1-2. (a) Ko tikambirane mibvunzo yaponi? (b) Nchani chinkuonesa kuti Yahova ni wofunisisa kutithandiza?

 YAHOVA angatithandize kuti tikwanise kugwebana na mabvuto yomwe tinkugumana nayo pamoyo wathu, nakuti timbakhale wokondwa pomwe tinkumutumikira. Ko iye atithandiza munjira ziponi? Ndipo nchani chomwe chingatithandize kuti timbaphindule mokwana na thandizo yomwe Yahova ankutipasa? Mibvunzo mwaya yadawiriwe munkhani ino. Koma tikanati kuona midawiro yake, naboni tiyambe na kukambirana mbvunzo uyu wakuti: Ko Yahova alidi na shungu yofuna kutithandiza?

² Mawu yomwe mtumi Paulo adaphatisa basa mu kalata yomwe adanembera Aheberi, yangatithandize kugumana mdawiro wa mbvunzo moyu. Iye adanemba kuti: ‘Yahova ndiye wonithandiza, ningachitelini mantha. Ko munthu anganichite chani?’ (Aheb. 13:6) Baibolo ya mareferensiya ifotokoza kuti mawu yoyambirira yomwe yadaphatisiwa basa mu vesi mweyi pakulewa kuti ‘wonithandiza,’ itanthauza munthu yemwe ankuthaminga kuti akathandize munthu yemwe ankulilira thandizo. Chitani ninge munkumuona Yahova ankuthaminga kuti akathandize munthu yemwe ali pa bvuto. Kafotokozedwe kamwaka kankuchita kuwoneseratu kuti Yahova anashungu ikulu yofuna kutithandiza. Mothandiziwa na Yahova, tingakwanise kupirira mabvuto yathu tili wokondwa.

3. Ko Yahova atithandiza munjira zitatu ziponi kuti tikwanise kupirira mabvuto yathu tili wokondwa?

³ Ko ni njira ziponi zomwe Yahova achatithandizira kuti tikwanise kupirira mabvuto tili wokondwa? Kuti tigumane mdawiro wa mbvunzo moyu, naboni tikambirane bukhu ya Yesaya. Ndawa chani? Ni ndawa yakuti maulosi yazinji yomwe Yesaya adauziriwa kunemba ni yothandiza pomwe kwa atumiki wa Mulungu ntsiku zino.  Ndipo Yesaya adafotokoza momwe Yahova alili pakuphatisa basa mawu yosashupa kubva. Ndoonankoni mavesi yanango ya bukhu ya Yesaya msolo 30. Mu msolo moyu Yesaya adaphatisa basa mafanizo yabwino maninge pofuna kubvekesa momwe Yahova alili wokonzeka kuthandiza atumiki wake. Iye adanemba kuti Yahova atithandiza (1) mwa kutitetekera na kudawira mapemphero yathu, (2) mwa kutitsogolera na (3) kutipasa madaliso manjeuno na kutsogolo. Naboni tikambirane bwinobwino momwe Yahova achatithandizira pa njira zitatu mwezi.

4. (a) Ko Yahova adati Ayuda wa munthawe ya Yesaya enze tani, ndipo adabvuma kuti agumane na mabvuto yaponi? (b) Ko wanthu wokhulupirika Yahova adawapasa chidikhiro chiponi? (Yesaya 30:18, 19)

⁴ Kumayambiriro kwa msolo 30, Yahova adachemera Ayuda kuti: ‘Wana alibe matu,’ ‘womwe athimizira tchimo pa tchimo.’ Iye adapitiriza kulewa kuti: ‘Iwo ni wanthu wopanduka, . . . womwe afunalini ne pang’ono kubvera malamulo ya Yahova.’ (Yes. 30:1, 9) Pakuti wanthu mwawa ambafunalini kubvera, Yesaya adaleweratu kuti Yahova adzabvume kuti iwo agumane na mabvuto. (Yes. 30:5, 17; Yer. 25:8-11) Vimwevi vidachitikadi ndawa patsogolo pake iwo adatengewa kuti akakhale akapolo ku Babulo. Podiya kuti venze teno, penze Ayuda anango wokhulupirika ndipo Yesaya adawapasa ntontholo woonesa kuti vinthu vidzawakhalire bwino kutsogolo. Iye adalewa kuti kutsogolo Yahova adzawacheukire kuti awathandize. (Lewengani Yesaya 30:18, 19.) Vimwevi ndivoletu vomwe vidachitika, Yahova adachita makonzedwe yakuti awachose ku ukapolo. Koma sikuti vinthu vidakhaliratu bwino nthawe mweyo neye. Mawu yakuti ‘Yahova adzadikhire kuti akukomereni mtima,’ yadawoneseratu kuti papite nthawe kuti Ayuda wokhulupirika mwawa apulumusiwe. Ndipo Aizirayeli mwawa adamala magole yokwana 70 ali ku ukapolo ku Babulo akanati kubvumiziwa kuti abwerere ku Yerusalemu. (Yes. 10:21; Yer. 29:10) Panthawe yomwe Aizirayeli enze ku ukapolo ku Babulo, ambalira ndawa ya mabvuto koma padandoti abwerera ku Yerusalemu adayamba kugwesa misozi ndawa yokondwa.

5. Ko lemba ya Yesaya 30:19 inkutitsimikizira chani?

⁵ Ntsiku zino tingalimbikisiwembo na mawu aya yakuti: ‘Shuwadi iye adzakukomere mtima akadzabva kulira kwako.’ (Yes. 30:19) Pamwapa Yesaya ankutitsimikizira kuti Yahova adzatibvesere panthawe yomwe tinkumulilira ndipo iye adzachite vinthu mwakankulumize kuti atidawire. Yesaya adalewa pomwe kuti: ‘Akandodzakubva unkulira, iye adzakudawiriretu.’ Mawu yolimbikisa mwaya yankutitsimikizira kuti Ababa wathu ni wofunisisa maninge kuthandiza wanthu womwe ankulilira thandizo. Kudziwa vimwevi kungatithandize kuti timbapirire tili wokondwa.

6. Ko mawu ya Yesaya yankuonesa tani kuti Yahova abvesera mapemphero ya mtumiki wake aliyese payekha?

⁶ Ko muvesi mweyi nchani pomwe chinango chomwe chinkutitsimikizira kuti Yahova ni wokonzeka kutidawira mapemphero yathu? Onani kuti pamwapa Yahova ankutitsimikizira kuti atetekera munthu aliyese akambapemphera. Ndawa chani tinkulewa tene? Kumayambiriro kwa msolo 30 wa bukhu ya Yesaya, Yahova adaphatisa basa mawu yakuti ‘imwepo’ ndawa yakuti ambayankhula na wanthu azinji. Koma muvesi 19 iye adaphatisa basa mawu yakuti ‘iwepo’ pakufuna kuonesa kuti yankuyenda kwa munthu aliyese payekha. Yesaya adanemba kuti: ‘Iwepo udzalirelini pomwe,’ ‘iye adzakukomere mtima,’ ndipo ‘iye adzakudawire.’ Pakuti Yahova ni Baba wachikondi, akationa kuti ndise wokwinyirira atiyankhulalini mawu yakuti: “Watani kukhala wolimba ninge m’bale panango mulongo ule?” M’malo mochita vimwevi, iye aikhira nzeru munthu aliyese payekha ndipo atetekera mapemphero yake.—Sal. 116:1; Yes. 57:15.

7. Ko Yesaya na Yesu adatsindika tani nkhani yolimbikira kupemphera?

 ⁷ Tikambamuuza Yahova m’pemphero vinthu vomwe vinkutishupa, iye mwakankulumize achita makonzedwe yakuti atithandize kuti tipirire bvuto mweyo. Ndipo vikakhala kuti bvuto yathu inkumalalini panthawe yomwe tingadikhira, tingafunike kupitiriza kumukumbira Yahova kuti atithandize basi. Ndipo iye ankuchita kutikumbira kuti timbachite vimwevi. Tinkulewa tene ndawa ya mawu yomwe Yesaya adanemba kuti: ‘Ayi kuleka kumukumbusa’ Yahova. (Yes. 62:7) Ko vimwevi vinkutanthauza chani? Vinkutanthauza kuti timbapemphere kawirikawiri nkumbakhala ninge tikumupasalini mpata Yahova kuti apumule. Mawu ya Yesaya mwaya yankutikumbusa mafanizo yomwe Yesu adapereka pankhani ya pemphero yomwe yali pa Luka 11:8-10, 13. Pamwapa Yesu ankutilimbikisa kuti ‘timbalimbikire’ kupemphera na ‘kupitiriza kukumbira’ kuti tipasiwe mzimu wochena. Tingakumbire pomwe Yahova kuti atitsogolere kuti tikwanise kusalula vochita mwanzeru.

8. Ko mawu ya pa Yesaya 30:20, 21 yadakwanirisika tani kalekale?

⁸ Lewengani Yesaya 30:20, 21. Masocha ya Babulo payadazungulira thaundi ya Yerusalemu kwa gole na hafu, wanthu wose adayamba kubonera maninge. Koma m’mavesi ya 20 na 21, Yahova adapolomisiwa kuti peno Ayuda mwawo angadziringe nkuchinja khalidwe yawo, adzawapulumusiretu nthawe mweyo. Yesaya adawapolomisa wanthu mwawa kuti Yahova yemwe ni ‘Mpfunzisi wawo Nkulu,’ adzawapfunzise momwe angambamutumikirire mu njira yobvumizika. Mawu mwaya yadakwanirisika panthawe yomwe Ayuda adawombolewa ku ukapolo. Yahova adawonesadi kuti iye ni Mpfunzisi Nkulu kwa iwo ndipo adawatsogolera pa kubwezeresa pomwe kupemphera chaiko. Isembo tinkuphindula maninge ndawa yopfunzisiwa na Yahova yemwe ni Mpfunzisi wathu Nkulu.

9. Ko ni njira ibodzi iponi yomwe Yahova atitsogolerera ntsiku zino?

⁹ Popitiriza kufotokoza mu njira yosashupa kubva, Yesaya adafotokoza kuti isepano tili ninge aluno womwe ankupfunzisiwa na Yahova mu njira ziwiri. Yesaya adati: ‘Imwepo mudzakwanise kuona na maso yanu Mpfunzisi wanu Nkulu.’ Mufanizo mweyi, Mpfunzisi nkulu moyu ankuonesewa kuti ali kutsogolo kwa aluno wake. Ndipo isembo ntsiku zino tinkuphindula maninge na malangizo mwaya. Ko Yahova atipfunzisa tani? Iye atipfunzisa pakuphatisa basa gulu yake. Tinkutembeja maninge ndawa ya mapfunziro yabwino yomwe gulu mweyi itipasa! Malangizo yomwe tiyatambira pa misonkhano ya mpingu, pa misonkhano yakuluyakulu, m’mabukhu yathu, m’mavidiyo na munjira zinango, yatithandiza maninge kuti timbakwanise kupirira mabvuto tili wokondwa mu nthawe zoshupa zino.

10. Ko tiyabva tani ‘mawu ya Mulungu kumbuyo kwathu’?

 ¹⁰ Pakufotokoza njira yachiwiri yomwe Yahova achatipfunzisira, Yesaya adati: ‘Mudzabve kumbuyo mawu na makutu yanu.’ Pamwapa mneneri Yesaya ankufotokoza Yahova kuti ni mpfunzisi watcheru yemwe ankufamba m’mambuyo mwa wopfunzira wake achimbawanangiza njira na kuwatsogolera. Ntsiku zino tiyabvambo mawu ya Yahova kumbuyo kwathu. Ko tiyabva tani? Onani kuti mawu youziriwa ya Mulungu yadanembewa m’Baibolo magole yazinji kumbuyo ndipo isepano kwenze kulibe. Ndipomwapa tikakhala kuti tinkuwerenga Baibolo, vikhala ninge kuti tinkubva mawu ya Mulungu kumbuyo kwathu.—Yes. 51:4.

11. Kuti tipirire tili wokondwa tichadekana kuchita chani, ndipo ndawa chani?

¹¹ Manje tingachite tani kuti timbaphindule mokwana na malangizo yomwe Yahova ankutipasa pophatisa basa Mawu yake na gulu yake kuti atitsogolere? Onani kuti Yesaya adafotokoza vinthu viwiri. Choyamba iye adalewa kuti, ‘njira ni iyi.’ Chachiwiri adati, ‘fambani mumo.’ (Yes. 30:21) Kundodziwa chabe njira nkosakwana, koma tichadekana ‘kumbafambamo.’ Pophatisa basa Mawu yake na gulu yake, viri ninge kuti Yahova ankutiuza njira panango kuti vomwe ankufuna kuti timbachite. Tipfunzira pomwe momwe tingaphatisire basa vomwe tinkupfunzira. Kuti tipitirize kumbatumikira Yahova mokondwa, tichadekana kudziwa vomwe Yahova achafuna na kumbaviphatisa basa. Tikachita teno, ndipo patingadalisiwe na Yahova.

12. Mobverana na Yesaya 30:23-26, ko Yahova adawadalisa tani wanthu wake?

¹² Lewengani Yesaya 30:23-26. Ko ulosi moyu udakwanirisika tani kwa Ayuda womwe adabwerera kumuyi kwawo ku Yerusalemu kuchoka ku ukapolo ku Babulo? Yahova adawapasa vinthu vizinji vowathandiza kukhala na moyo nakuti apitirize kumutumikira. Koma chofunika maninge nchakuti iye adawapasa chilichose chomwe angadekana kuti akhale naye pa ushamwali nakuti ayambe pomwe kumupempherera mu njira yobvumizika. Kumoku kwenze kuyamba kuti wanthu mwawa atambire madaliso yazinji yochokera kwa Mulungu. Vesi 26 inkulewa kuti Yahova adawagakisira luju panango kuti kuwathandiza kuti abvese bwino mawu yake. (Yes. 60:2) Madaliso yochokera kwa Yahova yadawathandiza atumiki mwawa kupitiriza kumutumikira ali wokondwa ‘ndawa yakuti enze na ntendere wa mumtima.’—Yes. 65:14.

13. Ko ulosi wolewa va kubwezeresewa kwa kupemphera chaiko unkukwanirisika tani ntsiku zino?

¹³ Ko ulosi moyu wolewa va kubwezeresewa kwa kupemphera chaiko ungatithandizembo isepano ntsiku zino? Inde ungatithandize! Ko ungatithandize tani? Kundochokera mu  1919  Yesu wayenda kale kudzulu, wanthu azinji akhala ankuchoka mu Babulo Nkulu yemwe ni chimake cha kupemphera kwabodza. Akandochoka abwera pa malo yabwino maninge ninge mwevenzere na Aizirayeli womwe adangena mu Dziko Yopolomisiwa. Vikakhala tene iwo angena mu paradaiso wauzimu. (Yes. 51:3; 66:8) Ko paradaiso wauzimu muyu nchani?

14. Ko paradaiso wauzimu nchani, ndipo ni mbani womwe ali m’paradaiso moyu ntsiku zino? (Onani Mathandauzo ya mawu yanango.)

¹⁴ Kundochokera mu 1919 Yesu wayenda kale kudzulu, wodzozewa adayamba kukondwa na paradaiso wauzimu. b Nkuyenda kwa nthawe, wanthu womwe anachidikhiro chokhala pano padziko yapasi womwe ni ‘wa nkhosa zinango,’ adayambambo kukondwa na paradaiso wauzimu moyu. Ndipo akhala ankutambira madaliso yazinji yochokera kwa Yahova.—Yoh. 10:16; Yes. 25:6; 65:13.

15. Ko paradaiso wauzimu ankugumanika kuponi ntsiku zino?

¹⁵ Ko paradaiso wauzimu moyu agumanika kuponi ntsiku zino? Atumiki wa Yahova ankugumanika padziko yose yapasi. Ndipomwapa, tingalewe kuti wanthu womwe ali m’paradaiso wauzimu ankugumanika padziko yose yapasi. Vilibe basa peno tinkukhala mu dziko iponi, tingakwanise kukhala mu paradaiso wauzimu peno tinkutumikira Yahova mu njira yobvumizika kwa iye.

16. Ko nchani chatingachite kuti tipitirize kumbaona kukhuza kwa paradaiso wathu wauzimu?

¹⁶ Kuti tipitirize kukhala m’paradaiso wauzimu, tichadekana nthawe zose kumbatembeja ndawa yokhala m’banja mweyi ya abale na alongo wathu womwe ankugumanika padziko yose yapasi. Ko tingachite tani vimwevi? Tingaonese kuti tinkutembeja, tikambapitiriza kuona vabwino vomwe abale na alongo wathu ankuchita, osati kumbandoikhira nzeru vomwe ankuphonyesa. (Yoh. 17:20, 21) Ndawa chani vimwevi ni vodekana maninge? Ganizirani chitsanzo ichi. Tikangena mthengo tidikhira kuti tione miti ya khaindi na khaindi. Molingana na vimwevi, m’paradaiso wathu wauzimu muli abale na alongo osiyanasiyana womwe alinganiziwa pomwe na miti. (Yes. 44:4; 61:3) Tingachite bwino kumbandoona mbali yabwino ya “thengo” mweyi, osati kumbandokhalira  kuona mbali zoipa za ‘miti’ yomwe tili nayo pafupi. Tinkufunalini kuti vophonya vathu panango va abale na alongo wathu, vitikangise kuona kukhuza kwawo panango kuti makhalidwe yawo yabwino.

17. Nchani chomwe aliyese payekha angachite pothandizira kuti abale na alongo ambakhale wobvana mu mpingu?

¹⁷ Ko patekha tingachite chani kuti tithandizire kuti abale na alongo ambakhale wobvana? Tingachite vimwevo mwa kukhala wanthu wokonda ntendere. (Mat. 5:9; Aro. 12:18) Nthawe iliyose yomwe tinkuyesesa kuchita vinthu vothandizira kuti abale na alongo wathu akhale pa ntendere mu mpingu, tichitisa kuti paradaiso wauzimu akhale wokhuza maninge. Osati timbayebwe kuti Yahova ndiye adawatenga abale na alongo mwawa kuti abwere mu paradaiso wauzimu kuti ambamutumikire mu njira yobvumizika. (Yoh. 6:44) Ndoganizani momwe Yahova achakhalira wokondwa pakutiona tikuchita vose vatingakwanise kuti tikhale pa ntendere na abale na alongo wathu womwe ankumutumikira!—Yes. 26:3; Hag. 2:7.

18. Ko tichadekana kumbaganizira maninge chani, ndipo ndawa chani?

¹⁸ Yahova atipasa isepano atumiki wake madaliso yazinji maninge. Manje nchani chatingachite kuti timbaphindule nayo mokwana? Tingafunike kumbaganizira maninge vomwe tinkupfunzira m’Mawu ya Mulungu kuchokera m’mabukhu yathu. Tikambapfunzira mwanjira mweyi na kuganizira vomwe tapfunzira, tingakwanise kukulisa makhalidwe yachikhrisitu yomwe yangatithandize kuti ‘timbakonde abale na alongo wathu’ na kuonesa pomwe ‘chikondi chaicho kwa wose’ mu mpingu. (Aro. 12:10) Tikambaganizira madaliso yatinayo manjeuno, tingalimbise ushamwali wathu na Yahova. Ndipo kuganizira pomwe madaliso yomwe Yahova watisungira kutsogolo, kungatithandize kuti tipitirize kumutumikira mpakana kalekale. Vimwevi ndivo vingatithandize kuti timbatumikire Yahova manjeuno tili wokondwa.

19. (a) Mobverana na Yesaya 30:18, ko ndise wotsimikizira chani? (b) Nchani chomwe chingatithandize kuti tipitirize kupirira tili wokondwa?

¹⁹ Yahova ‘adzanyamuke kuti atithandize’ panthawe yomwe adzafune kumalisa vinthu vose voipa mudziko ino. (Yes. 30:18) Ndise wotsimikiza kuti Yahova yemwe ni ‘Mulungu wachilungamo’ adzakonze vinthu manjemanje ndipo adzabvumelini kuti Satana apitirize kumbandotiboneresa. (Yes. 25:9) Tinashungu yakuti nthawe ifike yomwe Yahova adzatipulumuse. Koma padakali pano, tikufuna kupitiriza kumbatembeja mwayi wa pemphero, kumbapfunzira Mawu ya Mulungu, kuyaphatisa basa na kumbaganizira madaliso yathu. Tikambachita vimwevi, Yahova adzatithandize kuti tipitirize kupirira tili wokondwa pomwe tinkumutumikira.