NKHANI YOPFUNZIRA 45
Momwe Yahova achatithandizira kuti tikwanirise utumiki wathu
‘Iwo adzadziwe kuti pakati pawo penze mneneri.’—EZE. 2:5.
NYIMBO NA. 67 “Lalikira Mawu”
VOMWE TIPFUNZIRE a
1. Ko tinkudziwiratu kuti timbagumane na bvuto iponi, koma ndise otsimikizira chani?
TIDZIWIRATU kuti timbatsutsiwe tikambaphata basa yathu yolalikira ndipo panango kutsogolo uku timbadzatsutsiwe maninge kuposha manjeuno. (Dan. 11:44; 2 Tim. 3:12; Chiv. 16:21) Koma olo kuti viri teno, ndise otsimikiza kuti Yahova adzatithandize. Tinkulewa motsimikiza tene ndawa yakuti kundochokera kalekale Yahova wakhala ankuthandiza atumiki wake kuti akwanirise utumiki womwe wawapasa podiya kuti vinthu ni voshupa. Kuti tindoonako chitsanzo chibodzi chabe, naboni tikambirane vomwe vidachitikira mneneri Ezekieli yemwe adalalikira Ayuda wochoka ku ukapolo ku Babulo.
2. Ko Yahova adati wanthu omwe ambafunika kulalikiriwa na Ezekieli enze tani, ndipo tikambirane chani munkhani ino? (Ezekieli 2:3-6)
2 Ko wanthu omwe Ezekieli ambawalalikira enze tani? Yahova adawafotokoza kuti ni wanthu ‘opanduka,’ ‘wamwano,’ na ‘wamakani.’ Iwo enze oipa ninge minga ndipo vochita vawo venze ninge va kalize. Ndipomwapa ni vosadabwisa kuwona kuti Yahova adamuuza mobwerezabwereza Ezekieli kuti: ‘Ayi kuchita mantha.’ (Lewengani Ezekieli 2:3-6.) Ezekieli wenze wokonzeka kuphata basa yolalikira ndawa yakuti, (1) adachita kutumiwa na Yahova, (2) iye adamupasa mzimu wake ndipo (3) mawu ya Mulungu yadalimbisa chikhulupiriro chake. Ko vinthu vitatu vimwivi vidamuthandiza tani Ezekieli? Ndipo vingatithandizembo tani ntsiku zino?
YAHOVA ADATUMA EZEKIELI
3. Ko ni mawu yaponi yomwe yadamulimbikisa Ezekieli, ndipo ko Yahova adamutsimikizira tani kuti amuthandize?
3 Yahova adauza Ezekieli kuti: ‘Ninkukutuma iwepo.’ (Ezek. 2:3, 4) Ni vosachita kubvunza kuti mawu mwaya yadamulimbikisa maninge Ezekieli. Ndawa chani tinkulewa tene? Viri teno ndawa yakuti Yahova adaphatisambo basa mawu yabodzibodzi mwaya padapasa utumiki Mose na Yesaya omwe enze aneneri wake. (Eks. 3:10; Yes. 6:8) Ezekieli ambadziwa bwino kuti Yahova adawathandiza aneneri mwawa kuti achite utumiki wawo podiya kuti penze mabvuto yazinji. Ndipomwapa Yahova pakuuza Ezekieli kawiri kuti: ‘Ninkukutuma iwepo,’ ambamutsimikizira kuti amuthandize. Ndipo m’bukhu yomwe Ezekieli adanemba, adabwerezerabwerezera mawu yakuti ‘Yahova adayankhula nane.’ (Ezek. 3:16) Ndipo m’malo yazinji iye adanemba kuti ‘Yahova adayankhula nane pomwe.’ (Ezek. 6:1) Vimwivi vinkutsimikizira kuti Ezekieli wenze wotsimikiza kuti Yahova ndiyedi wamutuma. Ndipo pakuti iye wenze mwana wa wantsembe, ni vosachita kubvunza kuti ababa wake adamupfunzisa momwe Yahova adathandizira aneneri osiyanasiyana kalekale. Mwakulinganiza, Yahova adauza Isaki, Yakobo na Yeremiya kuti: ‘Nili nawe.’—Gen. 26:24; 28:15; Yer. 1:8.
4. Ko ni mawu yaponi yomwe yadamulimbikisa maninge Ezekieli?
4 Ko Aizirayeli adachita tani pangalalikiriwa na Ezekieli? Yahova adalewa kuti: ‘Koma wa mnyumba ya Izirayeli akafunelini kukubvera ndawa iwo afunalini kunibvera.’ (Ezek. 3:7) Wanthu omwe ambafunalini kutetekera Ezekieli, ndiye kuti ambalamba kubvera Yahova. Mawu mwaya yadamutsimikizira Ezekieli kuti akakaona kuti wanthu ankumubveralini, osati akaganize kuti ankukangira kuphata basa yake ya uneneri. Yahova adamutsimikizira pomwe Ezekieli kuti viweruzo vomwe iye ankulewa vikadzachitika, wanthu ‘adzadziwe kuti pakati pawo penze mneneri.’ (Ezek. 2:5; 33:33) Ni vosachita kubvunza kuti mawu mwaya yadamulimbikisa Ezekieli kuti apitirize kuchita utumiki wake.
YAHOVA ATITUMAMBO NTSIKU ZINO
Isembo tingambatsutsiwe ninge mwavidakhalira na Ezekieli, koma tinkudziwa kuti Yahova ali nase (Onani ndime 5-6)
5. Ko vomwe lemba ya Yesaya 44:8 inkufotokoza vinkutithandiza tani kuti osati timbagope wanthu?
5 Kudziwa kuti Yahova ankutituma, kutipasa mphanvu ntsiku zino. Pakutichemera kuti ndise ‘mboni’ zake, Yahova wawonesa kuti atilemekeza maninge. (Yes. 43:10) Umuyu ni mwayi ukulu maninge kwa isepano. Ninge momwe Yahova adalimbikisira Ezekieli kuti: ‘Ayi kuchita mantha,’ Yahova ankutilimbikisambo isepano kuti: ‘Ayi kugopa.’ Ndawa chani palibe chifukwa chobveka chogopera wanthu wotitsutsa? Ni ndawa yakuti tachitambo kutumiwa na Yahova ndipo iye ali pafupi kuti atithandize.—Lewengani Yesaya 44:8.
6. (a) Ko Yahova ankutitsimikizira tani kuti adzatithandize? (b) Ko tigumana mphanvu tikaganizira chani?
6 Yahova ankutitsimikizira kuti adzatithandize. Mwakulinganiza, kanthawe pang’ono Yahova akalibe kuwauza wanthu wake kuti: ‘Ndimwe mboni zangu,’ iye adalewa kuti: ‘Ukambadzapita pamadzi, inepano nidzakhale nawe. Ukambadzayambuka tukamadzi, madzi yadzakumizelini. Ukambadzafamba pamoto, udzapselini ndipo olo moto ukambadzagaka maninge, udzakuwaulelini.’ (Yes. 43:2) Pomwe tinkuchita utumiki wathu, nthawe zinango tingagumane na mabvuto yomwe yali ninge madzi yodzala ndipo yanango yangalingane na moto wogaka maninge. Podi vikhale teno, Yahova atithandiza kuti tipitirize kulalikira. (Yes. 41:13) Ninge mwevenzere muntsiku za Ezekieli, wanthu azinji ntsiku zino alambambo tikambawalalikira. Iwo akambalamba tene, sikuti tithamingira kuganiza kuti kukhala Mboni kwatikanga neye. Tigumana mphanvu ndawa yodziwa kuti tikambalimbikira kulalikira, Yahova akondwa maninge ndipo atiwona kuti ndise okhulupirika. Mtumi Paulo adalewa kuti: ‘Munthu aliyese adzadalisiwe mobverana na basa yomwe iye waphata.’ (1 Akor. 3:8; 4:1, 2) Mulongo munango yemwe wakhala ankuchita upainiya kwa nthawe itali adati: “Nigumana mphanvu ndawa yodziwa kuti Yahova nthawe zose atidalisa ndawa ya khama yathu.”
MULUNGU ADAPASA EZEKIELI MPHANVU YA MZIMU WAKE
Mu masomphenya, Ezekieli ankuwona galeta ya Yahova yakudzulu ndipo pawawona vimwevi ankutsimikizira kuti Yahova amuthandize kuchita utumiki wake (Onani ndime 7)
7. Ko Ezekieli ambabva tani akaganizira masomphenya yadawona? (Onani foto ya pakhava.)
7 Ezekieli adachita kuona yekha kuti mzimu wa Mulungu unamphanvu maninge. Vomwe Ezekieli adawona m’masomphenya yake vidamutsimikizira kuti mzimu wa Mulungu umbathandiza angelo wamphanvu omwe ambafambisa galeta yakudzulu. (Ezek. 1:20, 21) Ko Ezekieli adachita tani padawona vimwevi? Pokumbukira vomwe vidachitika, iye adanemba kuti: ‘Pinidawona vimwivo, nidagwada nkujolima mpaka nkhope yangu pasi.’ Onani kuti ndawa yochita nthendemezi, Ezekieli adafika pakujolima. (Ezek. 1:28) Pomwe iye angaganizira masomphenya yodabwisa mwaya, adakhala wotsimikiza kuti mothandiziwa na mzimu wa Mulungu akwanise basa yake yolalikira.
8-9. (a) Ko nchani chidachitikira Ezekieli padalamuliwa na Yahova kuti ‘imirira’? (b) Ko Yahova adathandiza tani Ezekieli kuti akwanise kulalikira wanthu woshupa?
8 Yahova adalamula Ezekieli kuti: ‘Iwe mwana wa munthu, imirira ninkufuna niyankhule nawe.’ Yahova padamulamula tene Ezekieli, adamupasa pomwe mzimu wake kuti akwanise kuimirira. Ezekieli adanemba kuti: ‘Mzimu udangena mwa inepano ndipo udaniimiririsa.’ (Ezek. 2:1, 2) Panthawe yose yomwe Ezekieli ambachita utumiki wake, ambatsogolerewa na ‘djanja’ ya Mulungu panango kuti mzimu wake.’ (Ezek. 3:22; 8:1; 33:22; 37:1; 40:1) Mzimu wa Mulungu udapasa mphanvu Ezekieli kuti akwanise kulalikira wanthu ‘wamakani na wosabvera.’ (Ezek. 3:7) Yahova adauza Ezekieli kuti: ‘Ine nachitisa nkhope yako kuti ikhale yolimba molingana na nkhope zawo, nakuti mphumi yako ikhale yolimba molingana na mphumi zawo. Nachitisa mphumi yako kukhala ninge mwala wa dayamondi, kukhala yolimba kuposha mwala wa msangalabwi. Ayi kuwagopa ndipo ayi kuchita mantha na nkhope zawo.’ (Ezek. 3:8, 9) Pamwapa venze ninge Yahova ankuuza Ezekieli kuti: ‘Ayi kubvuma kuti wanthu wosakonzeka mwawa akufokese. Viri teno ndawa inepano nikulimbise.’
9 Kundochokera mwapo, mzimu wa Mulungu udayamba kumuthandiza Ezekieli pa basa yolalikira. Ezekieli adanemba kuti: ‘Djanja ya Yahova idaniphata mwamphanvu.’ Padapita sondo yantero mneneri moyu akuganizira mawu yomwe Yahova adamuuza akanati kuwauza wanthu. Iye adachita vimwevi kuti akwanise kuwalalikira mowafika pamoyo. (Ezek. 3:14, 15) Patsogolo pake Yahova adamutenga nkumuyendesa kumalo yabwino kulibe mapiri ndipo kumuko ‘adamupasa mzimu wake.’ (Ezek. 3:23, 24) Apa manje Ezekieli wenze wokonzeka kuyamba basa yake yolalikira.
MZIMU WA MULUNGU UTIPASAMBO MPHANVU NTSIKU ZINO
Ninge mwevenzere na Ezekieli, nchani chomwe chitithandiza kuphata basa yolalikira ntsiku zino? (Onani ndime 10)
10. Nchani chingatithandize kuti tikwanise kupha basa yathu yolalikira, ndipo ndawa chani?
10 Ko nchani chingatithandize kuti tikwanise basa yathu yolalikira? Kuti tigumane mdawiro, naboni tiganizire vomwe vidachitikira Ezekieli. Akanati kuyamba basa yake yolalikira, mzimu wa Mulungu udayamba wamupasa mphanvu. Isembo ntsiku zino kuti tikwanise basa yathu yolalikira, tifunika kuthandiziwa na mzimu wa Mulungu. Ndawa chani? Ni ndawa yakuti Satana ankuyesesa kuchita vose vangakwanise kuti akangise basa yathu yolalikira. (Chiv. 12:17) Wanthu azinji aganiza kuti Satana ni wamphanvu maninge ndipo palibe munthu angakwanise kulimbana naye. Koma kukwanirisika kwa basa yathu yolalikira kunkutsimikizira kuti tamugonjesa Satana. (Chiv. 12:9-11) Ko tinkumugonjesa munjira ziponi? Tikambaphata basa yolalikira, tiwoneseratu kuti timugopalini Satana. Nthawe iliyose yomwe tinkuphata basa yolalikira ndiye kuti tinkugonjesa Satana. Manje pakuti tinkukwanisa kuphata basa yolalikira podiya kuti tinkutsutsiwa, ko vimwevi vinkutsimikizira chani? Vinkutsimikizira kuti Yahova ankukondwa nase ndipo ankutithandiza na mphanvu ya mzimu wake.—Mat. 5:10-12; 1 Pet. 4:14.
11. Ko mzimu wa Mulungu ungatithandize tani, ndipo nchani chatingachite kuti upitirize kumbatithandiza?
11 Ko nchani pomwe chatinkupfunzirapo tikawona momwe Yahova adathandizira Ezekieli kuti akwanise basa yake yolalikira? Mzimu wa Mulungu ungatithandize kugwebana na bvuto iliyose tikambaphata basa yolalikira. (2 Akor. 4:7-9) Manje nchani chatingachite kuti mzimu wa Mulungu upitirize kutithandiza? Timbamukumbire nthawe zose Mulungu kuti atipase mzimu moyu, uku tili otsimikiza kuti iye ankubvesera mapemphero yathu. Yesu adapfunzisa opfunzira wake kuti: ‘Pitirizani kukumbira, . . . pitirizani kufagafaga, . . . pitirizani kugogodza.’ Pamwapa mpfundo ni yakuti Yahova ‘apereka mzimu wake kwa wanthu omwe ankumukumbira’ basi.—Luka 11:9, 13; Mac. 1:14; 2:4.
MAWU YA MULUNGU YADALIMBISA CHIKHULUPIRIRO CHA EZEKIELI
12. Mobverana na Ezekieli 2:9–3:3, ko mpukutu moyu udachokera kuponi ndipo nkati mwake mwenze nembewe chani?
12 Ezekieli sikuti ambandothandiziwa na mzimu wa Mulungu chabe, koma ambathandiziwa pomwe na mawu yake. M’masomphenya, Ezekieli adawona djanja ili phatirire mpukutu. (Lewengani Ezekieli 2:9–3:3.) Ko mpukutu muyu udachokera kuponi? Nkati mwake mwenze nembewe chani? Ndipo vonembewa mu mpukutu muyu vidalimbikisa tani Ezekieli? Naboni tiwone. Mpukutu muyu udachokera kwa Mulungu wakudzulu. Vinkuwoneka kuti Yahova adaphatisa basa mngelo m’bodzi pa angelo anayi omwe Ezekieli adawona kuti amuwonese djanja yomwe yaphatirira mpukutu. (Ezek. 1:8; 10:7, 20) Mu mpukutu muyu mwenze mawu ya Mulungu yachiweruzo yomwe Ezekieli ambafunika kuuza Aizirayeli osabvera omwe adachokera ku ukapolo ku Babulo. (Ezek. 2:7) Mawu yachiweruzo mwaya yenze yonembewa seri na seri ya mpukutu.
13. Ko Yahova adauza Ezekieli kuti achite naye tani mpukutu, ndipo ndawa chani wenze wonzuna?
13 Yahova adauza mneneri wake kuti ‘adye mpukutu moyu mpakana kukhuta.’ Ezekieli adabveradi ndipo adadya mpukutu wose. Ko mbali mwiyi ya masomphenya itanthauza chani? Inkutanthauza kuti Ezekieli ambafunika kubvesa bwinobwino vomwe Mulungu wamuuza akanati kuuza wanthu. Iye ambafunika kuwerenga mawu ya mu mpukutu moyu mpakana kufika pakuyatsimikizira kuti ambakawauze wanthu motsimikiza. Patsogolo pake padadzachitika chinthu chodabwisa maninge. Ezekieli adazindikira kuti mpukutu moyu ni ‘wonzuna maninge ninge uchi.’ (Ezek. 3:3) Ndawa chani? Ni ndawa yakuti kwa Ezekieli, mawu yochokera kwa Yahova yenze yokoma panango kuti yabwino kuyabva. (Sal. 19:8-11) Iye angatembeja maninge ndawa yoona kuti Yahova ankukondwa naye ndipo wamusankhula kuti akhale mneneri wake.
14. Nchani chidathandiza Ezekieli kuti akhale wokonzeka kukwanirisa utumiki wake?
14 Patsogolo pake Yahova adauza Ezekieli kuti: ‘Nitetekere bwinobwino ndipo usunge mawu yose yomwe ninkukuuza aya.’ (Ezek. 3:10) Pakulewa tene, Yahova ambafuna kuti Ezekieli asunge mawu yose yomwe yali nembewe mu mpukutu ule na kumbayaganizira. Kuchita vimwevi kudamuthandiza maninge Ezekieli kuti akhale na chikhulupiriro cholimba. Vimwevi vidamuthandiza pomwe kuti aitengere siriyasi nkhani yofikisa ntontholo wa Yahova kwa wanthu wake. (Ezek. 3:11) Ezekieli padabvesa bwinobwino ntontholo wa Mulungu, wenze wokonzeka manje kuufikisa kwa wanthu na kupitiriza mpakana kumaliza.—Linganizani na Salimo 19:14.
MAWU YA MULUNGU YALIMBISAMBO CHIKHULUPIRIRO CHATHU NTSIKU ZINO
15. Kuti tiikwanise basa yolalikira, ko timbayesese ‘kusunga’ chani?
15 uti tikwanise basa yathu yolalikira, timbawerenge Mawu ya Mulungu nthawe zose kuti tikhale na chikhulupiriro cholimba. Isembo ‘timbasunge’ mawu yose yomwe Yahova ankutiuza. Ntsiku zino, Yahova ayankhula nase pakuphatisa basa Baibolo. Manje nchani chatingachite kuti Mawu ya Mulungu yapitirize kumbatitsogolera pa vochita, voganiza na volinga vathu?
16. Ko timbachite nayo tani Mawu ya Mulungu, ndipo tingayasunge tani mumtima mwathu?
16 Tikambadya chakudya mosashotashota, thupi yathu ikhala yolimba. Nchibodzibodzimbo, tikambapfunzira Mawu ya Mulungu nthawe zose na kuyaganizira, chikhulupiriro chathu chikhala cholimba maninge. Imwiyi ndiyo pfunziro yomwe Yahova ankufuna kuti titengepo. Yahova afunambo kuti ‘timbakhute Mawu yake’ panango kuti kuyabvesa bwinobwino. Kuti tikwanise kuchita vimwevi, timbapemphere, kuwerenga na kuganizira vatapfunzira. Tikapemphera, ndiye kuti tinkukonzekeresa mtima wathu kuti utetekere maganizo ya Mulungu. Tikateno tingayambe manje kuwerenga Baibolo. Koma tikawerenga timbapatule pomwe nthawe yokwana kuti tiganizire vatapfunzira. Manje tikachita vimwevi tingaphindule tani? Phindu ni yakuti chikhulupiriro chathu chidzakhale cholimba maninge.
17. Ndawa chani tikawerenga Baibolo tifunika kumbapatula nthawe yoganizira vatapfunzira?
17 Ndawa chani tikawerenga Baibolo tifunika kupatula nthawe yoganizira vatapfunzira? Timbachite vimwevi kuti tikhale na mphanvu yolalikira va Ufumu manjeuno nakuti tidzakwanise kulengeza ntontholo wachiweruzo manjemanje apa. Ndipo tikambayesesa pomwe kuganizira makhalidwe ya Yahova, tidzakhale naye paushamwali wolimba. Tikachita teno tidzakhale na ntendere wamumtima ndipo tidzakhale okondwa maninge.—Sal. 119:103.
NABONI TIPITIRIZE KUPIRIRA
18. Ko wanthu wa m’muyi mwathu ankufunika kudziwa chani, ndipo ndawa chani?
18 Isepano ndise osiyanako na Ezekieli ndawa yakuti iye wenze mneneri koma isepano neye. Koma olo kuti viri teno, ndise otsimikiza kupitiriza kulalikira kwa wanthu ntontholo womwe Yahova watipasa ikanati kufika nthawe yomwe iye adzalewe kuti manje mungaime. Ikadzafika nthawe yachiweruzo, wanthu wa m’muyi mwathu adzakhale alibe lazau ndipo adzakwaniselini kulewa kuti tilibe kubvako ntontholo wachiweruzo wochokera kwa Mulungu. (Ezek. 3:19; 18:23) Vidzakhale teno ndawa yakuti manjeuno iwo ankubva bwinobwino achimbatsimikiza kuti vinkuchokera kwa Mulungu, koma ankulamba.
19. Nchani chinkutipasa mphanvu yopitirizira kuphata basa yolalikira?
19 Ko nchani chinkutithandiza kuti tikwanise basa yathu yolalikira? Ni vinthu vitatu vomwe vidathandizambo Ezekieli. Tipitiriza kulalikira ndawa tinkudziwa bwino kuti tachita kutumiwa na Yahova, iye atipasa mphanvu ya mzimu wake ndipo mawu yake yatithandiza pomwe kukhala na chikhulupiriro cholimba. Pakuti Yahova ankutithandiza, tinazo mphanvu zopitirizira kulalikira na kupirira ‘mpakana mapeto.’—Mat. 24:13.
NYIMBO NA. 65 Pita Patsogolo
a Munkhani ino tikambirane vinthu vitatu vomwe vidathandiza mneneri Ezekieli kuti akwanise kuphata basa yake yolalikira. Tikawona momwe Yahova adamuthandizira kuti akwanirise utumiki wake, tikhale na chitsimikizo chakuti atithandizembo ntsiku zino kuphata basa yathu yolalikira.