“Mboni zimwezi zingabvana na wanthu wose kuphatanidzapo tumbwaya twangu tuwiri. Ntsiku inango Elaine yemwe wenze pakashelufu, adatupasa mabulasha tumbwaya twangu tuwiri. Nthawe inango panidayenda pomwe pamalo mwaya, tumbwaya tule tudathamangira Mboni zire kuti tupasiwe pomwe mabulasha.

“Kupita kwa minyezi, tumbwaya twangu tudayamba kukomedzewa na mabulasha yawo, ndipo ine ningakomedzewa na macheza yomwe ningachita nawo koma nimbazeza kuti nimasukiletu nawo maninge. Pa nthawe mweyi nenze na magole 70 ndipo ningadziwalini bwinobwino kuti wa Mboni za Yahova akhulupirira chani. Pakuti vochita va matchetchi yazinji Yachikhrisitu vinganiyipira, nidawona kuti vingakhale bwino nimbapfunzire panekha Baibolo.

“Pa nthawe mweyi nidawona Mboni zizinji m’malo yosiyanasiyana mu thaundi mweyi ndipo angalalikira pakuphatisa basa tumashelufu. Ningadabwa kuti wose angamasuka nane. Iwo enze okonzeka kunidawira mibvunzo yangu pakuphatisa basa Baibolo ndipo vimwevi vidachitisa kuti niyambe kuwathemba maninge.

“Ntsiku inango Elaine adanibvunza kuti: ‘Ko imwepo mukhulupirira kuti vinyama vidachita kulengewa na Mulungu?’ Inepano nidamudawira kuti: ‘Inde nikhulupirira!’ Pamwapo Elaine adaniwerengera lemba ya Yesaya 11:6-9. Kuchokera pamwapo nidakhala na shungu yofuna kudziwa vizinji kuchokera m’Baibolo, koma ningazeza basi kutambira bukhu iriyonse kuchokera kwa Mboni za Yahova kuti nikalewenge.

“Pazidondopita ntsiku pang’ono, nidakhala na macheza yabwino maninge na Elaine pabodzi na mwamuna wake Brent. Iwo adaniuza kuti ningachite bwino nilewenge kuyambira bukhu ya Mateyu mpakana Machitidwe kuti nibvesese bwinobwino kuti Akhrisitu chaiwo achadekana kuchita chani ndipo nidalewengadi. Nthawe pang’ono nidabvuma kuti Elaine na Brent ambanipfunzise Baibolo. Vimwevi vidachitika nkati mwa gole ya 2016.

“Ningawona kuchebwa maninge kuti ifike ntsiku ya pfunziro ya Baibolo nakuti tiyende ku Nyumba ya Ufumu. Nadalisiwa maninge ndipo ndine wokondwa ndawa yodziwa chaivo vomwe Baibolo ichafotokoza. Payidandomala gole ibodzi, nidabatizika nkukhala wa Mboni za Yahova. Manjeuno ninamagole 79, ndipo ndine wokondwa ndawa yakuti nidagumana chipembedzo chaicho. Nikuwona kuti nidachita mwayi, ndawa yakuti Yahova adabvuma kuti nikhalembo m’banja ya atumiki wake wapadziko yose yapasi.”