Paulo adanemba kuti: ‘Mwachilamulo ine nidafa ku chilamulo, mwakuti ningachitewedzelini pomwe, kuti nikhale wamoyo kwa Mulungu.’​—Agal. 2:19.

Vomwe Paulo adanemba vimbabverana na nkhani ikulu yomwe wenze adanembera ku mpingu wa ku Roma mu polovinsiya ya Galatiya. Akhrisitu anango wenze andasokonezeka na apfunzisi wa bodza. Wanthu mwawa ambanena kuti wanthu angakapulumuke akakhala kuti wakutewedza chilamulo cha Mose makamaka pa nkhani ya kugwatiwa. Koma Paulo ambadziwa kuti Yahova ambabvumalini wanthu kuti ndawa wenze wogwatiwa. Ndipomwapa iye adawauza mwamphanvu kuti mwechi chenze chipfunziso chabodza ndipo abale angadekana kukhulupirira mu ntsembe ya dipo ya Yesu Khrisitu.​—Agal. 2:4; 5:2.

Baibolo yenze idanena kale kuti munthu akafa palibe chomwe iye achadziwa. (Mla. 9:5) Pomwe Paulo adati: ‘Mwachilamulo ine nidafa ku chilamulo,’ ambathandauza kuti chilamulo cha Mose chikuphatalini pomwe basa mwa iye. Koma m’malo mwake iye wenze adayikha chikhulupiriro ku ntsembe ya Dipo ya Yesu Khrisitu. Ndipo iye ‘adakhala ngati wakhala pomwe na moyo kwa Mulungu.’

Momwe vinthu vidachinjira kwa Paulo vidachitika ‘ndawa ya chilamulo.’ Ndawa chani tinkulewa tene? Iye adafotokoza kuti: ‘Munthu achakhala wolungama ndawa ya kukhulupirira Yesu, osati ndawa ya basa ya chilamulo.’ (Agal. 2:16) Mwachikondi chilamulo chenze chidakonza vizinji vodekana. Ndipo Paulo adauza Agalatiya kuti: ‘Adayingizira kuti machimo yawonekere, mpakana yemwe ni mbewu ule afike.’ (Agal. 3:19) Shuwadi, chilamulo chimbawonesa kuti wanthu angakwaniselini kuchisunga bwino-bwino ndipo angadekana ntsembe yangwiro. Apa vikuwoneseratu kuti Chilamulo chimbatenga wanthu kuti ‘adikhire’ pa ntsembe ya dipo ya Yesu. Munthu adakakhulupirira mu ntsembe ya dipo ya Yesu adakakhala obvumizika kwa Mulungu. (Agal. 3:24) Paulo ambabwera pa mpfundo mweyi panango ndawa Chilamulo chidabwera kuti chibvume na kuyikha chikhulupiriro mwa Yesu. Ndipomwapa kwa Paulo ku ‘chilamulo wenze wakufa’ koma kwa Mulungu wenze wamoyo.

Paulo adafotokoza vibodzibodzi mukalata yake yoyenda kwa Aroma. Iye adati: ‘Ndipomwapa abale wangu, thupi ya Yesu idakuchitisani kukhala . . . Kuti mukhale munango mu chilamulo, ndawa tamukisiwa mu chilamulo, ndawa tafa kuchilamulo chimbatimanga chile.’ (Aro. 7:4, 6) Lemba mweyi pabodzi na lemba ya Agalatiya 2:19, yankuwonesa kuti Paulo ambanenalini kufa munthu ndawa yotongewa na Chilamulo. M’malo mwake, iye ambanena va kumasuliwa. Chilamulo chenze chilibe mphanvu kwa iye olo kwa wanthu anango. Iwo wenze adamasuliwa ndawa ya chikhulupiriro mu ntsembe ya dipo ya Khrisitu.