Lumbiro ‘ni mawu yomwe munthu ayankhula pakupolomisa chinthu mpakana kumbaguma dzina ya Mulungu . . . achimbati iye achitire umboni kuti nidzakwanirisedi.’ Iye angachite kuyankhula panango kuchita kunemba.

Anango angaganize kuti kulumbira nkuphonya ndawa Yesu adalewa kuti: ‘Ayi kumbalumbira olo pang’ono . . . Mumbatsimikizire kuti mukati ‘Inde’ akhaledi inde ndipo mukati ‘Ayi’ akhaledi ayi, ndawa mawu yothimizira pamwapa ni yochokera kwa woipa.’ (Mat. 5:33-37) Podiya kuti Yesu adalewa mawu mwaya, ambadziwa bwino kuti Chilamulo cha Mose chimbauza Aizirayeli kuti ambachite malumbiro nthawe zinango ndipo ambachitadi. (Gen. 14:22, 23; Eks. 22:10, 11) Iye ambadziwa pomwe kuti olo Yahova chaiye achita malumbiro. (Aheb. 6:13-17) Ndipomwapa tingalewelini kuti Yesu ambatanthauza kuti osati timbalumbire. Koma iye ambandofuna kuchenjeza kuti tisambalumbire koma ne kukwanirisa. Tikalumbira timbaitengere siriyasi nkhani mweyo ndipo tichadekana kuchitadi vomwe tapolomisa.

Manje tani peno mwauziwa kuti mulumbire? Chakuyamba, mukanati kulumbira tsimikizirani kuti mukwanisedi kukwanirisa. Peno munkukaikira, mungachite bwino kundoleka kulumbira. Mawu ya Mulungu yankutichenjeza kuti: ‘Viri bwino kuleka kupolomisa kusiyana na kupolomisa koma ne kukwanirisa.’ (Mla. 5:5) Patsogolo pake, onani mpfundo za m’Malemba ndipo ziphatiseni basa mobverana na chikumbuntima chanu chopfunzisiwa bwino. Ko ni mpfundo ziponi za m’Baibolo zamungaphatise basa?

Malumbiro yanango ni yobverana na chifuniro cha Mulungu. Mwakulinganiza, Mboni za Yahova zichita mapolomisi pa ntsiku ya ukwati. Mapolomisi mwaya ni mbali ya malumbiro. Mwamuna na nkazi wake achapolomisa pamaso pa Mulungu na pa wanthu wose kuti adzakondane, adzasamalirane ndipo adzapitirize kulemekezana achimbati ‘nili nawe moyo wangu wose.’ (Amuna na akazi anango afotokozalini mawu mwaya ndendende. Koma olo viri teno, kundolowolana chabe ni polimisi kale kwa Mulungu.) Patsogolo pake iwo alengezewa kuti manje ni olowolana ndipo ali pabodzi moyo wawo wose. (Gen. 2:24; 1 Akor. 7:39) Makonzedwe yopolomisana pa ntsiku ya ukwati ni yobverana na chifuniro cha Mulungu.

Malumbiro yanango ni yosabverana na chifuniro cha Mulungu. Mkhrisitu chaiye angalumbirelini kuti adzateteze dziko yawo pakuphatisa basa mpfuti panango kubvuma kulumbira kuti adzatumikirelini pomwe Mulungu. Kuchita vimwevi ni kuphwanya malamulo ya Mulungu. Akhrisitu ‘alilini mbali ya dziko,’ ndipomwapa angangenererelini munkhani za ndale na kumenya nawo nkhondo.—Yoh. 15:19; Yes. 2:4; Yak. 1:27.

 Malumbiro yanango yayendera chikumbuntima. Nthawe zinango tingafunike kuchita vinthu mosamala maninge pa nkhani ya kulumbira makamaka ‘tikambapereka vinthu va Kaisara kwa Kaisara na va Mulungu kwa Mulungu’ mobverana na malangizo ya Yesu.—Luka 20:25.

Tilinganize kuti Mkhrisitu wauziwa kuti ayankhule mawu yowonesa kukonda dziko yake panango kupasiwa passaporte yomwe inamawu yolumbira vinthu vosabverana na malamulo ya Mulungu. Vikakhala teno, chikumbuntima chake chopfunzisiwa bwino chingamuthandize kuti achite vinthu mwanzeru. Panango boma ingabvume kuti mawu yolumbira ya patsamba mweyo yachinjiwe kuti yabverane na chikumbuntima chake.

Kukhala na malumbiro yochita kukonzewa mwalamulo nthawe zinango kungakhale kobverana na mpfundo ya pa Aroma 13:1 yomwe ilewa kuti: ‘Munthu aliyese ambabvere olamulira akuluakulu.’ Ndipomwapa Mkhrisitu nthawe zinango angawone kuti palibe bvuto kuchita vomwe boma inkulewa ndawa ndivo vomwe Mulungu ankutiuza kuti timbachite.

Tingachite pomwe bwino kubvera chikumbuntima chathu chopfunzisiwa bwino peno tauziwa kuti tiphatise basa chinthu panango kuti tilumbire. Aroma wa kalekale ambayankhula mawu yowonesa kuti ankuchemerera mphanvu kuti iwathandize pakumenya nkhondo ya Mulungu, ndipo akachita teno ambayenda ali wotsimikiza kuti akawine. Nawombo Agiriki ambaimisa manja mdzulu akambachita malumbiro. Akachita vimwevi ambatsimikiza kuti Mulungu ankuphatisa basa mphanvu yake kuti akwanise kuwawona, kubva vomwe ankuyankhula na kudziwa kuwanda kwa wanthu omwe ali mwapo.

Koma mtumiki wa Yahova angayeselini kulumbirira vizindikiro va mudziko yake ndawa yakuti ni vobverana na kupemphera konama. Manje tani peno imwepo ku tiribunali mwauziwa kuti muphate Baibolo kuti mulumbirire nkhani yomwe munkuichitira umboni? Pankhani ninge mweyi, panango mungasaine kuchitadi ndawa Malemba yachawonesa kuti palibe vuto kulumbira na kuwonesa chizindikiro chakuti walumbiradi. (Gen. 24:2, 3, 9; 47:29-31) Ni vabwino pomwe kukumbukira kuti mukambachita lumbiro, ndiye kuti munkulumbira pamaso pa Mulungu kuti vamunkulewa ni vazedi. Muchadekana kukonzekera bwino kuti mukwanise kudawira chaivo pa mbvunzo uliwose wamungabvunziwe.

Pakuti tiwona kuti ushamwali wathu na Yahova ni wofunika maninge, tingachite bwino kuyamba tapemphera tikanati kubvuma kulumbira chinthu chomwe tauziwa. Vimwevi vingathandize kuti osati chikumbuntima chathu chitibonerese ndawa yophwanya mpfundo za m’Baibolo. Mukatsimikiza mtima kulumbira chinthu, muchadekana kuwonesesa kuti mwachikwanirisadi.—1 Pet. 2:12.