1-2. a) Ko Yunike yemwe wenzembo mayi adagumana na mabvuto yaponi? b) Fotokozani vomwe vinkuchitika pa foto ya pakhava.

 PODIYA kuti Baibolo ifotokozalini va ubatizo wa Timoteyo, ni vosachita kubvunza kuti amayi wake a Yunike adakondwa maninge pa ntsiku yomwe iye adabatizika. (Miy. 23:25) Chitani ninge munkuwona amayi wa Timoteyo ankukondwera kumuwona kuti ankungena m’madzi kuti abatizike. Iwo ankukondwa pomwe kuwona kuti ambuya wake a Loisi ali pafupi ndipo ankuwonambo vimwevi. A Yunike ankusekerera kumuwona Timoteyo waphata mphuno yake ndipo ankumiziwa m’madzi. Iye pawavuuka, amayi wake ankukanga kudziphata ndipo ankuchoka misozi nako kukondwa. Iwo akwanisa kupfunzisa mwana wawo kuti ayambe kukonda Yahova na Mwana wake Yesu Khrisitu podiya kuti pali mabvuto yazinji. Ko iwo adagumana na mabvuto yaponi pakupfunzisa mwana wawo kuti afikane pakubatizika?

² Timoteyo adakulira m’banja ya wanthu wosiyana vipembedzo. Ababa wake enze Agiriki ndipo amayi na ambuya wake enze Ayuda. (Mac. 16:1) Vinkuwoneka kuti Timoteyo wenze mulumbwana panthawe yomwe amayi wake a Yunike na ambuya wake a Loisi adangena muchipembedzo chachikhrisitu. Koma ababa wake alibe kukhalako Mkhrisitu. Manje Timoteyo adakakhala saidi iponi? Pakuti iye wenze kale wosinkhuka adakakwanisa kusalula yekha pankhani mweyi. Ko iye adakandongena mu tchetchi ya ababa wake? Ko adakapitiriza kutewedza miyambo yachiyuda yomwe adapfunzisiwa kuyambira ali mwana? Panango adakawona kuti viri bwino kubvuma kukhala wopfunzira wa Yesu Khrisitu?

3. Mobverana na Miyambo 1:8, 9, ko Yahova achabva tani akawona amayi womwe ankuyesesa kupfunzisa wana wawo kuti ayambe kumutumikira?

³ Ntsiku zino amayi wachikhrisitu achakondambo mabanja yawo ninge mwangachitira Yunike. Chofunika maninge kwa iwo ni kuthandiza wana wawo kuti akhale pa ushamwali na Yahova. Mulungu wathu akondwa akawona khama yomwe iwo ankuchita.  (Lewengani Miyambo 1:8, 9.) Yahova wathandiza amayi azinji kuti akwanise kupfunzisa wana wawo kuti ayambe kumutumikira.

4. Ko amayi azinji ankugumana na mabvuto yanyi ntsiku zino?

⁴ Mwachibadwa mayi angakhale na nkhawa kuti peno mwana wake atengerembo chitsanzo cha Timoteyo nkuyamba kutumikira Yahova. Ndipo bvuto inango ni yakuti azibereki angakwaniselini kukangisa kuti wana wawo aleke kugumana na mabvuto ya mudziko ya Satana ino. (1 Pet. 5:8) Bvuto inango ni yakuti amayi azinji alibe mwamuna ndipo ankulera wokha wana. Anango ali naye mwamuna koma iye atumikiralini Yahova. Mwakulinganiza, mulongo munango dzina yake Christine * adalewa kuti: “Mwamuna wangu ni wakhama pa nkhani yosamalira banja, koma bvuto ni yakuti anilambiza kuti nimbapfunzise wana va Yahova. Nkhani mwiyi yakhala inkunilirisa kwa magole yazinji ndawa yosadziwa kuti peno wana wangu adzakhale na mwayi wotumikira Yahova.”

5. Ko tikambirane chani munkhani ino?

⁵ Peno imwepo ndimwe mayi wachikhrisitu, dziwani kuti vingakufambireni bwino ninge mwavidachitikira kwa Yunike. Munkhani ino tikambirane vamungachite kuti mutewedzere chitsanzo cha Yunike pakupfunzisa wana wanu. Tiwone pomwe kuti vomwe muchachita na vomwe muchayankhula vingathandize kuti wana wanu abvume kumbapfunzisika. Ndipo pakumaliza tiwone momwe Yahova angakuthandizireni pankhani mweyi.

6. Mobverana na 2 Timoteyo 3:14, 15, nchani chidathandiza Timoteyo kuti akhale Mkhrisitu?

⁶ Timoteyo pewenze kamwana, amayi wake adachita khama kumupfunzisa ‘Mawu ya Mulungu.’ Podiya kuti venze teno, chidziwiso chake chenze chochepa ndawa yakuti palibe chomwe angadziwa pankhani ya Yesu Khrisitu. Koma vomwe Timoteyo adapfunzisiwa kuchokera m’Malemba venze vokwana kuti iye asalule kukhala Mkhrisitu. Koma ko ndivo vomwe iye adachita? Pakuti iye wenze mulumbwana, wenze na ufulu wosalula kukhala Mkhrisitu. Ni vosachita kubvunza kuti vomwe Timoteyo adapfunzisiwa pankhani ya Yesu iye ‘adavitsimikizira’ ndawa ya khama yomwe amayi wake adachita. (Lewengani 2 Timoteyo 3:14, 15.) Ni vodziwikiratu kuti Yunike adakondwa maninge ndawa yowona kuti wakwanisa kupfunzisa mwana wake nkuyamba kukonda Yahova podiya kuti penze mabvuto yazinji. Yunike adachitadi vinthu mobverana na dzina yake yomwe idachokera ku mawu yomwe tanthauzo yake ni yakuti “kuwina.”

7. Ko Yunike adakamuthandiza tani mwana wake kupita patsogolo podiya kuti wenze adabatizika kale?

⁷ Pomwe Timoteyo adabatizika, adakwanirisa cholinga chabwino maninge pamoyo wake. koma amayi wake adakhala pomwe na nkhawa inango. Ko mwana wawo moyu adakauphatisa tani basa moyo wake? Ko iye adakayamba kumbabverana na azishamwali woipa? Ko adakayenda kukapfunza ku shikola yaku Atene nkukabvuma vipfunziso vosabverana na Mawu ya Mulungu? Ko iye adakacheneka mphanvu zake, nthawe yake na kuphatisa basa ulumbwana wake wose pakufagafaga chuma kuti alemere? Yunike adakakwanisalini kumusalulira Timoteyo pankhani mweyi, koma adakamuthandiza. Ko adakamuthandiza tani? Iye adakapitiriza kumupfunzisa kuti ambakonde Yahova nakuti ambatembeje pa vomwe Mwana wake Yesu adatichitira. Sikuti wanthu womwe ali m’banja ya wanthu wogawikana vipembedzo ndiwo wokha achagumana na mabvuto neye. Olo azibereki womwe wose ni Mboni viwashupa basi kuti akwanise kupfunzisa wana wawo kuti  ayambe kutumikira Yahova. Ko azibereki mwawa angapfunzire chani kwa Yunike?

8. Ko mayi angathandize tani mwamuna wake yemwe ni Mboni pakupfunzisa wana kuti ambakonde Yahova?

⁸ Mbawapfunzisani Baibolo wana wanu. Alongo, peno amuna wanu ni Mboni, dziwani kuti Yahova achada kuti mumbawathandize pakupfunzisa wana kuti ayambe kukonda Yahova. Njira ibodzi yamungachitire vimwevi ni kuthandizira kuti pfunziro ya banja imbachitike nthawe zose. Ayi kumbayankhula mawu yonyozera makonzedwe mwaya ndipo mbayesesani kuti pfunziro ya banja imbachitike munjira yokomedza maninge. Mungachite bwino kuthandizira makonzedwe yomwe mwamuna wachita kuti ambapfunzise bwino wana. Peno panamwana yemwe anansinkhu wakuti angapfunzire Baibolo pakuphatisa basa bukhu yakuti Kondwani na moyo mpaka kalekale! mungachite bwino kuthandizira kuti mwana moyu ambapfunziredi.

9. Ko mayi yemwe mwamuna wake ni Mbonilini angagumane kuponi thandizo?

⁹ Amayi anango apfunzisa okha wana wawo Baibolo ndawa yakuti alibe mwamuna ndipo anango ndawa yakuti mwamuna wawo ni Mbonilini. Peno ndimo mwaviriri kwa imwepo, ayi kukhala na nkhawa yonyanya ndawa yakuti Yahova ni wokonzeka kukuthandizani. Mbawapfunzisani Baibolo wana wanu pakuphatisa basa mabukhu yokonzewa na gulu ya Yahova. Ndipo mungachite pomwe bwino kubvunza azibereki omwe ankugumanambo na bvuto ibodzibodzi kuti mubve vomwe achachita kuti achite pfunziro ya banja na wana pakuphatisa basa mabukhu mwaya. * (Miy. 11:14) Yahova angakuthandizeni pomwe kuti mumbakwanise kumbayankhula bwino na wana wanu. Ndipomwapa mumbamukumbire kuti akuthandizeni kudziwa vomwe wana wanu ankuganiza. (Miy. 20:5) Dziwani kuti mungayambe macheza yabwino olo kundomubvunza mbvunzo wakuti ‘ko ni bvuto ikulu iponi yomwe unkugumana nayo kushikola?’

10. Ni njira inango iponi yamungathandizire wana wanu kupfunzira va Yahova?

¹⁰ Gumanani njira zopfunzisira wana wanu va Yahova. Auzeni va Yahova na vinthu vizinji vomwe iye wakuchitirani. (Deut. 6:6, 7; Yes. 63:7) Vimwevi ni vofunika maninge makamaka peno ni voshupa kwa imwepo kupfunzisa wana wanu pamuyi mokhazikika. Christine watafotokoza kumayambiriro ule adalewa kuti: “Venze voshupa kuti nigumane mpata wopfunzira na wana wangu, ndipomwapa mpata ukandogumanika nimbapfunziriratu nawo. Nimbawatenga nkuyenda kukazunga panango kupakira mwadiya ndipo nimbawawonesa kukhuza kwa chilengedwe kuti akwanise kukhala pa ushamwali na Yahova. Panidawona kuti wana wangu akula, nidawalimbikisa kuti ambapfunzire Baibolo pawokha.” Kuthimizira pamwapa, mumbayankhule vinthu vabwino vomwe gulu yathu inkuchita ndipo ayi kumbakokola abale na alongo. Mukambacheza na wana wanu, ayi kumbalewa kuti akulu achitalini bwino vinthu, ndawa yakuti akadzagumana na mabvuto kutsogolo adzakwaniselini kufenderera akulu kuti awathandize.

11. Mobverana na Yakobo 3:18, ndawa chani ni vodikana maninge kuti timbalimbikise ntendere pamuyi?

¹¹ Yesesani kumbakhala mwantendere pamuyi panu. Nthawe na nthawe mbachitani vinthu vowonesa kuti mukonda maninge amuna wanu pabodzi na wana. Yesesani kumbayankhula mwaulemu maninge na amuna wanu ndipo alimbikiseni wana kuti ambawalemekezembo. Mukambachita vimwevi, muthandizira maninge kuti pamuyi pakhale ntendere ndipo mungawathandize pomwe kuti akhale na shungu yofuna kudziwa Yahova. (Lewengani Yakobo 3:18.) Wonani chitsanzo cha Jozsef yemwe ankuchita  upainiya wapadera ku Romênia. Pewenze mng’ono, ababa wake ambachita vose vangakwanise kuti akangise amayi wake na wana kutumikira Yahova. Iye adalewa kuti: “Amayi angayesesa kuti pamuyi pathu pakhale ntendere. Ababa akayamba kuchita chipiringu, amayi angachita vinthu modekha maninge. Amayi akawona kuti tinkushupika kulemekeza ababa na kuwabvera, angatiwerengera Aefeso 6:1-3. Patsogolo pake angatiuza makhalidwe yabwino ya ababa na kutifotokozera ndawa yake tichadekana kuwalemekeza maninge. Vimwevi vidathandiza maninge kuti pamuyi pathu pakhale ntendere.”

12. Mobverana na 2 Timoteyo 1:5, ko chitsanzo cha Yunike chidathandiza tani Timoteyo?

¹² Lewengani 2 Timoteyo 1:5. Yunike wenze chitsanzo chabwino maninge kwa Timoteyo. Ni vodziwikiratu kuti adamupfunzisa kuti chikhulupiriro chiwonekera mu vochita. (Yak. 2:26) Vimwevi vidamutsimikizira Timoteyo kuti amayi wake ankumupfunzisa tene ndawa yokonda Yahova. Timoteyo adachita kuwona yekha kuti kutumikira Yahova ndiko kunkuthandiza amayi wake kuti akhale wokondwa. Ko chitsanzo cha Yunike chidamuthandiza tani Timoteyo? Mtumi Paulo adawona kuti Timoteyo wenze na chikhulupiriro cholimba ninge amayi wake. Koma sikuti vimwevi vidandochitikambo vokha. Iye adakhala na chikhulupiriro ndawa yowonesesa chitsanzo chawo na kuwatewedzera. Ndipo ntsiku zino amayi azinji ankuthandizambo wanthu wa m’banja mwawo olo ‘posachita kuyankhula mawu.’ (1 Pet. 3:1, 2) Imwepo mungakwanisembo kuchita vimwevi. Ko mungakwanise tani?

13. Ndawa chani amayi achadekana kumbawona kuti ushamwali wawo na Yahova ndiwo wofunika maninge?

¹³ Mumbawone kuti ushamwali wanu na Yahova ndiwo wofunika maninge. (Deut. 6:5, 6) Ninge momwe amayi azinji ankuchitira, imwepombo munkuyesesa kuchita khama. Munkuphatisa basa nthawe yanu, kobiri ndipo mpakana nthawe zinango kumbachita kusowa tulo kuti mukwanise kusamalira wana wanu mwakuthupi. Koma osati mumbatangwanike maninge na kusamalira wana mpaka kusowa nthawe yolimbisa ushamwali wanu na Yahova. Mumbapatule nthawe ntsiku zose kuti mupemphere kwa Yahova, kupfunzira Baibolo pamwekha na kugumanika pamisonkhano. Mukambachita vimwevi, mudzalimbise ushamwali wanu na Yahova ndipo mudzapereke chitsanzo chabwino kwa wanthu wa m’banja mwanu na wanthu anango.

14-15. Ko mwapfunzira chani pa chitsanzo cha Leanne, Maria na João?

¹⁴ Onankoni vitsanzo vochepa va wana omwe adapfunzira kukonda Yahova ndawa ya chitsanzo chabwino cha amayi wawo. Leanne yemwe ni mwana wachikazi wa Christine adalewa kuti: “Ababa akakhala pamuyi vimbakwanisikalini kupfunzira Baibolo, koma amayi enze chitsanzo chabwino maninge pankhani yogumanika pamisonkhano. Podiya kuti tenze tilibe mpata wodziwa vizinji va m’Baibolo, vochita va amayi vidatithandiza kuti tikhale na chikhulupiriro cholimba. Ndipo tidadziwa kuti wa Mboni za Yahova ndiwo achapfunzisa chaivo podiya kuti tenze tikanati kuyamba kuyenda mumisonkhano.”

¹⁵ Maria yemwe ababa wake ambachitira nkhaza wanthu wa m’banja mwawo ndawa yakuti ayenda kumisonkhano adalewa kuti: “Amayi wangu ni chitsanzo chabwino maninge pankhani yolimba moyo ninge momwe alongo anango ankuchitira. Penenze mwana nimbalamba kuchita vinthu vanauziwa ndawa yogopa kuti anango alewe chani. Koma kuwona kulimba moyo kwa amayi na momwe ankuikhira Yahova pamalo yoyamba pamoyo wawo vidanithandiza kuti nisambagope munthu.” João yemwe ababa  wake angachita chipiringu ndawa yakuti pamuyi mwapo ankukambirana va Yahova adalewa kuti: “Chomwe chidanifika pamoyo maninge ni kuwona kuti amayi enze okonzeka kuchita chilichose kuti akondwerese ababa, koma ambabvumalini kuti awakangise kutumikira Yahova.”

16. Ko chitsanzo chabwino cha amayi chingathandize tani wanthu anango?

¹⁶ Dziwani kuti chitsanzo chanu imwepo amayi chingathandize maninge anango. Ko chingawathandize tani? Ndoganizani momwe chitsanzo cha Yunike chidathandizira mtumi Paulo. Iye angadziwa kuti Timoteyo akanati kukhala na chikhulupiriro, ‘omwe adayamba kukhala nacho ni . . . Yunike.’ (2 Tim. 1:5) Ko ni panthawe iponi Paulo padawona kuti Yunike anachikhulupiriro? Vinkuwoneka kuti iye adazindikira vimwevi pa ulendo wake woyamba wa umishonale panthawe yomwe angazungira ku Lusitara nkugumana na a Loisi na a Yunike ndipo adawathandiza kukhala Akhrisitu. (Mac. 14:4-18) Ndoganizani: Panthawe yomwe Paulo anganemba bukhu ya Timoteyo penze padapita kale magole 15, koma iye wenze adakali kukumbukira kuti Yunike anachikhulupiriro cholimba ndipo ni chitsanzo chabwino kwa Akhrisitu anango. Vimwevi vinkuwoneseratu kuti iye wenze chitsanzo chabwino kwa Paulo na kwa Akhrisitu anango wa munthawe yake. Peno imwepo munkulera mwekha wana panango munzanu wa m’banja ali muchipembedzo chinango, khalani wotsimikiza kuti mukakhala na chikhulupiriro cholimba mudzakhale chitsanzo chabwino kwa anzanu.

17. Ko mungachite tani peno mwana wanu ankuchinjalini podiya kuti munkuyesesa kumupfunzisa?

 ¹⁷ Manje tani peno mwayesesa kuchita khama koma mwana wanu ankuchinjalini? Vikakhala teno dziwani kuti kupfunzisa mwana kutenga nthawe. Ninge mwatinkuwonera pafoto, nthawe zinango tikabzala mbewu tingambakaikire kuti peno idzakuledi mpakana kubala vipaso. Podiya kuti palibe chamungachite kuti ikule kamangu, imwepo mungapitirize kumbaithiriza kuti ikule bwino. (Maliko 4:26-29) Mwakulingana na chitsanzo mwichi, imwepo ninge mayi mungambakaikire kuti peno munkukwanisadi kumufika pamoyo mwana wanu. Ni shuwadi kuti palibe chamungachite kuti apite patsogolo kankulumize, koma mukambayesesa kumupfunzisa, adzakwanise kukhala pa ushamwali na Yahova.—Miy. 22:6.

18. Ko Yahova angawathandize tani wana wanu kuti akhale naye paushamwali?

¹⁸ Kundochokera kalekale, Yahova wakhala ankuthandiza alumbwana na atsikana azinji kuti akhale naye pa ushamwali. (Sal. 22:9, 10) Peno wana wanu anacholinga chofuna kukhala pa ushamwali na Yahova, iye angawathandize. (1 Akor. 3:6, 7) Dziwani kuti Yahova ankupitiriza kumukonda mwana wanu, podiya viwoneke kuti iye ankumutumikiralini na moyo wose. (Sal. 11:4) Wana wanu akadzawonesa ‘chizindikiro chakuti ankufuna’ kukhala pa ushamwali na Yahova, iye adzawathandize kuti akhaledi azishamwali wake. (Mac. 13:48; 2 Mbiri 16:9) Yahova angakuthandizeni kuyankhula mawu yabwino na yapanthawe yake kwa mwana wanu. (Miy. 15:23) Iye angachitise pomwe m’bale panango mulongo wa mumpingu mwanu kukhala na chidwi chothandiza mwana wanu. Dziwani kuti olo iye akule, Yahova anamphanvu yomukumbusa vinthu vomwe mudamupfunzisa kalekale. (Yoh. 14:26) Mukambayesesa kupfunzisa wana wanu na kuwapasa chitsanzo chabwino, Yahova adzakudaliseni maninge.

19. Ko Yahova angaleke kukukondani ndawa yakuti mwana wanu wasalula kuipa? Fotokozani.

¹⁹ Sikuti Yahova angeleke kukukondani ndawa yakuti mwana wanu wasalula voipa pamoyo wake. Iye angachitelini vimwevi ndawa yakuti imwepo mumukonda. Peno imwepo munkulera mwekha wana, Yahova ankupolomisa kukhala Baba kwa wana wanu ndipo adzawateteze podiya vinthu vikhale voshupa. (Sal. 68:5) Imwepo mungakwaniselini kumuchichimiza mwana wanu kuti asalule kutumikira Yahova. Koma mukapitiriza kuthemba Yahova na kuyesesa kupfunzisa wana wanu, iye adzakondwe namwe.