Panidayamba kukula, ushamwali wangu na Yahova udachepa. Azishamwali wangu wa kushikola ambawoneka kuti anaufulu wochita chilichose, ndipo inepano nidayamba kuwona kuti ninkuluza. Nidayamba kuwona kuti malangizo yomwe abereki ambanipasa na mpfundo zachikhrisitu vinkunipanikiza, ndipo basa yauzimu nimbaiwona kukhala yoshupa. Podiya kuti nimbatsimikiza kuti Yahova aliko, nimbawona kuti nililini naye paushamwali.

Nenze nilibiretu kuleka kulalikira, ningalalikira kanthawe kadikidiki. Nikakhala kuti nayenda mu umboni, ningakonzekeralini, ndipo ningashupika kuti niyambise macheza. Ndawa ya mwevi utumiki wangu umbafambalini bwino ndipo ningakondwalini. Vimwevi vidanichitisa kuti nileke kukonda kulalikira. Ningadzibvunza kuti: ‘Ko munthu angakwanise tani mwevi sondo iliyose na mwezi uliwose?’

Pomwe nidafikisa magole 17, nidakhala na maganizo yodziimira panekha. Nidalongedza kachola kangu nkuchoka pamuyi, ndipo nidafulukira ku Austrália. Kuwona ine ninkuchoka venze vowawa  kwa azibereki wangu. Enze na nkhawa, koma angaganiza kuti nikapitirize kuchita vinthu vauzimu.

Ku Austrália, nidalekeratu kuchita vinthu vauzimu. Ndipo ningaendalini kumisonkhano pafupi-pafupi. Nidakhala na azishamwali omwe ninge ine angakonda kuenda kumisonkhano koma tikachoka uko, tingaenda kukamwa na kuvina usiku. Panthawe mweire nenze mwendo ubodzi mu choonadi unango kudziko, koma ningakhalalini wokondwa olo pang’ono.

Payadapita magole yawiri, nidagumana na mulongo munango yemwe mosadziwa adanithandiza kuganizira komwe moyo ungaenda. Ningakhala m’nyumba pabodzi na alongo 5 osalowodwa, ndipo tidachemera wonyang’anira dera pabodzi na nkazi wake Tamara, kuti adzakhale kumuyi kwathu kwa sondo. Akakhala kuti mwamuna wake ankusamalira nkhani za mpingu, Tamara angacheza na ise atsikana ndipo angaseka nase. Ningavikonda mwevi. Wenze womasuka na wochezeka. Nimbadabwa kuwona munthu wauzimu moyu ankuchita vinthu vokomedza tene.

Tamara wenze wolimbikisa. Kukonda kwake chonadi na kulalikira vidatifika pamoyo. Iye angakondwa kuchitira Yahova vose vangakwanise, pomwe ine nenzelini wokondwa ndawa yakuti nenze nilibe khama pakutumikira Yahova. Vochita vake na momwe angakhalira wokondwa vidanithandiza kuchinja. Chitsanzo chake chidachitisa kuti niganizire maninge va chonadi. Yahova achada kuti aliyese wa ise amutumikire ‘mwakukondwa’ na kuyenda kwa iye ‘unkukuwa mokondwa.’—Sal. 100:2.

Ningafunambo kukhala wokondwa ninge mwewenzere Tamara, koma kuti nigumane chimwemwe mwechi ningadekana kuchinja vinthu vinango. Vidatenga nthawe, koma mwapang’onopang’ono nidayamba kuchinja. Nidayamba kumbakonzekera kuyenda kokalalikira, ndipo ningatumikira ninge mpainiya wothandiza nthawe na nthawe. Mwevi vidanithandiza kuti nileke kukhala  waukali na wodzikaikira. Nidayamba kuphatisira basa maninge Baibolo mu umboni, ndipo nidagumanadi chimwemwe chaicho. Patsogolo pake nidayamba kuchita upainiya wothandiza mwezi uliwose.

Nidayamba kukhala na azishamwali omwe angachitambo bwino mwauzimu ndipo ambakondwa pakutumikira Yahova. Chitsanzo chawo chabwino chidanithandiza kuona vinthu vakudikana maninge na kukhala na ndandanda yabwino yauzimu. Nidayamba kukondwa maninge na mu umboni kuposha kale yose, ndipo patsogolo pake nidayamba kutumikira ninge mpainiya wokhazikika. Apa manje nidayamba kukondwa na misonkhano.

Patsogolo pake nidagumana na Alex, wachikondi yemwe achakonda Yahova na utumiki. Iye angatumikira ninge ntumiki wothandiza ndipo wenze mpainiya kwa magole 6. Alex wenze adaendako kukatumikira kumalo yomwe yenze yosowa maninge ku Malawi. Kumuko iye adagumana na amishonale omwe adamulimbikisa kupitiriza kuikha Ufumu pamalo yoyamba.

Mu 2003, Alex na ine tidalowolana ndipo tidakhala na mwayi wopitiriza utumiki wa nthawe zose. Tidapfunzira vinthu vizinji vokomedza, ndipo Yahova watidalisa mu njira yomwe tingaidikhiralini.

Mu 2009, tidachemerewa kuti tikachite utumiki wa umishonale ku Timor-Leste, yomwe ni dziko ing’ono mu ntsuwa ya ku Indonêsia. Tidakhala wokondwa koma pabodzibodzipo tidachita mantha. Minyezi 5 patsogolo pake, tidafika ku kapital kwa Dili.

Kuchinja moku kudachitisa kuti moyo wathu uchinje maninge. Tingafunikana kudjaira chikhalidwe chinyowani, chiseweredwe, vakudya na malo yokhala. Tikayenda mu umboni, timbagumana na wanthu womwe ni wosauka maninge, womwe  adapfunzira pang’ono na anango womwe alibiretu ndipo ambaponderezewa. Tidawona wanthu azinji olemala ndawa ya nkhondo na uchigananga. *

Ulaliki ungafamba bwino! Mwakulinganiza, nidagumana na mtsikana munango wa magole 13 dzina yake Maria. * Apo nkuti amayi wake andofa magole pang’ono kumbuyo, ndipo ababa wake angawaonalini pafupi-pafupi. Ninge mwevenzere na wana azinji wa nsinkhu wake, moyo wake Maria wenze ulibe tsogolo. Ninkukumbuka nthawe yomwe adalira pomwe anganifotokozera momwe angabvera. Nidasowa chochita, ndipo vomwe angayankhula ningavibvesesalini bwino-bwino ndawa yakuti panthawe mweyi nenze nikanati napfunzira bwino-bwino chiseweredwe chimwechi. Nidapemphera kwa Yahova, kumukumbira kuti anithandize kuti nimulimbikise, pamwapo nidamulewengera lemba yolimbikisa. Magole pang’ono, choonadi chidayamba kuchinja moyo wa Maria na mawonekedwe yake. Iye adabatizika, ndipo manjeuno ankuchitisambo mapfunziro yake ya Baibolo. Ntsiku zino Maria anabanja ikulu yauzimu ndipo achadzibva kuti niwokondewa.

Yahova ankudalisa ku Timor-Leste. Olo kuti ofalisa azinji abatizika m’magole 10 yapita aya, azinji ankutumikira ninge apainiya, atumiki othandiza panango akulu. Anango ankutumikira m’maofesi yotsumbudzulira pakupereka chakudya chauzimu mu chiseweredwe chakwawo. Nichakondwa maninge nikambawabva ankuimba nyimbo pamisonkhano, ankusekerera na kuona kukula kwawo mwauzimu.

Utumiki wathu ku Timor-Leste ni wosiyana maninge na moyo wa ku Austrália. Koma nimbadikhiralini kuti ningadzakhale na moyo wokondwa tene. Nthawe inango timbakwera kabasi kang’ono komwe kenze tolo wanthu, mwenze vitsomba vamunyu na mitolo yanango ya muliwo yoyenda ku merkado yakumuko. Ntsiku zinango timbachitisa mapfunziro ya Baibolo kuli kotentha mu kanyumba kang’onong’ono kopsyipa pantsi ndipo nkhuku zimbandofambambo. Olo kuti timbagumana na mabvuto ninge mwaya, nimbaona kuti vimwevi ni ‘vokomedza’!

Nikanyang’ana kumbuyo, nichatembeja azibereki wangu pakunipfunzisa bwino njira za Yahova na kunithandiza olo pa nthawe yomwe ningaleka kuchita khama pakutumikira Yahova. Miyambo 22:6 idakwanirisika kwa ine. Amayi na Ababa ni wokondwa akawona Alex na ine. Iwo achakhala wokondwa pakuona vomwe tinkuchita pakutumikira Yahova. Kuyambira mu 2016 tidayamba kutumikira mu dera ya nthambi ya ku Australasia.

Pano nindowona ninge nkunama kuona kuti ninkukonda basa yolalikira. Manje ninkukonda utumiki! Nidafika pakuzindikira kuti olo kuti unamabvuto yazinji, chimwemwe chaicho chichabwera ndawa yotumikira Yahova na moyo wose. Ndipo magole 18 yanakhala ninkutumikira Yahova na Alex yakhala magole yokomedza maninge pamoyo wangu. Manje ninkubvesesa choonadi chomwe wamasalimo adanena kwa Yahova kuti: ‘Wose wothawira kwa imwepo adzakondwe. Adzakuwe mokondwa. . . . Okonda dzina yanu adzakondwe ndawa ya imwepo.’—Sal. 5:11.