Mibvunzo yochokera kwa olewenga
Ndawa chani Yesu akanati wafa adanena mawu yogumanika pa Salimo 22:1?
Yesu akanati wafa, adayankhula mawu yomwe yankugumanika pa Mateyu 27:46. Iye adati: ‘Mulungu wangu, Mulungu wangu, mwanisiyiranyi?’ Pakulewa vimwevi Yesu adakwanirisa mawu ya wamasalimo Davide yomwe yali pa Salimo 22:1. (Maliko 15:34) Kungakhale kuphonya kulewa kuti adalewa mawu mwaya ndawa yakuti wenze adakhumudwa panango kulewa kuti wenze adaleka kukhala na chikhulupiriro panthawe mweyi. Yesu angadziwa bwino-bwino chifukwa chomwe ambafunikira kufa, ndipo wenze wofunisisa kuchita vimwevi. (Mat. 16:21; 20:28) Iye angadziwa pomwe kuti panthawe ya impfa Yahova ‘adzamutetezelini’ kuti aleke kubonera. (Yobu 1:10) Yahova adabvuma kuti Yesu abonere kuti awonese kuti adakwanisa kukhala wokhulupirika viribe basa momwe impfa yake idakakhalira yowawa.—Maliko 14:35, 36.
Tsono ndawa chani Yesu adanena mawu ya mu salimo mweyi? Olo kuti tinkudziwalini vose bwino-bwino, naboni tindokambiranako vifukwa vinango. *
Ko pakunena mawu mwaya, Yesu ambatsindika kuti Yahova wamulekerera pa impfa yake? Yesu angadikana kupagali dipo mosathandiziwa na Yahova. Iye wenze ninge munthu, ndipo angadikana ‘kulawa impfa m’malo mwa wanthu wose.’—Aheb. 2:9.
Pakufotokoza mawu yang’onong’ono ya mu salimo mweyi, ko Yesu angafuna kuti aliyese aganizire va salimo yose mweyi? Venze vachizolowezi mu nthawe ya Ayuda kusunga yose salimo mumsolo. Mwa kuwakumbusa vesi ibodzi ya salimo mweyi, iwo adakakwanisa kuganizira va salimo yose. Peno vimwevi ndivo vomwe Yesu angaganiza, iye adathandiza Ayuda mwawa kuganizira va maulosi yazinji yomwe yangagumanika mu salimo na vochitika vofotokoza va impfa yake. (Sal. 22:7, 8, 15, 16, 18, 24) Kuingizira mwapa, kumapeto kwa salimo mweyi, kupambana kwa ufumu wa Mulungu inkufotokozewa kuti udzakhalepo padziko yose yapasi.—Sal. 22:27-31.
Pakufotokoza mawu ya Davide mwaya, ko Yesu ambaonesa kuti wenze wosaphonya? Kuchosapo pa impfa yake, Yesu adapirira mabvuto yonamiziriwa. (Mat. 26:65, 66) Mulandu moyu adaukonza usiku nthawe yamala kale ndipo wenze wosabverana na malamulo. (Mat. 26:59; Maliko 14:56-59) Pakulewa mbvunzo moyu womwe ungadikanalini mdawiro, panango Yesu angawonesa kuti palibe chadachita kuti alangiwe tene.
Ko Yesu angakumbusa soti anango kuti olo kuti Davide yemwe adanemba salimo mweyi adabonera, vimwevi vingaonesalini kuti Yahova angamukondalini Davide? Davide pakubvunza mbvunzo moyu sikuti wenze alibe chikhulupiriro. Pomwe adachita bvunzo moyu, iye angada kuwonesa chidaliro chake kwa Yahova kuti adzamupulumuse ndipo Yahova adapitiriza kumudalisa. (Sal. 22:23, 24, 27) Nchibodzibodzimbo, Yesu ‘Mwana wa Davide’ adabonera pamuti wodzudzikirapo, koma vimwevi vinkuonesalini kuti Yahova angamukondalini.—Mat. 21:9.
Ko Yesu angafotokoza mabvuto yake kuti Yahova amuteteze kuti akwanise bwino-bwino kukhala wokhulupirika mpaka mapeto? Chakulinga cha Yahova chakuyambirira chenzelini chakuti Mwana wake adzadzudzike na kufa neye. Makonzedwe mwaya yadachitiwa padandoti Adamu na Hava achimwa. Yesu alibe kuphonya chilichose, koma angafunikira kubonera na kufa kuti adawire nkhani yomwe Satana adayambisa nakuti apereke dipo yomwe ni malipiro yakudikana kuti abwezerese vomwe Adamu adaluza. (Maliko 8:31; 1 Pet. 2:21-24) Vimwevi vidakakwanisika pokhapokha Yahova adakayima kumuteteza Yesu kwa nthawe yoyamba pamoyo wake.
Ko Yesu angayesa kuthandiza wopfunzira wake kuti aganizire chifukwa chomwe Yahova adabvumira kuti iye afe mwanjira mweyi? * Yesu angadziwa kuti khaindi mweyi ya impfa yankhanza pamuti wodzudzikirapo idakakhumudwisa azinji. (1 Akor. 1:23) Ateweri wake mwawa adakaikhira nzeru pachifukwa chomwe Yesu wafera, adakabvesesa thandauzo yake. (Agal. 3:13, 14) Iwo adakamuona iye ninge Mpulumusi osati ninge chigananga.
Viribe basa kuti ndawa chani Yesu adanena mawu mwaya, koma chomwe tinkudziwa ni chakuti iye angadziwa kuti vose vomwe adagumana navo venze chakulinga cha Mulungu. Patsogolo pakuti wafotokoza mawu mwawa ya mu salimo mweyi, Yesu adati: ‘Nakwanirisa vomwe muchada!’ (Yoh. 19:30; Luka 22:37) Ndawa yakuti Yahova adabvuma kuti Yesu abonere tene, vidapereka mpata wakuti akwanirise vose vomwe adatumiziriwa pa dziko yapasi kudzachita. Vidachitisa soti kuti akwanirise vinthu vonembewa pa nkhani ya iye ‘mu chilamulo cha Mose na m’maulosi ya Aneneri na mu bukhu ya Masalimo.’—Luka 24:44.
^ ndi. 4 Onani soti ndime 9 na 10 mu nkhani yakuti: “Vomwe tingapfunzire pa mawu ya Yesu yomalizira” mu ntsanja ino.
^ ndi. 10 Pa utumiki wake, nthawe zinango Yesu angayambisa nkhani panango mbvunzo womwe ungawonesalini kuti iye ankuiwona tani nkhani mweyo. Iye angachita vimwevi kuti ayambise macheza na ateweri wake.—Maliko 7:24-27; Yoh. 6:1-5; wonani Nsanja ya Olonda ya 15 Outubro, 2010, tsa. 4-5.
