1-2. Ko tikambirane chani mu nkhani ino?

KO MUNGABVE tani peno munkudikhirira katundu koma unkufikalini panthawe yake? Ko imwepo mungakhumudwe? Lemba ya Miyambo 13:12 ichati: ‘Vomwe ungadikhira vikakanga viwawisa moyo.’ Ndipo vimwivi ni vobveka. Koma tani muchibva kuti panavifukwa vobveka vomwe vinkuchitisa kuti katundu uleke kufika panthawe yake? Apa manje panango mungakhale wokonzeka kudikhirira.

² Mu nkhani ino tikambirane mpfundo za m’Baibolo zomwe zingatithandize kukulisa ‘khalidwe yodikhira.’ (Mika 7:7) Patsogolo pake tikambirane vochitika viwiri vomwe tichadikana kudikhira Yahova. Pomalizira, tikambirane va madaliso yomwe tidzatambire ndawa yodikhira Yahova.

3. Ko mpfundo ya pa Miyambo 13:11 inkutipfunzisa chani?

³ Chibodzi mwa chitsanzo chomwe chingatithandize kukhala na mtima wodikhira chinkugumanika pa Miyambo 13:11 yomwe ichati: ‘Vinthu va ntengo wapatali vomwe vigumanika munjira yachinyengo vicheperachepera, koma woviunganiza na djanja yake ndiye achachitisa kuti viwande pang’onopang’ono.’ Ko mpfundo ni iponi pamwapa? Munthu wanzeru achita vinthu mosamala na moderekha ndipo aphindula.

4. Ko mpfundo ya pa Miyambo 4:18 inkutipfunzisa chani?

⁴ Lemba ya Miyambo 4:18 ichatiuza kuti: ‘Njira ya wolungama ili ninge kugaka kwamphanvu komwe kuchayenda kuchiingizirika mpakana ntsiku kukhazikika.’ Mawu mwaya yankuwonesa momwe Yahova achaululira cholinga chake kwa wanthu pang’ono-pang’ono. Ndipo vesi mweyi ingaphatisiriwe pomwe basa pofotokoza momwe mkhrisitu achayendera  patsogolo mwauzimu pa moyo wake. Vitenga nthawe kuti munthu akulise ushamwali wake na Yahova. Tikambapfunzira mwakhama na kuphatisira basa malangizo yomwe tichatambira m’Mawu ya Mulungu na gulu yake, tidzakulise pang’ono-pang’ono makhalidwe ninge ya Khrisitu. Ndipo tizamudziwe bwinobwino Mulungu. Onani chitsanzo chomwe Yesu adapereka pankhani mwiyi.

5. Ko Yesu adapereka chitsanzo chiponi pakubvekesa kuti vitenga nthawe kuti munthu achinje?

⁵ Ntontholo wa Ufumu womwe tichalalikira, Yesu adaulinganiza na mbewu yomwe ikula pang’ono-pang’ono mumtima mwa munthu wachidwi. Iye adati: ‘Mbewu zimera na kukula. Koma vimwevi vikambachitika, munichiro adziwalini chinthu. Pang’ono-pang’ono, dothi payokha ibala vipaso. Choyamba m’mera ubiriwira, patsogolo pake ubulisa ngalangala, pamamaliziro pake tirigu uyamba kuwonekera mu ngalangala.’ (Maliko 4:27, 28) Ko Yesu pamwapa adabvekesa mpfundo iponi? Iye ambabvekesa kuti ninge mwavichakhalira kuti mbewu ichakula pang’ono-pang’ono, munthu wachidwi akatambira ntontholo wa Ufumu, kukula kwake kwauzimu kuchitika pang’ono-pang’ono. Mwakulinganiza, pfunziro yathu yachidwi ikambalimbisa ushamwali wake na Yahova tichawona kuti ankuchinja vizinji pa moyo wake. (Aef. 4:22-24) Koma timbakumbukire kuti yemwe ankuchitisa kuti iye achinje ni Yahova.—1 Akor. 3:7.

6-7. Ko tinkupfunzira chani pa momwe Yahova adalengera dziko yapasi?

⁶ Yahova ni wodekha pa chilichose chomwe ankuchita viribe basa kuti papite nthawe itali tani kuti amalize basa yake. Iye achita vimwivi kuti dzina yake ilemekezeke nakuti aphindulise anango. Mwakulinganiza, ndoganizani kuderekha komwe iye adachita panthawe yose yomwe adakhala ankukonza vinthu vose padziko yapasi.

⁷ Tikapenda bwinobwino momwe Yahova adalengera dziko yapasi, Baibolo ifotokoza kuti adachita kuikha ‘mipimo yake,’ ‘maziko’ na ‘mwala wapakhona.’ (Yobu 38:5, 6)  Mpakana iye adakhala na nthawe yokwana yoganizira basa yake. (Gen. 1:10, 12) Ndoganizani momwe angelo ambabvera akawona chanyowani chilichose chomwe Yahova walenga. Ni vosachita kubvunza kuti iwo ambadabwa maninge. Ndawa yowona vimwevi, azinji adayamba ‘kumbawombera m’manja.’ (Yobu 38:7) Ko tinkupfunzira chani pamwapa? Vidatenga magole yazinji maninge kuti Yahova amalize basa yake, koma iye ambati akanyang’anisisa chilichose chawakonza mwabuya, ambalewa kuti ‘venze bwino maninge.’—Gen. 1:31.

8. Ko manje tikambirane chani?

⁸ Ninge mwatawonera mu vitsanzo va mundime zapadzulu, tingagumane mpfundo zizinji m’Mawu ya Mulungu zomwe zinkutsindika kudikana kodikhira. Manje naboni tikambirane mbali ziwiri zomwe isepano tichadekana kudikhirira Yahova.

9. Ko ni nthawe iponi yomwe tichadekana kudikhira Yahova?

⁹ Tikakhala kuti tapemphera kwa iye ndipo akanati kutidawira. Tikamukumbira mphanvu kuti tikwanise kupirira mayesero panango vofoka vathu, tingawone ninge ankuchebwa kutithandiza. Ndawa chani Yahova angadawiriretulini mapemphero yathu yose panthawe ibodzi?

10. Ndawa chani tifunika kudikhira tikakumbira chinthu kwa Yahova?

¹⁰ Yahova achabvesera mwatcheru mapemphero yathu. (Sal. 65:2) Iye achawona kuti kupemphera kwathu mochokera pasi pa moyo ni chizindikiro chakuti tinachikhulupiriro. (Aheb. 11:6) Tikamukumbira kuti atithandize, iye ni wofunisisa kutiwona tikuyesesa kuchita vinthu mobverana na mapemphero yathu kuti tikwanirise vofuna vake. (1 Yoh. 3:22) Ndipomwapa tichadekana kudikhira nkumbachita vinthu mobverana na mapemphero yathu peno tinkulimbana na vizolowezi voipa panango vofoka vathu. Yesu adatithandiza kubvesa kuti mapemphero yathu yanango yangadawiriwelini nthawe mweyo. Iye adati: ‘Pitirizani kukumbira, ndipo mudzapasiwe, pitirizani kufagafaga, ndipo mudzagumane, pitirizani kugogodza, ndipo adzakufungulireni. Ndawa aliyese wokumbira apasiwa, aliyese wofagafaga agumana, ndipo aliyese wogogodza afunguliriwa.’ (Mat. 7:7, 8) Tikambatewedza malangizo mwaya ‘nkupitiriza kupemphera,’ tidzachite kuwona tekha kuti shuwadi Ababa wathu wakudzulu achabvesera na kudawira mapemphero yathu.—Akol. 4:2.

11. Ko lemba ya Aheberi 4:16 itithandiza tani peno vinkuwoneka kuti mapemphero yathu yankudawiriwalini nthawe mweyo?

¹¹ Podiya viwoneke kuti mapemphero yathu yankudawiriwalini nthawe mweyo, Yahova ankupolomisa kuti ‘adzatidawire panthawe yake.’ (Lewengani Aheberi 4:16.) Ndipomwapa tichadekanalini kumuimba mulandu Yahova peno tinkudawiriwalini kankulumize. Mwakulinganiza, wanthu akhala ankupemphera kwa magole yazinji kuti Ufumu wa Mulungu ubwere kuti umalise mavuto yose. Ndipo Yesu ndiye adatiuza kuti timbaupempherere. (Mat. 6:10) Koma kungakhale kupusa maninge peno tingabvume kuti chikhulupiriro chathu chifoke ndawa yakuti mapeto yankubweralini panthawe yomwe wanthu ambadikhirira. (Hab. 2:3; Mat. 24:44) Tingawonese kuti ndise wanzeru peno tinkupitiriza kudikhira Yahova na kupemphera kwa iye tichimbatsimikiza kuti adzatidawire. Mapeto ya dziko ino yadzafike panthawe  yake ndipo Yahova adasankhula kale ‘ntsiku na ora’ yake. Ndipo imwiyi idzakhale nthawe yabwino maninge.—Mat. 24:36; 2 Pet. 3:15.

12. Ko tingashupike maninge kukhala wodikhira pa nkhani iponi?

¹² Tikambadikhira kuti chilungamo chichitike. Wanthu mu dziko iyi achitira nkhanza wanthu womwe ni wosiyana nawo khaindi, dzinza panango dziko. Anango achitiriwa nkhanza ndawa ya maonekedwe na kuchepekera kwa nzeru. Wanthu wa Yahova akhala ankuchitiriwa viribe chilungamo ndawa ya vomwe achakhulupirira. Tikambadzudziwa teneuyu, timbakumbukire mawu ya Yesu yakuti: ‘Yemwe adzapirire mpakana mapeto ndiye wati adzapulumuke.’ (Mat. 24:13) Koma ko mungachite tani peno mwazindikira kuti munthu munango wachita chimo ikulu mumpingu? Nkhani ikaperekewa kwa akulu, ko imwepo mudzaisiye m’manja mwawo na kudikhira kuti Yahova aikonze munjira yabwino? Ko akulu angachite chani peno munthu wachita chimo ikulu?

13. Ko Yahova achada kuti akulu ambachite chani peno munthu wachita chimo?

¹³ Akulu akandodziwa kuti munthu munango wachita chimo ikulu mumpingu, achapemphera maninge kuti agumane ‘nzeru yochokera kudzulu’ kuti akwanise kuibvesa bwino nkhani yose. (Yak. 3:17) Cholinga chawo ni kuthandiza munthu yemwe wachita chimo kuti ‘amubweze panjira yake yoipa’ peno ni vokwanisika. (Yak. 5:19, 20) Iwo achada soti kuchita vose vangakwanise kuti ateteze mpingu na kulimbikisa womwe akhudziwa na nkhani mweyo. (2 Akor. 1:3, 4) Akalibe kusamalira chimo ikulu, akulu achadekana kuyamba adziwa nkhani yose, ndipo panango vingatenge nthawe. Akateno achadekana kuipempherera maninge na kuphatisa basa Malemba mosamala kuti asamalire chimo ‘munjira yabwino.’ (Yer. 30:11) Podiya kuti akulu achadekanalini kutenga nthawe ikulu maninge, koma achadekana kusamala pomwe kuti osati apereke chiweruzo mwakankulumize. Akulu akatewedza malangizo ya Yahova, wanthu wose mumpingu adzakhale obverana maninge. Koma podiya kuti nkhani isamaliriwe bwino, nthawe zinango wophonya ule angapitirize kudziimba mulandu. Manje peno vimwivi vakuchitikirani imwepo, ko amungachite tani kuti muchepeseko ululu?

14. Ko ni chitsanzo cha m’Baibolo chiponi chomwe chingakuthandizeni kupirira peno mwaphonyerewa maninge na m’bale panango mulongo?

 ¹⁴ Ko imwepo mudaphonyerewako kale maninge na m’bale panango mulongo? Peno nteno, mungagumane vitsanzo m’Mawu ya Mulungu vomwe ni vothandiza kudikhira Yahova kuti akonze vinthu. Mwakulinganiza, Yosefe padachitiriwa viribe chilungamo na azibale wake chaiwo, alibe kubvuma kuti vochita vawo vimuchitise kumbandokhala wokalipa. Koma iye ambaikhira nzeru maninge pa basa ya Yahova yemwe adadzamudalisa ndawa ya kupirira kwake. (Gen. 39:21) Vinkuwoneka kuti Yosefe wenze wokonzeka kuwakhululukira azibale wake ndipo wonani momwe Yahova adamudalisira. (Gen. 45:5) Ninge Yosefe, isembo tidzalimbikisiwe tikathemba Yahova na kudikhira kuti iye akonze vinthu panthawe yake.—Sal. 7:17; 73:28.

15. Ko nchani chidathandiza mulongo kupirira kusowa chilungamo?

¹⁵ Kuchitiriwa vinthu vilibe chilungamo sikuti nthawe zose kuchakhala kowawa ninge mwevenzere kwa Yosefe, koma nthawe zinango vinthu vilibe chilungamo vingatiwawe maninge. Tikakhala kuti tinkubvanalini na anzathu, kuphatanidzapo wanthu womwe achatumikiralini Yahova, tingaphindule tikaphatisa basa mpfundo za m’Baibolo. (Afil. 2:3, 4) Ganizirani chitsanzo chibodzi ichi: Mulongo munango adakhumudwa maninge pomwe adabva kuti munzake wa kubasa ankumunamizira vinthu vomwe iye alibe kuchita. M’malo mwa kuthamanga nayo nkhani mweyo, iye adadekha nkuyamba kuganizira chitsanzo cha Yesu. Pomwe Yesu ambayankhuliwa vachipongwe, alibe kubwezera vachipongwe. (1 Pet. 2:21, 23) Pakuganizira vimwivi, iye adawona kuti vingakhale bwino kundokhala chete. Patsogolo pake iye adadzazindikira kuti munzake wakubasa adamuchita teneule ndawa yakuti ambadwala ndipo wenze na nkhawa ikulu. Mulongo ule adadziwa kuti munzake alibe kuchita kufuna kuyankhula voipa. Mulongo adakhala wokondwa maninge ndawa ya kupirira pa bvuto mweyi ndipo adakhala na ntendere.

16. Ko nchani chingakulimbikiseni peno munkuchitiriwa vinthu viribe chilungamo? (1 Petulo 3:12)

¹⁶ Peno imwepo munkuboneresewa ndawa ya kusowa chilungamo panango ndawa ya mabvuto yanango, dziwani kuti Yahova ali pafupi  na wanthu wa ‘mtima wophwanyika.’ (Sal. 34:18) Iye achakukondani ndawa yoyesesa kudikhira na kumutulira nkhawa zanu. (Sal. 55:22) Iye ndiye Woweruza nkulu wa dziko yose. Iye achawona vose vomwe vinkuchitika. (Lewengani 1 Petulo 3:12.) Peno imwepo munkugumana na mabvuto yomwe mungakwaniselini kuyakonza mwekha, ko ndimwe wokonzeka kudikhirira Yahova?

17. Ko pa lemba ya Yesaya 30:18 Yahova ankupolomisa kuchita chani?

¹⁷ Manjemanje Ababa wathu wakudzulu atidalise na Ufumu wake. Lemba ya Yesaya 30:18 ichati: ‘Yahova adzadikhirire kuti akukomereni moyo ndipo adzanyamuke kuti akuchiterini chifundo. Ndawa Yahova ni Mulungu wachilungamo. Wodala ni wanthu wose womwe amudikhirira.’ Wanthu womwe ankudikhirira Yahova adzatambire madaliso manjeuno ndipo adzadalisiwe pomwe mudziko inyowani yomwe inkubwera.

18. Ko tinkudikhirira madaliso yaponi?

¹⁸ Wanthu wa Mulungu akambadzangena mu dziko inyowani, iwo adzabonerelini pomwe na mabvuto yomwe ankuyapirira ntsiku zino. Vinthu vosowa chilungamo vidzamale ndipo palibe wati adzabve pomwe kuwawa. (Chiv. 21:4) Palibe chati tidzasowe ndawa panthawe mwiyo tidzakhale na vinthu vizinji. (Sal. 72:16; Yes. 54:13) Yamwaya yadzakhale madaliso yabwino maninge!

19. Ko Yahova ankutikonzekerera chani pang’onopang’ono?

¹⁹ Manjemanje tidzagwebanelini pomwe na makhalidwe yoipa ndipo tidzakwanise kukulisa makhalidwe yose ya Mulungu. Yahova ankutikonzekerera moyo wabwino womwe tidzakhale nawo mu Ufumu wake. Ayi kutaya mtima ndipo ayi kufoka. Manjemanje tikhale na moyo wabwino. Pakuti tinkudikhira tsogolo yabwino, naboni tose tikhale wokonzeka kudikhirira Yahova pa vomwe iye adzatichitire.