1. Ko nchani chomwe chingatichitise kukhala wokondwa maninge?

 YAHOVA achada kuti timbakhale wokondwa. Tinkudziwa vimwevi ndawa yakuti chimwemwe ni chipaso cha mzimu wakuchena. (Agal. 5:22) Pakuti kupasa ndiko kuchabweresa chimwemwe chikulu kuposha kutambira, tichada kuchita vose vatingakwanise mu utumiki na kuthandiza abale wathu munjira zosiyanasiyana.—Mac. 20:35.

2-3. a) Ko lemba ya Agalatiya 6:4, inkuwonesa vinthu viwiri viponi vomwe tingachite kuti tikhale wokondwa pakutumikira Yahova? b) Ko tikambirane chani mu nkhani ino?

² Pa Agalatiya 6:4, mtumi Paulo adafotokoza vinthu viwiri vomwe vingatithandize kupitiriza kukhala wokondwa. (Lewengani.) Chakuyamba, chakulinga chathu chimbakhale kuchitira Yahova vomwe tingakwanise. Tikambayesesa kumuchitira vose vomwe tingakwanise, tidzakhaledi wokondwa. (Mat. 22:36-38) Chachiwiri, timbapewe kudzilinganiza na anango. Vilibe basa kuti thanzi yathu ilitani, tidziwa vizinji tani ndipo tidakula tani, tose tingakwanise kuchitira Yahova vomwe tingakwanise. Ndipo timbadziwe pomwe kuti mphaso iliyose yomwe tingakhale nayo ni yochokera kwa iye. Ndipo peno anzathu ankuchita vizinji kuposha isepano, timbakondwe nawo pabodzi pakudziwa kuti ankuphatisa basa buya yawo kuti atamande Yahova, osati pakundofuna kuti wanthu awawone. Ndipomwapa, m’malo moyesesa kuti tilingane nawo tingachite bwino kupfunzirapo kanthu pa chitsanzo chawo.

³ Mu nkhani ino, tikambirane vomwe tingachite peno tinkuwona kuti tingakwaniselini kuchita vizinji ndawa ya momwe vinthu viliri pa moyo wanthu. Tikambirane pomwe momwe tingaphatisire basa bwino mphaso iliyose yomwe tingakhale nayo na vomwe tingapfunzire pa vitsanzo va anango.

4. Ko nivochitika viponi vomwe vingamukwinyiririse munthu? Perekankoni chitsanzo.

⁴ Atumiki anango wa Yahova ankukwanisalini kuchita vizinji ndawa ya uchikulire panango ndawa yodwaladwala. Vimwevi ndivo vinkuchitikira Carol. Iye kalekale adatumikirako ku dera yosowa. Panthawe mweyi iye angachitisa mapfunziro ya Baibolo yokwana 35 ndipo adathandiza azinji kuti adzipereke mpakana kufika pakubatizika. Carol vingamufambira bwino maninge pa basa yolalikira. Koma patsogolo pake adayamba kudwala ndipo ambandokhala pamuyi nthawe zose. Carol adalewa kuti: “Ninkudziwa kuti ndawa ya kudwaladwala kwangu ningakwaniselini kuchita vomwe anzangu ankuchita, ndipo nthawe zinango niwona kuti iwo ndiwo wokhulupirika maninge kuposha inepano. Ninkukwanisalini kuchita vinthu vomwe ninkufuna ndipo vimwevi vinikwinyiririsa maninge.” Carol anashungu yochitira Yahova vose vomwe angakwanise ndipo tinkumutembeja ndawa ya cholinga chake chabwino. Ndipo tinashuwa kuti Yahova ankumubvesa ndawa yofuna kumuchitira vomwe angakwanise.

5. a) Ko tichadekana kukumbikira chani peno tinkukwinyirira ndawa yakuti tinkukwanisalini kuchita vizinji? b) Ninge momwe mafoto yankuwonesera, ndawa chani imwepo mungalewe kuti m’bale moyu alibe kuleka kuchitira Yahova vomwe angakwanise?

⁵ Peno imwepo ndimwe wokwinyirira ndawa yakuti munkukwanisalini kuchita vomwe mungakwanise, dzibvunzeni kuti: ‘Ko Yahova achada kuti nichite chani?’ Yahova achada kuti imwepo mumbachite vomwe mungakwanise mobverana na momwe viliri pa moyo wanu. Ganizirani chitsanzo ichi: Mulongo yemwe anamagole 80 ankukwinyirira ndawa yakuti ankukwanisalini kuchita vinthu mu utumiki ninge mwambachitira pewenze na magole 40. Iye ankuganiza kuti podi ayeseretani, vomwe ankuchita vingakondwereselini Yahova. Koma ko nishuwadi? Ganizirani kuti peno mulongo moyu angachita vomwe angakwanise pewenze na magole 40, ndipo namanje adakachita basi pomwe anamagole 80, ndiye kuti alibe kuleka kuchita vomwe angakwanise. Peno tayamba kuganiza kuti vomwe tinkuchitira Yahova ni vosakwanira, tichadekana kukumbukira kuti Yahova ndiye anaudindo wosaina kuti vomwe vingamukondwerese ni viponi. Tikambayesesa kuchita vomwe tingakwanise, Yahova adzatiuze mokondwa kuti: ‘Mwaphata basa maninge.’—Linganizani na Mateyu 25:20-23.

6. Ko tinkupfunzira chani pa chitsanzo cha Maria?

⁶ Kuti tikwanise kukhala wokondwa tichadekana kuikhira nzeru pa vomwe tingakwanise m’malo mombaganizira vomwe tingakwaniselini kuchita. Ganizirani chitsanzo cha Maria, yemwe ankushupika na matenda yomwe yankumukangisa kuchita vizinji pa basa yolalikira. Pakuyamba iye ambakwinyirira maninge mpaka ambadziwona kuti alibe na basa. Koma iye adadzayamba kuganizira mulongo munango wa mumpingu mwawo yemwe ambandokhala gone. Ndipo Maria adawona kuti vingakhale bwino kumuthandiza. Iye adalewa kuti: “Nidachita makonzedwe kuti nimbalalikire naye pa foni na kunemba makalata. Nthawe iliyose yomwe nalalikira naye pabodzi, nimbabwerera kumuyi nili wokondwa ndawa ya kuwona kuti nakwanisa kuthandiza munzangu.” Isembo tingathimizire chimwemwe chathu tikambaikhira nzeru pa vomwe tingakwanise kuchita osati pa vomwe tingakwaniselini. Koma tani peno tingakwanise kuchita vizinji, ndipo palikale vinthu vomwe tinkuchita bwino pakutumikira Yahova?

7. Ko ni malangizo yabwino yaponi yomwe mtumi Petulo adapereka kwa Akhrisitu?

⁷ Mu kalata yake yoyambirira yomwe adauziriwa kunemba, mtumi Petulo adauziriwa kuti alimbikise abale kuti aphatisire basa mphaso yomwe anayo kuti alimbikise abale na alongo wawo. Petulo adanemba kuti: ‘Malingana na  mphaso yomwe aliyese adatambira, iphatisireni basa pakutumikira anango ninge wonyang’anira wabwino womwe atambira kukoma mtima kukulu kwa Mulungu.’ (1 Pet. 4:10) Tichadekanalini kuzeza kuphatisa basa mphaso yomwe tilinayo, pakugopa kuti anango angatichitire jerasi panango kukwinyirira. Tikambazeza ndiye kuti tinkupasalini Yahova vomwe tingakwanise.

8. Mobverana na 1 Akorinto 4:6, 7, ndawa chani tichadekana kupewa kudzitama ndawa ya mphaso zomwe tinazo?

⁸ Ni shuwadi kuti tichadekana kuphatisa basa mphaso zathu mwakukwana, koma timbasamale ndawa tingayambe kumbadzitama. (Lewengani 1 Akorinto 4:6, 7.) Mwakulinganiza, panango imwepo vikushupanilini kuyambisa mapfunziro ya Baibolo. Ndipo muchadekanalini kuzeza kuphatisa basa mphaso yanu mweyi. Koma vingakhale bwino kuti mumbapewe kudzitama na mphaso yanu mweyi. Panango imwepo vidakufambirani bwino maninge mu umboni ndipo mudayambiratu pfunziro ya Baibolo, ndipo ndimwe wokondwa kuti muuzembo anzanu wa mukagulu kanu vomwe vakuchitikirani. Pamwandogumana na anzanu wa mukagulu kanu, mulongo ankusimba kuti adakwanisa kugawira magazini. Iye adandokwanisa kugawira magazini koma imwepo mudayambisiratu pfunziro ya Baibolo. Ko imwepo muchite chani pamwapa? Munkudziwa bwino kuti abale na alongo wa mukagulu kanu angaphindule maninge na vomwe vidakuchitikirani. Koma mungachite bwino kudikhira nthawe inango kuti mudzasimbe vimwevi. Kuchitira kuti mulongo yemwe adagawira magazini ule angakwinyirire pakuwona kuti adachita vochepa. Mukachita tene ndiye kuti ndimwe munthu wabwino mtima. Koma sikuti tinkufuna kutanthauza kuti muleke kuyambisa mapfunziro ya Baibolo, pakuti imwepo munamphaso, pitirizani kuiphatisa basa!

9. Ko timbaphatise tani basa mphaso zathu?

⁹ Timbakumbukire kuti mphaso zose zomwe tinazo tidachita kupasiwa na Mulungu. Timbaphatise basa mphaso mwezi kuti tilimbikise abale na alongo mu mpingu, osati pakufuna kuti anango atiwone. (Afil. 2:3) Tikambaphatisa basa mphanvu zathu na maluso yathu kuti tichite vomwe Mulungu achada, tidzakhale wokondwa osati ndawa yakuti tachita vizinji kuposha anango koma ndawa yakuti taphatisa basa mphaso zathu kuti titamande Yahova.

10. Ndawa chani nkuphonya kumbadzilinganiza na anzathu?

¹⁰ Munthu akaleka kusamala, angambadzilinganize na munzake nkumbamuderera ndawa ya vinthu vomwe iye akwanisalini kuchita bwino. Mwakulinganiza, pangakhale m’bale yemwe akwanisa kukamba bwino nkhani za wose. Imweimbo ndiyo mbali yomwe iye akwanisa kuchita  bwino. Panango mumtima mwake angambanyoze m’bale yemwe akwanisalini kukamba bwino nkhani. Koma m’bale yemwe ankumunyoza uyo, panango iye achita bwino maninge pankhani ya kutambira alendo, kupfunzisa wana ndipo ashotalini mu umboni. Ndise wotembeja maninge kukhala na abale na alongo azinji womwe anamphaso ndipo ankuziphatisa basa pakutumikira Yahova na kuthandiza anzawo!

11. Ndawa chani tichadekana kuyesesa kutewedzera chitsanzo cha Yesu?

¹¹ Nishuwadi kuti tichadekana kupewa kumbadzilinganiza na anango, koma tingapfunzire vizinji kuchokera kwa atumiki wa Yahova wokhulupirika. Ndipo munthu yemwe ni chitsanzo chabwino pankhani mweyi ni Yesu Khrisitu. Podiya kuti ndiselini wangwiro ninge Yesu, tingapfunzire vizinji kuchokera ku makhalidwe yake yabwino na vinthu vizinji vomwe adachita. (1 Pet. 2:21) Tikambachita vose vatingakwanise kuti titewedzere chitsanzo chake, tidzakhale atumiki wa Yahova wabwino ndipo vidzatifambire bwino mu utumiki.

12-13. Ko tingapfunzire chani kuchokera kwa Mpfumu Davide?

¹² M’Mawu ya Mulungu, tigumanamo vitsanzo va amuna na akazi wokhulupirika, womwe podiya kuti enze wochimwa, ni vitsanzo vabwino vomwe tingatewedzere. (Aheb. 6:12) Ganizirani va Mpfumu Davide yemwe Yahova adamuchemera kuti ‘munthu wangu wapamoyo.’ Baibolo inango pakufotokozera vesi mweyi ilewa kuti ‘munthu yemwe ankunikondweresa maninge.’ (Mac. 13:22) Koma Davide wenzelini wangwiro. Iye adachita machimo yakuluyakulu. Olo viliteno, iye ni chitsanzo chabwino kwa isepano. Ndawa chani? Ndawa yakuti pangatsuuliwa iye alibe kudziikhira kumbuyo. Koma adabvuma malangizo yamphanvu yomwe adapasiwa ndipo adalapa na moyo wose. Vimwevi vidachitisa kuti Yahova amukhululukire.—Sal. 51:3, 4, 10-12.

¹³ Kuti tiphindule na chitsanzo cha Davide, tichadekana kudzibvunza kuti: ‘Ko nichita tani nikapasiwa malangizo? Ko nibvuma kuphonya kwangu? Panango niyamba kudziikhira kumbuyo? Ko niimba mulandu wanthu anango? Ko niyesesa kuti nisadzabwerezere pomwe vomwe naphonya?’ Mungachite pomwe bwino kumbadzibvunza mibvunzo mwaya mukambalewenga nkhani zinango za amuna na akazi wotomolewa mu Baibolo. Ko iwo adagumana na mabvuto yomwe imwepo munkugumanambo nayo? Ko ni makhalidwe yabwino yaponi yomwe iwo adawonesa? Peno munkulewenga nkhani ya mwamuna panango nkazi, mungachite bwino kudzibvunza kuti: ‘Ko ningachitetani kuti nikhale wokhulupirika maninge ninge mtumiki moyu wokhulupirika wa Yahova?’

14. Ko tingaphindule tani tikambanyang’anisisa chitsanzo cha Akhrisitu anzathu?

 ¹⁴ Tingapfunzire pomwe vizinji kuchokera kwa wokhulupirira anzathu, peno akhale alumbwana panango akuluakulu. Mwakulinganiza, ko imwepo munkuwonako munthu wa mumpingu mwanu yemwe ni chitsanzo chabwino maninge pankhani ya kupirira mabvuto, yomwe imwepo munkugumana nayo ninge, kutsutsiwa m’banja, panango kudwaladwala? Ko pali makhalidwe yabwino ya munthu muyo yomwe muchadekana kuyesesa kukhalambo nayo? Mukambaganizira chitsanzo chawo mosamala maninge mudzakwanise kupirira mabvuto yanu. Ndise wotembeja maninge ndawa ya kukhala na abale na alongo mwawa womwe ni vitsanzo vabwino pankhani ya kukhulupirika!—Aheb. 13:7; Yak. 1:2, 3.

15. Ko mtumi Paulo adapereka malangizo yabwino yaponi yomwe yangatithandize kutumikira Yahova tili wokondwa?

¹⁵ Kuti tilimbikise ntendere na m’bverano mumpingu, aliyese achadekana kuyesesa kuchita mbali yake. Ganizirani chitsanzo cha Akhrisitu woyambirira. Iwo enze adapasiwa mphaso na maudindo yosiyanasiyana. (1 Akor. 12:4, 7-11) Koma vimwevi vilibe kuchitisa kuti ayambe kupikisana panango kuyamba magawano. Koma Paulo adawalimbikisa kuti ambaphatise basa mphaso zawo kuti ‘amange thupi ya Khrisitu.’ Paulo adanembera Aefeso kuti: ‘Chidzo chilichose chikambaphata basa yake bwinobwino, vithandiza kuti thupi ikule bwino.’ (Aef. 4:1-3, 11, 12, 16) Womwe achatewedza malangizo ya Paulo mwaya, achalimbikisa ntendere na m’bverano yomwe nimakhalidwe yofunika maninge mu mpingu ntsiku zino.

16. Ko tichadekana kukhala wotsimikiza kuchita chani? (Aheberi 6:10)

¹⁶ Khalani wotsimikiza kupeweratu kumbadzilinganiza na anango. Koma pfunzirani kuchokera pa chitsanzo cha Yesu ndipo yesesani kutewedzera makhalidwe yake. Phindulani pomwe na vitsanzo va m’Baibolo na va ntsiku zino va wanthu wokhulupirika. Mukapitiriza kuchita mbali yanu, mumbatsimikizire kuti Yahova ‘ni wolungama ndipo angayebwelini basa yanu.’ (Lewengani Aheberi 6:10.) Pitirizani kukhala wokondwa pakutumikira Yahova, muchimbadziwa kuti iye ankutembeja maninge khama yomwe munkuchita kuti mumukondwerese.