NKHANI YOPFUNZIRA 33
Kondwani na maudindo yamunayo
‘Kuwona na maso kulibwino kuposha kukhumba na mtima.’—MLAL. 6:9.
NYIMBO NA. 111 Tinavifukwa vizinji vokhalira wokondwa
VOMWE TIPFUNZIRE *
1. Ko azinji ankuyesesa tani kuti achite vizinji pa basa ya Yahova?
POMWE mapeto ya dziko ino yankufendera, tinabasa ikulu maninge kuti tiphate. (Mat. 24:14; Luka 10:2; 1 Pet. 5:2) Tose tinkufuna kuchita vose vatingakwanise pa basa ya Yahova. Azinji athimizira utumiki wawo. Anango ankufuna kudzayamba upainiya. Anango ankufuna kudzatumikira ku Beteli panango kuthandizira kumanga nyumba za gulu yathu. Ndipo abale azinji ankuyesesa kuti ayenerere kukhala atumiki wothandiza panango akulu. (1 Tim. 3:1, 8) Yahova achakondwa maninge akawona vomwe wanthu wake ankufuna kuchita pakumutumikira.—Sal. 110:3; Yes. 6:8.
2. Ko tingabve tani peno tinkukwanisalini kukwanirisa volinga vathu vauzimu?
2 Peno nthawe ikundopita koma osakwanirisa volinga vathu vinango, shungu yathu ingayambe kuchepa. Ndipo tingayambe pomwe kufoka ndawa yowona kuti mobverana na nsinkhu wathu tingakwaniselini kuchita mautumiki yanango. (Miy. 13:12) Vimwivi ndivo vidachitikira Melissa. * Iye wenze na shungu yakuti akatumikireko ku Beteli panango kungena Shikola ya olalikira va Ufumu. Koma iye adati: ‘Mobverana na nsinkhu wangu manje vingakwanisikelini. Kwa ine manje, mwayi muyu wandokhala maloto basi. Nthawe zinango viniwawa maninge.’
3. Ni vinthu viponi vomwe anango angafunike kuchita kuti ayenerere maudindo yanango?
3 Abale anango omwe ni alumbwana na wamphanvu, panango angafunike kudikhira kuti akhume mwauzimu na kuwonesa makhalidwe yanango akanati kupasiwa maudindo yanango mumpingu. Podiya kuti iwo angakhale wabuya na wodzipereka, nthawe zinango angafunike kupfunzira kudikhira ndipo nthawe zinango angafunike kupfunzira kukhala waulemu. Mukayesesa kukhala na makhalidwe yabwino, maudindo yadzakufikeni panthawe yomwe mungadikhiralini. Wonani vomwe vidachitikira Nick. Pewenze na magole 20, vimbamuwawa maninge ndawa ambaikhiwalini kuti akhake ntumiki wothandiza. Iye adati: ‘Nimbandowona ninge pali vanidaphonyesa.’ Koma Nick alibe kubwerera m’mbuyo. Iye ambayesesa kuchita vose vangakwanise mumpingu na pa basa yolalikira. Manjeuno iye ankutumikira mu Komiti ya Nthambi.
4. Ko tipfunzire chani munkhani ino?
4 Ko imwepo vinkukuwawani ndawa yakuti namanje mukanati kukwanirisa volinga vanu vauzimu? Peno nteno, muuzeni Yahova mpemphero. (Sal. 37:5-7) Mungabvunze pomwe abale na alongo wodziwa vizinji ndipo yesesani kutewedza malangizo yangakupaseni. Mukachita vimwivi, panango mungakhale wokonzeka kukwanirisa cholinga chanu. Koma ninge mwavidakhalira na Melissa watafotokoza kumayambiriro, panango pakali pano ni vosakwanisika kukwanirisa cholinga chanu. Manje imwepo mungachite tani kuti mupitirize kukhala wokondwa? Pakudawira mbvunzo moyu, nkhani ino ifotokoze (1) vomwe vingakupaseni chimwemwe, (2) momwe mungaingizirire chimwemwe chanu, na (3) volinga vatingakhale navo vomwe vingathimizire chimwemwe chathu.
VOMWE VINGAKUPASENI CHIMWEMWE
5. Kuti tikhale wokondwa, ko tichadekana kumbaganizira chani? (Mlaliki 6:9)
5 Lemba ya Mlaliki 6:9, inkufotokoza vomwe tingachite kuti tikhale wokondwa. (Lewengani.) Munthu yemwe ankukondwa na ‘vomwe maso yake yankuwona’ achakhala wokhutira na momwe vinthu viliri pamoyo wake. Koma munthu yemwe andokhumba muntima mwake chinthu chomwe adzakhalelini nacho, angakhalelini wokondwa. Manje tinkupfunzira chani pamwapa? Kuti tigumane chimwemwe, tichadekana kumbaganizira volinga vomwe tingakwanise osati vomwe tingakwaniselini.
6. Ko tikambirane fanizo iponi, ndipo tiikhire nzeru pa chani?
6 Ko ni vokwanisikadi kumbakondwa na vinthu vomwe munavo kale? Kuposha vose, nthawe ikambapita mwachibadwa tichagumana na mabvuto yanyowani. Koma ni vokwanisika kukondwa. Tingambakondwe na vinthu vomwe ‘maso yathu yankuwona’ pakali pano. Ko tingachite tani vimwevi? Kuti tidziwe mwatingachitire, naboni tiwone chitsanzo cha Yesu cha matalente chogumanika pa Mateyu 25:14-30. Tiikhire nzeru maninge pa vomwe tinkupfunzirapo pa nkhani ya momwe tingagumanire chimwemwe na madaliso yomwe tinayo.
MOMWE MUNGAINGIZIRIRE CHIMWEMWE CHANU
7. Fotokozani mwachigwato fanizo ya Yesu ya matalente.
7 Mufanizo mweyi, mwamuna adachita ulendo. Koma akanati wachoka, adachemera akapolo wake na kuwapasa matalente kuti achite bizi. * Mobverana na momwe vinthu venzere pamoyo wa aliyese, mwamuna ule adapereka matalente 5 kwa kapolo woyamba, yawiri kwa kapolo munango na ibodzi kwa munango. Akapolo awiri adachita khama kuti awagumanire kobiri zizinji abwana wawo. Koma kapolo wachitatu, m’malo mophatisa basa kobiri ire, adandoyenda kaibisa ndipo abwana wake alibe kukondwera naye.
8. Ndawa chani kapolo woyambirira wa mu fanizo ya Yesu adakhala wokondwa?
8 Kapolo woyamba adawona kuti ni mwayi kupasiwa matalente yokwana 5 na bwana wake. Imweyi yenze mali izinji, ndipo vidawonesa kuti bwana ule angamuthemba. Manje tani va kapolo wachiwiri? Venze vosashupa kuti iye akalipe ndawa alibe kupasiwa mali zizinji ninge woyamba ule. Koma ko iye adachita chani?
Ko tinkupfunzira chani kwa kapolo wachiwiri wa mu fanizo ya Yesu? (1) Iye adapasiwa matalente yawiri na abwana wake. (2) Iye adaphata basa mwakhama kuti awagumanire kobiri zizinji abwana wake. (3) Iye adakwanisa kugumana pomwe matalente yanango yawiri (Onani ndime 9-11)
9. Ko Yesu alibe kufotokozako vinthu viponi va kapolo wachiwiri? (Mateyu 25:22, 23)
9 Lewengani Mateyu 25:22, 23. Yesu alibe kufotokozako kuti kapolo wachiwiri adakalipa ndawa yakuti adatambira matalente yawiri. Ndipo Yesu alibe kufotokoza kuti kapolo ule ambadandaula kuti: ‘Ndawa chani inepano anipasa tumotu basi? Ndawa chani ule amupasa matalente 5? Ko abwana mwawa anithembalini? Ko ankuganiza kuti nidzonge kobiri zawo poziphatisira basa pa vinthu vangu?’
10. Ko kapolo wachiwiri adachita chani na matalente yake?
10 Ninge mwadachitira kapolo woyamba, kapolo wachiwiri adautengera siriyasi udindo womwe adapasiwa na abwana wake. Mapeto yake ni yakuti adagumana pomwe matalente yanango yawiri. Kapolo wakhama na wabuya moyu adadalisiwa maninge. Sikuti bwana wake adondokondwa chabe, koma adamupasa soti mwayi wonyang’anira vinthu vizinji.
11. Ko mungaingizire tani chimwemwe chanu?
11 Isepanombo tingaingizire chimwemwe chathu pakuganizira vinthu vomwe tidapasiwa pa basa ya Yahova. ‘Mbatangwanikani’ maninge pa basa yolalikira, ndipo mbadziperekani pa basa za kumpingu. (Mac. 18:5; Aheb. 10:24, 25) Pakuyenda kumisonkhano, mbakonzekerani kuti mukapereke ndemanga zolimbikisa pa nkhani yomwe ikapfunziriwe. Tengerani siriyasi mbali iliyose yamungapasiwe pamisonkhano ya mpingu. Mukakumbiriwa kuti muchite chinthu chinango mumpingu, khalani wodzipereka na wothembeka. Ayi kumbawona kuti nkutaya nthawe kuphata basa yomwe mwapasiwa. Yesesani kuingizira buya yanu. (Miy. 22:29) Mukambayesesa kuchita khama pa basa iliyose yamungapasiwe, mudzapite patsogolo mwakankulumize ndipo mudzakhale wokondwa. (Agal. 6:4) Mudzawone soti kuti ni vosashupa kukondwa na anzanu womwe atambira udindo womwe imwepo munkuufunambo.—Aro. 12:15; Agal. 5:26.
12. Ko ni chani chidathandiza Melissa na Nick kuti aingizire chimwemwe chawo?
12 Ko munkukumbukira kuti mulongo Melissa wenze na shungu yokatumikira ku Beteli na kungena Shikola ya olalikira va Ufumu? Podiya kuti viribe kukwanisika kukwanirisa cholinga chake, iye adati: ‘Nimbayesesa kuchita khama pa utumiki wangu wa upainiya na kuphatisira basa njira zosiyanasiyana zolalikirira. Vimwevi vinibweresera chimwemwe chikulu.’ Tani va Nick yemwe ambaikhiwalini kukhala ntumiki wothandiza? Iye adati: ‘Nimbaikhira nzeru pa maudindo yenenze nayo kale ninge kulalikira na kupereka ndemanga zolimbikisa pamisonkhano. Nidayesesa kuti nikatumikire pa Beteli ndipo nidadzachemerewa gole ya mangwana yake.’
13. Ko nchani chomwe chidzatichitikire tikambaganizira va udindo womwe tinaye manjeuno? (Mlaliki 2:24)
13 Ko mukambaikhira nzeru pa utumiki womwe munaye manjeuno, vingachitise kuti mudzatambire maudindo yakulu-yakulu kutsogolo? Vimwevi vingachitikedi ndipo ndivo vidachitikira Nick. Koma peno vingakwanisikelini, ninge Melissa, khalani wokondwa na buya yanu ndipo mudzapitirize kukhala wokondwa pa vinthu vomwe munkuchita. (Lewengani Mlaliki 2:24.) Kuposha vose, mudzakhale wokondwa pakudziwa kuti khama yanu inkukondweresa Bwana wathu Yesu Khrisitu.
VOLINGA VOMWE VINGAINGIZIRE CHIMWEMWE CHATHU
14. Ko tichadekana kumbaganizira chani tikambafuna kukwanirisa volinga vathu pakutumikira Yahova?
14 Ko kuganizira va maudindo yomwe tinayo pakali pano kumbatikangise kuchita vizinji potumikira Yahova? Neye. Kukhala na volinga vauzimu kuchatithandiza kuti timbachite khama pakukhala wobala vipaso mu umboni na kuthandiza abale na alongo wathu. Tingakwanirise volinga vimwivi peno ndise wanzeru na wodzichepesa ndipo tinkuikhira nzeru pa kuthandiza anango osati kumbadodzithandiza tekha.—Miy. 11:2; Mac. 20:35.
15. Ko ni volinga vinango viponi vomwe vingaingizire chimwemwe chathu?
15 Ko ni volinga viponi vomwe mungakhale navo? Mukumbireni Yahova kuti akuthandizeni kuganizira vomwe mungakwanise kuchita. (Miy. 16:3; Yak. 1:5) Imwepo mungakhale na volinga ninge vomwe vafotokozewa mu pfunziro ino mundime yoyambirira, vomwe ni kukhala mpainiya wothandiza panango wokhazikika, kutumikira ku Beteli panango kudzipereka pa basa zomangamanga panango mungadzipereke kupfunzira chiseweredwe chinango kuti mukwanise kulalikira ntontholo wabwino mugawo yanu kwa womwe akwanisalini kuyankhula chiseweredwe chanu. Imwepo mungadziwe vizinji pakuwona msolo 10 wa bukhu ya Gulu Lochita Chifuniro cha Mulungu ndipo yankhulani na akulu wa mumpingu mwanu. * Mukachita khama pa volinga vanu vimwevi, mudzavikwanirise ndipo chimwemwe chanu chidzaingizirike.
16. Ko mungachite chani peno mungakwaniselini kukwanirisa cholinga chamunacho?
16 Koma tani peno pa volinga vatafotokoza ivi palibe chomwe mungakwanise? Fagafagani cholinga chinango chomwe mungakwanise kukhala nacho. Onankoni volinga vinango.
Ko ni volinga vinango viponi vomwe mungakwanirise? (Onani ndime 17) *
17. Mobverana na 1 Timoteyo 4:13, 15, ko m’bale angachite chani kuti akhale mpfunzisi wabwino?
17 Lewengani 1 Timoteyo 4:13, 15. Peno imwepo ndimwe m’bale wobatizika, mungachite khama kuti mumbayankhule na kupfunzisa bwino. Ndawa chani? Ndawa yakuti ‘mukadziwa bwino’ kulewenga, kuyankhula na kupfunzisa, mudzathandize wobvera wanu. Yesesani kukhala na cholinga cha kupfunzira mbali iliyose na kuiphatisira basa mu kabulosha kakuti Chitani khama pa kulewenga na kupfunzisa mwabuya. Pfunzirani mbali iliyose ndipo mungadzawonese kuti munkuiphatisira basa mukadzapasiwa nkhani kuti mukambe. Phatisirani basa malangizo yochokera kwa mulangizi panango kwa nkulu ‘yemwe ni wakhama pa kuyankhula na kupfunzisa.’ * (1 Tim. 5:17) Ayi kumbandoganizira va kuibvesa bwino chabe nkhani, koma pa momwe mungathandizire wobvesera wanu kulimbisa chikhulupiriro chawo panango kuwathandiza kuti achite kuchinja kulikose. Mukachita vimwevi, mudzakhale wokondwa ndipo iwombo adzakhale wokondwa.
Ko ni volinga vinango viponi vomwe mungakwanirise? (Onani ndime 18) *
18. Nchani chingatithandize kukhala na volinga pa basa yathu yolalikira?
18 Tose tinautumiki womwe ni kulalikira na kupfunzisa wanthu. (Mat. 28:19, 20; Aro. 10:14) Ko imwepo muchada kuingizira buya yanu pa basa yodekana mweyi? Khalani na cholinga cha kupfunzira na kuphatisa basa vomwe mukupfunzira mukabulosha kakuti Kupfunzisa mwabuya. Mungagumane pomwe mpfundo zinango zothandiza mu Utumiki na moyo wathu wachikhrisitu—Ndandanda ya misonkhano na m’mavidiyo yogumanika pambali yakuti vomwe tinganene. Pananjira zizinji zomwe tingachite kuti timbaphate bwino basa mweyi. Pakutewedza mpfundo zimwezi, mungakhale wotsimikiza kuti mudzakhale na chimwemwe ndawa ya kukhala na buya pa basa yolalikira.—2 Tim. 4:5.
Ko ni volinga vinango viponi vomwe mungakwanirise? (Onani ndime 19) *
19. Ko tingachite tani kuti tikhale na makhalidwe yachikhrisitu?
19 Mukambaganizira volinga vanu, ayi kuyebwa va kukulisa makhalidwe yabwino yachikhrisitu. (Agal. 5:22, 23; Akol. 3:12; 2 Pet. 1:5-8) Ko mungachite tani? Linganizani kuti munkufuna kulimbisa chikhulupiriro chanu. Imwepo munkulewenga nkhani m’mabukhu yathu ndipo mwagumana mpfundo zabwino za momwe mungalimbisire chikhulupiriro chanu. Ndipo munkuphindula pakunyang’anira vidiyo pa JW Broadcasting® yomwe inkuwonesa momwe abale na alongo adakhalira wolimba pomwe chikhulupiriro chawo chidayesewa. Patsogolo pake, wonani njira zomwe mungaphatisire basa kuti mulimbisembo chikhulupiriro chanu.
20. Ko tingatani kuti tiingizire chimwemwe chathu nakuti tichepese kukwinyirira?
20 Ni vosachita kubvunza kuti tose tinashungu yochititira Yahova vose vatingakwanise. Mudziko inyowani ya Mulungu, tidzakwanise kumutumikira Yahova munjira iliyose yatinkufuna. Koma pakali pano, tikayesesa kuchita vose vatingakwanise, tidzakhale wokondwa maninge ndipo kukwinyirira kwathu kudzachepe. Ndipo chodikana maninge nchakuti tidzapereke ulemelero kwa Yahova ‘Mulungu wachimwemwe.’ (1 Tim. 1:11) Ndipomwapa naboni timbakondwe na maudindo yomwe tinayo.
NYIMBO NA. 82 “Onetsani Kuwala Kwanu”
^ ndi. 5 Tichamukonda maninge Yahova, ndipo tichada kuchita vose vatingakwanise mu basa yake. Ndipomwapa azinji ankufuna kuthimizira vomwe angachite pa basa yolalikira. Koma ko tingachite tani peno tayesesa kuchita vose vatingakwanise koma tinkukwanirisalini volinga vinango? Nchani chingatithandize kupitiriza kulalikira tiri okondwa? Midawiro yake yankugumanika mu fanizo ya Yesu ya matalente.
^ ndi. 2 Madzina yanango yachinjiwa.
^ ndi. 7 MATHANDAUZO YA MAWU YANANGO: Talente yenze kobiri yokwanira kupagali munthu yemwe waphata basa kwa magole 20.
^ ndi. 15 Abale wobatizika ankulimbikisiwa kuti ayenerere kukhala atumiki wothandiza na akulu. Kuti mudziwe viyenereso, wonani msolo 5 na 6 mu bukhu ya Gulu Lochita Chifuniro cha Mulungu.
^ ndi. 17 MATHANDAUZO YA MAWU YANANGO: Mulangizi ni nkulu yemwe achaikhiwa mwapadera kuti ambapereke malangizo kwa akulu na atumiki wothandiza peno ni vofunikira kuteno mumpingu.
^ ndi. 64 MAWU YOFOTOKOZERA FOTO: Pakufuna kukwanirisa cholinga chake chakuti ambapfunzise bwino, m’bale ankufagafaga m’mabukhu yathu.
^ ndi. 66 MAWU YOFOTOKOZERA FOTO: Pomwe mulongo wakwanirisa cholinga chake cholalikira mwamwayi, ankupereka kakhadi kwa nkazi yemwe wamugulisira chakudya.
^ ndi. 68 MAWU YOFOTOKOZERA FOTO: Ndawa yofuna maninge kuwonesa makhalidwe yachikhrisitu, mulongo ankupereka mphaso kwa mulongo munzake.
