1. Ndawa chani atumiki anango wa Yahova achadzibva kuti ali okhaokha?

AZINJI wa ise tichadzibva kuti tili tekha. Kwa anango, maganizo mwaya yachachoka mwakankulumize, pomwe anango angadzibve tene kwa nthawe itali. Tingadzibve kuti tili tekhatekha olo kuti tinawanthu azinji. Anango achashupika kuti adjaire mpingu unyowani. Anango achokera m’banja yomwe adadjaira kuchitira pabodzi vinthu, ndipo achadzibva kukhala okhaokha akakhala kuti afulukira kutali na azibale wawo. Pomwe anango achakhala na chisuwo na azishamwali pabodzi na azibale omwe adachoka. Ndipo Akhrisitu anango, makamaka omwe apfunzira manjemanje chonadi, achadzibva kuti ali okhaokha akambatsutsiwa panango kulambiwa na wanthu wosakhulupirira wa m’banja mwawo na azishamwali wa kalekale.

2. Ko tidawire mibvunzo yaponi?

² Yahova achadziwa ndipo achabvesa chilichose chomwe chichatichitikira. Tikambadzibva kuti tili tekha, iye achadziwa vimwevi ndipo achada kutithandiza kupirira. Ko Yahova achatithandiza tani? Ko ni chani chomwe tingachite kuti tidzithandize? Ndipo ni chani chomwe tingachite kuti tithandize anango omwe achabva kuti ali okhaokha? Naboni tikambirane midawiro yake.

3. Ko Yahova adaonesatani kuti angaganizira Eliya?

³ Yahova achada kuti atumiki wake wose akhale wokondwa. Iye ali pafupi na aliyese wa ise. Ndipo achadziwa tikakhala  kuti tapanikizika maganizo panango tikafoka. (Sal. 145:18, 19) Onani momwe Yahova adakhalira tcheru kwa mneneri Eliya. Mwamuna wokhulupirika moyu yemwe adakhala mu nthawe yoshupa mu mbiri ya Aizirayeli. Wanthu wa Yahova adayamba kudzudziwa maninge, ndipo Eliya ndiye wenzeletu pangozi ikulu na azondi wa Mulungu mwawa. (1 Maf. 19:1, 2) Chomwe chingamushupisa maninge Eliya chenze chakuti angadziona kuti wandosala yekhayekha mneneri yemwe angatumikira Yahova. (1 Maf. 19:10) Mulungu mwakankulumize adaona vomwe vingachitikira Eliya, ndipo iye adatuma mngelo kuti akalimbikise mneneri wake pakudziwa kuti alilini yekha nakuti penze Aizirayeli azinji omwe angagopa Mulungu!​—1 Maf. 19:5, 18.

4. Ko lemba ya Maliko 10:29, 30 inkuwonesa tani kuti Yahova achaganizira atumiki wake omwe alibe chithandizo cha azibale na azishamwali wawo?

⁴ Yahova achabvesa kuti pomwe tidasalula kumutumikira, anango wa ise tidasiya vinthu vizinji. Vomwe vinkuphatanidzapo chithandizo chochokera kwa wachibale omwe ni wosakhulupirira panango azishamwali wakale. Pakufuna kumubva mawu yake, mtumi Petulo adabvunza Yesu kuti: ‘Ise tasiya vinthu vose ndipo takutewerani, ko tidzagumane chani?’ (Mat. 19:27) Yesu mwachikondi adatsimikizira wopfunzira wake kuti adzaphindule na banja ikulu yauzimu. (Lewengani Maliko 10:29, 30.) Ndipo Yahova yemwe ni Msolo wa banja yathu mweyi yauzimu, wapolomisa kuti adzathandize omwe achada kumutumikira. (Sal. 9:10) Ganizirani vinthu vinango vomwe mungachite kuti mutambire chithandizo cha Yahova pomwe munkudzibva kuti muli mwekha.

5. Ko ni phindu yanyi yomwe ilipo tikambaganizira momwe Yahova achatisamalilira?

⁵ Ganizirani momwe Yahova achakusamalirani. (Sal. 55:22) Vimwevi vidzakuthandizeni kuona mwachikatikati vomwe vinkukuchitikirani. Mulongo wosalowolewa munango dzina yake Carol, * yemwe alibe wachibale mu chonadi adati: ‘Nikanyang’ana kumbuyo na kukumbukira momwe Yahova adanithandizira  kukhala wolimba pa viyeso, nichakwanisa kuona kuti nililini nekha. Ndipo vimwevi vinitsimikizira kuti Yahova adzakhale nane mpaka kalekale.’

6. Ko lemba ya 1 Petulo 5:9, 10 ingalimbikise tani wale omwe achadzibva kuti ali wokha?

⁶ Ganizirani momwe Yahova ankusamalilira Akhrisitu anzanu omwe achadzibva kukhala okhaokha. (Lewengani 1 Petulo 5:9, 10.) Mbale Hiroshi, yemwe kwa magole yazinji wakhala aliyekha ali Mboni m’banja mwake adati: ‘Mu mpingu ni vosashupa kuona kuti palibe yemwe vinthu vikumufambira bwinobwino. Kudziwa kuti tose tinkuchita vomwe tingakwanise kuti titumikire Yahova kungalimbikise wale omwe achadzibva kuti ali wokhawokha mu chonadi.’

7. Ko pemphero yakuthandizani tani?

⁷ Khalani na ndandanda yabwino yauzimu. Vimwevi vinkuphatanidzapo kumuuza Yahova momwe muchabvera. (1 Pet. 5:7) Massiel adati: ‘Chinthu chibodzi chomwe chichanithandiza kumalisa maganizo yakuti nili nekha ni kupemphera mogwigwirira kwa Yahova, iye ni Baba wangu ndipo nichapemphera kwa iye ntsiku iliyose kazinji pa ntsiku kuti adziwe momwe ninkubvera.’

8. Ko kulewenga Mawu ya Mulungu na kuyaganizira kungakuthandizeni tani?

⁸ Mbalewengani Mawu ya Mulungu ntsiku iliyose na kuganizira va nkhani inango yomwe inkufotokoza vifukwa vikulu-vikulu va chikondi cha Yahova kwa imwepo. Bianca, yemwe adapirira kutsutsiwa na wachibale wake, adafotokoza kuti: ‘Kulewenga nkhani za m’Baibolo na kuziganizira komasoti kuona momwe atumiki anango wa Yahova omwe adapirira mabvuto ninge yangu kudanilimbikisa.’ Akhrisitu anango achaikha mumsolo malemba yanango yomwe yachawalimbikisa ninge, Salimo 27:10 na Yesaya 41:10. Anango achaona kuti kubvesera nkhani zotepewa zopfunzirira kuchawathandiza kuti aleke kudzibva okhaokha akambakonzekera misonkhano panango pomwe ankulewenga Baibolo.

9. Ko kugumanika kumisonkhano kudakuthandizani tani imwepo?

⁹ Chitani khama kugumanika pamisonkhano nthawe zose. Imwepo mudzaphindule na pologalama zolimbikisa, ndipo mudzawadziwe abale na alongo wanu. (Aheb. 10:24, 25) Massiel, yemwe tamutomola pakuyamba adati: ‘Olo kuti nenze wamanyazi maninge, nidasaina kuyenda kumisonkhano kabodzi kokha basi nakuti nikadawireko. Vimwevi vidanithandiza kudzibva kuti nili mbali ya mpingu.’

10. Ndawa chani ni vodekana kukonza ushamwali na Akhrisitu wokhulupirika?

¹⁰ Khalani pawushamwali na abale wokhulupirika. Fagani azishamwali mu mpingu omwe  mungapfunzire nawo vizinji podiya kuti mukhale osiyana nawo magole panango chikhalidwe. Baibolo ichatikumbusa kuti ‘nzeru zinawanthu wachikulire.’ (Yobu 12:12) Wachikulire angapfunzirembo vizinji kuchokera kwa alumbwana. Davide wenze mwana maninge na Yonatani koma vimwevi vilibe kukangisa kuti akondwe na ushamwali wawo wolimba. (1 Sam. 18:1) Davide na Yonatani angathandizana pakutumikira Yahova olo kuti adagumana na mabvuto yakulu-yakulu. (1 Sam. 23:16-18) Mulongo Irina yemwe ndiye yekha mboni m’banja mwawo adanena kuti: ‘Abale na alongo angakhale abale wathu, ndipo Yahova angawaphatisire basa kuti akwanirise vosowa vathu.’

11. Ko mungachite chani kuti mulimbise ushamwali wanu?

¹¹ Kukhala na azishamwali anyowani ni koshupa, makamaka peno unamanyazi. Mulongo Ratna yemwe ni wamanyazi ndipo adapfunzira chonadi olo kuti angatsutsiwa adati: ‘Ningafunikira kubvuma kuti ningadekana thandizo kuchokera ku banja yangu yauzimu.’ Vikhala voshupa kuti uwuze munthu momwe unkubvera, koma mukambachita vimwevi munthu angakhale shamwali wanu chaiye. Azishamwali wanu achada kukulimbikisani na kakuthandizani, koma achadikana kukudziwani kuti akwanise kuchita vimwevi.

12. Ko utumiki ungakuthandizeni tani kukhala na azishamwali wabwino?

¹² Njira ibodzi yokonzera ushamwali ni kuyenda pabodzi mu umboni na abale na alongo. Carol yemwe tamutomolako kale adati: ‘Nidakhala na azishamwali azinji wabwino pakupatula nthawe yoyendera mu umboni na alongo na kuchitira pabodzi vinthu vinango vawuzimu. Yahova adanithandiza kwa magole yazinji pakuphatisira basa azishamwali mwawa.’ Kulimbisa ushamwali wathu na akhrisitu anzathu kuchadekana khama. Yahova achaphatisira basa azishamwali mwawa kuti akuthandizeni mukapanikizika na maganizo ninge yakudzibva kuti muli mwekhamwekha.​—Miy. 17:17.

13. Ko aliyese mumpingu anaudindo uponi?

¹³ Aliyese mu mpingu anaudindo wakuchita kalikose kuti alimbikise chikondi na mtendere kuti aliyese aleke kudzibva kuti aliyekha. (Yoh. 13:35) Vochita na voyankhula vathu vingathandize maninge. Onani vomwe mulongo munango adanena. Iye adati: ‘Pomwe nidapfunzira chonadi, mpingu udakhala banja yangu. Vidakakwanisikalini inepano kukhala wa Mboni za Yahova sembe nilibe kuthandiziwa.’ Ko ni chani chomwe imwepo mungachite kuti muthandize anyowani mu chonadi kudzibva kuti tili nawo mu mpingu?

14. Ko nchani chamungachite kuti mukhale pa ushamwali na anyowani?

¹⁴ Yambani ndimwe kufuna kukhala nawo paushamwali. Tingayambe na kuwatambira wanyowani kumisonkhano yathu ya mpingu. (Aro. 15:7) Koma tichadekana kuchita vizinji kwa azishamwali wathu osati kundowamonisa chabe. Tichadekana kukhala nawo pawushamwali wolimba nthawe zose. Ndipomwapa khalani na chidwi na anyowani. Mwaulemu, yesayesani kubvesa mabvuto yomwe ankugumana nayo. Anango vingawashupe kufotokoza momwe ankubvera, koma khalani wosamala kuti muleke kuwakakamiza kuti akudawireni basi. M’malomwake, kambiranani nawo mwachikondi mibvunzo yabwino ndipo abvesereni akambadawira. Mwakulinganiza, mungawabvunze momwe iwo adapfunzirira chonadi.

15. Ko Akhrisitu wolimba angathandize tani anango mu mpingu?

 ¹⁵ Aliyese mu mpingu angakule mwauzimu vikakhala kuti akhrisitu wolimba mwauzimu makamaka akulu, ankuchita nawo chidwi. Melissa, yemwe adalerewa mu chonadi na amayi wake adati: ‘Nikusowa chonena momwe abale adadziperekera ninge ababa wauzimu kwa magole yazinji. Ndipomwapa nichada kuwawonesambo khalidwe yabwino abale wangu.’ Mauricio yemwe ni m’bale wachilumbwana yemwe adabva kuti adasiyiwa ndawa womupfunzisa adasiya chowonadi adati: ‘Akulu ambaniwonesa chidwi. Nthawe zose ambacheza nane. Ambanitenga nkuyenda nane pabodzi mu umboni, anganifotokozera vomwe angapfunzira mu pfunziro yawo ya Baibolo ya pawokha, mpakana nimbatchaya naye pabodzi bola.’ Melissa pabodzi na Mauricio ankutumikira Yahova mu utumiki wa nthawe zose.

16-17. Ko ni njira ziponi zomwe tingathandizire anango?

¹⁶ Thandizani munjira yodekana. (Agal. 6:10) Leo yemwe ankutumikira ninge mmishonale kutali na banja yake adati: ‘Nthawe zizinji vinthu vomwe uchada ni kuuziwa mawu yabwino pa nthawe yodekana. Nikukumbukira ntsiku inango pomwe nidachita ngozi pakaro. Pomwe nidafika kumuyi nenze sokonezeke maganizo, koma patsogolo pake banja inango idanichemera kuti tikadye. Vomwe tidadya nikuvikumbukiralini, koma vomwe nindokumbukira ni vakuti adanibvesera mwatcheru. Pamapeto pake, nidayamba kubva bwino!’

¹⁷ Tose tichakomedzewa na vochitika, vawuzimu ninge misonkhano yadera na yachigawo. Viritene ndawa yakuti tichakhala na nthawe yokhala na azinzathu, ndipo tichakambirana va nkhani zomwe tabva pansonkhano moyu. Komasoti Carol yemwe tamutomola pakuyamba adati: ‘Nichadzibva kukhala nekhanekha makamaka pamisonkhano yadera na yachigawo.’ Ndawa chani? Iye adati: ‘Podiya kuti nichakhala na abale na alongo azinji nichawona kuti wose achakhala na wa m’banja mwawo. Kwa ine maganizo yodziona kuti nili nekhanekha niyamphanvu.’ Anango achashupika kuti agumanike pansonkhano wadera panango wachigawo vikakhala kuti munzawo wa mu ukwati wafa. Ko imwepo munkudziwako munthu yemwe ankugumana na  mabvuto ninge mwaya? Tani kumuchemera kuti mudzakhale naye pabodzi pachochitika chauzimu pabodzi na banja yanu?

18. Ko tingaphatise tani basa 2 Akorinto 6:11-13 tikambachemerera anzathu m’miyi mwathu?

¹⁸ Khalani na nthawe yokhalira pabodzi. Yesesani kukhala na abale na alongo osiyanasiyana mu vochitika vanu, makamaka kwa wale omwe achadzibva kuti aliwokha. Tichadekana ‘kufungula mitima yathu kwa wose,’ makamaka kwa wanthu ninge mwawa. (Lewengani 2 Akorinto 6:11-13.) Melissa yemwe tamutomolako pakuyamba adati: ‘Nthawe zose venze vokomedza vikakhala kuti azishamwali watichemera kuti tikawaone panango kuti tikazunge nawo pabodzi.’ Ko mu mpingu mwanu muli munthu yemwe mungamuchemerere kumuyi kwanu?

19. Ko ni pa nthawe iponi yomwe kukhala na Akhrisitu anzathu kungakhale kothandiza?

¹⁹ Tikambakhala na nthawe yokhalira na Akhrisitu anzathu, iwo adzakhale wokondwa. Anango vingawashupe kuti akhale na wachibale wawo panthawe yomwe iwo ali m’maphwando. Pomwe anango angaone kuti madata ninge ntsiku yobadwa, ntsiku yomwe wachibale wawo adafa, yangakhale yowawa maninge. Tikakhala na nthawe yokhala na abale na alongo omwe ankugumana na mabvuto ninge mwawa, timbawawonese kuti ‘tichawaganizira maninge.’​—Afil. 2:20.

20. Ko mawu ya Yesu yomwe yali pa Mateyu 12:48-50 yangatithandize tani tikambadzibva kuti tili tekha?

²⁰ Panavifukwa vizinji vomwe Akhrisitu angadzibvere kukhala okha. Koma tichadekanalini kuyebwa kuti Yahova achabvesa maganizo ninge mwaya. Iye achatipasa vomwe tichadekana pakuphatisira basa Akhrisitu anzathu. (Lewengani Mateyu 12:48-50.) Isembo tingawonese kuti tinkutembeja Yahova pamakonzedwe yake yachikondi pomwe tinkuchita vose vatingakwanise kuti tithandize banja yathu yauzimu. Vilibe basa momwe nthawe zinango tingabvere, tirilini tekha ndawa yakuti Yahova nthawe zose ali kusaidi yathu.