1. Ninge Mpfumu Davide, ko anango wa ise tingakhale na mbvunzo uponi?

TOSE tichada kukhala mwantendere na mosagunduzika pamoyo. Palibe angafune kumbandokhala na nkhawa. Koma nthawe zinango, tingagumane na vinthu vomwe vingatichitise nkhawa. Kunena shuwa, atumikimbo anango wa Yahova adabvambo chibodzi-bodzi, ndipo Mpfumu Davide adabvunza Yahova kuti: ‘Ko ntsiku za moyo wangu zidzakhale na chisoni kufikira lini?’​—Sal. 13:2.

2. Ko tipfunzire chani mu nkhani ino?

² Podiya kuti tingakwaniselini kukhaliratu tilibe nkhawa, pali vatingachite kuti tigwebane nazo. Mu nkhani ino, tidziwe vinthu vinango vomwe vichatichitisa kuti timbakhale na nkhawa. Patsogolo pake tikambirane njira 6 zomwe tingachite kuti tikhale osagunduzika pomwe tinkulimbana na mabvuto yathu.

3. Ni vinthu viponi vomwe vichatichitisa nkhawa, ndipo ko tingakwanise kuvikangisa?

³ Pali vinthu vizinji vomwe vingachitise kuti tikhale na nkhawa. Ndipo vinango tingavikangiselini. Mwakulinganiza, tingakwaniselini kubweza mitengo ya vakudya, vovala na vinthu vinango vikambadula. Ayathu wakushikola na wakubasa angatiyese kuti tichite vinthu mosaya chilungamo panango kuchita chigololo. Tingakwaniselini kuchepesa vinthu vaugananga mudera yathu. Tinkugumana na mabvuto mwaya ndawa yakuti tinkukhala na wanthu wamudziko ya Satana womwe achatewedzalini mpfundo za m’Baibolo. Ndipo Satana yemwe ndiye ankutonga dziko mweyi, ankudziwa kuti wanthu anango angakangire kutumikira bwino-bwino Yahova ndawa ya ‘nkhawa za moyo wa nthawe ino.’ (Mat. 13:22; 1 Yoh. 5:19) Ndipomwapa ni vosadabwisa kuwona kuti wanthu azinji mudziko ankugumana na vinthu vizinji vopasa nkhawa!

4. Ko chingachitike nchani mabvuto yakatikulira?

⁴ Mabvuto yangatikulire mpakana kusowa pophata. Mwakulinganiza, tingakhale na nkhawa kuti tigumane tani mali kuti tidzisamalire, panango kuti nidzachitetani nikadzadwala mpakana kufika pakunichosa basa. Panango tingambadere pomwe nkhawa kuti tidzakwaniselini kukhulupirika tikadzayesewa kuti tiphwanye malamulo ya Mulungu. Manje-manje Satana na wanthu womwe iye ankutonga adzaukire atumiki wa Mulungu, ndipomwapa tingambadere nkhawa kuti tidzachitetani. Koma panango mungabvunze kuti, ‘manje nkuphonya kukhala na nkhawa zatene?’

5. Ko Yesu angathandauza chani padati: ‘Lekani kukhala na nkhawa’?

⁵ Tinkudziwa kuti Yesu adauza wopfunzira wake kuti: ‘Lekani kukhala na nkhawa.’ (Mat. 6:25) Ko Yesu angathandauza kuti tikhaliretu tilibe nkhawa? Neye. Kumbukirani kuti olo atumiki wa Yahova wa kale-kale adakhalambo na nkhawa. Koma Yahova adapitiriza kukondwa nawo. * (1 Maf. 19:4; Sal. 6:3) Yesu akundotilimbikisa. Iye angadalini kuti timbakhale na nkhawa maninge na momwe tidzazisamalirire m’moyo uno mpakana kuleka kutumikira bwino-bwino Mulungu. Manje nchani chatingachite kuti tichepese nkhawa?​—Wonani bokosi yakuti: “ Mwamungachepesere nkhawa.”

6. Mwakubverana na Afilipi 4:6, 7, nchani chingatithandize kukhala wosagunduzika pa nkhawa zathu?

⁶ (1) Mumbapemphere mosalekedza. Mukakhala na mabvuto yomwe yankukuchitisani nkhawa, mumbapemphere kwa Yahova. (1 Pet. 5:7) Iye angakudawireni mapemphero yanu mwa kukupasani ‘ntendere wa Mulungu womwe uposha kuganiza mwamphanvu kulikose.’ (Lewengani Afilipi 4:6, 7.) Yahova adzakupaseni ntendere moyu pa kuphatisira basa mphanvu ya mzimu wake wakuchena.​—Agal. 5:22.

7. Ndawa chani tichadekana kutomoleratu bvuto yathu tikambapemphera?

⁷ Mukambafendera kwa Yahova mpemphero, fungulani mtima wanu kwa iye. Mbamuuzani mabvuto yose, ndipo mufotokozereni momwe imwepo munkubvera ndawa ya mabvuto mwaya. Mukanati kukonza bvuto yanu, mbamukumbirani nzeru kuti mukwanise kusalula bwino-bwino vinthu. Mukakhala kuti mukwaniselini kukonza bvuto yanu, mbamukumbirani Yahova kuti akuthandizeni kuti musambakhale na nkhawa yonyanya. Mukambatomoleratu mpemphero vomwe vinkukushupani, mudzakwanise kuwona momwe Yahova wakudawirirani. Vingachitike kuti mdawiro ungabwereretulini nthawe mweyo, koma ayi kufoka. Kuchosa pa kuleweratu ­sitiriti bvuto yanu, Yahova achada soti kuti mumbalimbikire kupemphera.​—Luka 11:8-10.

8. Ko tinganene pomwe chani m’mapemphero yathu?

⁸ Mukambatulira nkhawa zanu Yahova mpemphero, mbamutembejani pa  vomwe wakuchitirani. Ni vabwino maninge kuganizira vinthu vabwino vomwe ankutichitira podiya kuti tiri panthamu. Vingachitike kuti nthawe zinango mungasowe mawu yamungafotokozere maganizo yanu, koma kumbukirani kuti Yahova achadawira mapemphero olo yakundoti: ‘Pilizi nithandizeni!’​—2 Mbiri 18:31; Aro. 8:26.

9. Ko chitetezo chaicho tingachigumane tani?

⁹ (2) Thembani nzeru za Yahova, osati zanu. Mu nthawe ya mneneri Yesaya, ntundu wa Ayuda udachita mantha ndawa ya kubva kuti Asuri ankubwera kudzamenyana nawo. Pakulamba kuti angatongewe na Asuri, adathemba Aiguputo kuti awathandize. (Yes. 30:1, 2) Yahova adawauza kuti vomwe asalula viwabweresere ngozi. (Yes. 30:7, 12, 13) Pophatisira basa Yesaya, Yahova adawauza komwe angagumane chitetezo chaicho. Iye adati: ‘Mudzakhale wamphanvu mukakhala osagunduzika na wachikhulupiriro’ kwa Yahova.​—Yes. 30:15b.

10. Ko ni vochitika viponi vomwe vingawonese kuti tichathemba Yahova?

¹⁰ Ko tingawonese tani kuti tikuthemba Yahova? Onani vitsanzo. Linganizani kuti mwapasiwa mwayi wa basa ya mali zizinji, koma imbakudyereni nthawe yamudakachitira vinthu vauzimu. Panango linganizani kuti munthu yemwe muchaphata naye basa ankukufunani koma iye ni mtumikilini wa Mulungu wobatizika. Panango munthu wa m’banja mwanu ankukuuzani kuti: “Usalule pakati pa ine na Mulungu wako.” Pa vochitika vose mwevi, vingakhale voshupa kusalula bwino, koma Yahova adzakupaseni nzeru. (Mat. 6:33; 10:37; 1 Akor. 7:39) Mbvunzo ni wakuti, ko imwepo mudzathembe Yahova na kutewedza malangizo yake?

11. Ni nkhani za m’Baibolo ziponi zatingapfunzire kuti tikhale osagunduzika tikambatsutsiwa?

¹¹ (3) Pfunzirani na vitsanzo vabwino na voyipa. Mu Baibolo munankhani zizinji zowonesa kudekana kokhala osagunduzika na kumbathemba Yahova. Mukambapfunzira nkhani mwezi, onani chomwe chidathandiza atumiki wa Yahova kukhala osagunduzika pomwe angatsutsiwa maninge. Mwakulinganiza, pomwe tiribunali ikulu ya Ayuda idawuza atumi kuti aleke kulalikira, iwo alibe kuchita mantha. Koma adadawira kuti: ‘Tichadekana kubvera Mulungu ninge wolamulira osati wanthu.’ (Mac. 5:29) Podiya kuti adagopsewa, iwo alibe kuchita mantha. Ndawa chani? Ndawa iwo angadziwa kuti Yahova ali kusaidi yawo. Vimwevi vidakondweresa Yahova. Ndipomwapa iwo adapitiriza kulalikira ntontholo wabwino. (Mac. 5:40-42) Chitsanzo chinango chabwino ni cha Sitefano, pomwe adauziwa kuti aphewe, adapitiriza kukhala na ntendere ndipo pankhope angawoneka ‘ninge mngelo.’ (Mac. 6:12-15) Ndawa chani? Ndawa yakuti iye ambadziwa kuti Yahova ankukondwa naye.

12. Mwakubverana na 1 Petulo 3:14 na 4:14, ndawa chani tichadekana kukhala wokondwa tikambadzudziwa?

¹² Atumi angatsimikizira kuti Yahova ali kusaidi yawo. Iwo adatambira mphanvu yochokera kwa Mulungu yochitira vodabwisa. (Mac. 5:12-16; 6:8) Koma ise ntsiku zino tingakwaniselini kuchita vodabwisa. Podiya kuti viriteno, Yahova achaphatisa basa Mawu yake pakutitsimikizira kuti, peno tinkubonera ndawa ya chilungamo, ndiye kuti iye ankukondwa nase ndipo tinamzimu wake. (Lewengani 1 Petulo 3:14; 4:14.) Ndipomwapa, m’malo mokhala na nkhawa kuti tidzachitetani tikambadzatsutsiwa kutsogolo, tichada  kuwonesesa vomwe tingachite kuti tilimbise kuthemba kwathu Yahova kuti iye adzatipulumuse. Ninge momwe atumi adachitira, isembo tichadekana kukhulupirira polomisi ya Yesu yakuti: ‘Nidzakupaseni mawu yoti munene na kukupasani nzeru, zomwe wotsutsa wanu wose adzakwaniselini kuzilamba panango kuzitsutsa.’ Yesu adatitsimikizira kuti: ‘Peno mudzapirire, mudzagumane moyo.’ (Luka 21:12-19) Ndipo tichadekanalini kuyebwa kuti Yahova achakumbukira atumiki wake womwe adafa ali wokhulupirika ndipo adzawamukise.

13. Ko tingaphindule tani tikakambirana va vitsanzo va wanthu womwe alibe kukhala wosagunduzika na kuthemba Yahova?

¹³ Tingapfunzire soti vizinji kwa wanthu womwe alibe kukwanisa kukhala wosagunduzika na kuthemba Yahova. Kupfunzira vitsanzo vawo kungatithandize kuti tileke kuphonyambo ninge iwo. Mwakulinganiza, kumayambiriro kwa utongi wa Asa, gulu ikulu ya nkhondo idayenda kukamenyana na Ayuda. Asa adathemba Yahova ndipo adawina. (2 Mbiri 14:9-12) Koma patsogolo pake, padaukiriwa na Basa,mpfumu ya Aizirayeli yemwe wenze na masocha pang’ono, Asa adathemba gulu ya nkhondo ya Asiriya kuti imuthandize m’malo monyang’ana kwa Yahova wachipulumuso, ninge mwadachitira pakuyamba. (2 Mbiri 16:1-3) Ndipo ali kufupi na kumapeto kwa moyo wake, pangadwala nthenda ya mapazi, alibe kuthemba Yahova kuti amuthandize.​—2 Mbiri 16:12.

14. Ko tinkupfunzira chani pa vomwe Asa adaphonyesa?

¹⁴ Pakuyamba, Asa adanyang’ana kwa Yahova padagumana na mabvuto. Koma patsogolo pake adasiya kuthemba Mulungu, adawona kuti ni vabwino kudzithemba yekha. Pakuyamba, kuthemba kwake Asiriya kudakhala ninge kwaphata basa. Koma viribe kuphata basa, ndipo kutetezeka kwawo kwenze kwakanthawe. Yahova pakuphatisa basa mneneri, adamuuza kuti: ‘Ndawa yakuti mudathemba mpfumu ya Siriya osathemba Yahova Mulungu wanu, gulu yankhondo ya Asiriya yathawa m’manja mwanu.’ (2 Mbiri 16:7) Tichadekana kukhala wosamala kuti osati timbadzithembe nkumbaganiza kuti tingakwanise kukonza mabvuto yathu mosakumbirako thandizo ya Yahova. Podiya kuti mpofunika kuti tisalule vinthu mwakankulumize, tikaderekha nkuthemba Yahova, iye adzatithandize kuti vinthu vitifambire bwino.

15. Tichadekana kuchita chani tikambalewenga Baibolo?

¹⁵ (4) Sungani munsolo mavesi ya m’Baibolo. Mukagumana mavesi yowonesa kudikana kokhala osagunduzika na kuthemba Yahova, yasungeni munsolo. Kuti mukwanise kuyasunga, mumbayalewenge mokuwa panango kuyanemba pamalo yomwe mungambayawone mosashupa. Yoswa adalamuliwa kuti ambalewenge bukhu ya chilamulo nthawe zose kuti achite vinthu mwanzeru. Kuchita vimwevi kumbamulimbikisa kuti aleke kukhala na mantha, ndipo ambakhala wolimba moyo pakutsogolera wanthu wa Mulungu. (Yos. 1:8, 9) Mavesi yazinji ya m’Baibolo yangakuthandizeni kukhala na ntendere wa m’maganizo na wamuntima mukagumana na vinthu vopasa nkhawa panango mantha.​—Sal. 27:1-3; Miy. 3:25, 26.

16. Ko Yahova achaphatisira tani basa mpingu kuti tikhale wosagunduzika nakuti timbamuthembe?

¹⁶ (5) Khalani pabodzi na wanthu wa Mulungu. Yahova achaphatisa basa abale na alongo kuti atithandize kukhala osagunduzika na kumuthemba. Mumisonkhano yathu, tichaphindula na nkhani  zosiyana-siyana zomwe zichakambiwa, ndemanga za abale na alongo na macheza yolimbikisa yomwe tichakhala nayo na abale wathu. (Aheb. 10:24, 25) Tingalimbikisiwe soti tikambafotokoza momwe tikubvera kwa azishamwali wothembeka wa mumpingu. ‘Mawu yabwino’ yochokera kwa shamwali yangatithandize kuchepesa nkhawa zathu.​—Miy. 12:25.

17. Mwakubverana na Aheberi 6:19, ko chidikhiro cha Ufumu chingatithandize tani kukhala wodjirikira podiya tigumane na voshupa?

¹⁷(6) Limbisani chidikhiro chanu. Chidikhiro chathu cha Ufumu chili ‘ninge ndangula ya miyoyo,’ yomwe ichatichitisa kuti tikhale wodjirikira podiya kuti tinkugumana na mabvuto yosiyana-siyana panango nkhawa. (Lewengani Aheberi 6:19.) Mbasinkhasinkhani mapolomisi ya Yahova yonena za kutsogolo mukakhala kuti munankhawa. (Yes. 65:17) Yesesani kuganizira m’moyo mwanu muli mudziko inyowani yantendere, komwe nkhawa kudzakhale kulibe. (Mika 4:4) Mungalimbise chidikhiro chanu, mwa kuuzako anango va dziko inyowani. Chitani vose vamungakwanise pa basa yolalikira na kupfunzisa wanthu. Imwepo mukachita tene, mudzakhale na ‘chidikhiro chotsimikizika mpakana mapeto.’​—Aheb. 6:11.

18. Ko kutsogolo uku tigumane na chani, ndipo timbachite chani kuti tidzagwebane navo?

¹⁸ Pakuti tiri kufupi maninge na mapeto ya dziko ino, tigumane na vinthu vizinji vopasa nkhawa. Lemba yathu ya gole ya 2021, itithandize kugwebana na mabvuto mwaya tiri osagunduzika, osati na mphanvu zathu chabe, koma ndawa ya kuthemba kwathu Yahova. Nkati mwa gole mwaino, tinkufuna kuti vochita vathu viwonese kuti tinkuthemba polomisi ya Yahova yakuti: ‘Mudzakhale wamphanvu mukakhala osagunduzika na wachikhulupiriro.’​—Yes. 30:15.