1. Ko tinkudziwa tani kuti Yahova ankufuna kuti tikhale naye paushamwali?

 YAHOVA ankutichemera kuti tikhale naye paushamwali. (Yak. 4:8) Iye ankufuna kuti akhale Mulungu wathu, Baba wathu na Shamwali wathu. Iye adawira mapemphero yathu ndipo atithandiza tikambagumana na mabvuto. Iye aphatisa pomwe basa gulu yake pakutipfunzisa na kutiteteza. Koma ko tingachite tani kuti tikhale paushamwali na Yahova?

2. Ko tingachite tani kuti tikhale paushamwali na Yahova?

² Tingakhale paushamwali na Yahova tikambapemphera kwa iye, kuwerenga Mawu yake na kuganizira vatapfunzira. Tikachita teno, tiyamba kumukonda maninge na kumutembeja pa vomwe ankutichitira. Tikhala pomwe na shungu yofuna kumubvera nthawe zose na kumupasa ulemerero womwe ndiye yekha achadekana kutambira. (Chiv. 4:11) Tikambamudziwa bwino Yahova, tidzayambe kumuthemba maninge na kuthemba pomwe gulu yake yomwe ankuphatisa basa pakufuna kutithandiza.

3. Ko Satana ayesesa tani kuti atisiyanise na Yahova, koma nchani chingatithandize kuti osati tifike pakusiya Yahova na gulu yake? (Salimo 31:13, 14)

³ Koma cholinga cha Satana ni kufuna kutisiyanisa na Yahova ndipo achita vimwevi makamaka akationa kuti tinkugumana na mabvuto. Ko iye achita chani pofuna kukwanirisa cholinga chake? Iye atipumpsa kuti tileke kukonda Yahova na gulu yake. Koma pali vomwe tingachite kuti tileke kugonja. Chikhulupiriro chathu chikakhala cholimba, tingabvumelini kuti tisiyane na Yahova pabodzi na gulu yake.—Lewengani Salimo 31:13, 14.

4. Ko tikambirane chani munkhani ino?

⁴ Munkhani ino, tikambirane mabvuto yatatu yomwe yangachokere kwa wanthu omwe ni Mbonilini ndipo tiwone kuti bvuto iliyose  payokha ingatikangise tani kuthemba Yahova na gulu yake. Ko mabvuto mwaya yangatisiyanise tani na Yahova? Ndipo nchani chatingachite kuti tileke kugonja Satana akambatiyesa?

5. Ko mabvuto yangatikangise tani kuthemba Yahova na gulu yake?

⁵ Nthawe zinango, tingambagumane na mabvuto yotsutsiwa m’banja mwathu panango kuluza basa yathu. Ko mabvuto mwaya yangatikangise tani kuthemba Yahova na gulu yake nkusiya kumutumikira? Tikambashupika na bvuto kwa nthawe itali, tingambakhale wokwinyirira maninge ndipo tingambadzione kuti tilibe na basa. Vikakhala tene, Satana agumanirapo mwayi wotichitisa kuganiza kuti Yahova alibe nase basa ndipo atikondalini. Cholinga cha Ndyerekezi nkufuna kutichitisa kuganiza kuti Yahova na gulu yake ndiwo ankutibweresera mabvuto. Vimwevi ndivo vidachitikirambo Aizirayeli anango womwe ambakhala ku Iguputo. Pakuyamba iwo enze adatsimikiza kuti Mose na Aroni achitadi kutumiwa na Yahova kuti adzawapulumuse ku ukapolo wawo. (Eks. 4:29-31) Koma Farao padawathimizira mabvuto, iwo adayamba kuimba mulandu Mose na Aroni mpakana adawauza kuti: ‘Mwatinunkhisa pamaso pa Farao na atumiki wake ndipo mwawapasa chibemba m’manja mwawo kuti atiphe.’ (Eks. 5:19-21) Iwo adayamba kuimba mulandu atumiki wokhulupirika wa Mulungu. Vimwevi venze vokwinyiririsa maninge! Peno imwepo mwakhala mukubonera na bvuto inango kwa nthawe itali, ko mungachite tani kuti mumbathembe maninge Yahova na gulu yake?

6. Ko tinkupfunzira chani pa vomwe mneneri Habakuku adachita kuti apirire mabvuto yake? (Habakuku 3:17-19)

⁶ Muuzeni vose Yahova mpemphero ndipo mukumbireni kuti akuthandizeni. Mneneri Habakuku adagumanambo na mabvuto yazinji. Mpakana nthawe inango adafika pa kukaikira kuti peno Yahova amuikhiradi nzeru. Koma iye adamufotokozera Yahova vose mpemphero. Iye adamuuza kuti: ‘Imwe Yahova, ko nidzalilire thandizo yanu koma imwepo ne kunibva kufikira lini? . . . Ndawa chani mukundopitiriza kunyang’ana khalidwe yoipa?’ (Hab. 1:2, 3) Yahova adadawira mapemphero yochokera pasi pa mtima ya mtumiki wokhulupirika moyu. (Hab. 2:2, 3) Padaganizira momwe Yahova adapulumusira wanthu wake kumbuyo, Habakuku adayamba pomwe kukondwa. Iye adayamba kutsimikizira kuti Yahova amuikhira nzeru ndipo adzamuthandize pa bvuto iliyose. (Lewengani Habakuku 3:17-19.) Ko tinkupfunzira chani pamwapa? Mukambagumana na mabvuto, mbapempherani kwa Yahova na kumuuza momwe munkubvera. Mumbawone kuti iye ndiye angakuthandizeni basi. Mukamukumbira kuti akuthandizeni, khalani wotsimikiza kuti Yahova adzakupaseni mphanvu kuti mukwanise kupirira. Ndipo mukaona momwe iye ankukuthandizirani, chikhulupiriro chanu chidzalimbe maninge.

7. Ko wanthu wa m’banja ya Shirley ambayesesa kumuchitisa kuti iye ambakaikire chani, ndipo nchani chidamuthandiza kuti osati asiye kukhulupirira Yahova?

⁷ Pitirizani kuchita vinthu vomwe vingakuthandizeni kukhala paushamwali na Yahova. Onani momwe kuchita vimwevi kudathandizira mulongo wathu Shirley yemwe akhala ku Papua Nova Guiné, panthawe yomwe ambagumana na mabvuto. b Shirley ali m’banja yosauka ndipo kuti agumane chakudya ni nkhani ikulu. Munthu munango wa m’banja mwawo adachita vinthu vomuchitisa kuti ayambe kukaikira Yahova. Munthu muyo adamuuza kuti: “Peno ukhulupirira kuti Mulungu ankukuthandiza na mzimu wake, manje thandizo yake ili kuponi? Ona kusauka kuli m’banja mwathu, ukundotaya nthawe kuphata basa yolalikira iwe.” Shirley adalewa kuti: “Nidayamba kudzibvunza  kuti: ‘Ko Mulungu moyu atiikhiradi nzeru panango neye?’ Pamwapo nidayamba kupemphera kwa Yahova nkumuuza vose vomwe venze kumtima kwangu. Nidapitiriza kumbawerenga Baibolo na mabukhu yathu ndipo nidapitiriza pomwe kulalikira na kumbagumanika pa misonkhano.” Kanthawe pang’ono iye adazindikira kuti Yahova ankuikhira nzeru maninge banja yawo. M’banja mwawo iwo ambaboneralini na njala ndipo enze wokondwa maninge. Shirley adalewa kuti: “Nidayamba kuona kuti Yahova ankudawiradi mapemphero yangu.” (1 Tim. 6:6-8) Imwepombo peno munkugumana na mabvuto, ayi kubvuma kuti yakusiyaniseni na Yahova ndipo pitirizani kuchita vinthu vokuthandizani kuti mukhale naye paushamwali.

8. Ko nchani chingachitikire abale womwe ankutsogolera mu gulu ya Yahova?

⁸ Adani wathu aphatisa basa mavidiyo na intaneti pofuna kufalisa mabodza yonamizira abale womwe ankutsogolera mu gulu ya Yahova. (Sal. 31:13) Mpakana abale anango afika pa kumangiwa nkulewewa kuti ni vigananga. Akhrisitu woyambirira adagumanambo na bvuto ninge mweyi panthawe yomwe Paulo adatongewa kuipa mulandu wake nkumangiwa. Ko manje iwo adachita tani?

9. Ko Akhrisitu anango adachita tani padaona kuti mtumi Paulo wamangiwa?

⁹ Akhrisitu anango woyambirira enze adaleka kuthandiza mtumi Paulo pewenze mu djeri ku Roma. (2 Tim. 1:8, 15) Ndawa chani? Ko iwo ambachita tene ndawa yakuti wanthu azinji ambawona kuti Paulo ni chigananga? (2 Tim. 2:8, 9) Panango iwo ambagopa kuti akambamuthandiza nawombo amangiwe? Peno iwo ambamuthandizalini ndawa chani, koma ganizirani momwe Paulo angabvera. Kumbukirani kuti iye adagumana na mabvuto yazinji mpakana kuikha moyo wake pangozi pakufuna kuti awathandize. (Mac. 20:18-21; 2 Akor. 1:8) Osati tikhalembo ninge wanthu wale womwe adamusiya Paulo panthawe yomwe angadekana kuthandiziwa! Ko timbakumbukire chani peno abale wamaudindo ankudzudziwa?

10. Ko timbakumbukire chani tikawona kuti abale wa maudindo ankudzudziwa, ndipo ndawa chani?

¹⁰ Mumbakumbukire chomwe chinkuchitisa kuti  timbadzudziwe na yemwe ankuchitisa vimwevi. Lemba ya 2 Timoteyo 3:12 ilewa kuti: ‘Wose wofuna kukhala na moyo wodzipereka kwa Mulungu mwa Khrisitu Yesu, nawombo adzadzudziwe.’ Ndipomwapa osati timbadabwe maninge tikawona kuti Satana ankuchitisa kuti abale wamaudindo amangiwe. Iye achita vimwivi pofuna kutichitisa mantha kuti afokese chikhulupiriro chathu.—1 Pet. 5:8.

11. Ko tinkupfunzira chani pa chitsanzo cha Onesiforo? (2 Timoteyo 1:16-18)

¹¹ Pitirizani kumbathandiza abale na alongo wanu ndipo mumbakhale okhulupirika kwa iwo. (Lewengani 2 Timoteyo 1:16-18.) Mkhrisitu munango woyambirira dzina yake Onesiforo adachita vinthu vabwino maninge panthawe yomwe Paulo adamangiwa. ‘Iye alibe kugopa ndawa yowona matcheni yomwe Paulo adamangiwa nayo.’ Koma Onesiforo adafagafaga Paulo ndipo padamugumana, adawona njira za momwe angamuthandizire. Iye adachita kuikha moyo wake pangozi kuti achite vimwivi. Manje pfunziro kwa isepano ni iponi? Osati timbabvume kuti mantha yatikangise kuthandiza abale na alongo wathu omwe ankudzudziwa. Koma naboni timbawaikhire kumbuyo ndipo timbakhale okonzeka kuwathandiza podi vikhale voshupa. (Miy. 17:17) Palibe pomwe munango angawathandize, ndise basi.

12. Ko tinkupfunzira chani kwa abale na alongo wathu wa ku Rússia?

¹² Ndoganizirani momwe abale na alongo wathu ku Rússia ankuthandizira anzawo omwe ankumangiwa. Iwo achita kuti anzawo akatengewa nkuyendesewa kutiribunali, iwo ayendambo kumuko kuti akawathandizire. Manje pfunziro ni iponi kwa isepano? Abale wa maudindo akambanamiziriwa, kumangiwa panango kudzudziwa, ayi kumbachita mantha. Timbawapempherere, kuthandiza wanthu wa m’banja mwawo na kuwona njira zinango zowathandizira.—Mac. 12:5; 2 Akor. 1:10, 11.

13. Ko kunyozewa kungatikangise tani kuthemba Yahova na gulu yake?

¹³ Wanthu wa m’banja mwathu, anzathu wa kushikola na anzathu wakubasa, nthawe zinango angambatinyoze ndawa ya basa yathu yolalikira na kutewedza mpfundo za Yahova pankhani ya makhalidwe yabwino. (1 Pet. 4:4) Iwo angambatilewe kuti: “Ndawa chani munthu wabwinobwino iwe udangena tchetchi ilibe na basa mwiyi?” Ndipo anango angambatinyoze ndawa ya momwe tichachitira vinthu na wanthu wochosewa, nkumbalewa kuti: “Unganiuze kuti momwe unkuchitira umu, ndiwe munthu wachikondi iwepo?” Mawu yatene yangatichitise kukaikira kuti peno tinkuchitadi vinthu vabwino. Tingayambe kumbadzibvunza kuti: ‘Nichileka kuchita vimwivi, kuti Yahova angakalipe? Ko gulu yake mwiyi inkunyanyiralini pakuchita vinthu?’ Manje vinthu vikafika pamwapa, nchani chamungachite kuti mupitirize kukhala paushamwali na Yahova nakuti osati muchoke mugulu yake?

14. Ko timbachite chani peno wanthu ankutinyoza ndawa yotewedza mpfundo za Yahova? (Salimo 119:50-52)

¹⁴ Khalani otsimikiza kutewedza mpfundo za Yahova pankhani ya chabwino na choipa. Yobu ambatewedza maninge mpfundo za Yahova podiya kuti wanthu ambamunyoza ndawa yochita vimwivi. Shamwali munango wa Yobu adafika pakuyesesa kumuchitisa kuganiza kuti Yahova alibe navo basa peno iye angatewedze mpfundo zake panango neye. (Yobu 4:17, 18; 22:3) Koma Yobu alibe kubvuma kukhulupirira mabodza mwaya. Viri teno ndawa iye ambatsimikiza kuti mpfundo za Yahova pankhani ya chabwino na choipa ni zabwino ndipo wenze wotsimikiza kuzitewedza. Iye alibe kubvuma kuti anango amukangise kukhala wokhulupirika kwa Yahova. (Yobu 27:5, 6) Manje tinkupfunzira chani pamwapa? Ayi kubvuma kuti kunyozewa kukuchitiseni kuyamba kukaikira mpfundo za Yahova. Ganizirani vomwe  vakuchitikirani pamoyo wanu. Ko mukawona bwinobwino, munkuwonambolini kuti mpfundo za Yahova zakuthandizani kuti vinthu vimbakufambireni bwino? Pitirizani kukhala m’gulu mweyi ya Yahova yomwe itengera siriyasi nkhani yotewedza mpfundo za Yahova. Mukachita teno, podiya wanthu ayesere tani kukunyozani, adzakwaniselini kukusiyanisani na Yahova.—Lewengani Salimo 119:50-52.

15. Ndawa chani Brizit ambanyozewa?

¹⁵ Onani vomwe vidachitikira mulongo Brizit wa ku Índia. Wanthu wa m’banja mwake ambamunyoza maninge ndawa ya vomwe achakhulupirira. Kanthawe pang’ono padandoti wabatizika mu 1997, mwamuna wake yemwe ni Mbonilini adaluza basa yake. Ndipomwapa mwamuna moyu adasaina vakuti iye, nkazi wake, wana na azibereki wawo omwe ambakhala kuthaundi inango afulukire kunango. Brizit adagumana na mabvuto yakulu maninge. Pakuti mwamuna wake wenzelini pabasa, iye ambafunika kumbamala nthawe itali ankumuthandiza kuti vifambe bwino m’banja mwawo. Kuthimizira pamwapa, kuti achite misonkhano ambafunika kufamba makilometro yokwana 350 kuti akafike ku Nyumba ya Ufumu. Vokwinyiririsa ni vakuti wanthu wa m’banja mwake ambamunyoza maninge ndawa ya vomwe iye angakhulupirira. Vinthu vidafika poipa maninge mpakana adafika pakufuluka pomwe. Vowawa maninge ni vakuti mwadzidzidzi mwamuna wake adamwalira. Patsogolo pake, mwana wake nkazi adafa na magole 12 ndawa ya khansa. Ndipo choipa maninge nchakuti wanthu wa m’banja ya Brizit adayamba kumuimba mulandu nkumbati iye ndiye wachitisa. Iwo ambamuuza kuti adakati ulibe kukhala wa Mboni za Yahova, sembe vimwivi vilibe kuchitika neye. Podiya kuti venze teno, iye adapitiriza kuthemba Yahova na kukhala mu gulu yake.

16. Ko Brizit adadalisiwa tani ndawa yoyesesa kukhala pafupi na Yahova na gulu yake?

¹⁶ Pakuti Brizit ambakhala kutali maninge na Nyumba ya Ufumu, wonyang’anira dera adamulimbikisa kuti ambandolalikira wanthu wa mudera yake ndipo ambachitise misonkhano pamuyi pake. Pakuyamba iye ambawona kuti akwaniselini. Koma iye adatewedza malangizo yadauziwa. Adayamba kumbalalikira wanthu wa m’muyi mwake, kuchitisa misonkhano pamuyi pake ndipo ambapatula pomwe nthawe yochita pfunziro  ya banja na wana wake awiri akazi. Ko iye adaphindula tani? Brizit adayamba kumbachitisa mapfunziro ya Baibolo yazinji maninge ndipo azinji adabatizika. Mu 2005, iye adayamba kuchita upainiya wokhazikika. Iye adadalisiwa maninge ndawa yothemba Yahova na gulu yake. Wana wake wose awiri wale adayamba kutumikira Yahova ndipo manjeuno mudera yake muna mipingu yawiri. Brizit atsimikiza kuti Yahova adamupasa mphanvu kuti akwanise kupirira mabvuto mwaya kuti apitirize kukhala wolimba podiya kuti ambanyozewa na wanthu wa m’banja mwake.

17. Ko tichadekana kukhala wotsimikiza kuchita chani?

¹⁷ Satana afuna kuti timbakhulupirire kuti Yahova atisiya tikambagumana na mabvuto ndipo tikapitiriza kukhala m’gulu yake ndipo pati vinthu vishupiretu. Satana afuna kuti timbakhale na mantha maninge peno abale womwe ankutsogolera amangiwa, ankudzudziwa ndipo ankunamiziriwa. Ndipo iye achitisa pomwe kuti wanthu ambatinyoze kuti tiyambe kukaikira Yahova na gulu yake. Koma isepano tinkuyadziwa bwino mapulani yake mwaya ndipo angakwaniselini kutinamiza. (2 Akor. 2:11) Khalani wotsimikiza kupitiriza kukhala wokhulupirika kwa Yahova na gulu yake ndipo mukateno Satana adzakunamizenilini. Nthawe zose mumbakumbukire kuti Yahova angakusiyenilini. (Sal. 28:7) Ndipomwapa ayi kubvuma kuti pagumanike chinthu chokusiyanisani na Yahova.—Aro. 8:35-39.

18. Ko tidzakambirane chani mu nkhani yomwe inkubwera?

¹⁸ Mu nkhani ino takambirana mabvuto yomwe yangabwere kuchokera kwa wanthu womwe ni Mbonilini. Koma nthawe zinango wanthu womwe ali mumpingu angatibweresere pomwe mabvuto yomwe yangatichitise kuti tikangire kuthemba Yahova na gulu yake. Manje tingachite tani kuti tipirire mabvuto mwaya? Tidzakambirane vimwevi mu nkhani yomwe inkubwera.