NKHANI YOPFUNZIRA 14
‘Londolani mapazi yake mosamala maninge’
‘Khrisitu adabonera ndawa ya imwepo, ndipo adakusiyirani chitsanzo kuti mulondole mapazi yake mosamala maninge.’—1 PET. 2:21.
NYIMBO NA. 13 Khristu Ndi Chitsanzo chathu
VOMWE TIPFUNZIRE *
Yesu ankusiya mapazi kuti ise tiyalondole mosamala (Onani ndime 1-2)
1-2. Ko tingakwanise tani kulondola mapazi ya Yesu? Perekani chitsanzo.
TILINGANIZE kuti imwepo pabodzi na anzanu munkufamba mthengo mokosa na mopasa mantha. Ndipo m’bodzi yemwe ni wodjaira kufamba mthengo ankukutsogolerani. Munkufamba mudothi yofewa ndipo ankukuuzani kuti mumbaponde momwe mapazi yake yaponda. Kanthawe pang’ono, munkuzindikira kuti wokutsogolerani ule wakusiyani. Koma munkuchitalini nkhawa pakudziwa kuti imwepo na anzanu mulondole momwe iye waponda.
2 Ninge Akhrisitu chaiwo, nasembo tinkufamba mthengo mokosa na mopasa mantha. Thengo yake ni dziko yatinkukhala ino. Koma tinkutembeja kuti Yahova watipasa Mwana wake Yesu yemwe ni mtsogoleri wabwino kuti tilondole mapazi yake mosamala maninge. (1 Pet. 2:21) Pakulewa va kulondola, sikuti pamwapa Petulo ambathandauza kulondoladi mapazi chaiyo. Koma ninga mwavichakhalira kuti munthu wotsogolera achasiya mapazi kumbuyo, Yesu adatisiyira chitsanzo chakuti tilondole. Naboni tikambirane mibvunzo yatatu ya momwe tingalondolere mapazi yake. Ko kumulondola kuchathandauza chani? Ndawa chani tichadekana kumulondola? Ndipo tingamulondole tani?
KO KULONDOLA MAPAZI YA YESU KUCHATHANDAUZA CHANI?
3. Ko kulondola mapazi ya munthu kuchathandauza chani?
3 Ko kulondola mapazi ya munthu kuchathandauza chani? Mu Baibolo, mawu yakuti ‘kufamba’ na yakuti ‘mapazi’ nthawe zizinji yachathandauza vomwe munthu ankuchita pamoyo wake. (Gen. 6:9; Miy. 4:26) Vomwe munthu ankuchita pamoyo wake, tingavilinganize na mapazi yomwe munthu ankusiya akambafamba. Ndipomwapa, kulondola chitsanzo cha munthu, kuchathandauza kutewedzera vomwe iye ankuchita.
4. Ko kulondola mapazi ya Yesu kuchathandauza chani?
4 Manje kulondola mapazi ya Yesu kuchathandauza chani? Mwachigwato tingalewe kuti kuchathandauza kutewedzera vomwe adachita pamoyo wake. Mu lemba yomwe yatakula msolo, mtumi Petulo adafotokozeratu sitiriti va chitsanzo chabwino cha Yesu pakupirira pa mabvuto. Koma pali soti mbali zizinji zomwe tingamutewedzere. (1 Pet. 2:18-25) Kunena shuwa, vose vomwe Yesu anganena na kuchita pamoyo wake, ni chitsanzo kwa ise.
5. Ko vingakwanisike kuti wanthu wochimwa alondole Yesu? Fotokozani.
5 Pakuti ndise wochimwa, ko tingakwanisedi kulondola Yesu? Inde tingakwanise. Kumbukirani kuti Petulo ankutilimbikisa ‘kulondola mapazi ya Yesu mosamala maninge’ podiya kuti ndise wochimwa. Tikambalondola mapazi yake mosamala na kuchita vose vatingakwanise ninge wanthu wochimwa, tidzakhale tinkubvera mawu ya mtumi Yohane yakuti: ‘Pitirizani kufamba ninga momwe iye adafambira.’—1 Yoh. 2:6.
NDAWA CHANI TICHADEKANA KULONDOLA MAPAZI YA YESU?
6-7. Ndawa chani tingalewe kuti kulondola mapazi ya Yesu kungatichitise kuti tikhale pa ushamwali na Yahova?
6 Tikambalondola mapazi ya Yesu tidzakhale paushamwali na Yahova. Ndawa chani tinkunena vimwevi? Chakuyamba, Yesu adatisiyira chitsanzo cha momwe tingakondweresere Mulungu. (Yoh. 8:29) Ndipomwapa tikambalondola mapazi ya Yesu, tidzakondwerese Yahova. Ndipo tingakhale na chitsimikizo chakuti Ababa wathu wakudzulu adzafenderere wose womwe ankuyesesa kuti akhale naye paushamwali.—Yak. 4:8.
7 Chachiwiri, Yesu adatewedza bwino-bwino chitsanzo cha Ababa wake. Ndipomwapa iye adati: ‘Yemwe waona ine, waona pomwe Ababa.’ (Yoh. 14:9) Tikambatewedzera makhalidwe ya Yesu pakuchita vinthu na anzathu, ninge mwadawonesera chifundo kwa wakhate na kwa nkazi wodwala matenda yakulu na kwa oferewa, tidzawonese kuti tinkutewedzeradi Yahova. (Maliko 1:40, 41; 5:25-34; Yoh. 11:33-35) Tikambayesesa kutewedzera makhalidwe ya Yahova, ushamwali wathu na iye udzalimbe.
8. Fotokozani momwe kulondola Yesu kungatithandizire ‘kugonjesa’ dziko.
8 Tikambalondola mapazi ya Yesu, tingasokonezewelini na dziko yoipa yatinkukhala ino. Usiku womalizira wa moyo wake padziko yapasi, Yesu adati: ‘Naigonjesa dziko.’ (Yoh. 16:33) Pamwapa angathandauza kuti alibe kubvuma kuti dziko imusokoneze pa vomwe angaganiza, volinga vake na vochita. Yesu alibe kuyebwa vadabwerera padziko yapasi, vomwe ni kulemekeza dzina ya Yahova. Manje isembo? Mudziko yatiri ino, munavinthu vizinji vomwe vingatisokoneze. Koma tikaikhira nzeru pa kutumikira Yahova ninge Yesu, tidzakwanise ‘kugonjesa’ dziko.—1 Yoh. 5:5.
9. Tingachite chani kuti tikhale panjira yokagumana moyo wosapera?
9 Tikambalondola mapazi ya Yesu tidzatambire moyo wosapera. Pomwe mulumbwana munango adabvunza vomwe angachite kuti adzagumane moyo wosapera, Yesu adamudawira kuti: ‘Bwera ukhale nteweri wangu.’ (Mat. 19:16-21) Kwa Ayuda anango womwe ambakhulupiriralini kuti iye ni Khrisitu, iye adati: ‘Nkhosa zangu . . . zichanilondola. Ndipo ninkuzipasa moyo wosapera.’ (Yoh. 10:24-29) Kwa Nikodemo wa mukhoti ya Sanihedirini yemwe wenze na chidwi na vomwe Yesu angapfunzisa, Yesu adamuuza kuti ‘wale womwe angamukhulupirire’ adzagumane ‘moyo wosapera.’ (Yoh. 3:16) Tingawonese kuti tinkukhulupirira Yesu peno voyankhula na vochita vathu vinkubverana na vomwe iye adapfunzisa. Tikachita vimwevi, tidzakhale wokonzeka kukhala pa njira yokagumana moyo wosapera.—Mat. 7:14.
KO TINGALONDOLE TANI MAPAZI YA YESU MOSAMALA?
10. Ko ‘kudziwa’ bwino-bwino Yesu kuchaphatanidzapo chani? (Yohane 17:3)
10 Tikanati tayamba kulondola mapazi ya Yesu, tichadekana kumudziwa bwino. (Lewengani Yohane 17:3.) ‘Kudziwa’ Yesu Khrisitu kumalalini. Tingafikane pa kumudziwa bwino-bwino tikambapfunzira makhalidwe yake, kaganizidwe kake na malamulo yake. Viribe basa kuti takhala mu choonadi kwa nthawe itali tani, tose tichadekana kuyesesa kudziwa bwino Yahova na Mwana wake.
11. Ko tingagumanemo chani m’mabukhu ya Mateyu, Maliko, Luka na Yohane?
11 Pakutithandiza kuti timudziwe bwino Mwana wake, Yahova mwachikondi adabvuma kuti M’mawu yake mukhale mabukhu ya Mateyu, Luka, Maliko na Yohane. Mabukhu mwaya yankusimba vomwe vidachitika pamoyo wa Yesu. Nkhani zimwezi zinkufotokoza vomwe Yesu adanena, vomwe adachita na kutiwonesa momwe adabvera. Mabukhu yanayi mwaya yachatithandiza ‘kuganizira mwamphanvu’ va chitsanzo cha Yesu. (Aheb. 12:3) Ndipo kunena shuwa munavitsanzo vomwe Yesu adatisiyira. Mwa kupfunzira mabukhu mwaya, tingamudziwe bwino maninge Yesu. Tikachita vimwevi, tidzalondole mosamala mapazi yake.
12. Ko tingaphindule tani mwakukwana na mabukhu ya Mateyu, Maliko, Luka na Yohane?
12 Kuti tiphindule na mabukhu mwaya, tichadekana kuchita vizinji osati kundoyalewenga. Tichadekana kukhala na nthawe ya kuyapfunzira mosamala na kuyaganizira maninge. (Linganizani na Yoswa 1:8) Naboni tikambirane mbali ziwiri zomwe zingatithandize kuganizira mwamphanvu mabukhu mwaya na kuphatisira basa vomwe talewengamo.
13. Ko mungachite tani kuti nkhani za m’mabukhu yanayi zikufikeni pamoyo?
13 Chakuyamba, chitisani nkhani za m’mabukhu mwaya kukhala zofika pamoyo. Linganizani kuti munkuwona na kubva vomwe vingachitika. Kuti mukwanise kuchita vimwevi, phatisirani basa vitsulo vopfunzirira vokonzewa na gulu ya Yahova. Bvesesani nkhani yose na vomwe vidachitika pambuyo na patsogolo pa nkhani yomwe munkupfunzira. Onani vose vomwe vinkufotokozera nkhani mweyo. Linganizani nkhani yomwe munkupfunzira na lemba inango ya m’mabukhu yanayi mwaya. Nthawe zinango bukhu ibodzi ingafotokoze vinthu vomwe mu bukhu inango mulibe.
14-15. Ko tingachite tani kuti tiphatisire basa pamoyo wathu nkhani zatingalewenge m’mabukhu yanayi?
14 Chachiwiri, phatisirani basa nkhani za m’mabukhu mwaya pamoyo wanu. (Yoh. 13:17) Mukamaliza kupfunzira mosamala bukhu iliyose, mumbadzibvunze kuti: ‘Ko pali chilichose chomwe ningachiphatisire basa pamoyo wangu pa nkhani yanapfunzira iyi? Ko ningaphatise tani basa nkhani mweyi pakuthandiza anango?’ Yesani kuganizira munthu yemwe mungamuthandize ndipo mwachikondi muuzeni vamwapfunzira panthawe yabwino.
15 Naboni tikambirane momwe tingaziphatisire basa mbali ziwiri mwezi. Tikambirane va nkazi wamasiye yemwe Yesu adawona mu kachisi.
NKAZI WAMASIYE MUKACHISI
16. Fotokozani vomwe vinkuchitika pa Maliko 12:41.
16 Chitisani nkhani mweyo kukufikani pamoyo. (Lewengani Maliko 12:41.) Chitani ninge munkuwona vomwe vingachitika. Penze pa Nisani 11, mu 33 Yesu akanati wayenda kudzulu ndipo wenze na ntsiku zidiki-diki kuti aphewe. Kwa nthawe itali wakhala ankupfunzisa mu kachisi. Atsogoleri wachipembedzo ambamutsutsa maninge. Pakuyamba adamubvunza kuti ulamuliro ankumutenga kuponi wochitira basa yake. Anango ambabwera kudzamupasa mibvunzo pakuganiza kuti akangire kudawira. (Maliko 11:27-33; 12:13-34) Apa manje Yesu wachoka saidi iyi nkuyenda saidi inango ya kachisi. Vinkuwoneka kuti yamwaya yenze malo yofikira akazi ndipo penze mabokosi yoikhamo vopereka. Padakhala pasi adawona wanthu ankuponya vopereka m’mabokosi. Iye adawona wolemera ankuponya mali zizinji. Apa panango zimbachita kubveka akambaziponya m’bokosi.
17. Ko nkazi wamasiye wosauka wofotokozewa pa Maliko 12:42 adachita chani?
17 Lewengani Maliko 12:42. Pawamaliza kuwona wolemera, Yesu ankuwona nkazi ‘wamasiye wosauka.’ (Luka 21:2) Moyo ni woshupa kwa iye, ndipo ni voshupa pomwe kuti agumane vodekana va ntsiku na ntsiku. Koma iye ankuyenda ku bokosi ya vopereka ndipo ankuponyamo tukobiri tuwiri tulibe na mphanvu. Yesu adawona bwinobwino kuti iye waponya tukobiri tuwiri twasimbi tomwe ambatuphatisa basa panthawe mweyo. Yenze mali yakuti ungagulelini ne mpheta yomwe yenze mbalame yotchipa.
18. Mobverana na Maliko 12:43, 44, ko Yesu adanena chani va chopereka cha nkazi wamasiye?
18 Lewengani Maliko 12:43, 44. Yesu adadabwa maninge na nkazi wamasiye moyu. Ndipo adachemera wopfunzira wake kuti awonembo. Iye adati: ‘Nkazi wamasiye moyu wapereka vizinji kuposha aliyese.’ Ndipo adafotokoza kuti: ‘Wolemera andotapudza pa chuma chawo, koma nkazi uyu wapereka vose vewenze navo.’ Pomwe nkazi moyu angachita vose vangakwanise kuti apereke kwa Yahova pantsiku mweyi, wenze na chitsimikizo kuti Yahova amusamalire.—Sal. 26:3.
Ninge Yesu, tembejani anango pa vomwe ankuchita pakutumikira Yahova (Onani ndime 19-20) *
19. Ko tinkupfunzira chani pa mawu ya Yesu yolewa va nkazi wamasiye?
19 Phatisirani basa nkhani yamwapfunzira pamoyo wanu. Dzibvunzeni kuti: ‘Ko ninkupfunzira chani pa mawu ya Yesu yolewa va nkazi wamasiye?’ Ganizirani nkazi wamasiye moyu. Iye angafunisisa kupasa Yahova vinthu vizinji. Koma podiya venze teno, iye adapereka kwa Yahova vomwe adakwanisa. Ndipo Yesu adawona kuti chopereka chake chenze chodekana maninge pamaso pa Ababa wake. Pamwapa pfunziro ni yakuti Yahova achakondwera tikadzipereka na moyo wose pa basa yake. (Mat. 22:37; Akol. 3:23) Yahova achakondwa akambatiwona tikuchita vose vatingakwanise. Mpfundo mweyi tingaiphatisire basa pomwe tinkupereka mphanvu zathu, nthawe yathu pakumutumikira, kuyenda mu umboni na kumisonkhano.
20. Ko mungaphatisire tani basa nkhani yonena va nkazi wamasiye? Perekani chitsanzo.
20 Ko mungaphatisire tani basa nkhani yonena va nkazi wamasiye? Yesani kuganizira va munthu yemwe mungakwanise kukamulimbikisa ndawa ya khama yake pakukondweresa Yahova. Mwakulinganiza, ko imwepo munkudziwako mulongo wachikulire yemwe achadziwona kuti alibe na basa ndawa yakuti ankukwanisalini kuchita vizinji mu umboni ninga mwangachitira kale? Panango munkudziwako m’bale yemwe anamatenda yomwe yankumukangisa kugumanika pamisonkhano yose? Thandizani wanthu mwawa mwa kuwauza mawu ‘yabwino kuti muwalimbikise.’ (Aef. 4:29) Afotokozereni mpfundo zolimbikisa zamwapfunzira kwa nkazi wamasiye. Mawu yanu yolimbikisa yangamuchitise iye kutsimikiza kuti Yahova achakondwera tikambachita vose vatingakwanise. (Miy. 15:23; 1 Ates. 5:11) Mukambalimbikisa anango kuti achite vose vangakwanise kwa Yahova podiya vikhale vochepa, mudzakhale kuti munkutewedza chitsanzo cha Yesu mosamala.
21. Ko ndimwe wotsimikiza kuchita chani?
21 Ndise wotembeja maninge ndawa ya mabukhu yanayi mwaya yomwe yachafotokoza bwinobwino va moyo wa Yesu, na vinthu vizinji vomwe tingachite kuti tilondole mapazi yake mosamala maninge. Tani kukhala na ndandanda ya pfunziro ya patekha panango yapabanja kuti tiwadziwe bwino mabukhu mwaya? Naboni tikumbukire phindu ya kupfunzira. Tichada kuti nkhani imbakhale yofika pamoyo na kuiphatisira basa pamoyo wathu. Kuthimizira mwapa, mwa kutewedzera vomwe Yesu adachita, tichadekana kubvesera vomwe iye adanena. Mu nkhani ikubwera, tidzakambirane vomwe tinkupfunzira pa mawu yomalizira yomwe Yesu adalewa akanati wafa.
NYIMBO NA. 15 Tamandani Mwana Woyamba Kubadwa wa Yehova
^ ndi. 5 Akhrisitu chaiwo ‘achatewera mapazi ya Yesu mosamala maninge.’ Ko Yesu ankufuna kuti ‘timbamulondole’ pa vinthu viponi? Nkhani mweyi idawire mbvunzo moyu. Ndipo tiwone kuti ndawa chani tichadekana kumulondola mosamala maninge nakuti tingachite tani vimwevi.
^ ndi. 60 MAWU YOFOTOKOZERA MAFOTO: Pawamaliza kuganizira mawu ya Yesu yolewa va nkazi wamasiye, mulongo ankulimbikisa mulongo wachikulire ndawa ya vomwe ankuchita pakutumikira Yahova na moyo wose.
