitira kuti tidzagumane moyo wosapera. Chikumbuso ni chochitika chapadera kwa Akhrisitu chaiwo gole iliyose. Gole ino tidzachichite pa Satade, 27 Março 2021 dzuwa ikadzachoma. Gole ino, azinji womwe achakhala kudera komwe kunaufulu adzachite nsinda moyu momasuka. Anango adzachite podiya kuti ankutsutsiwa, ndipo anango adzashupike ndawa yakuti ali mudjeri. Viribe basa momwe vidzakhalire, Yahova, Yesu na banja yakudzulu ya Mulungu adzakomedzewe kuwona wanthu ankuchita chikumbuso ninge mpingu, ninge kagulu, panango munthu aliyekha.